"მაზლის ცოლმა ლამის ჩემი ბინიდან გამაძევოს"

გამარჯობათ! მინდა, ჩემი ამბავი მოგიყვეთ და გთხოვთ, დამიბეჭდეთ. აღარ ვიცი, ჩემი პრობლემა ჩხუბის გარეშე როგორ მოვაგვარო. ვერ ვიტან ოჯახურ კონფლიქტებს, არ მინდა, ქვეყნის სალაპარაკო გავხდე, მაგრამ უკვე ვეღარ ვუძლებ იმას, რაც ჩემს სახლში ხდება.
ერთი წელია, რაც ჩემი მაზლი და მისი ცოლ–შვილი ბინაში შემომისახლდნენ. აქვე ვიტყვი, რომ ეს ბინა ჩემი და ჩემი ქმრის ნაყიდია, დედამთილ–მამამთილმა მხოლოდ მცირედი თანხა დაგვიმატეს. ჩვენს ერთ შვილთან ერთად ბედნიერად ვცხოვრობდით, ქმარს თვალებში შევციცინებდი და კარგი წყვილი ვიყავით. ახლა კი მეუღლის მიმართაც ვეღარ ვიჩენ ყურადღებას და მეშინია, ჩვენს ურთიერთობაში ბზარი არ გაჩნდეს. მაზლის ცოლი ისე იქცევა, თითქოს მისი სახლი იყოს. ჩემს ბინაში სტუმრად ვიქეცი, თვითონ კი მასპიძელია. ჩემი თქმა არც დასჭირვებია, ისე აითვისა ყველა კუთხე–კუნჭული. თან მუდმივად მახსენებს, რომ ამ ბინაში მისი დედამთილ–მამამთილის ნაშრომიც დევს და ამიტომ მასაც ისევე აქვს უფლება, აქ იცხოვროს, როგორც მე და ჩემს ქმარ–შვილს.
ნებისყოფა მოვიკრიბე, რომ არაფერი მეთქვა, თანაც ჩემზე პატარაა და არ მინდოდა, მის დონემდე დავცემულიყავი. ის ჩემი მოთმინებით სარგებლობდა და ყველანაირ ზღვარს ამიტომაც გადააბიჯა.
ამას წინათ რაიონიდან დედა მესტუმრა. მან კი ძალიან უხეშად, დამცინავად მკითხა, შენი და შენი ქმრის შუაში დააწვენ თუ მე და ჩემმა ქმარმა ჩავიწვინოთ ლოგინშიო. ვეღარ მოვზომე, ოთახში შევათრიე და ვუთხარი, ახლა შეიძლება დაგახრჩო, შენს თავს ვერავინ გამომწიწკნის ხელიდან, სანამ დედაჩემი აქ იქნება, მანამდე ჩემმა თვალებმა არ დაგინახოს, თუ გინდა, ქუჩაში იცხოვრე–მეთქი. მართლა შეეშინდა, შვილს ხელი მოჰკიდა და სახლიდან გავარდა.
ის ქალბატონი დედამთილთან წავიდა და ჩემზე იჭორავა, სახლიდან გამომაგდოო. თურმე ისიც კი თქვა, მე და ჩემს შვილს საჭმელს გვიმალავდაო. ეს საშინელი ტყუილია. რად უნდოდა ნებართვა, ყველაფრის ბატონ–პატრონი თვითონ იყო! დედამთილმა შემომითვალა, აქ ვიწროდ ვართ, ისევ თქვენთან უნდა მოვიდნენ და ძალიან გთხოვ, როგორმე აიტანე, სანამ თავიანთ ბინაში გადავლენო. ისე მელაპარაკა, თითქოს მე ვავიწროვებდი ოდესმე, არადა პირიქით იყო. რომ მობრძანდა, ბოდიშიც არ მომიხადა, ისე შევარდა საძინებელში და რაღაცეების ლაგება დაიწყო. ამას ვეღარ ვუძლებ. ქმარს ვეუბნები, რომ ბინა ვიქირაოთ და გადავიდეთ. გაგიგიათ, რომ საკუთარი ბინიდან გაძევებდნენ? მე სწორედ ასეთი რამ დამემართა.
"სარკის" ერთგული მკითხველი