რატომ იტყუებიან ბავშვები ?

ზოგჯერ მშობლები თავადაც ვერ ხვდებიან, ისე უბიძგებენ თავიანთ პატარებს ტყუილისკენ. მაგალითად, თუ თქვენ ბავშვი დასაჯეთ არა ცუდი საქციელისთვის, არამედ იმისთვის, რომ არ შეასრულა თქვენი მოთხოვნა, ასეთ დროს მათში თვითდაცვის ინსტიქტი მოქმედებს. ბავშვები ცდილობენ, თავიანთი საქციელით მშობლებში არასასიამოვნო რეაქცია არ გამოიწვიონ და ტყუილის თქმას იწყებენ.

ხშირია შემთხვევები, როდესაც მშობელი უხასიათობის დროს არა მხოლოდ სჯის, არამედ ფიზიკურადაც ეხება შვილს. აი, ასეთ დროს მუშაობას იწყებს ბუმერანგის მეთოდი. რაც მეტად გაუბრაზდებით პატარას, მით მეტად მოგატყუებთ ის, რათა თავიდან აიცილოს მოსალოდნელი გაბრაზება. როგორ მოიქცეთ? პირველ რიგში გაერკვიეთ, რატომ იტყუება პატარა? მაქსიმალურად შეიკავეთ თავი, რათა მას გაბრაზებულ გულზე არ დააცხრეთ.

გახსოვდეთ, თქვენი შვილი არ არის დამნაშავე, ის უბრალოდ გამოუცდელი პატარა ადამიანია, რომელმაც ჯერ არ იცის როგორია „სწორად“ მოქცევა. აუცილებელია, ოჯახში იყოს ისეთი გარემო, სადაც მას არ მოუწევს მოტყუება. თუ ბავშვი გენდობათ, უყვარხართ და იცის, რომ ჩადენილი საქციელის მშვიდად ახსნის საშუალება ექნება, მას არ მოუწევს ტყუილის თქმა.

ეცადეთ, ენდოთ თქვენს პატარას, გაუზიარეთ აზრები და დაუახლოვდით მას. დაუთმეთ მეტი დრო, ეთამაშეთ, ან უბრალოდ მოესიყვარულეთ. დადებითად შეუფასეთ ფანტაზია და იუმორი. თუ ვერ უსრულებთ დანაპირებს, შეეცადეთ მისთვის გასაგებ ენაზე აუხსნათ მიზეზი. იყავით ბავშვის მეგობარი, რომელთანაც თბილ და მეგობრულ ურთიერთობას დაამყარებთ, ასეთ შემთხვევაში ის არასოდეს მოგატყუებთ.

eva.ge