ლელა წურწუმია: "ეკრანი მასუქებს, არადა ძალიან გამხდარი ვარ"

მომღერალ ლელა წურწუმიას როცა პროექტ "ორი ვარსკვლავის" ორგანიზატორებმა წამყვანობა შესთავაზეს, ჯერ კარგად დაფიქრდა, სანამ დათანხმდებოდა. ის ამ შოუში თავისი პირობებით მივიდა და შედეგით კმაყოფილია. სცენაზე წამყვანი პირველად არის და ძალიან მოსწონს, რომ სიმღერის ნაცვლად ლაპარაკი უწევს. ორშაბათიდან ორშაბათამდე ამ პროექტით ცხოვრობს – კოსტიუმები, მაკიაჟი, ტექსტი... როგორც ყოველთვის, ახლაც გვერდით უდგას ქმარი, კახა მამულაშვილი, იგივე მამულიჩა. მისი აზრი ლელასთვის ყოველთვის მნიშვნელოვანია, თუმცა საკუთარ თავს კრიტიკას არც თვითონ აკლებს.
– ქალბატონო ლელა, სცენაზე დგახართ, მაგრამ სიმღერის ნაცვლად შოუ მიგყავთ. როგორ გრძნობთ თავს ამ ამპლუაში?
– ძალიან კარგად ვგრძნობ თავს. რთული სამუშაო არ არის. კონცერტზე მშვენიერ ხასიათზე მივდივარ, ჩემს საქმეს ვაკეთებ და მოვდივარ.
– როცა შოუს წამყვანობა შემოგთავაზეს, დასათანხმებლად მოლაპარაკება გახდა საჭირო?
– შემოთავაზება ამ პროექტის პროდიუსერის, ნოე სულაბერიძისგან მივიღე და, რა თქმა უნდა, რაღაც პირობებზე შევთანხმდით. პირდაპირ თანხმობა არ მიმიცია, მოვილაპარაკეთ და შემდეგ დავთანხმდი. პირდაპირ ეთერში პირველად არ ვმუშაობ, ტელეკომპანია "იმედზე" რამდენიმე პროექტი წამიყვანია, ასევე ვიყავი გადაცემა "ხანუმას" წამყვანი. ასეთი შოუ კი არასდროს წამიყვანია და, მართალი გითხრათ, ძალიან მაინტერესებდა. ეს საქმე საპასუხისმგებლო და ამავე დროს საინტერესოა.
გამიმართლა იმაში, რომ არაჩვეულებრივი თანაწამყვანები მყავს – დუტა და ანუკა ქორქია. ჩვენს რეალობაში დუტა ერთ–ერთი საუკეთესო შოუმენია და ვფიქრობ, რომ ერთმანეთს კარგად შევესისხლხორცეთ. დუტა თავის საქმეს აკეთებს, მე – ჩემსას. მე ვარ ლელა წურწუმია, ის არის დუტა სხირტლაძე. რასაც ის აკეთებს, იმას არც გავაკეთებ და ვერც გავაკეთებ, რადგან მაშინ მე არ ვიქნები მე. იქ მიწვეული ვარ, როგორც ლელა წურწუმია და არა – როგორც კონკრეტულად ამ შოუს წამყვანი.
– როგორც ვიცი, თქვენი და დუტას ურთიერთობა სტუდენტობის დროს დაიწყო. ალბათ ესეც გიადვილებთ სცენაზე წყვილში მუშაობას.
– დიახ, ასეა. მე და დუტა ჯგუფელები ვიყავით. მასთან ყოველთვის მქონდა კომუნიკაცია, ჩვენ დღემდე ახლობლები ვართ. კარგი ჯგუფი გვყავდა, ხშირად ვხვდებოდით საზოგადოებრივი თავშეყრის ადგილებში და ეს ურთიერთობა არასდროს შეგვიწყვეტია. დუტა პირად ურთიერთობებშიც და სცენაზეც ძალიან კომფორტულია.
– როგორ იწყებთ შოუსთვის მზადებას, რა ხდება ორშაბათ დღეს?
– ეს პროცესი ძალიან საინტერესოა. კოსტიუმი, მაკიაჟი, ტექსტი – ამ ყველაფრის მზადებაში ვარ. ძირითად ტექსტებს ვსწავლობ, მაგრამ პირდაპირი ეთერის დროს კონკურსანტებთან და წამყვანებთან ურთიერთობა, მათთან საუბარი სრული იმპროვიზაციაა.
– ალბათ თეატრალური განათლება და მერე სცენაზე დგომის მრავალწლიანი სტაჟიც გეხმარებათ იმაში, რომ ამდენ კამერას "გაუმკლავდეთ" და არ დაიბნეთ.
– სცენაზე და კამერასთან მუშაობა ჩემთვის პრობლემა არ არის. სიმღერის დროს ოცი კამერა რომ იყოს, ოცივე კამერას ვხედავ და შემიძლია მუშაობა. ამ შემთხვევაში ძალიან მომწონს, რომ ვლაპარაკობ და არ ვმღერი.
– როგორც გამოცდილ მომღერალს, რა შენიშვნები გაქვთ კონკურსანტებთან?
– არანაირი შენიშვნა არ მაქვს, პირიქით, მინდა, ეს ადამიანები გავამხნევო, რადგან მათი მისამართით ძალიან დიდი აგრესია წამოვიდა. მე არ მაქვს "ფეისბუქის" საკუთარი გვერდი, მაგრამ გავიგე, რომ მათ ლანძღავდნენ. სამწუხაროდ, ჩვენთან არ არსებობს კრიტიკა, აქ პირდაპირ ყველას ლანძღავენ, რადგან, როგორც წესი, ლანძღვა უფრო ადვილია, ვიდრე კრიტიკა. ძალიან რთულია სიმღერა და ვფიქრობ, ამის შემდეგ უფრო მეტად დააფასებენ ჩვენი პროფესიის ადამიანებს. ყველა კონკურსანტი თავის საქმეში წარმატებულია. ბუნებრივია, მათთვისაც დიდი რისკი იყო ამ შოუში მონაწილეობა. სცენაზე გამოსვლა დიდი ადრენალინი, დიდი პასუხისმგებლობაა. კონკურსანტები ზრდასრული ადამიანები არიან და ზუსტად იციან, რაში გაყვეს თავი.
– კონკურსანტების გაგება ნამდვილად არ გაგიჭირდებათ, თქვენც ხომ ასევე გარისკეთ, როცა პროექტში "ცეკვავენ ვარსკვლავები" მიიღეთ მონაწილეობა.
– კი, ასე იყო. პროფესიით მოცეკვავე არ ვარ, მაგრამ ვიცეკვე. ვფიქრობ, რომ ცუდად არ მიცეკვია, მიუხედავად ამისა, იყო აგრესიაც და ლანძღვაც, მაგრამ პოზიტური განწყობა და შეფასებებიც იყო. პრინციპში, ასეთი შოუების მონაწილეები ყოველთვის ხდებიან განსჯის თემა.
პროექტის მონაწილეების მიმართ დადებითი განწყობა მაქვს და არ მინდა, როგორც მომღერალმა, კრიტიკულად შევხედო და შევაფასო. ჟიურის წევრი რომ ვყოფილიყავი, პროფესიულ შენიშვნებს მივცემდი, მაგრამ ამ შემთხვევაში მათ ინტერესებს ვიცავ.
კონკურსანტები ყოველ ტურზე ძალიან ნერვიულობენ, მაგრამ ამავე დროს ძალიან ბედნიერები არიან, რადგან მათ მოსწონთ სიტუაცია, გარემო. იმასაც მიხვდნენ, მომღერლობა რა რთული, შრომატევადი საქმე ყოფილა.
– თვითონ შოუს ხარისხი, ტექნიკური მხარე როგორ მოგწონთ?
– შოუში ტექნიკური პრობლემები ხშირია, ძირითადი პრეტენზია იმასთან დაკავშირებით არის, რომ მონაწილეს თავისი ხმა არ ესმის. ამ შოუს ძალიან კარგი გუნდი აკეთებს, მაგრამ საერთოდ რთულია პირდაპირ ეთერში მუშაობა.
– კონკურსანტებიდან ფავორიტები თუ გყავთ და ვინ არიან ისინი?
– რა თქმა უნდა, მყავს. ამ ადამიანებთან მთელი ცხოვრების განმავლობაში მაქვს გარკვეული ურთიერთობა, თითოეულ მათგანს ვგულშემატკივრობ და, თუ რამე რჩევა სჭირდებათ, ვეუბნები, ვამხნევებ. მე, როგორც პროფესიონალმა მომღერალმა, ვიცი, რომელი მღერის კარგად და რომელი – ვერა.
ვინ ვერ მღერის კარგად, ამას ნამდვილად არ გეტყვით, მაგრამ გეტყვით, ვინ მღერის კარგად – მიშა ბაღათურია, ლევან ჯავახიშვილი, მიშა ხუჯაძე. საოცარი შარმი აქვს მორაგბე გივი ბერიშვილს. ძალიან საყვარელია ვახო რჩეულიშვილი, საოცარი პიროვნებაა ჩემი გოგოლა (კალანდაძე), ასევე – ულამაზესი ირინა ონაშვილი და სალომე ღვინიაშვილი, დალი ჩიტალაძე, ვისთანაც არაჩვეულებრივი ურთიერთობა მაქვს... ბოდიშს ვიხდი, მაგრამ მე ვერ ვიქნები ობიექტური და პირდაპირ ვამბობ, სუბიექტური ვარ, რადგან მათთან დიდი ხნის ურთიერთობა მაკავშირებს. მე ამ შოუს წამყვანი ვარ და ამიტომ მათ გაკრიტიკებას მე ნუ მომთხოვთ.
– შოუს ორგანიზატორებმა რამე შეზღუდვა ან მოთხოვნები თუ წამოგიყენეს, რაც ხელშეკრულებაშიც არის ჩაწერილი?
– არანაირი შეზღუდვა არ მაქვს. სამი თვის განმავლობაში ჩემი საქმე უნდა შევასრულო.
– ალბათ ფსიქოლოგიურად იმისთვისაც მზად ხართ, რომ სამი თვის განმავლობაში მაყურებელი გამადიდებელი შუშით დაგაკვირდებათ და ეს სოციალურ ქსელებშიც აისახება. თავად თქვენ რამდენად აქტიურობთ თუნდაც საქართველოში ასე პოპულარულ "ფეისბუქში"?
– ტყუილი იქნება, რომ გითხრათ, საზოგადოებას ჩემთან დაკავშირებული ინფორმაციებით ვანებივრებ–მეთქი. როგორც გითხარით, "ფეისბუქზეც" არ ვარ დარეგისტრირებული. მამულიჩას კი აქვს საკუთარი გვერდი, მაგრამ ჩემთან დაკავშირებით ისიც ყოველთვის მწირი ინფორმაციებით შემოიფარგლება. კატეგორიულად მყავს გაფრთხილებული, რომ ინფორმაციების გაცემისგან თავი შეიკავოს. მე არ მაინტერესებს სხვისი ცხოვრება და შესაბამისად, ვცდილობ, ჩემი ცხოვრებითაც დიდად არ დაინტერესდნენ. ადამიანებთან ურთიერთობისას გარკვეული ზღვარის დაცვა მიყვარს.
– თქვენი კანდიდატურაც ხომ არ განიხილებოდა ჟიურის წევრად და რა აზრის ხართ ჟიურის შეფასებებზე?
– არ ვიცი, განიხილებოდა თუ არა ჩემი კანდიდატურა, რადგან ამაზე არასოდეს გვისაუბრია. ამ შოუს პროფესიონალი ჟიური ჰყავს. თეონა კონტრიძე, ია ნინიძე და ზურა ყიფშიძე ვერ იქნებიან სუბიექტურები. ისინი როგორც აღიქვამენ და როგორც შეიგრძნობენ, ისე აფასებენ მონაწილეებს. ამ შემთხვევაში ყველაზე კრიტიკული თეონა კონტრიძეა. ის პროფესიით მომღერალია და მისი შეფასებები ყოველთვის გამოირჩევა სიმძაფრით.
ძალიან საინტერესო იყო, როცა ტელეწამყვანი ინგა გრიგოლია დაემატა ჟიურის სპეციალურ წევრად. ამის გამო ჟიურიში დიდი აჟიოტაჟი ატყდა და სანახაობრივად უფრო საინტერესო გამოვიდა. ისიც ნათელია, რომ მარტო ჟიური არაფერს წყვეტს, მთავარი ესემეს–ებია. პროექტიდან "ცეკვავენ ვარსკვლავები" იულია ქავთარაძის და ოთო ფოლადაშვილის წყვილი რომ გავარდა, 11 000 გაგიჟებული ადამიანის კომენტარი მივიღეთ, რას ჰქვია, გააგდეთო. იმ 11 000 კაცს რომ თითო ესემესი გაეგზავნა, ისინი შოუს არ დატოვებდნენ.
– იგრძნობა, რომ სასცენო სამოსზე დიდ აქცენტს აკეთებთ, ერთიმეორეზე ლამაზი კაბები გაცვიათ. შთამბეჭდავი იყო თეთრი მარგალიტების მასიური მძივი შავ კაბაზე, შანელის სტილში. ვინ გირჩევთ სასცენო კოსტიუმებს?
– ის მარგალიტის მძივი ჩემი გაკეთებულია. პირველსა და მეორე ტურში ზენკასა და მარის შეკერილი კაბები მეცვა. ეს დიზაინერები ამ პროექტისთვის მუშაობენ. 9 წელიწადია დიზაინერ ნინო ხიჯაკაძესთან ვიკერავ, მესამე ტურშიც ჩემი კაბების კოლექციიდან მეცვა და ამ ეტაპზე ჩემი პირადი კოლექციიდან გამოვიყენებ კოსტიუმებს.
– სცენაზე ერთი და იმავე კაბით არასოდეს გამოდიხართ. ადვილი არ იქნება ახალ–ახალი კოსტიუმის შექმნა.
– ყოველთვის ახალ კოსტიუმს ვიცვამ და არასდროს ვიმეორებ. შეიძლება ერთი და იგივე სიმღერა ბევრჯერ ვიმღერო სხვადასხვა კონცერტზე, მაგრამ სცენაზე ერთი და იმავე კაბას არასდროს ჩავიცვამ. ეს არის ჩემი წარმატების ნაწილი. ყველა ჩემი სასცენო კოსტიუმი განსაკუთრებულ პატივში მყავს – მოვლილი და კარგად შენახული. ყველა კაბა ჩემი ენერგეტიკის მატარებელია, ყველა ძვირფასი ქსოვილებისგან არის შექმნილი.
– კაბებით დიდი აქცენტი გაქვთ გაკეთებული სხეულზე. რა მეთოდებით უვლით თავს, რომ მუდამ ფორმაში იყოთ?
– ძალიან გამხდარი ვარ, მაგრამ ეკრანზე ეს არ ჩანს. რეალურ ცხოვრებაში ვინც მიყურებს, გაოგნებულები არიან. ჯანსაღი ცხოვრების წესს ვიცავ, ვვარჯიშობ, ფიტნესს მივდევ. ერთი პერიოდი შევეშვი ამ ყველაფერს და ახლა ისევ დავიწყე. როცა ვარჯიში შევწყვიტე, ეს ჩემს სხეულზეც აისახა, თან წლებიც მემატება და...
25 წლის გოგო აღარ ვარ, უფრო მეტის გახლავართ და მინდა, ფორმა შევინარჩუნო. სცენაზე ვდგავარ და ყოველთვის კარგად უნდა გამოვიყურებოდე. ეს, პირველ რიგში, ჩემი განწყობისთვის, ჩემი ხასიათისთვისაა მნიშვნელოვანი. პლაზმური ტელევიზორები ძალიან ასუქებს, ადამიანს ფორმას აკარგვინებს. არ შეიძლება ორშაბათს მსუქანი ვიყო და სამშაბათს გამხდარი აღმოვჩნდე. ადამიანები რომ მიყურებენ, მათ გაოგნებას სახეზე ვკითხულობ ხოლმე. კამერები და პლაზმური ტელევიზორები ასუქებს.
– ამ შოუში როგორი შეფასებები მიიღეთ ქმრისგან, შვილისგან?
– ჩემთვის მნიშვნელოვან ადამიანებს ყოველთვის ვეკითხები აზრს. გარდა ამისა, შინ რომ ვბრუნდები, პროექტს ვრთავ და თავიდან ბოლომდე ვუყურებ. ვაკვირდები ჩემი სახის მიმიკას, ღიმილს, მეტყველებას, ხელის მოძრაობას, მიბრუნება–მობრუნებას, იმას, თუ რა როგორ ტონალობაში ვთქვი, რამდენად სწორი მესიჯი გავაჟღერე.
საკმაოდ თვითკრიტიკული ვარ. საკუთარ თავზე სულ ვმუშაობ, რაღაცეები მომწონს, რაღაცეები – არა და არც შეიძლება ყველაფერი მომწონდეს. ამ ყველაფრის მიმართ ჩემი ოჯახის წევრების განწყობაც ძალიან პოზიტიურია. მამულიჩასთვის მთავარია, სცენაზე ვიდგე და რას გავაკეთებ, მნიშვნელობა არ აქვს.
– კვირიდან კვირამდე ამ პროექტით ცხოვრობთ, ხომ არ ჩამოშორდით თქვენს მთავარ საქმეს – სიმღერას?
– ასე ვერ ვიტყოდი. თებერვალში ამერიკაში ვიყავი, ჩიკაგოსა და ნიუ იორკში კონცერტები მქონდა. 7 აპრილს ისრაელში მივდივარ, ერთ ტურზე არ ვიქნები. ეს კონცერტი ორი თვით ადრე მქონდა დაგეგმილი, მათთან კონტრაქტი მაქვს დადებული და ვერაფერს შევცვლი. ამერიკაში მქონდა ძალიან წარმატებული საქველმოქმედო სოლო კონცერტი. ბევრი მაყურებელი მოვიდა, კონცერტს სოციალურ ქსელში კარგი გამოხმაურება ჰქონდა.
ლანა კიკნაძე, ჟურნალი სარკე