რეპორტაჟი "ცეკვავენ ვარსკვლავების" პირველი რეპეტიციიდან - რა ხდება კულისებში

დღეს თბილისის ცირკში სტარტს მეგაშოუ "ცეკვავენ ვარსკვლავები" აიღებს. პროექტს სულ 10 მონაწილე ჰყავს. ისინი დიდი მონდომებით არიან ჩართულები შოუს მომზადების პროცესში, რაც ცოტა ხნის წინ ცირკში მისულებმა საკუთარი თვალით ვნახეთ, როცა პირველ გენერალურ რეპეტიციას დავესწარით. ორი კვირაა, კონკურსანტები რეპეტიციებს გადიან და როგორც იტყვიან, ცეკვის ანბანს ეუფლებიან. თითოეული მათგანი აღნიშნავს, რომ იმდენს ვარჯიშობს, რომ სხეულის ყველა ნაწილი სტკივა; რომ ძალიან უნდათ კონკურსზე კარგად გამოსვლა; ამასთან, ფსონს თოთოეული მათგანი გამარჯვებაზეც აკეთებს.

თიკა ჯამბურია:
- ძალიან მალე მოგვიხდა მობილიზება და მთელი დღეებია, ვმეცადინეობთ. შემართებით ვარ, დღეს "სამბა" უნდა ვიცეკვო. მყავს არაჩვეულებრივი მეწყვილე, რატი გაჩეჩილაძე, რომელსაც დღეს ახლოს გაიცნობს მაყურებელი. მასზე ამბობენ, თუ რატი იცეკვებს, ის წყვილი მოიგებსო. ასე რომ, უნდა გავიმარჯვოთ და ამიტომ, ვცდილობ, ყველაფერი მაქსიმალურად გავაკეთო. ცხოვრებაში პირველად მიწევს ასე პროფესიონალურ დონეზე ცეკვა და მინდა, რომ ეს ყველაფერი წარმატებული იყოს.

- შოუზე რას იტყვი?
- ვფიქრობ, ძალიან საინტერესო შოუ იქნება. განსხვავებული და საინტერესო კონკურსანტები არიან.

- შემოთავაზება რომ მიიღე, მაშინვე დათანხმდი?
- არა, რადგან ცოტა დრო მქონდა მოსაფიქრებლად. კიდევ დიდხანს რომ შევყოვნებულიყავი, უარს ვიტყოდი. მოკლედ, გავრისკე...

- და რას მიხვდი ამ მცირე მონაკვეთში?
- რომ ცეკვა ძალიან რთული რამ ყოფილა, საოცრად ვიღლები; ამავე დროს, საპასუხისმგებლოც არის, რადგანაც ამ შოუს ბევრი ადამიანი უყურებს. ჟიურიში კომპეტენტური ადამიანი ზის, ცეკვის ექსპერტი, გოჩა ჩერტკოევი, ამიტომ მაქსიმალურად ყველაფერი ზუსტად უნდა გავაკეთოთ, რომ მისი შენიშვნები არ დავიმსახუროთ.

- შვილი რას გეუბნება?
- რეპეტიციებზე დამყავს და რატი მოსწონს. ამბობს, ასეთი ბიჭი მინდა, რომ შემიყვარდესო.

- რამდენი წლის არის?
- მაისში სამის ხდება.

- რაღაც კარგად გაქვს აკრეფილი და მგონი, გამარჯვებასაც უმიზნებ.
- მივხვდი, რომ რაღაცები ამ მიმართულებით გამომდის და რატომაც არა, დიდხანს მინდა, რომ ამ პროექტში ვიყო.

გიორგი ნაზღაიძე:
- ჩემი ამ პროექტში ჩართვა ახალი, საინტერესო გამოწვევაა, - ნაზღაიძე ცეკვავს, უკვე კარგია, არა? თან, საზოგადოება დაინახავს არა სკანდალურ ნაზღაიძეს, არამედ სულ სხვანაირ გიორგის, ანუ როგორ ვცეკვავ და რეალურად როგორი ადამიანი ვარ. ეს შოუ ხომ წარმოაჩენს პიროვნებას ისეთად, როგორიც არის. ახლა მეძლევა შანსი, საკუთარი თავი წარმოვაჩინო.

- რას აპირებ?
- პირველ რიგში მინდა, რომ მაგრად ვიცეკვო. თავს არ დავზოგავ. ყველას და განსაკუთრებით ჩემს მეგობრებს თავი უნდა მოვაწონო და ჩემი ნამუშევრით სიამოვნება მივანიჭო. მაგრამ მთავარი და აუცილებელი ფაქტორი მაინც ის არის, რომ კარგად ვიცეკვო.

- და მოიგო კიდეც, ხომ?
- მოდი, აქ კითხვის ნიშანი დავსვათ... მაგრამ პროექტში თუ სამი თვე დავრჩი, მერე ალბათ ამის სურვილიც გაჩნდება. ისე, მთავარია, რომ ჩემგან სიახლეებს ელოდებიან. მგონი, მართლაც საინტერესო ვიქნები. დღეს "ვენურ ვალსს" ვცეკვავ, ოღონდ, ცოტა თანამედროვე ილეთებით. საზოგადოებას რომ უფრო მეტი ემოცია მივანიჭო. ჩემი პარტნიორია ნასტია, მშვენიერი უკრაინელი გოგონა. უსაყვარლესი და თბილი, მიძლებს.

- ე.ი. მორჩილი მოწაფე ხარ?
- ეს ჩემი სფერო არ არის და აბა, რა ვქნა? ოღონდ, ვარჯიშისგან ყველაფერი მტკივა. გუშინ მეორე ცეკვის რეპეტიციებზე გადავედით, ანუ უკვე თეძოების ამოგდებას ვიწყებ (სიცილით ამბობს).

ლალი ფაცია, ambebi.ge