ერქან ფეთექაია – როგორ იქცა წყლის გამყიდველი ყველაზე გავლენიან მსახიობად

თურქების საყვარელმა მსახიობმა ერქან ფეთექაიამ სცენაზე ფეხი 12 წლის ასაკიდან შედგა, თუმცა მუშაობა არც მანამდე იყო მისთვის უცხო – 8 წლისა ქუჩაში წყალს ყიდდა. ის დღეს თურქეთში ყველაზე გავლენიან მსახიობად ითვლება –შეუძლია, რეჟისორს სცენა თავისი სურვილისამებრ შეაცვლევინოს, პარტნიორი მსახიობი აირჩიოს, სცენარისტს მითითებები მისცეს... ფეთექაია ქართველმა მაყურებელმა სერიალ "ქალბატონ დილას" წყალობით გაიცნო და მალევე შეიყვარა.
ერქან ფეთექაია 1971 წლის 11 დეკემბერს თურქეთის ქალაქ ელიაზიგში დაიბადა. ბავშვობა სტამბულში გაატარა. სკოლის დამთავრების შემდეგ ანატოლიის სახელმწიფო კონსერვატორიაში ჩააბარა დრამატურგიის განხრით. 12 წლის ასაკში სტამბულის სახელმწიფო თეატრში დადგმულ სპექტაკლში ითამაშა. 1993 წლიდან კი ამ თეატრის მსახიობია. დღემდე 15 სერიალში აქვს მონაწილეობა მიღებული, რომელთაგან ყველაზე დიდი აღიარება 2008 წელს გადაღებულმა "ბოლო იმედმა" მოუტანა.
2005 წელს მსახიობი საყვარელ ქალზე დაქორწინდა და ერქან და დიდემ ფეთექაიები დღემდე ერთად ბედნიერად ცხოვრობენ. მათ ერთი ვაჟი ჰყავთ.
ამჟამად ერქანს ახალ სერიალში იღებენ, რომლის სახელწოდება ჯერ გასაიდუმლოებულია. ცნობილი მხოლოდ ისაა, რომ მსახიობი ბიზნესმენს განასახიერებს და მისი პარტნიორი ულამაზესი ნურგულ ეშელჩაი იქნება.
ერქან ფეთექაიას უკეთ გასაცნობად გთავაზობთ ინტერვიუს, რომელიც ჟურნალ "ელში" გამოქვეყნდა.
– თქვენი ეკრანული ცხოვრება დილის გადაცემით დაიწყო, 12 წლის ასაკში კი სახელწიფო თეატრის სცენაზე სპექტაკლში ითამაშეთ, შემდეგ სერიალები და პოპულარობა...
– ჩემი ეკრანული ცხოვრება დილის გადაცემით არ დაწყებულა. ყველაფერი კამერის წინ ხუმრობით დაიწყო, როცა ფარული კამერის წამყვანი ვიყავი. შემდეგ დილის გადაცემის წამყვანად გადამიყვანეს, ბოლოს კი სერიალშიც მიმიწვიეს. 12 წლისამ ავტობუსის გაჩერებაზე გავიცანი ადამიანი, რომელმაც სპექტაკლში მონაწილეობა შემომთავაზა. მე უნდა შემეცვალა პატარა მსახიობი, რომელიც იმ დროს ავად იყო და ყველაფერი აქედან დაიწყო. შემდეგ გადავწყვიტე, კონსერვატორიაში დრამატურგიის განხრით ჩამებარებინა.
ისე, მუშაობა გაცილებით ადრე დავიწყე. 8 წლის ვიყავი, როდესაც ქუჩაში წყალს ვყიდდი. იმიტომ კი არ ვმუშაობდი, რომ ოჯახს უჭირდა, არა, უბრალოდ ქუჩაში ყოფნა მომწონდა.
– როგორ ფიქრობთ, თეატრში და კამერის წინ მუშაობა ერთამენთისგან განსხვავდება?
– ვფიქრობ, ადამიანს, რომელიც თეატრში თამაშობს, კამერის წინაც მშვენივრად შეუძლია მუშაობა.
– თქვენ ითამაშეთ სერიალში "ბამბის ველის პრინცესა", რომელიც საკმაოდ დიდხანს გადიოდა ეკრანზე, წარმატებულიც იყო, მაგრამ მოხდა ისე, რომ სერიალი საკუთარი ნებით დატოვეთ. არ გაგიჭირდათ მასში ხანგრძლივი თამაშის შემდეგ სხვა სერიალზე გადართვა?
– არა. რა თქმა უნდა, ეს ყველა მსახიობს არ შეუძლია. თურქეთში ცოტა მსახიობია, ყველა სერიალი ერთმანეთს ჰგავს, ხანდახან მოსაწყენია კიდეც, მაგრამ ყველაფრის მიუხედავად, მე მიყვარს ჩემი საქმე. მე ვითამაშე სერიალში "მაწანწალა", რის შემდეგაც მეშინოდა, რომ მასში შესრულებულ როლს ჩემს კარიერულ ცხოვრებაზე უარყოფითად არ ემოქმედა. განსხვავებული იყო და ამიტომაც მივიღე მასში მონაწილეობა.
– ცნობილია, რომ გარდა სამსახიობო ნიჭისა, არაჩვეულებრივი ხმაც გაქვთ, შემოთავაზება რომ მიიღოთ მუსიკალური სფეროდან, დათანხმდებით თანამშრომლობაზე?
– არა, რადგან ვერ შევძლებ, ეს ძალიან ძნელია. ნოტებთან 12 საათს ნამდვილად ვერ "ვიმუშავებ". ყველამ თავისი საქმე უნდა აკეთოს. მე არ ვარ პროფესიით მუსიკოსი და არ მესმის, რატომ უნდა ვიმღერო.
– სერიალების გადაღება საკმაოდ ხანგრძლივი პროცესია, როგორ უძლებთ ამას?
– რა თქმა უნდა, ძნელია. ჩემი აზრით, თურქეთში სისტემა უნდა შეიცვალოს და მსახიობმა დღეში 8 საათზე მეტი არ უნდა იმუშაოს. ჩვენ კი, ყველაზე მცირე, დღეში 12 საათი ვმუშაობთ და ენერგია გვეცლება. ეს არა მარტო მსახიობებისთვის, გადამღები ჯგუფისთვისაც რთულია. ვფიქრობ, სურათის ხარისხზეც უარყოფითად აისახება.
– სერიალში "დაკარგული დრო" უარყოფითი პერსონაჟის, კაპიტან ალის როლი განასახიერეთ. ეს თქვენს იმიჯზე ცუდად ხომ არ აისახა?
– ვშიშობდი, რომ ამ როლის შესრულება უარყოფითად აისახებოდა ჩემს იმიჯზე, მაგრამ ამ სერიალმა 32 ჯილდო მომიტანა.
– "ბამბის ველის პრინცესას" გადაღებები ქალაქ ადანაში მიმდინარეობდა, შემდეგ კი "ქალბატონი დილაზე" გადაერთეთ, რომელიც კვლავ ამ ქალაქში უნდა გადაეღოთ. მოკლედ, ადანაში საკმაოდ დიდხანს დარჩით, არ მოგბეზრდათ იქ ყოფნა?
– არა, არ მომბეზრდა, ადანა ძალიან მიყვარს. ასე რომ არ ყოფილიყო, წლების განმავლობაში იქ ნამდვილად ვერ გავჩერდებოდი.
– უამრავი თაყვანისმცემელი გყავთ, რომლებიც თქვენთან ერთად ფოტოების გადაღებას ითხოვენ. არ იღლებით მათთან ურთიერთობით?
– მიყვარს ჩემი თაყვანისმცემლები და მათგან არასოდეს ვიღლები!
– არის ისეთი როლი, რომლის თამაშიც ძალიან გინდათ?
– მინდა, ვითამაშო ქურდის როლი, რადგან ბავშვობიდან მიყვარს ფილმები ძარცვაზე და გამოძიებაზე.
– ოჯახი სტამბულში გყავთ, თქვენ კი გადაღებებზე სხვადასხვა ქალაქში გიწევთ ყოფნა. ფაქტობრივად, ოჯახს ხართ მოწყვეტილი, არ გიჭირთ ასე ცხოვრება?
– რა თქმა უნდა, მიჭირს. შარშან ცოლ–შვილი ჩემთან ერთად იყვნენ ადანაში. ჩემთვის ცოლ–შვილი ყველაფერია. მათაც ძალიან კარგად ესმით, რა პროფესია და სამსახური მაქვს.
მოამზადა თათია ბოჭორიძემ, ჟურნალი სარკე