სექსი და ბავშვები - რომელ ასაკში უნდა ავუხსნათ "ყველაფერი"

რამდენიმე ათეული წლის წინ მოზრდილ ბავშვებსაც გულწრფელად ეგონათ, რომ მშობლებმა კომბოსტოში იპოვეს, მაღაზიაში იყიდეს ან წერომ მოიყვანა სახლში. დღეს კი მასმედიისა და ხელმისაწვდომი ინტერნეტის წყალობით, ამ კუთხით ბავშვთა "განათლება" აშკარად წინ წავიდა. დროთა განმავლობაში სქესობრივი აღზრდის საკითხიც დადგა დღის წესრიგში.
ჯერჯერობით ჩვენს ქვეყანაში სქესობრივი განათლების, როგორც სასკოლო საგნის შემოღების ყველა მცდელობა კრახით დასრულდა. ყველა წიგნი, რომელიც ამ საგნის შესწავლის მიზნით დაიბეჭდა, "გარყვნილების პროპაგანდასა" და "ბავშვის სულის დამახინჯებაში" დაადანაშაულეს. საზოგადოება ვერც სწავლების მეთოდსა და ხერხებზე შეთანხმდა. ამიტომ სანამ დავასა და ჭოჭმანში წლები გავიდა, ბავშვებმა ცოდნის მარაგი თავად "შეივსეს".
ამაში ყველაფერი ხელს უწყობთ, პირველ რიგში კი ტელევიზიითა და ინტერნეტით "დღისით, მზისით" შეზღუდვის გარეშე გავრცელებული ინტიმური კადრები. ღია ინფორმაცია სქესობრივი საკითხებისადმი ინტერესსაც მეტისმეტად ადრე ავითარებს. ამ დაინტერესებას ბიძგს საზოგადოებაც აძლევს - გამუდმებით ყურადღების ცენტრში არიან სექსუალური ცნობადი სახეები, მუდმივად მიმდინარეობს სექსუალური ორიენტაციების ხმამაღალი გარჩევა, თოჯინებიც კი გამოხატული სასქესო ნიშნებით გამოდის. აღარაფერს ვამბობთ სერიალების თემატიკაზე, სადაც სექსი და ქალის მშობიარობა ლამის სრული ნატურალიზმითაა ნაჩვენები. შესაბამისად, აღარც ბავშვებს სჯერათ, რომ "კომბოსტოში" იპოვეს და მშობლებსაც საკმაოდ ადრე უწევთ უხერხულ შეკითხვებზე პასუხის გაცემა. თუ ბავშვმა საჩოთირო კითხვები დაგისვათ, არ გაექცეთ მათ. პასუხი, თუნდაც შელამაზებული, აუცილებლად გაეცით. რა თქმა უნდა, "შიშველი სიმართლის" პირში მიხლას არ გთავაზობთ, ბავშვის ასაკის გათვალისწინებით აუხსენით ან ბავშვურად "შეუფუთეთ" სასურველი ინფორმაცია.
მაინც ვინ უნდა ზრუნავდეს ბავშვის სქესობრივ განათლებაზე, მშობელი თუ სკოლა? საინტერესოა, რა გამოცდილება აქვთ სხვა ქვეყნებს? ყველაზე ნათელი მაგალითი იმისა, თუ რა სავალალო შედეგები გამოიწვია სქესობრივი აღზრდის გაკვეთილების სკოლაში დანერგვამ, გერმანიაა. ეს საგანი იქ მე-4 კლასიდან ისწავლება, ზოგიერთ სკოლაში კი - 1-ლი კლასიდან. ის სავალდებულო საგანია და არავინ ინტერესდება, თანახმაა თუ არა მშობელი, მის 7 წლის შვილს სექსზე ესაუბრებოდნენ.
გაკვეთილზე მასაწავლებლები ბავშვებს კამასუტრაზე, ერთსქესიან სიყვარულსა და ტრანსსექსუალებზე უამბობენ. შედეგად, ბევრ ბავშვს ფსიქიკური გადახრები დაუდგინეს. ზოგიერთი მეტისმეტად თამამი ფოტოების გამო გონებასაც კი კარგავდა გაკვეთილზე.

10 წლის მოსწავლის ლუიზა მარტენესის მშობლები მხოლოდ იმიტომ გაასამართლეს, რომ ბავშვმა სექსის გაკვეთილებზე დასწრება არ ისურვა. გოგონა ამბობდა, რომ გაკვეთილზე ცუდად ხდებოდა, მშობლებმა კი ნება დართეს, აღარ დასწრებოდა მათ. სკოლამ მშობლებს ჯარიმა დააკისრა, რის გადახდაზეც ცოლ-ქმარმა უარი განაცხადა. საქმე სასამართლომდე მივიდა და საბოლოოდ მათ ერთდღიანი პატიმრობა შეუფარდეს.

მარტინესების შემთხვევამ გერმანიაში საპროტესტო გამოსვლები გამოიწვია, სადაც მშობლები ამ საგანის საგაკვეთილო ბადიდან ამოღებას ითხოვდნენ. "ბავშვებს სექსი კი არა, სიყვარული და ყურადღება სჭირდებათ, გამოფხიზლდით, მშობლებო" - აცხადებდნენ მომიტინგეები. საკითხი დღემდე გადაუჭრელია, ისევე როგორც ჩვენთან.
დაინერგება თუ არა სქესობრივი აღზრდა სკოლებში, ჯერჯერობით უცნობია. ამ დრომდე საკითხი საზოგადოების მხრიდან უარყოფითი დამოკიდებულების გამო შეჩერებულია.

ბევრი მასწავლებელი მიიჩნევს, რომ სქესობრივ აღზრდაზე მნიშვნელოვანია მორალურ-ზნეობრივი თემების წინ წამოწევა, რასაც სკოლაში რელიგიის სწავლებამ უნდა შეუწყოს ხელი.