''სამეფო კარის თამაშების'' გმირს ტარიელის როლში გადაიღებენ? - ''ვეფხისტყაოსნის'' გადაღებები იწყება

რეჟისორი ნიკოლოზ ხომასურიძე მორიგ მასშტაბურ პროექტზე მუშაობს. დიდგორის ბრძოლის შემდეგ რეჟისორმა გადაწყვიტა, კვლავ ისტორიულ თემაზე ემუშავა და ამჯერად ყურადღება უკვდავ პოემა ''ვეფხისტყაოსანზე'' შეაჩერა. ამჯერად ტრეილერის გადაღებები მიმდინარეობს, სადაც სხვა მსახიობები არიან დაკავებულები. რეჟისორს ერთ-ერთი მთავარი როლის შემსრულებლად ''სამეფო კარის თამაშების'' გმირი ჯეისონ მომოა წარმოუდგენია.

- ნიკოლოზ, ''ვეფხისტყაოსნის'' გადაღების იდეა როგორ დაიბადა?
- ჯერ მხოლოდ რამდენიმე ტრეილერი გადავიღეთ, სადაც ტარიელის ბრძოლაა ასახული. მალე გადავიღებთ ტარიელის ნესტან-დარეჯანთან ქაჯეთის ციხეში შეხვედრას და იმ ვერსიაში უკვე წარმოდგენილი იქნება, როგორი მიმართულების ფილმი შეიძლება, რომ გამოვიდეს. მერე გვექნება ინვესტორებთან შეხვედრა, როგორც საქართველოში, ასევე უცხოეთში.

- გადაწყვეტილი გაქვთ, მთავარ როლებს ვინ შეასრულებენ?
- რაც გადავიღეთ, ქართული მოცეკვავეები არიან დაკავებული. გადაწყვეტილი გვაქვს, უცხოელმა მსახიობებმა შეასრულონ მთავარი როლები.
- უცხოელი მსახიობებიდან ვის შესთავაზებთ მიუზიკლში მონაწილეობას?
- ამაზე საუბარი ნაადრევია. ახლა მიმდინარეობს ვარჯიში თუ რამდენად კარგად გავართვმევთ თავს ასეთი მასშტაბური ფილმის გადაღებას.
- მაინცდამაინც მიუზიკლის გადაღება რატომ გადაწყვიტეთ?
- პირველ რიგში იმიტომ, რომ ქართული ცეკვა იქნება წარმოდგენილი კარგად და პოპულარიზაციას გავუწევთ ''ვეფხისტყაოსანს'', ქართულ ცეკვას და კულტურას.
- ფილმის დასრულებას როდის გეგმავთ?
- როგორც კი გვექნება ფინანსები, დავიწყებთ ფილმზე მასშტაბულ მუშაობას. რეალურად ფილმი უკვე შეკრულია. მოგვიანებით მხოლოდ სცენარს დავხვეწავთ და განვავითარებთ. გვინდა, ერთი წლის განმავლობაში ფილმი უკვე დასრულებული იყოს.
- ტარიელის როლზე ვინ წარმოგიდგენიათ?
- ჯერჯერობით გადაწყვეტილი არ არის და წინასწარ რა აზრი აქვს. ჯეისონ მომოა წარმომიდგენია ტარიელის როლში, მაგრამ ვნახოთ როგორ განვითარდება მოვლენები. მაგარი მსახიობი და ტიპაჟია.

მერი კობიაშვილი