ნანა ნებიერიძემ ქალიშვილი გაათხოვა და თავადაც ოჯახის შექმნა სურს

ყოფილ სპორტსმენს, ნანა ნებიერიძეს 39 წლის ასაკში ცხოვრებაში ახალი ეტაპი დადგა – ცოტა ხნის წინ ქალიშვილი, 20 წლის ნინა ჯაფარიძე გაათხოვა. ნანა სიდედრობისთვისაც მზად არის და ბებიობისთვისაც და არც იმას გამორიცხავს, რომ თვითონაც ხელმეორედ შექმნას ოჯახი, რადგან 2 წელია გვერდით ჰყავს ადამიანი, ვისთანაც თავს ბედნიერად გრძნობს. საქმეშიც წარმატებები აქვს, საკუთარი სატრენაჟორო დარბაზი გახსნა და ფილმში იღებენ, სადაც "მის საქართველოს" როლს შეასრულებს.
თავისი ცხოვრების სიახლეებზე ნანა ნებიერიძე "სარკეს" უამბობს.
– ნანა, როგორი მიდის თქვენი ცხოვრება მას შემდეგ, რაც ტელემაყურებლის თვალთახედვიდან გაუჩინარდით?
– იმ პერიოდში, როცა პროექტში "ცეკვავენ ვარსკვლავები" ვმონაწილეობდი, არამხოლოდ ვცეკვავდი, სპექტაკლ "ყინულის დედოფალში" ვთამაშობდი. ამის მერე ვიფიქრე, რომ პაუზა იყო საჭირო. კი არ დავიღალე, უბრალოდ ცხოვრებაში დგება მომენტი, როცა გარკვეულ პიკამდე მიდიხარ და მერე ცოტა ხანს ისვენებ.
– ცეკვა მიატოვეთ თუ აგრძელებთ?
– სცენა და ცეკვა ძალიან მენატრება. საკუთარი სატრენაჟორო დარბაზი გავხსენი, სადაც მოცეკვავე სალომე ჭაჭუაც დადის. სულ ვთხოვ ხოლმე, რამე მასწავლოს. პროექტის შემდეგ ლევან ახვლედიანმა ტურნირი მოაწყო და მას ვთხოვე, ვალსი გვეცეკვა. ვერ გეტყვით, რა ბედნიერი ვიყავი!
– სხვა ტელეპროექტებიდან არ გქონიათ შემოთავაზება?
– ტელეკომპანია "იმედის" პროექტ "ადრენალინში" მივიღე მონაწილეობა და ცხოვრებაში პირველად გამიხარდა წაგება. არსებობს რაღაცეები, რისი კეთებაც არ შემიძლია. ამ პროექტში მივხვდი, რომ გველების არ მეშინია, მაგრამ მატლები ვერ შევჭამე და ამიტომაც წავაგე. ჩემთან ერთად პროექტში სალომე ჭაჭუაც იყო. ჩვეულებრივი არანორმალურია, მატლები შეჭამა! გიორგი ვარდოსანიძეც იქ იყო და გადაირია, ეს ვინ მომიყვანია ცოლადო.
სალომე ძალიან მიზანსწრაფულია, მის დანახვაზე ჩემი თავი გამახსენდა. მეც ასეთი ვიყავი მის ასაკში. აქტიური ცხოვრება ძალიან მიყვარს. მართალია, "აბაზანის მომღერალი" ვარ, მაგრამ რომელიმე მუსიკალური პროექტიდან რომ მივიღო შემოთავაზება, სიამოვნებით დავთანხმდები. თავზე ხელი ავიღე და პირველად "ოთარ ტატიშვილის შოუში" ვიმღერე ექსპრომტად, მაგრამ როცა ვუყურე, არ მომეწონა.
ჟურნალისტიკა ჩემი ჰობია. ამ სფეროშიც მაქვს წინადადება, რასაც საიდუმლოდ დავტოვებ. ფილმში როლიც შემომთავაზეს და ვფიქრობ, გამომივა. ამ ფილმზე მხოლოდ იმას გეტყვით, რომ ძალიან საინტერესო როლი მაქვს – "მის საქართველოს" ვთამაშობ. მას შემდეგ, რაც "მის საქართველო" გავხდი, ბევრი წელი გავიდა და ფილმში ამის შემდგომი პერიოდია ასახული.
ბევრჯერ მაქვს ნათქვამი, რომ ბავშვობიდან სცენაზე ვოცნებობდი და ეს ოცნება ამისრულდა. მგონი, საკუთარი თავი უკვე ვიპოვე. არ ვთვლი, რომ ოცნებები გვიან ამიხდა, მგონი, ყველაფერი ახლა იწყება. ყველაფერს თავისი დრო აქვს. 39 წლის ვარ, მაგრამ თუნდაც 50 წლის ასაკში რომ დაწყებულიყო ჩემი ოცნებების ახდენა, მნიშვნელობა არ ექნებოდა. ძალიან ბედნიერი ვარ!
– ამ ბედნიერებას პირადი ცხოვრებაც ხელს უწყობს?
– უკვე 2 წელია საყვარელი ადამიანი მყავს გვერდით და ძალიან ბედნიერი ვარ. სიმართლე გითხრათ, ამის თქმისაც მეშინია. ადამიანმა, რომელიც მიყვარს, ალბათ ისეთი მიმიღო, როგორიც ვარ. მისი შეცვლა არ მინდა, როგორიც არის, ისეთი მინდა, იყოს. თავისი პლუსებით და მინუსებით მიზიდავს. სულ მინდა, მის გვერდით ვიყო და დავეხმარო. ჩვენ ერთი გრძნობა გვაკავშირებს. ჩემი ყოველი დილა მისი მესიჯით იწყება: "დილა მშვიდობისა, ჩემო სიცოცხლე!". დღეც ასე მთავრდება: "ღამე მშვიდობისა, ჩემო სიხარულო!".
– 2 წლის განმავლობაში როგორ ახერხებთ მუდამ ასეთი უღრუბლო და უპრობლემო ურთიერთობა გქონდეთ?
– სიყვარულს კანონი არ აქვს. არსებობს პერიოდები, როცა ხასიათზე არ ხარ ან რაღაც არ მოგწონს, მაგრამ ეს არ ნიშნავს იმას, რომ საყვარელ ადამიანს აუცილებლად უნდა შეეკამათო. ცხოვრებას ყოველ წამსა და ნაბიჯზე სწავლობ, სადღაც უნდა აპატიო, თვალი დახუჭო. თუ რამე არ მოგწონს, უნდა უთხრა კიდეც, მაგრამ სწორად და არა – ჩხუბით. მის გვერდით თავს დაცულად ვგრძნობ. ალბათ ხმამაღალი ნათქვამი გამომივა, მაგრამ სხვა არც მაინტერესებს და არც მინდა. ხშირად მეკითხებიან, როგორი მამაკაცი გინდა, გვერდში გყავდესო, მე კი სულ ერთი პასუხი მაქვს – როგორიც არის თავისი მინუსებით და პლუსებით. ცხოვრებას ერთად ვსწავლობთ, რადგან ურთიერთობა ძალიან რთულია, მაგრამ, რაც მთავარია, ერთმანეთს ვავსებთ.
– ეს ურთიერთობა ქორწინებამდე ჯერ არ მიდის?
– კი, როგორ არა. ოჯახი მინდა და ამაზე ვფიქრობ კიდეც, უბრალოდ არ ვჩქარობ. მინდა, ბედნიერი ვიყო, მაგრამ ეს ერთ სახლში ცხოვრებას არ ნიშნავს. ალბათ ყველაფერს დრო გვიჩვენებს. სიმართლე გითხრათ, ამ საკითხზე არც გვისაუბრია.
– თქვენს შვილს, ნინას როგორი ურთიერთობა აქვს თქვენს რჩეულთან?
– არაჩვეულებრივი. ერთხელ ნინამ მითხრა, ჩემთვის მთავარი შენი ბედნიერებააო და ძალიან გამიხარდა.
– შევიტყვეთ, რომ თქვენი გოგონა გათხოვილა.
– რამდენიმე დღის წინ მისი ნიშნობა იყო და ძალიან ბედნიერია. მალე სიდედრი გავხდები და მშვენივრად ვგრძნობ თავს, უფრო მობილიზებული ვარ. როცა ნინამ ეს ნაბიჯი გადადგა, მისთვის არანაირი რჩევა მიმიცია. ის ახლა იწყებს ცხოვრებას და იმდენად ბედნიერია, რჩევის მიცემა ჩემი მხრიდან არასწორი იქნება. 20 წლისაა, ეს მისი გადაწყვეტილებაა და მეც კეთილგანწყობილი ვარ.
ბევრი ეტაპი მაქვს გავლილი, ახლა კი სიდედრი ვხდები და ალბათ მალე ბებიაც ვიქნები. ამით ვცოცხლობ და ვხარობ. მინდა, ლამაზი ბებია ვიყო და ამისთვის ვზრუნავ კიდეც.
– როგორ ზრუნავთ, რა საშუალებებს იყენებთ?
– ჯანსაღი ცხოვრების წესით ვცხოვრობ, მაგრამ ვერ გეტყვით, რომ კოსმეტოლოგთან ხშირად დავდივარ და ბოტოქსს ვიკეთებ, ამისთვის ჯერჯერობით არ მიმიმართავს. ხშირად მესმის, ნანა ნებიერიძე სულ "დაბოტოქსებულიაო", მაგრამ ეს არ მწყინს. რადგან კარგად გამოვიყურები, ბოტოქსი მაქვს გაკეთებული? ნაოჭები რომ არ მაქვს, ალბათ გენეტიკაც ხელს მიწყობს. სიცილი ძალიან მიყვარს, ვცდილობ, სულ კარგ ხასიათზე ვიყო, ეს კი ჩემს გარეგნობაზეც აისახება. დიეტას არასდროს ვიცავ, ვვარჯიშობ და ბევრ წყალს ვსვამ. ახლა აღარ ვცურავ, ცოტა ხნით გავჩერდი. როცა ჩემი სხეული მეტყვის, რომ რაღაც ნაწილში კორექცია მჭირდება, ისევ დავიწყებ ცურვას.
სოფიო ბოჭორიძე, ჟურნალი სარკე