რატი დურგლიშვილი მაკა ზამბახიძის გარეშე იწყებს სიმღერას

მომღერალი რატი დურგლიშვილი სოლო კარიერის კეთებას იწყებს, ანუ დუეტ "ჯორჯიასგან" დამოუკიდებლად და თავისი განუყრელი პარტნიორის, მაკა ზამბახიძის გარეშე იმღერებს. წინ ამბიციური მიზანი აქვს დასახული – უცხოეთის შოუბიზნესში უნდა დაიმკვიდროს თავი. ნაბიჯებს დგამს. ცოტა ხნის წინ დაბრუნდა მილანიდან, სადაც უცხოელ პროდიუსერებს შეხვდა. ამავდროულად მუშაობს პირველ საავტორო ალბომზე, რომელშიც მის მუსიკაზე შექმნილი სიმღერები შევა. ერთი სიტყვით, 32 წლის ასაკში მისი ცხოვრება მნიშვნელოვნად იცვლება, რაზეც თავად უამბობს "სარკის" მკითხველებს.
– რატი, როგორც შევიტყვეთ, ცოტა ხნის წინ მილანიდან დაბრუნდით. თუ საიდუმლო არ არის, რა მიზნით იყავით იქ წასული?
– ეს იყო საქმიანი ვიზიტი. პირველ ალბომზე ვმუშაობ, სადაც ჩემი სიმღერები შევა. ამასთან დაკავშირებით სხვადასხვა ქვეყნის პროდიუსერებთან მქონდა შეხვედრები. მინდა, ჩემი საქმიანობა საზღვარგარეთ გავაგრძელო.
– საზღვარგარეთულ შოუბიზნესში ფეხის მოკიდება რამდენად რეალურია ქართველი მომღერლისთვის?
– დიდი ხანია ეს ოცნებად მაქვს. მე აღარც ვცდილობ საზღვარგარეთ გასვლას, თვითონ ცდილობენ ჩემთან თანამშრომლობას. ერთ პროდიუსერს რომ გაიცნობ, შემდეგ კოლეგებს თავად გაკავშირებენ. ამ პერიოდში დაახლოებით 80 პროდიუსერს შევხვდი უკვე. ყველას თავისებური შემოთავაზება აქვს. ევროპელ ხალხთან უფრო ადვილად ვამყარებ კონტაქტს. ამერიკელები ბევრ რამეში გიწყობენ ხელს, ამას საკუთარი გამოცდილებით გეუბნებით. ყველაფერს აკვირდებიან – ნიჭს, გემოვნებას თუ ინდივიდუალიზმს. ჩემს პორტფოლიოში წერია, რომ ვხატავ, ვწერ სიმღერებს და ეს მათ დაინტერესებას იწვევს, თუმცა არ მინდა, ნაადრევი პროგნოზები გავაკეთო.
– თქვენი პირველი ალბომი როგორი იქნება, რა სიმღერები შევა?
– ეს ჩემი პირველი საავტორო ალბომი იქნება. სიმღერები ბრიტანული სტილის გამოვიდა. ყველა უცხოენოვანია. რამდენიმე სიმღერა უცხოელმა პროდიუსერებმა შეიძინეს კონტაქტების საშუალებით. კონტრაქტებიდან გამომდინარე, ალბომზე ვრცლად საუბარი ამჯერად არ შემიძლია.

– ბევრი ქართველი მომღერალი ცდილობს რუსულ შოუბიზნესში ადგილის დამკვიდრებას. თქვენ რატომ აირჩიეთ უფრო რთული, დასავლური გზა?
– რუსული შოუბიზნესი არ არის ჩემი სტილი. უფრო ბრიტანული განხრით მივდივარ. ახლა სწორედ იმას ვაკეთებ, რაც მომწონს. ვინც ჩემს სიმღერებს მოუსმინა, უარყოფითი შეფასება არავის გაუკეთებია. დიდი ინტერესი მოდის ევროპელებისგან. სულ მაკვირდებიან. ზოგადად ქართველებს გვაქვს ჩვენთვის დამახასიათებელი ქარიზმა. ძალიან მიხარია, რომ ქართველი ვარ. ამ პატარა ქვეყანაში იმდენი რამ მოგვცა ღმერთმა, რომ სხვაგან გახედვა არ მოგინდება, თუმცა შოუბიზნესში მუშაობა მცირერიცხოვან ერში რთულია.
– რა ბედი ეწევა დუეტ "ჯორჯიას", თქვენი და მაკა ზამბახიძის ურთიერთობა როგორ გაგრძელდება?
– დუეტი არ დაშლილა, თუმცა მისი არსებობა არ გამორიცხავს იმას, რომ სოლო კარიერაზეც ვიფიქროთ. ბევრი დუეტის და ჯგუფის წევრები სოლო კარიერასაც მიჰყვებიან. რაც შეეხება ჩემი და მაკას ურთიერთობას, ჩვენ მეგობრები ვართ. საერთოდ, როცა მეგობარს ვიძენ, მას აღარ ვკარგავ და ამ შემთხვევაშიც ასე იქნება.
– თქვენი იმიჯით თუ ვიმსჯელებთ, გიყვართ მოდურად, ახალი ტრენდების გათვალისწინებით ჩაცმა. ფიქრობთ, რომ მომღერლისთვის, ზოგადად შოუბიზნესის წრიდან ცნობილი ადამიანისთვის ჩაცმულობა მნიშვნელოვანი ფაქტორია?
– მოდის ტენდენციები მაინტერესებს, მაგრამ ვიცვამ იმას, რაც მომწონს და მიხდება. მილანში მქონდა ასეთი შემთხვევა: ჩემი საყვარელი ბრენდების ერთ–ერთ მაღაზიაში სამოსს ვიზომავდი და შევნიშნე, რომ რამდენიმე ადამიანი თვალს არ მაშორებდა. ცოტა შევწუხდი კიდეც. ბოლოს ერთ–ერთი მოვიდა და მითხრა, რომ დიზაინერებთან თანამშრომლობს, ეძებს ახალ სახეებს და მოეწონა, თუ როგორ შევუხამე სამოსი ერთმანეთს, ვიზუალურადაც მოვეწონე და კონტაქტები გავცვალეთ. ასეთი შემთხვევითობით შეიძლება რომელიმე ბრენდის სახე აღმოვჩნდე.
მიყვარს ჩაცმა. ყოველთვის ვგრძნობ ყურადღებას, ჩემი სტილიდან გამომდინარე. ასე ხდებოდა მილანშიც. საქართველოში ბევრად ვაკონტროლებ თავს ჩაცმულობის მხრივ, საზღვარგარეთ კი ისე ვიცვამ, როგორც მომწონს. ზოგადად, იმ ქვეყნის მოდის ტენდენციას მივყვები, სადაც ჩავდივარ... პოპულარული შეიძლება გახდე სამოსის გახდით. მე კი მინდა, ჩემი შემოქმედება აინტერესებდეთ. ყველაფერი უნდა სცადო.
– წარმატებას უარყოფითი მომენტებიც სდევს, თუნდაც ჭორები, გადაჭარბებული ყურადღება გარშემომყოფთაგან. ეს თქვენთვის შემაწუხებელია?
– უარყოფითი ემოცია გამომიცდია, მაგრამ არ მაღელვებს, რადგან ყოველთვის ჩემი ცხოვრებით ვარ დაკავებული. არ მაინტერესებს, ვინ რას ამბობს ჩემზე. ამას რომ აჰყვე, მათი ცხოვრებით უნდა დაკავდე და ჭორიკანა გახდე, მე კი სიმღერა მირჩევნია. ამავდროულად, თუ შენზე არ ლაპარაკობენ, ე.ი. საინტერესო არ ხარ.
– მშობლები თქვენს ყველა ნაბიჯს მხარს უჭერენ?
– იმდენად ვენდობით ერთმანეთს, რომ მათგან რამეზე უარი არ მახსოვს. ყოველთვის გვერდით მიდგანან. ძალიან ვამაყობ ჩემი მშობლებით, მათ აბსოლუტურად სწორად გამზარდეს. კმაყოფილი ვარ ჩემი ცხოვრებით, იმით, რომ სიკეთის გაკეთება შემიძლია, რომ ბოროტი არ ვარ. ამ ღირებულებებზე გამზარდეს მშობლებმა. მათი შეფასება ჩემთვის ყოველთვის მნიშვნელოვანია.
– მშობლები ალბათ თქვენი პირადი ცხოვრებითაც განსაკუთრებულად არიან დაინტერესებულნი.
– ბოლო დროს მართლა ხშირად დაიწყეს საუბარი იმაზე, რომ დროა, ცოლი მოვიყვანო. ვფიქრობ, კარიერაში ოჯახი ხელს შემიშლის. ორივე ერთად, წარმატებული კარიერა და ოჯახი, არ გამოდის. ამიტომ ჯერ ოჯახს არ შევქმნი.
– თუკი საბოლოოდ მაინც გადაწყვეტთ ცოლის მოყვანას, როგორი ქალი წარმოგიდგენიათ გვერდით?
– ალბათ სტერეოტიპი და იდეალი მაქვს... რადგან ამდენი ხანი არავინ გამოჩნდა, ვინც დამაინტერესებდა, ე.ი. გარკვეული მოთხოვნები მაქვს. ამავდროულად, ღმერთის და ოჯახის გარდა, ჩემზე წინ ვერავის ვაყენებ. პირადი ცხოვრება მეექვსე პლანზე მაქვს გადაწეული. იმდენად სრულყოფილად ვცხოვრობ ჩემი პროფესიით, კარგი მეგობრებით თუ სიტუაციით, რომელიც თავად შევიქმენი, რომ ვერავის მივცემ უფლებას, ეს დამინგრიოს. როცა ახალი ადამიანი შემოვა ჩემს ცხოვრებაში, ის ჩემი მეგობარიც უნდა იყოს.
– ქალის გარეგნობას დიდ მნიშვნელობას ანიჭებთ?
– ალბათ ამას აქვს მნიშვნელობა, რადგან ძალიან მიყვარს ლამაზი ადამიანები. იმას ვერ ვიტყვი, რომ ამ მხრივ სტერეოტიპი მაქვს და აუცილებლად ქერა ან შავგვრემნები მაინტერესებს. გარეგნობაზე მეტად მაინც ის არის მნიშვნელოვანი, რომ ჩემნაირი იყოს.
– როგორი ხართ თქვენ?
– ვერ ვიტყვი, რომ საკუთარი თავი შესწავლილი მაქვს. ვინც ამას ამბობს, ალბათ გენიოსია. მე მიჭირს საკუთარი თავის შეცნობა. დღეს ასეთი ვარ, ხვალ შეიძლება რადიკალურად შევიცვალო. რთული ხასიათი მაქვს, მალე მბეზრდება ერთი და იგივე.
– მათ შორის – ადამიანებიც?
– მეგობრები არასოდეს მომბეზრებია, მაგრამ არ ვიცი, პირად ცხოვრებასთან დაკავშირებით რა როგორ იქნება.
– როგორი რეჟიმით ცხოვრობთ?
– მეგობრები სულ მეხუმრებიან, შენნაირად რომ ვცხოვრობდეთ, უბედნიერესები ვიქნებოდითო, რადგან სულ ვისვენებ. საყვარელ საქმეს ვაკეთებ, ამიტომ ამას მუშაობას ვერ ვუწოდებ – ყველგან ვისვენებ და არასოდეს ვიღლები. ცხოვრების ეს გზა მე ავირჩიე, მე შევქმენი ეს ყველაფერი. აქტიურად ვცხოვრობ. ვცდილობ, ჯანსაღი ცხოვრების წესი მქონდეს. ბოლო პერიოდში დიეტასაც ვიცავ. მინდა, ფორმაში უფრო მეტად ჩავდგე.
მანანა ნოდია, ჟურნალი სარკე