რით მოხიბლეს ბასა ფოცხიშვილი ქართველმა ჯარისკაცებმა

მასთან ინტერვიუს ჩაწერა საკმაოდ რთულია. ძნელია, ისეთი დრო დაამთხვიო, როცა საქმე არ აქვს, სულ გადარბენაზეა. ასეთი დრო ახლა დაუდგა, თორემ ცოტა ხნის წინ ისეთი პერიოდიც იყო, საქართველოში სამუშაო საერთოდ რომ არ ჰქონდა, ამიტომ ხშირად საზღვარგარეთ დადიოდა და ბასა ფოცხიშვილიც ქართველებმა თითქოს დაივიწყეს. ამბობდნენ, ბასა წინა ხელისუფლებას ვერ მოერგო და ამიტომ დაიკარგაო... მერე თქვეს, ბიძინა ივანიშვილისთვის სოციალური კლიპი უნდა გადაეღო, მაგრამ კონფლიქტი მოუვიდათ და ყველაფერი ჩაიშალაო.
მოკლედ, ქართველი რეჟისორის გარშემო ბევრი კითხვა დაგროვდა. ახლა მის ცხოვრებაში აქტიური ეტაპია. ახლახან დაამთავრა ''ევროვიზიის'' კლიპზე მუშაობა და ახლა ქართული ნომ-რის სცენოგრაფიაზე მუშაობს. გარდა ამისა, ქართული ჯარისთვის გადაიღო კლიპები, რომლებსაც საზოგადოება სულ მალე იხილავს. მის პირად ცხოვრებაშიც უკვე დიდი ხანია კარგი ეტაპია. უკვე რამდენიმე წელია ბასასა და რადიო ''უცნობის'' დირექტორის და ბიზნესმენის კოკო კაპანაძის სიყვარულის ამბავი გრძელდება...

- დიდი ხანია, ქართულ პრესაში არ გამოჩენილხართ, რა ხდება ბასა ფო-ცხიშვილის შემოქმედებაში?
- ბოლო პერიოდი დაკავებული ვიყავი. ''ევროვიზიის'' ქართველი მონაწილეებისთვის კლიპი გადავიღე. ძალიან მომწონს კომპოზიცია და შემსრულებლები. ''შინის'' დიდი ხნის თაყვანისმცემელი ვარ, მარიკო ებრალიძე კი ჩემთვის აღმოჩენა იყო. მან თავისი ინდივიდუალიზმითა და ეშხით მომხიბლა. ძალიან ლამაზია, ჯაზის მომღერლის გარეგნობა აქვს და არა პოპვარსკვლავის, რაც ძალიან მომწონს. კომპოზიცია მაღალმხატვრულია, კონკურსის ფორმატისგან განსხვავდება. აქ ცოცხალი ინსტრუმენტებია. ეთნოც არის, პოპიც, კლასიკაც და ძალიან საინტერესოა. იქაც წერენ, რომ ამით ''ევროვიზიის'' ფორმატი უფრო განვითარდება, რადგან ამ სიმღერამ სიახლე და გამბედაობა შეიტანა. კონიუნქტურის ნასახიც არ არის აქ და ეს იყო მიზეზი, რის გამოც ამ პროექტში მონაწილეობას დავთანხმდი. მინდა გითხრათ, რომ ძალიან დიდი სიამოვნება მივიღე კლიპის გადაღებისგან, სიმღერის ჩაწერის დროს და სცენოგრაფიის რეპეტიციებისას, რაც უკვე დავიწყეთ.
ახლახან დავამთავრე ქართული ჯარის ორი სარეკლამო რგოლის გადაღება. მართლა აღფრთოვანებული ვარ ქართული ჯარით. ეს არის დასავლური სტანდარტის და ქართული სულისკვეთების ჯარი. მოვიხიბლე ქართველი ჯარისკაცების ფიზიკური მონაცემებით, ადამიანური თვისებებით. გული გამინათდა, რომ გადავხედე, ისეთი ლამაზები იდგნენ, ისეთი ვაჟკაცები და დახვეწილები, რომ გული სითბოთი და სიამაყით ამევსო.
- როგორც ვიცი, თქვენ გააკეთეთ გადაცემა ''1 წუთი მაესტროზე''.
- კი, მაკა ასათიანის იდეა იყო ეს პროექტი. ამ გადაცემაზე ვიმუშავე. ავაწყვე პროექტი, სტილისტიკა, ქუდები გადავიღე და ახლა თინა ასათიანი აკეთებს ამ გადაცემას არაჩვეულებრივად.
- ერთი პერიოდი საერთოდ არ ჩანდით, წინა ხელისუფლების მიმართ ანტიპათიით იყავით განწყობილი, თქვენი გააქტიურება ხელისუფლების ცვლილებას ხომ არ უკავშირდება? ახლა უფრო გაგეხსნათ გზები?
- არა, იმედი მაქვს, რომ ჩემი გზები არც ერთ ხელისუფლებაზე არ არის დამოკიდებული. რაც იყო, იყო, უკვე წარსულია. მათზე მხოლოდ მაშინ ვლაპარაკობდი, როცა იყვნენ და ახლა უკვე უხერხულია მათზე საუბარი. ის პერიოდი, რაც აქ არ ვჩანდი, ხან იტალიაში ვიყავი, ხან - აზერბაიჯანში, რადგან აქ არ ვმუშაობდი.
- მართალია, რომ ბიძინა ივანიშვილის დაკვეთით სოციალური კლიპი უნდა გადაგეღოთ, გადაღებებზე არ და გემორჩილათ, თქვენ უარი თქვით კლიპის გადაღებაზე და კონფლიქტი მოგივიდათ?
- არა, მსგავსი არაფერი ყოფილა. ახლა თქვენ დიდი ხნის ამბავს მეკითხებით და არც მახსოვს. ასე, წერენ ხოლმე სისულელეებს და მე არც ვკითხულობ. ეს დიდი ხნის წინ იყო.
- ისევ საქმიანობაზე გკითხავთ. კიდევ რას უნდა ველოდოთ მომავალში ბასა ფოცხიშვილისგან?
- ვნახოთ, მერე რა იქნება. კოპენჰაგენში ''ევროვიზიაზე'' უნდა გავემგზავრო და გავაკეთო სცენოგრაფია.
- რა ხდება, თქვენი აზრით, დღეს ქართულ შოუბიზნესში, როგორი ვითარებაა?
- მიმაჩნია, რომ ამჟამად ზოგადად ქართულ კულტურაში გაჩერებული და გაყინული პერიოდია, მაგრამ იმედი მაქვს, ძალიან ახლო მომავალში ეს სფერო ამოძრავდება. ამის გამო გული ძალიან მტკივა და ძალიან ვწუხვარ. მე კულტურა საქართველოს სავიზიტო ბარათად და ყველაზე მნიშვნელოვნად მიმაჩნია და არა მარტო საქართველოსი, არამედ ყველა ქვეყნის. ქვეყანას კულტურით ვაფასებ. იმედია, ისეთი სიახლეები გაჩნდება, როგორიც ზოგადად ქართულ კულტურას შეეფერება.
- მუსიკალურ პროექტებზე რა აზრის ხართ, რაც ქართული ტელეარხებით გადის?
- ტელეარხებს საერთოდ იშვიათად ვუყურებ. ერთადერთი ''ორი ვარსკვლავის'' ყურება დავიწყე, რადგან გოგოლა ჩემი მეგობარია და მას ვგულშემატკივრობ. ძალიან ნიჭიერი და ლამაზია. ეს პროექტი ბევრ ქვეყანაში არსებობს და რა თქმა უნდა, ძალიან საინტერესოა, ვფიქრობ, საქართველოშიც თანდათან იხვეწება და, უფრო კარგი ხდება, რადგან ამის პოტენციალი ქართველებს გვაქვს. ძალიან არტისტული და მუსიკალური ერი ვართ. ჯერ პროექტი ახალი დაწყებულია...
- რა ხდება თქვენს პირად ცხოვრებაში, როგორც ვიცი, გყავდათ პარტნიორი, გრძელდება სიყვარულის ამბავი კოკო კაპანაძესთან, თუ რამე სიახლეა?
- არა, ისევ ერთად ვარ. არასდროს მესმის, პირადზე ჟურნალ-გაზეთების მეშვეობით რატომ უნდა ვილაპარაკო. კარგად ვარ. ყველა ჯანმრთელად და კარგადაა.
- ადრე ამბობდით, ცოტა დრო უნდა გავიდეს ურთიერთობაში, რომ მასზე ილაპარაკოო და არ გავიდა ეს დრო?
- ეს ურთიერთობა ჯერ არ გაცივებულა, რომ ასე ვილაპარაკო. თუ გაცივდება ოდესმე, მერე აუცილებლად ვილაპარაკებ.
- უნდა გაცივდეს აუცილებლად?
- არა, იცით, როდესაც გრძნობაზეა ლაპარაკი, ისეთი დიდია და ამაღლებული, ალბათ, რომ ილაპარაკო, ლიტერატორი, მწერალი ან პოეტი უნდა იყო და მე მხოლოდ რეჟისორი ვარ, ამიტომ ისე ვერ აღვწერ, როგორც არის. ვიზუალურად შემიძლია და სიტყვებით არა. საქართველოში იმდენი მეგობარი გყავს, იმდენი ახლობელი, ოჯახის წევრები, რომ რაღაცის თქმა თუ გინდა, შეგიძლია, იმათ უთხრა, ამიტომ არის, რომ ფსიქოანალიტიკოსი ჩვენთან პოპულარული არ არის. არ მიმაჩნია სწორად, მკითხველი ჩემი პირადი საკითხებით შევაწუხო.
- დაოჯახებას ხომ არ გეგმავთ?
- ესეც ძალიან პირადი შეკითხვაა და ამაზეც, თუ შეიძლება, არ გიპასუხებთ.

ეკა ჩიკვაიძე
ჟურნალი ''რეიტინგი''