ქეთა თოფურია და ლევ გეიხმანი შვილის გაჩენაზე ოცნებობენ

ქართველი მომღერალი ქეთა თოფურია უკვე 10 წელია ჯგუფ "ა სტუდიოს" სოლისტია და რუსულ შოუბიზნესში გამორჩეული სახეა. მოსკოვში ჯერ კიდევ გოგონა ჩავიდა და თითქმის შეუძლებელი შეძლო – ვარსკვლავად აღიარეს. რუსული შოუ ელიტისთვის ახალგაზრდა ქართველი ქალი ბრწყინვალე გემოვნებისა და სტილის მაგალითიც გახდა. ქეთამ მოსკოვში მყარად მოიკიდა ფეხი, ცენტრში საკუთარი სამოთახიანი ბინა შეიძინა. ერთი წლის წინ კი მდიდარ ბიზნესმენ ლევ გეიხმანს გაჰყვა ცოლად. ცოლ–ქმარი უკვე შვილზე ოცნებობენ.
ქეთას დედამ, ნატა ბუცხრიკიძემ, შვილის წარმატებაში დიდი როლი ითამაშა. ის დღემდე ქეთას საუკეთესო მრჩეველია. თავადაც მოსკოვში ცხოვრობს, დრო და დრო კი საქართველოს სტუმრობს.
საზოგადოებისთვის ისიც ცნობილია, რომ ქეთას მამა, ანდრო თოფურია, ე.წ. კანონიერი ქურდი იყო. დიდიხნის განმავლობაში მოსკოვში ცხოვრობდა. 3 წლის წინ პატიმრობაში მყოფი გარდაიცვალა.
ახლახან თბილისში რამდენიმე დღით ჩამოსული ნატა ბუცხრიკიძე "სარკეს" შეხვდა და ჩვენს მკითხველებს მოსკოვში გატარებულ 10 წელიწადზე გულწრფელად ესაუბრა.
– ქალბატონო ნატა, როცა 10 წლის წინ თქვენ და თქვენი შვილი თბილისიდან მიდიოდით, რა მოლოდინები გქონდათ, გეგონათ, რომ ქეთა ასეთი წარმატებული გახდებოდა?
– ყოველ შემთხვევაში, ვცდილობდი, ჩემი წილი შრომა ჩამედო მასში. რადგან ეს სფერო აირჩია, ყველანაირად შევუწყვე ხელი. როცა წამოიზარდა, ფსიქოლოგობა მოინდომა და ჩააბარა კიდეც უნივერსიტეტში ამ ფაკულტეტზე. რაც შეეხება მოსკოვს, ერთი და იგივე, გაცვეთილი ფრაზებია და ამაზე აღარც ვლაპარაკობ, რომ ნატო დუმბაძის ხელშეწყობით მოხდა ყველაფერი. ქეთა მან გააცნო ჯგუფს და ჯგუფის წევრებს მოეწონათ. ნატოს მაშინ დავუსვი კითხვა: "რატომ ქეთა?". მით უმეტეს, იმ პერიოდში ის სხვა მომღერლების პროდიუსერი იყო, ქეთას კი მე ვპატრონობდი. მიპასუხა, ქეთაში მე დავინახე ის, რაც სხვას არ ჰქონდა – თავისუფლება, მიამიტობა, ბოროტი და ჭორიკანა არ არისო. ნატოს ხელშეწყობით და ღვთის წყალობით, მოერგო რუსულ შოუბიზნესს.
– ასე უპრობლემოდ, სირთულეების გარეშე?
– არანაირი სირთულე ჰქონია. როცა ჯგუფმა პირველი საპრეზენტაციო კონცერტი გამართა, მაყურებელმა პირველივე კონცერტიდან მიიღო ქეთა. ჩემი შვილი იქ ყველას შეუყვარდა. ნამდვილად არ მეგონა, იქაური ცხოვრების ტემპს, მენტალიტეტს, კლიმატურ პირობებს თუ შეეგუებოდა, წლობით მზე არ იყო, მაგრამ მე რომ არ შევგუებოდი იქაურობას, ქეთაც ვერ შეეგუებოდა. ამ ყველაფერს მე სხვა თვალით ვუყურებ, ერთი შვილი მყავს და სადაც ის იქნება ბედნიერი, მეც იქ უნდა ვიყო.
– თქვენთვის არ იყო ძნელი უცხო ქალაქის რიტმისთვის აგეწყოთ ფეხი?
– მე კიევში დავიბადე, რუსული სკოლა თბილისში დავამთავრე. ასე რომ, ჩემთვის იქ ცხოვრება არ იყო რთული. იმაზე არ ვფიქრობდი, ქეთას თავისი საქმე გამოუვიდოდა თუ არა, მხოლოდ იმის მეშინოდა, იქაურობას შეეგუებოდა თუ არა. ქეთას ვეღარ დავყვებოდი უკან, რადგან ჯგუფს თავისი დირექტორი და პროდიუსერი ჰყავს. მე მხოლოდ ჟურნალ–გაზეთებით და ტელევიზიით ვადევნებდი მის საქმიანობას თვალყურს. იქ ძალიან მადლიერი მაყურებელი და მსმენელია.
– საქართველოსგან განსხვავებით?
– არა, ქართველები არაჩვეულებრივი მსმენელები ვართ. საქართველოსა და რუსეთის მუსიკალურ ცხოვრებას, კულტურას ერთმანეთს არასოდეს შევადარებ. რუსებმაც იციან, როგორი მუსიკალური ერი ვართ, მაგრამ ჩვენ გვაქვს კომპლექსი, რომ მსახიობს ზედმეტი ტაში არ დავუკრათ, არტისტისთვის კი აპლოდისმენტია ყველაფერი. ჩვენ კრიტიკული შემფასებლები ვართ და ალბათ მეც ასეთი მსმენელი ვარ რუსებისთვის. დღემდე ქეთას რომ ვუსმენ, სულ რაღაც არ მომწონს.
– მითითებებს, შენიშვნებს აძლევთ?
– ჩემს შენიშვნას რა აზრი აქვს, მაგრამ უბრალოდ ვაფასებ ისე, როგორც ქართველი მსმენელი – კრიტიკული თვალით. მოსკოვში ასე არ არის. თუ იქ ხალხს უყვარხარ, კონცერტებზე მოვა და მომღერალმა რაც უნდა გააკეთოს, როგორც უნდა შეეშალოს, ყურადღებას არ მიაქცევს. ხალხი მაინც კმაყოფილი და ბედნიერია.
მე ქეთას კონცერტებზე არ დავდივარ, მხოლოდ საიუბილეო კონცერტებზე მივდივარ. რაც ქეთა "ა სტუდიოს" წევრია, ორჯერ აღნიშნეს ეს თარიღი – ჯგუფის დაარსებიდან 20 წელი და 25 წელი. ახლახან ძალიან წარმატებული კონცერტები ჰქონდათ სიმფონიურ ორკესტრთან ერთად.
– ქეთამ მეორე მსოფლიო ომში გამარჯვების 60 წლისთავთან დაკავშირებით გამართულ კონცერტზე რომ იმღერა მოსკოვში, საქართველოში მოღალატე უწოდეს. როგორი იყო მაშინ დედის რეაქცია?
– როგორც აღნიშნეთ, ეს იყო 60 წლისთავი მეორე მსოფლიო ომში გამარჯვების და რუსეთში ჩამოსული იყო 9 ქვეყნის პრეზიდენტი. ეს კონცერტი გაიმართა "ლუჟნიკების" სტადიონზე. ქეთა ამ კონცერტზე რომ გავიდა, ქართველი ვეტერანები, ვინც მოსკოვში ცხოვრობენ, ხელებს უკოცნიდნენ, შვილო, გმადლობთ, ერთი ქართველი მაინც გამოხვედი ამ კონცერტზეო. რუსეთის მთავრობამ ამ კონცერტისთვის სულ 8 მომღერალი აარჩია, მათ შორის "ა სტუდიო". ჯგუფმა იმღერა ქართველი მუსიკოსის და პოეტის, ბულატ ოკუჯავას სიმღერა კინოფილმიდან "ბელორუსიის ვაგზალი". რატომ ატეხეს ასეთი ამბავი? რა, პარტიზანების სიმღერა შეასრულა თუ "კატიუშა"?! რატომ არის მოღალატე?! ქეთა არის მომღერალი და, თუ რეჟისორი კონცერტზე ჩააცმევს ტომარას, ისიც ჩაიცვამს...
ვისთვისაც ქეთა მოღალატეა, ის ჩემთვის არის მოღალატე, მოღალატეა საქართველოსი და იმ ხალხის, ვინც ამ ომში დაიღუპა. როგორც მახსოვს, მეორე მსოფლიო ომს უამრავი ქართველი შეეწირა.
– თქვენს დედაშვილობაზე გვიამბეთ. როგორ ყალიბდებოდა თქვენი ურთიერთობა ბავშვობიდან დღემდე?
– ქეთა არ იყო რთული, პრეტენზიული, მომთხოვნი ბავშვი. რასაც ვუკეთებდი, ყველაფრით კმაყოფილი იყო. ჩვენ არასოდეს გვიჩხუბია, შეიძლება იმიტომ, რომ ყველგან დავყვებოდი. ერთადერთი, რაც არ მომწონდა, ის იყო, რომ კონცერტების გამო სკოლის გაცდენა უწევდა, ამიტომაც სათანადოდ ვერ სწავლობდა.
მე ქიმიკოსი ვარ, ანალიტიკური ტვინი მაქვს. ყოველთვის მინდოდა, რომ მასაც კარგად სცოდნოდა მათემატიკური საგნები, მაგრამ ის ჰუმანიტარია. ერთი რამ კი აღსანიშნავია, არასოდეს ყოფილა ზარმაცი და ყოველთვის ბევრს შრომობდა ჩამწერ სტუდიაში თუ გადასაღებ მოედანზე.
ის, რომ ქეთა დღეს მღერის, კომპოზიტორ ოთარ ტატიშვილის დამსახურებაა. ოთარი სულ ჩვენ გვერდით იდგა და დღემდე უახლოესი მეგობრები ვართ.
– ქმრის გარეშე, მარტო ზრდიდით შვილს. მარტოხელა დედობა არ იყო რთული?
– ქმარს არ გავშორებივარ, მე და ანდრო ბოლომდე ცოლ–ქმარი ვიყავით. როდესაც ისეთი მთავრობა მოვიდა, რომ კანონიერ ქურდებს აქ აღარ დაედგომებოდათ, ყველა გადაიხვეწა საზღვარგარეთ. ჩემი მეუღლე მოსკოვში წავიდა. ქეთა "ა სტუდიოში" რომც არ ყოფილიყო, ჩვენ მაინც ვაპირებდით მოსკოვში საცხოვრებლად წასვლას. შეიძლება აქ ასე ამბობენ, რომ ჩვენ გაშორებულები ვიყავით, მაგრამ იმ პერიოდში ყველა ცოლი გაშორებული იყო ქმარს, იგივე ნატო დუმბაძე, იმიტომ, რომ ჩვენ კრიმინალების ცოლები ვიყავით. კანონიერი ქურდი როცა გყავდა ქმარი, ის ვერ გაჩერდებოდა საქართველოში.
ჩვენ კარგი ოჯახი გვქონდა. ეს საქართველოა და ყველამ ძალიან კარგად იცის, რომ ყოველ მეორე ოჯახში ასეთი "პროფესიის" ხალხი იყო. ისინი არიან ჩვეულებრივი ადამიანები. არაფერი სასწაული მათში არ არის.
– რას ნიშნავს, იყო კანონიერი ქურდის ცოლი?
– ეს არის აბსოლუტურად სხვა თემა, რომელსაც დელიკატურად ვუდგები. ქმრის სტატუსი ჩემთვის არანაირ სირთულეს წარმოადგენდა. მე ანდროს ცხოვრებაში არ ჩავრეულვარ და ჩემს ქმარს თავისი მეორე ცხოვრება არასოდეს განუხილავს ოჯახში.
– ქეთასთვის მამის სტატუსს ხელი არ შეუშლია?
– რა თქმა უნდა, არა. ჯერ ერთი, იმიტომ, რომ ქეთას საქმიანობაში არასოდეს ერეოდა და არ აინტერესებდა. ჩემი მეუღლე ექიმების ოჯახიდან იყო, პროფესორი მშობლები ჰყავდა. ყოველთვის უნდოდა, რომ ქეთაც ექიმი ყოფილიყო, თუმცა ის ყოველთვის ეწინააღმდეგებოდა ამაში. ერთადერთი შეზღუდვა, რაც ქეთას მამისგან ჰქონდა, ის იყო, რომ არ მოსწონდა, როცა მოკლე კაბას ან დეკოლტეს იცვამდა. მაგრამ, როცა მოსკოვში ნახა მისი გამოსვლები, დიდი ბედნიერებით ივსებოდა და მერე უკვე არანაირი გართულება ჰქონია.
– თქვენი ქმრის გარდაცვალების შემდეგ ათასნაირი ვერსია გაჩნდა. რეალურად რა მოხდა, რითი გარდაიცვალა?
– გავარდა ხმა, რომ ნარკოტიკებისგან მოკვდა, მაგრამ ეს არ არის სიმართლე. ოფიციალური ვერსია ასეთია: ანდრო დაჭერილი იყო, ინერვიულა და ციხეში გულის შეტევით გარდაიცვალა. ჩვენთვის ეს ყველაფერი ძალიან მოულოდნელი იყო და მძიმე პერიოდი დაგვიდგა.
ანდრო ახალგაზრდა კაცი იყო, ჩემზე 9 წლით უმცროსი. ერთად 28 წელი ვიცხოვრეთ. როცა მისი გარდაცვალება შევიტყვეთ, ქეთა იმ საღამოს საზღვარგარეთ ტურნეში მიფრინავდა. ატირებული წავიდა და დაკრძალვის დღეს რამდენიმე საათით ჩამოფრინდა. ჩემთვის და ქეთასთვის ანდროს გარდაცვალება დიდი ტრაგედია იყო. მე სადღაც, გულში, მაინც სულ მეშინოდა მისი მომავლის...
– რუსულმა შოუბიზნესმა და პრესამ ქეთა თოფურიას ქორწილი წლის ქორწილად აღიარა. ალბათ იმ დღეს უბედნიერესი დედა იყავით.
– ეს ქორწილი გაკეთდა ქეთას კოლეგებისთვის ორშაბათს. ეს არის კვირის ის დღე, როცა მომღერლები თავისუფლები არიან. პუგაჩოვას ქმრის, გალკინის დაბადების დღეზე გადაწყდა მათი ქორწილის თარიღი, ალა პუგაჩოვამ აირჩია და თან დაემთხვა ქეთას დაბადების დღეს – 9 სექტემბერს. რუსეთში რომ წლის ქორწილად აღიარებენ ქორწილს, ესე იგი მართლა კარგი გამოვიდა, თუმცა ქეთას ქორწილი სამკაციანი რომ ყოფილიყო, ჩემთვის მაინც კარგი იქნებოდა. არასოდეს ვყოფილვარ მეშჩანი. იყო პერიოდები, როცა დიდი ფული მქონდა და იყო პერიოდები, როცა საერთოდ არ მქონდა. მე ყველაფერი მაქვს გამოვლილი.
რაც შეხება ემოციებს, დამიჯერებთ, რომ არაფერი მახსოვს? ძალიან ვნერვიულობდი, მაგრამ რა მანერვიულებდა, არ ვიცი. ლიოვას ოჯახს კარგად ვიცნობდი, მისი მშობლებიც და დაც ჩემი ახლო მეგობრები არიან, მაგრამ მაინც ვღელავდი. ქორწილის ჩანაწერს რომ ვუყურე, ვნახე, რომ სულელივით დავდიოდი. ერთი საათით ადრე მივედი საქორწილო დარბაზში. როცა ქეთა და ლიოვა შემოვიდნენ რესტორანში, მაშინ ვნახე პირველად ქეთას საქორწილო კაბა. შოუბიზნესს უნდოდა, რომ ეს ქორწილი გამართულიყო. თავიდან ქეთა ამბობდა, რომ მას არ სურდა ქორწილის გადახდა, მაგრამ მერე როგორც აღმოჩნდა, სდომებია.
– ლიოვა გეიხმანი სასურველი სასიძო იყო თქვენთვის?
– ქეთა და ლიოვა 3 წელი ხვდებოდნენ ერთმანეთს. მას კარგად ვიცნობდი. ლიოვა ჩამოყალიბებული პიროვნებაა, ქეთაზე უფროსია. ჩემი სიძე ჭკვიანი ადამიანია, ძალიან მიყვარს. სასურველი სასიძო ნამდვილად იყო, მაგრამ ჩემი მოწონება არაფერს ნიშნავდა და არც ახლა ნიშნავს, მთავარია, ქეთას მოსწონს და უყვარს.
– როგორ გაგაცნოთ ქალიშვილმა მომავალი ქმარი?
– როცა ანდრო დაიჭირეს, სახლში ამოვიდა ჩემ სანახავად და მითხრა, თუ რამეში დაგჭირდებით, თქვენ გვერდით ვარო. ერთი წელი იცხოვრეს ერთად ისე, რომ ხელი არ ჰქონდათ მოწერილი. ქეთამ მე, ბიძამისს, მამამისის მეგობრებს გვითხრა, რომ ერთად აპირებდნენ ცხოვრებას და ცალკე გადასვლას. ლიოვა ტრადიციული ოჯახიდანაა. რუსი ებრაელები არიან. მამამისი აკადემიკოსია, დედა – უცხო ენების სპეციალისტი. ლიოვასგან მოდიოდა ინიციატივა, რომ დაქორწინებულიყვნენ. ორ დღეში ერთხელ მეკითხებოდა, როდის გვექნება ქორწილიო. მე კი ქეთასთან გადავამისამართებდი ხოლმე ამ კითხვით. ქეთა არ ჩქარობდა.
– ახლა როგორია მათი ცოლქმრული ცხოვრება, როგორ ეგუება მომღერალი ცოლის რეჟიმს ქმარი?
– ქმრისგან ქეთას არანაირი შეზღუდვა აქვს. იქ არ წახვიდე, აქ არ წამოხვიდეო – მათ ურთიერთობაში ასეთი რამ არ არსებობს. ერთმანეთი უყვართ და ენდობიან. ასეთი პროფესიის ქალი რომ მოგყავს ცოლად, ყველაფრისთვის მზად უნდა იყო. გასტროლებზე, რასაკვირველია, ვერ დაჰყვება. ლიოვა ბიზნესმენია, მას თავისი საქმე აქვს.
– ბებიობისთვის ხომ არ ემზადებით?
– ჩემი წლები მიდის, მინდა, ბებია გავხდე. ქეთას არ აქვს იმის გაჭირვება, რომ შვილს ძიძა ვერ აუყვანოს ან სათანადო ყურადღება ვერ მიაქციოს. ამ ყველაფერს ლიოვა არ სჭირდება, თავისი ფინანსებითაც შეძლებს შვილის უზრუნველყოფას. ქეთა მატერიალურად იმდენად მყარად დგას, რომ ოჯახის რჩენა არ გაუჭირდება. ლიოვასაც და ქეთასაც ძალიან უნდათ შვილი, მაგრამ ჯერჯერობით ორსულად არ არის. ლიოვას მაშინაც უნდოდა შვილი, როცა ხელი არ ჰქონდათ მოწერილი. მას ჰყავს ერთი შვილი.
– პირველი ქორწინებიდან?
– ქორწინებიდან – არა, ლიოვას პირველი ცოლი არის ქეთა. ჩემი სიძე ქორწინებაში არასოდეს ყოფილა, ამიტომ, როგორც ლიოვას მამა ამბობს, ქეთას, ამ მხრივ, ძალიან დიდი მისია აქვს დაკისრებული... ლიოვას ჰყავს არაჩვეულებრივი გოგონა, 15 წლის სონია, რომელიც შვეიცარიაში სწავლობს. ბავშვს ძალიან უყვარს ქეთა. სონიჩკა იყო ქორწილში. ისინი ერთად დადიან დასასვენებლად. როცა სონიჩკა შვეიცარიიდან ჩამოდის, ქეთასთან ბინავდება.
ლიოვას ქართული მენტალიტეტი აქვს. ქეთა ხანდახან ამბობს, მგონი, ქართველიაო. არაფერი ეშლება.
ლანა კიკნაძე, ჟურნალი სარკე