16 წლის გოგონას ქორწინებამდე სექსის გამო სახალხოდ გაასამართლებენ

მალდივის კუნძულებზე არასრულწლოვან გოგონას სახალხოდ იმის გამო გაასამართლებენ, რომ მას სქესობრივი კავშირი ქორწინებამდე ჰქონდა. მას ამისათვის ფიზიკური სასჯელი ელის.

სკანდალური სასამართლო განაჩენი, შარიათის კანონების მიხედვით, მალდივის არქიპელაგზე, ატოლ რააზე გამოიტანეს.

ერთ-ერთმა ადგილობრივმა სამართალდამცველმა განაცხადა, რომ ბრალდებულს ჯერ რვათვიან პატიმრობას შეუფარდებენ, ხოლო როცა უკვე სრულწლოვანი გახდება, შემდეგ გაროზგავენ.

საქმის მსვლელობიდან გამომდინარე, ბრალდებულმა ივლისში 29 წლის საქმროსთან სქესობრივი კავშირი დაამყარა. როცა გოგონას ნათესავებმა ამის შესახებ გაიგეს, მათ დაუყოვნებლივ პოლიციას მიმართეს. დაკავების შემდეგ გოგონამ აღიარა, რომ ის ნამდვილად იმყოფებოდა ქორწინებამდე სქესობრივ კავშირში, რაც მუსულმანური რელიგიით სასტიკად ისჯება.

გასულ კვირას ბრალდებულის საქმროს 10 წლით თავისუფლების აღკვეთა მიუსაჯეს. თუ გავითვალისწინებთ, რომ მას 15 წლით პატიმრობა ემუქრებოდა, სასჯელი მსუბუქია.

აღსანიშნავია, რომ 2011 წლის ბოლოს გაერთიანებული ერების ორგანიზაციის უმაღლესმა კომისარმა ადამიანთა უფლებების დარგში ნავი პილეიმ მალდივის მთავრობა დაარწმუნა, რომ ქალების ფიზიკური დასჯის კანონი გაეუქმებინათ.

”ბარბაროსული და არაადამიანური დასჯის მეთოდს ადგილი არ უნდა ჰქონდეს დემოკრატიულ საზოგადოებაში”, - აღნიშნა აზიის ქალთა დაცვის ორგანიზაციის, Human Rights Watch-ის ექსპერტმა არუნა კაშიაპმა.

მალდივებზეც კი მოსახლეობის დიდი ნაწილი ქალების დასჯის ამ მეთოდს წარსულის სამარცხვინო გადმონაშთად მიიჩნევს. ”ეს სასაცილოა და თან სამარცხვინო. ჩვენს ქვეყანაში უამრავ ზრდასრულ ადამიანს აქვს სექსუალური ურთიერთობა ქორწინების გარეშე.

ისინიც უნდა გავროზგოთ? - დასვა რიტორიკული შეკითხვა ერთ-ერთ ინტერნეტ-ფორუმზე ქალმა, სახელად მარიამ. - და რატომ არ უნდა გაიროზგოს, მაგალითად, 29 წლის მამაკაცი (რომელსაც ბრალდებულთან ჰქონდა სექსი)? და რატომ უნდა გასამართლდეს სახალხოდ მხოლოდ არასრულწლოვანი გოგონა?”

დავამატებთ, რომ ადგილობრივი კანონის მიხედვით, გოგონებს 13-დან 18 წლამდე ეკრძალებათ სექსუალური ურთიერთობა. თუ სქესობრივი კონტაქტი კიდევ უფრო ადრეულ ასაკში მოხდა, ეს უკვე განიხილება, როგორც გაუპატიურება.