სტეფანე: "მარცხენა მხარეს, გულთან ახლოს მიზის გაბუნია"

პროექტ "იქს ფაქტორის" ჟიურის წევრები, ტელეწამყვანი გიორგი გაბუნია და მომღერალი სტეფანე, შოუს განმავლობაში თითქმის სულ კინკლაობდნენ, ზოგჯერ ერთმანეთს ისეთ რეპლიკებსაც ესროდნენ, რომლებიც ბევრს შეიძლებოდა შეურაცხყოფადაც მიეღო. მაგრამ ეს გარეგანი სურათია, ეკრანის მიღმა მეგობრები არიან და ერთობლივი გეგმებიც დააწყვეს, კონკურსის დასრულების შემდეგ ბიზნესის წამოწყებას და დიდი ფულის შოვნას აპირებენ, თუ როგორ, ამაზე ქვემოთ.
გიორგი: ჩემი ცხოვრება ერთხელ უკვე შეიცვალა, როცა "იქს ფაქტორი" სტეფანესთან ერთად დაიწყო. როცა ეს პროექტი დასრულდება და სტეფანეს გარეშე მომიწევს ცხოვრება, ალბათ ჩემში ერთი ნახევარი, მარჯვენა მხარე, დაცარიელდება იმიტომ, რომ მთელი ამ ხნის განმავლობაში სტეფანე სწორედ ამ მხარეს მიზის.
სტეფანე: მე მარცხენა მხარეს, გულთან ახლოს მიზის გაბუნია.
გიორგი: ჩემთან ფილტვთან ახლოს ხარ.
– ალბათ მკითხველს ყველაზე მეტად ის აინტერესებს, თქვენი ურთიერთობა კადრმიღმა როგორია.
გიორგი: რასაც ეკრანზე უყურებთ, ეს არის მთელი ჩვენი კინკლაობა. სინამდვილეში არაჩვეულებრივი ურთიერთობა გვაქვს იმიტომ, რომ თვითონ სტეფანეა ისეთი, შეუძლებელია მასთან სხვანაირი დამოკიდებულება გქონდეს. მე, პირადად, სულ ვიცინი, როცა სტეფანე მოდის.
სტეფანე: კარგი გაგებით თუ ცუდით?
გიორგი: რა თქმა უნდა, კარგი გაგებით.
სტეფანე: გიორგი მიყვარს, ის სინამდვილეში უკარგესი ადამიანია.
– ერთმანეთს პროექტამდე იცნობდით?
გიორგი: კი, ოღონდ – ზედაპირულად. სტეფანესთან ჯერ კიდევ "მაესტროში" მუშაობის პერიოდიდან მქონდა ურთიერთობა და გამარჯობა–გაგიმარჯოს დონეზე ვიცნობდი. საფუძვლიანად "იქს ფაქტორში" გავიცანი.
სტეფანე: "საფუძვლიანად" – მეგობრობას ნიშნავს, ჩვენ დავმეგობრდით.
– ამ სიტყვებით ბევრს გააკვირვებთ...
სტეფანე: შეიძლება გიორგი ჩემთვის სულიერად ძალიან ახლო მეგობარიც იყოს და მის მეგობრებს რომ ჰგონიათ, ძალიან ახლობლები არიან, სინამდვილეში მეც მათ სიაში შევდიოდე.
– სანამ ასე დაახლოვდებოდით, რა წარმოდგენა გქონდათ ერთმანეთზე?
გიორგი: სტეფანეს, როგორც მომღერალს, ეკრანიდან ვიცნობდი, მაგრამ ის სულ სხვანაირია, როცა ახლოს გაიცნობ. პროდიუსინგის სფეროში რომ გადავიდა, მისი საქმიანობის შედეგები მომწონდა. დროთა განმავლობაში დიდი გამოცდილება დააგროვა. მას ამ მიმართულებით სულ სხვანაირი "დაძველება" აქვს.
სტეფანე: დაძველებული კონიაკის მსგავსად, ხომ? რასაც გიორგიზე ვერ ვიტყვი, გიორგი არ ძველდება, ის სულ თინეიჯერდება და თინეიჯერდება.
გიორგი: სხვათა შორის, "მაესტროს" ეთერში უამრავჯერ მაქვს სტეფანეს კლიპი გაშვებული და ხალხს ამის კლიპებზე პრიზებიც აქვს მოგებული.
სტეფანე: გიორგის საინფორმაციო გამოშვებებში ვხედავდი და არ მეგონა, ამ სფეროშიც თუ ვიხილავდი. რაღაც მომენტში მის მდგომარეობაში შევდივარ კიდეც, რთულია, თან პოლიტიკაზე ფიქრობდე, თან – მუსიკაზე.
გიორგი: პოლიტიკურ–მუსიკალური ტოქ შოუ უნდა გავაკეთო, მაგრამ როგორი იქნება, არ ვიცი.
სტეფანე: ეგ უკვე ვიცი, ვისაც აქვს, მაგრამ არ ვიტყვი.
გიორგი: მეც ვხვდები.
– გეტყობათ, რომ ერთმანეთს კარგად გაუგეთ.
სტეფანე: კი. ჟიურის ოთხივე წევრი ერთიმეორის მიმართ ძალიან პოზიტიურად ვართ განწყობილი. თუ მაყურებელს ჟიურის წევრები მოსწონს, ეს იმანაც განაპირობა, რომ ერთმანეთს დიდ პატივს ვცემთ და გვიყვარს.
გიორგი: მაყურებელი იმასაც უნდა ხვდებოდეს, ჩემი და სტეფანეს "დაპირისპირება" ჟიურის როგორ კრავს. იქ შეიძლება ერთმანეთს სერიოზულადაც ვუსაყვედუროთ რაღაცეებზე, მაგრამ ერთიანი გუნდი ვართ და ერთმანეთში განვიხილავთ პრობლემას. შეიძლება რომელიმე კონკურსანტზე მე და სტეფანე ვერ დავეთანხმოთ ერთმანეთს, მაგრამ მეორე მონაწილეზე შევთანხმდეთ. ჯინაზე არ ვკინკლაობთ.
სტეფანე: შეიძლება ეთერში ერთმანეთი დავკლათ, მაგრამ ეკრანმიღმა ყველაფერი მთავრდება. ამის გამო გიორგის უდიდეს პატივს ვცემ. იცის, რომ ის, რასაც იქ ვაკეთებთ, სამსახურია და, როგორც კი კულისებში გავდივართ, ჩვეულებრივად ვართ. ეს ჩემთვის ყველაზე დიდი პროფესიონალიზმის მაჩვენებელია.
გიორგი: იგივე ხდება კონკურსანტებთანაც, ჩვენ შეიძლება ისინი გავაკრიტიკოთ, მაგრამ თითოეულთან კარგი ურთიერთობა გვაქვს.
სტეფანე: თუ გიორგი ცუდ ხასიათზე მოვიდა, თავის კონკურსანტებს ჩემ წინააღმდეგ აქეზებს.
გიორგი: ეს ტყუილია! ეს კაცი არის ეჭვიანი! სტეფანე ძალიან ემოციურია და მისი ერთ–ერთი ემოცია არის ის, რომ ეჭვიანია.
– სტეფანე, ეთანხმებით?
სტეფანე: არ ვიცი.
გიორგი: კი, ეჭვიანი არის, მაგრამ უხდება, ესეც მისი ერთ–ერთი დამახასიათებელი თვისებაა, რომელიც უფრო საინტერესოს ხდის.
– პირდაპირ ეთერში ისეთ რეპლიკებს ისვრით, რომ... ერთმანეთის რეაქციების არ გეშინიათ?
სტეფანე: ორივენი იმდენად მყარი ფსიქიკის ადამიანები ვართ, რომ ჩვენივე რეაქციების არ გვეშინია. საკუთარ თავში დარწმუნებულები ვართ. მთავარია, რომელიმე ასპექტში სუსტი არ იყო, ასეთი კი არც სტეფანეა და არც გიორგი.
გიორგი: მაგრამ სტეფანე უფრო გულკეთილია. როგორი შხამიც უნდა ამოვანთხიო, ჩემგან ვერ გაიგონებს სიტყვებს: "მაპატიე" ან "ხომ არ გეწყინა?". სტეფანე კი ყოველთვის ამოწმებს, საწყენად ხომ არ მიიღეო. არა, რა სისულელეა–მეთქი, ვეუბნები. ხან ჩემი მამიდა მოიხსენია, ხან ოჯახის წევრებზე ხომ არ გადავიდეო, მითხრა. ამაზე რეაქცია არ მაქვს, ყველაფერზე ვიცინი. სტეფანე მერე ამოწმებს, ხომ არ მეწყინა.
– შოუს შემქმნელებს თავიდანვე ჰქონდათ ჩაფიქრებული, რომ ერთმანეთთან ასეთი დამოკიდებულება გქონოდათ თუ სპონტანურად ჩამოგიყალიბდათ ეს ურთიერთობა?
გიორგი: პირველ ჩაწერამდე მე და სტეფანეს მხოლოდ ერთხელ გვქონდა შეხება, როცა პროდიუსერებს შევხვდით ერთად. მაშინ ჟიური ყალიბდებოდა. ამის შემდეგ პირდაპირ ჩაწერაზე შევხვდით და ასეთი ურთიერთობა იქვე დაიწყო. სხვათა შორის, იმ მომენტში თამთა გოდუაძის ყოფნა ჟიურიში გადაწყვეტილი არც იყო. სტეფანეს იდეა იყო, რომ ჟიურიში თამთა ყოფილიყო, რის გამოც მთელი "რუსთავი 2" სტეფანეს წინაშე დამხობილები ვართ და მადლობას ვუხდით.
სტეფანე: მოიცა, ჩემ გამო მადლობელი არ ხარ, მეც რომ ვარ?!
გიორგი: ვიცოდი, რომ შენ პროექტში იქნებოდი. თამთას ყოფნა მერე გადაწყდა. სტეფანეს აქვს საუბრის თავისებური მანერა, ფრაზები, იუმორიც.
სტეფანე: შენ ხომ, რას ამბობ, ისეთი იუმორი გაქვს!..
გიორგი: სტეფანე მეკითხება ხოლმე, შენ იუმორი არ გაქვს და ხალხს რატომ ეცინებაო.
– სტეფანე, გიორგი თქვენს ჩაცმულობაზეც ხშირად ამახვილებს ყურადღებას და არც ეს გწყინთ?
სტეფანე: ერთი ყურიდან მეორეში ვუშვებ. ჩაცმასთან დაკავშირებით გიორგის ნამდვილად არ დავეკითხები აზრს.
გიორგი: როცა ყურში შეუშვებ და მეორედან გამოუშვებ, ესე იგი "სკვაზნოი" გაქვს.
სტეფანე: ჰოდა, მაქვს!
გიორგი: არადა მანდ საერთოდ ტვინი მდებარეობს ხოლმე... (იცინიან).
სტეფანე: მე კიდევ, გიორგიზე მართლა მხოლოდ კარგი შემიძლია ვთქვა.
გიორგი: ეს ინტერვიუ ჩაწერილი და დაწერილი ვერ წარმომიდგენია, ეს დიალოგი უნდა მოესმინა ხალხს.
– რადიკალურად განსხვავებული თვისებები გაქვთ და ერთმანეთს როგორ უგებთ?
სტეფანე: თანამშრომლობა თანაცხოვრებას არ ნიშნავს... თუმცა გიორგიში ყველაფერს დადებითს ვხედავ.
– ცუდს ვერაფერს?
სტეფანე: ვერა.
გიორგი: შეიძლება არ უნდა, რომ დაინახოს, თორემ შეუძლებელია ასე იყოს.
– გიორგი, თქვენ რა თვისებები აღმოაჩინეთ სტეფანეში?
გიორგი: ერთი უარყოფითი რამ – აი, თეძოს ზემოთ ლაქა აქვს.
სტეფანე: მანდ და ღიპზე პრეტენზიებს არ ვიღებ. ესეც ვარჯიშობს და ღიპი არ აქვს.
– მოგწონთ ერთად მუშაობა?
გიორგი: ერთად არც ვმუშაობთ. სიმართლე გითხრათ, არ ვიცი, რეპეტიციაზე როგორია. რეპეტიციაზე არავის ასწრებს, სხვა კონკურსანტებსაც კი. მე კი ყველას შევყრი და ისე ვმუშაობ.
სტეფანე: ეს ყველაზე დიდი შეცდომაა. ასე ჩემი მეგობარი კოლეგებიც აკეთებენ, რაც "მარიაჟი" მასტერკლასებია, სინამდვილეში კი ასეთ დროს იბოჭება ის ადამიანი, ვისთანაც მუშაობ. ზოგჯერ შეიძლება შეურაცხმყოფელად უთხრა რაღაც ან უცებ, შედარების დროს, ისეთი ცუდი რამ თქვა, რაც არ გინდა, სხვამ გაიგოს, რადგან ის ადამიანი ამის ღირსი არაა. ამიტომ მუშაობის დროს რამეში არ უნდა იზღუდებოდე, ბოლომდე უნდა "ქაჩავდე" კონკურსანტს, რაც ძალიან რთულია.
გიორგი: მე, მაგალითად, ეს დეტალი არ ვიცოდი და ყველა კონკურსანტთან ერთად ვმუშაობ, ერთმანეთს უსმენენ, ერთიმეორეს რაღაცეებს უსწორებენ და ა.შ. სტეფანემ თუ ნახა, ჩვენ ვმეცადინეობთ, რომც სთხოვო, ოთახში შემოდიო, არ შემოვა.
სტეფანე: ზოგი ნაკლებად ნიჭიერია, ზოგი – მეტად, ამიტომ ყველა გაკვეთილი იმ შემთხვევაშია ნაყოფიერი, თუ ის ინდივიდუალურია.
– გიორგი, ჟიურის სხვა წევრებისგან განსხვავებით, მუსიკოსი არ ხართ. როგორ ამეცადინებთ თქვენი გუნდის წევრებს?
გიორგი: გამორიცხულია, მუსიკოსებთან ერთი ერთზე ვიმუშაო. მინიმუმი, ორი ადამიანი ვმუშაობთ. მე ძირითად მიმართულებას ვაქცევ ყურადღებას, მაგრამ, ჩემი გემოვნებიდან, ინტუიციიდან გამომდინარე, ვაძლევ შენიშვნებს, მათ შორის – მუსიკალური მიმართულებით. ჩემთან ერთად ვოკალის პედაგოგი ყოველთვის არის. სტეფანე, თამთა გოდუაძე და სოფო ტოროშელიძე, ბუნებრივია, მარტო მუშაობენ. სტეფანე მუსიკალური პედაგოგის როლსაც მთლიანად ითავსებს.
– რაიმე კუთხით ემთხვევა თქვენი და სტეფანეს გემოვნება ერთმანეთს?
სტეფანე: ადამიანს ჩვენი გემოვნებიდან გამომდინარე არ უნდა ვაფასებდეთ, ეს ძალიან ინდივიდუალურია. გიორგის სწორი მუსიკალური აღქმა აქვს და რაღაცეებს კარგად ხვდება, რაღაცეებში მოიკოჭლებს, მაგრამ...
– მაგალითად?
სტეფანე: სულ ვეუბნები, შემსრულებლის მუსიკალური ხასიათი საერთოდ არ ნიშნავს იმას, რომ აუხსნა, თუ რაზეა სიმღერა. როცა კონკურსანტს იმდენს უკეთებ, რომ მისი ყოველი ნერვი მუსიკის შეგრძნებას იწყებს, როცა ის მთლიანად მუსიკაში შედის, ესაა ხასიათი. მთავარია, იქიდან არ გამოვიდეს და იმაზე არ ფიქრობდეს, თუ რა ნოტს იღებს, რამდენად პროფესიონალურად ჟღერს მისი ხმა და სუფთაა თუ არა.
გიორგი: სტეფანეს ვეთანხმები, მაგრამ ეს ჩემს შემთხვევაში ვერ მექნება, რადგან ამას ძალიან დიდი გამოცდილება სჭირდება და ძალიან დიდი დროც, რაც მე არ მაქვს. ასე რომ, ვცდილობ, გავაკეთო ის, რაც მე შემიძლია.

– შოუს გარეთ გრძელდება თქვენი მეგობრობა, ერთმანეთს ხვდებით?
სტეფანე: გიორგი იხევს ხოლმე უკან.
გიორგი: მე ცოტა არაკომუნიკაბელური ადამიანი ვარ. სხვათა შორის, რამდენიმე დღის წინ თამთასთან ერთად ჩინურ რესტორანში ვიყავი.
სტეფანე: არაკომუნიკაბელურობა ჩემთან დამოკიდებულებაში არ შემიმჩნევია და ზოგადად, არ ვიცი... გიორგი ხშირად ძალიან დაკავებულია და ამის გამოც ვერ ახერხებს რაღაცეებს.

გიორგი: ძალიან დიდი სტრესია, როცა კონკურსანტების დატოვება ან გაშვება გვიწევს, ამიტომ ორშაბათის კონცერტი ჩვენთვის დიდ ემოციებს უკავშირდება. ხშირად თვითონაც გამომითქვამს სურვილი, სადმე წავსულიყავით, მაგრამ მერე გამხსენებია, რომ მეორე დღეს, ანუ სამშაბათს, კიდევ დიდი სტრესი მაქვს, რომელსაც გადაცემა "არჩევანი" ჰქვია. ამიტომ ორშაბათს, გვიან ღამით, ვეღარსად მივდივარ. კონცერტის შემდეგ სასწრაფოდ სახლში გავრბივარ, რომ გამოძინება მოვასწრო. რაღაც პერიოდი თამთა საბერძნეთში მიდის, სტეფანეც – სადღაც. ასე ვიშლებით და ორშაბათობით ისევ ვიკრიბებით.
– სტეფანე, გიორგის პოლიტიკურ ტოქ შოუს უყურებთ?
სტეფანე: არა, თუმცა გიორგის გამო კი მომდომებია, მეყურებინა, მაგრამ, მაქსიმუმი, წუთი, წუთნახევარი "გამიქაჩავს". ჩემთვის ესეც ძალიან ბევრია. ასეთი გადაცემების ყურება არ შემიძლია. ვისაც ასეთი შოუები აინტერესებს, გიორგის აუცილებლად უნდა უყურონ. მას ბრწყინვალედ მიჰყავს "არჩევანი". მე პოლიტიკა არ მაინტერესებს.
– შოუს დასრულების შემდეგ როგორ წარმოგიდგენიათ თქვენი მეგობრობა, გადაიკვეთება თქვენი გზები თუ შოუსთან ერთად თქვენი ურთიერთობაც დამთავრდება?
სტეფანე: ალბათ გადაიკვეთება, მაგრამ ორივეს ძალიან რთული გრაფიკი გვაქვს...
გიორგი: სტეფანე ჩამოგიყალიბებთ, რას ვაპირებთ.
სტეფანე: ჩვენ უნდა გავხსნათ საკონსულტაციო, რეიტინგის ამწევი კომპანია. თუ რომელიმე გადაცემას რეიტინგი დააკლდება, მე და გიორგის მიგვიწვევენ და ყველას შემოვაფხიზლებთ.
ეკა ლემონჯავა