• ვანო ჯავახიშვილი: "ადრე ერთმანეთთან შიშველი გავლა გვერიდებოდა"

    იუმორისტებმა ვანო ჯავახიშვილმა და თამუნა ლეკვეიშვილმა ერთმანეთის არსებობის შესახებ ჯერ კიდევ გასული საუკუნის ბნელი 90–იანებიდან იცოდნენ, როცა თამუნა ვანოს "კავეენ"–ში გულშემატკივრობდა დარბაზიდან, ვანო კი მის იუმორისტულ სიმღერებს რადიო "105"–ში უსმენდა. შეიძლება ითქვას, "დაუსწრებლად" ერთმანეთის ფანები იყვნენ. მერე კი ერთ ტელეკომპანიაში აღმოჩნდნენ და ახლა თამუნა, როგორც ვანო თავად ამბობს, მისი შოუს ხერხემალია.
    თამუნა: "კავეენზე" სულ დავდიოდი და ვანოს გუნდი "პარადოქსი" რომ გამოდიოდა სცენაზე, ხმამაღლა ვყვიროდი. მაგარი გუნდი იყო.
    ვანო: თამუნა გულშემატკივართა რიგებში არ მყავდა შემჩნეული, მაგრამ მის შესახებ ვიცოდი, რადგან რადიო "105"–ში ყველა იუმორისტულ სიმღერას ის ასრულებდა. უშუქობის პერიოდში მისი სიმღერები პოპულარული იყო, შეიძლება ითქვას, მისი ფანიც ვიყავი. 2002 წლიდან ტელეკომპანია "რუსთავი 2"–ში ვარ. მაშინ მე, ნიკა გრიგოლია და გია ჭანტურია მულტფილმ "ჩვენი ეზოს" სცენარისტები ვიყავით.
    – თქვენი პირველი ერთობლივი სკეტჩი გახსოვთ?
    ვანო: როგორ არა?! "შაბათის შოუს" პირველივე სკეტჩში მე და თამუნამ ვითამაშეთ. რესტორნის სიტუაცია იყო, რომელსაც დიდი გამოხმაურება მოჰყვა.
    თამუნა: მაშინ გამხდრები, წიწკვები ვიყავით.
    ვანო: ოღონდ ახლა მკითხველმა ის არ იფიქროს, რომ ხელფასმა გაგვასუქა. ჩვენ მაგიდასთან ჯდომისგან გავსუქდით.
    ვანო: ადრე ერთმანეთთან შიშველი გავლა გვერიდებოდა, ახლა კი ჩვენთან ისეთი რაღაცეები ხდება, სიცილით მოკვდებით. ალბათ ხალხი იკითხავს: "ნეტა, რა ხდება რეპეტიციების დროს?"
    – მართლაც რა ხდება რეპეტიციებზე?
    ვანო: ბევრი სასაცილო რამ. მაგალითად, შეიძლება ერთ–ერთი მსახიობი ბიჭი რეპეტიციაზე შიშველი შემოვიდეს და ამაზე ისე ავხარხარდეთ, რომ არ შეგვრცხვეს.
    თამუნა: როგორ არ შეგვრცხვენია?! გოგონები თვალებზე ხელს ვიფარებთ ხოლმე.
    ვანო: როცა ხუმრობებს ვახარისხებთ, დაბალი ხარისხის ხუმრობებზე ცინიკური აპლოდისმენტებით ინგრევა ხოლმე ოთახი. თუ ვინმე ძალიან უხარისხო კალამბურს იტყვის, ანუ ორაზროვან სიტყვას, ამას ჩინურ "შუტკას" ვეძახით და ბევრს ვიცინით.
    – ჩინური "შუტკებით" ვინ გამოირჩევა?
    თამუნა: ასეთ უხარისხო ხუმრობებს ვინ წერს, ვერ გაგიმხელთ. მუშაობის პროცესში შეიძლება რაღაცაზე მაგრად გაგვეცინოს და ვიღაც ისე გადაბჟირდეს, ცუდად გახდეს.
    სკეტჩის დროს დაგვილევია კიდეც. ერთხელ მარტინი დავლიეთ და ისე დავთვერით, მთვრალ გოგოებს ბუნებრივად ვთამაშობდით. მგონი, ეს ალეკო მალხაზიშვილმა არ იცის და "სარკიდან" გაიგებს.
    – თამუნა, ალეკო და ვანო მკაცრი ხელმძღვანელები არიან?
    ვანო: მე გიპასუხებთ, რომ სიმკაცრე და თვალების ბრიალი ჩვენთან არ ხდება. ჩვენი სამსახური იმით გამოირჩევა, რომ ერთმანეთს არ ვჭამთ. ჩემი გადაცემის სცენარის წერის დროს დიქტატორი შეიძლება არ ვარ, მაგრამ ზედმეტად მომთხოვნი და მკაცრი ნამდვილად გახლავართ. არავის ვაძლევ უფლებას, საქმეს ზედაპირულად მიუდგეს. როცა მკაცრი ვარ, აუტანელი ვხდები.
    თამუნა: არ ხარ აუტანელი, უბრალოდ მუშაობისას მომთხოვნი და სერიოზული ხდები. ვანო ყველაფერს ჩხუბის გარეშე აგვარებს. სამსახურში ვიღაცეებთან მიკამათია, მაგრამ მე და ვანოს – არასოდეს.
    ვანო: სამი გოგო გვყავს და მაქსიმალურად ვცდილობთ, თავი კარგად იგრძნონ.
    – როგორ პირობებს უქმნით ქალებს?
    ვანო: თამუნა სამი შვილის დედაა და სამსახურში დილის 10 საათზე ვერ მოდის. მისი შვილების აღზრდაში მთლიანი გუნდია ჩართული, ყველანაირად ხელს ვუწყობთ. "კომედი არხს" თუ უყურებთ, თამუნა ყველა ძველ სკეტჩში ორსულადაა. ამ პერიოდში სულ ვცდილობდით, რომ გვერდით დავდგომოდით. ახლა კი თათია სულუაშვილი გვყავს ორსულად, შემოდგომაზე მეორე შვილი ეყოლება და მის მდგომარეობასაც ვითვალისწინებთ. დილით მოსვლა მასაც უჭირს, თან ის პერიოდი აქვს, ადამიანები რომ ეზიზღებათ ხოლმე.
    – ვანო, ორსული თანამშრომლების მოთხოვნებს თუ ასრულებთ ხოლმე?
    თამუნა: ჩვენ ასეთი პრეტენზიულები არ ვართ!
    ვანო: ასეთი "კაპრიზები" ქმარმა უნდა შეგისრულოთ! ჩემს ცოლს ბევრჯერ ისეთი რაღაც მოუთხოვია, თბილისი გადამიქოთებია. ახლა კონკრეტულად არ მახსოვს, რა იყო.
    – რამდენად კარგად უგებთ ერთმანეთს მუშაობის პროცესში?
    ვანო: ძალიან იშვიათი შემთხვევაა, როცა გოგოს კარგი ხუმრობის წერა შეუძლია. მუსიკალური მიმართულებით რომ განვიხილოთ, თამუნა ჩვენი გუნდის ერთ–ერთი ხერხემალია, მას ძალიან მნიშვნელოვანი ფუნქცია აკისრია. ის რომ არა, ჩვენი მუსიკალური ნომრები ყოვლად უსმენო და უხარისხო იქნებოდა.
    – თამუნა, თავიდან შოუში მხოლოდ თქვენ იყავით გოგო. მამაკაცების გარემოში მუშაობის დაწყება არ გაგიჭირდათ?
    თამუნა: არანაირად. ბავშვობაში ახტაჯანა გოგო ვიყავი. მთელი დღე ველად ვიყავი გაჭრილი, ადრენალინი არ მაკლდა. მახსოვს, ერთხელ ჩემს ძმას წყალში ვახრჩობდი. მზეზე კასრით წყალი თბებოდა. ჩემი ძმა, ლევანი, დავიჭირე, თავი ჩავაყოფინე და რომ გალურჯდა, მიხაროდა. ბებიამ გადაარჩინა, ძლივს ამოისუნთქა. ბიჭებთან მეგობრობაც ყოველთვის კარგად გამომდიოდა, მაგრამ თავიდან აქ ცოტა კომპლექსები მქონდა, მერე დავმეგობრდით და კომპლექსებიც მომეხსნა.
    – როცა ვანო მშობლიურ ზესტაფონზე ბევრს გეხუმრებოდათ, არ გწყინდათ?
    თამუნა: ეს ხუმრობა აღარ არის აქტუალური. უკვე გაიგო ხალხმა, რომ ზესტაფონიდან ვარ.
    ვანო: თამუნა თბილისის შვილი გახდა.
    თამუნა: მე მაინც ზესტაფონელად დავრჩები.
    – ეკრანის მიღმაც ბევრს ხუმრობთ ერთმანეთზე?
    ვანო: კობა ბარათელი თავის ჭკუაში მეხუმრება, მაგრამ ვერ მჯობნის. მცხეთიდან რომ ვარ წარმოშობით, პროვინციელს მეძახის. თვითონ ვერ გაუგია, საიდან არის, ყველა კუთხის შვილია. ვეხუმრები, ეროვნება არ გაქვს–მეთქი. ზესტაფონის სოფელ სვირიდან არის, სკოლა აფხაზეთში აქვს დამთავრებული, ქუთაისელი ცოლი მოიყვანა, იქ დასახლდა და ამჟამად თბილისში უსინდისოდ ცხოვრობს. თამუნასთან ბოროტი ხუმრობებით კი მიშა ანდღულაძე გამოირჩევა, ქალურად ეხუმრება.
    თამუნა: უცებ გამლანძღავს ხოლმე, ძირითადად წონასთან დაკავშირებით. ქალი პერსონაჟების ხმით მელაპარაკება და ამიტომაც არ მწყინს, თორემ ჩემი მიშა ამას არ მეტყვის.
    – ჯგუფიდან ყველაზე კომფორტული ვინ არის მუშაობის დროს?
    ვანო: ვასო ფხაკაძე რომ დაგისახელოთ, დიდი ტყუილი იქნება. ზედმეტად პასუხისმგებლობის მქონე ადამიანია. თუ რამე აქვს გასაკეთებელი, შეუძლია მთელი სამსახური ჩართოს იმ საქმეში. მაგალითად, აძებნინოს ბუმბული, რომელსაც ოქროს დაბოლოებები აქვს. პასუხისმგებლობა ხანდახან ხალხის შეწუხებაში გადასდის.
    – ხასიათი ცოლის მოყვანამაც არ შეუცვალა?
    ვანო: ვასოს უფრო ბედნიერი კაცის გამოხედვა აქვს, ვიდრე ჰქონდა. ბოლო დროს არავისთან უკამათია, ალბათ ცოლი მოუხდა.
    – იცნობდით მის საცოლეს?

    ვანო: როცა ცოლად მოიყვანა, მაშინ გაგვაცნო. ვასო რომ დაქორწინდებოდა, ამის იმედი გადაწურული გვქონდა. ახლა ზაქრო ინწკირველი დაგვრჩა დასაქორწინებელი.
    სოფიო ბოჭორიძე, ჟურნალი სარკე
    3 038 ნახვა
    GOGATV

    abezara