ნატალია ქუთათელაძე: "ჩემი ქმარი არასტანდარტულ ქართველ ცოლთან ცხოვრებას უნდა შეეგუოს"

მეცოსოპრანო ნატალია ქუთათელაძე სერიოზული ნახტომისთვის ემზადება – ოქტომბერში სოლო კონცერტს გეგმავს. პედაგოგი ეუბნება, რომ ის ამისთვის უკვე მზად არის. 22 წლის მომღერალს ბებია და დედა, მომღერლები ნანი ბრეგვაძე და ეკა მამალაძე უმაგრებენ ზურგს, რომ თავისი შესაძლებლობები ბოლომდე გამოიყენოს. სანამ ამ საპასუხისმგებლო კონცერტისთვის სერიოზულ მზადებას დაიწყებს, მანამდე ნატალია იტალიის მონახულებას გეგმავს.
– ნატალია, კარგად გარუჯულხართ. ზღვაზე დაისვენეთ?
– რამდენიმე დღის წინ დავბრუნდი გონიოდან. იქ სახლი გვაქვს და ყოველ წელს ჩავდივართ. ჯერ ნანი მიდის, შემდეგ – ეკა, მერე მე ჩავდივარ მეგობრებთან ერთად, შემდეგ – ჩემი ძმები თავიანთი ოჯახებით... მოკლედ, სერიოზული რიგი დგას იქ ჩასვლაზე. ყველაზე დაუვიწყარ დროს იქ ვატარებ.
– 21 ივლისს ქალბატონი ნანის დაბადების დღე იყო. როგორ აღნიშნეთ ეს დღე?
– ეკამ რაღაცნაირად თავი მოაბა და კახეთში წავედით. ბებია ამბობდა, ასეთი დაბადების დღე არასოდეს მქონიაო. ნანი თავის ასაკს არ ამხელს, მაგრამ ისე გამოიყურება, უნდა თქვას. მისი ასაკი აბსოლუტურად არ შეეფერება მის გარეგნობას. ნანის დაბადების დღე ძალიან მიყვარს, უამრავი ადამიანი ულოცავს, ლამაზ თაიგულებს ჩუქნიან, წერილებს უგზავნიან.

– თავად რა საჩუქარს უკეთებთ ხოლმე ქალბატონ ნანის?
– ბევრ სითბოს, ალერსს, კოცნას ვჩუქნი. ეს არის მისთვის განსაკუთრებული საჩუქარი.
– სპექტაკლ "ქეთო და კოტეზე" მუშაობის დროს ბათუმში ბებიასთან ერთად 3 თვე გაატარეთ. უყურებდით, როგორ მუშაობდა, როგორ უდგებოდა საქმეს. ამ თვეების განმავლობაში ალბათ მისგან ბევრი რამ ისწავლეთ.

– ის 3 თვე ჩემთვის მართლაც დიდი გაკვეთილი იყო. რეპეტიციები წარმოუდგენელი რეჟიმით მიმდინარეობდა, მას კი ერთხელაც არ დაუწუწუნია, დავიღალეო. საოცრად პოზიტიური ადამიანია. მისგან ვერასდროს გაიგონებთ უარყოფით ფრაზას. რომ ურეკავენ და ეკითხებიან, როგორ ხარო, ყოველთვის პასუხობს: "მშვენივრად", "გადასარევად!". მის გვერდით ყოველთვის სახალისოა ყოფნა, მაგრამ იმდენად ბევრ შენიშვნას იძლევა... არაფერი მოსწონს და ეს არის ერთადერთი მიზეზი, რის გამოც ჩვენ შორის კონფლიქტი წარმოიქმნება ხოლმე.
– კონკრეტულად რა არ მოსწონს თქვენში?

– ჩემი გარეგნობა, ქცევები, მანერები. უნდა, რომ იდეალური ვიყო.
– ქალბატონი ეკაც ასეთი მომთხოვნია?
– ეკა მკაცრი არ არის და მასთან დასვენებაც დიდი კომფორტია, ყველაფრის უფლებას მაძლევს. ერთადერთი, სულ მახსენებს, რომ მზეზე არ დავწვე და ვცდილობ, მათ სანერვიულო არ მივცე.
– ღამის ცხოვრება, საზღვაო ფლირტი – ეს თქვენთვის ნაცნობი შეგრძნებებია?
– წელს ნამდვილად განსაკუთრებული ზაფხული მქონდა და რაც თქვენ ჩამოთვალეთ, ყველაფერი იყო. თუმცა საზღვაო რომანი ზღვაზევე მთავრდება. იმდენად მნიშვნელოვანი გეგმები მაქვს წინ, სერიოზულ ურთიერთობებზე საუბარი ზედმეტია. ჯერ 22 წლის ვარ.
– როგორი უნდა იყოს მამაკაცი, რომელიც თქვენ გვერდით ყოფნას დაიმსახურებს?
– არ მაქვს ჩამოყალიბებული, როგორი უნდა იყოს, რა უნდა ჰქონდეს და რა – არა. მთავარია, კარგი იუმორის გრძნობა გააჩნდეს და ძალა, რომ, როგორც ქალი, მასზე ვიყო დამოკიდებული. და კიდევ, არასტანდარტული ქართველი ცოლის ცხოვრების რეჟიმს უნდა შეეგუოს, რაც ნიშნავს გასტროლებს, კონცერტებს...
– კარიერაში ასეთ წარმატებულ ქალებს ძალიან უჭირთ პირადი ცხოვრების აწყობა, ოჯახური ურთიერთობების დალაგება. ამაზე ალბათ ბებია და დედაც გელაპარაკებიან.
– კი, ბატონო, მაგრამ ჩემი ქმარიც ასეთივე წარმატებული უნდა იყოს და, რაც მთავარია, სიმღერა არ უნდა ამიკრძალოს. მე თუ ის ამიკრძალე, რითიც ვცხოვრობ, რად მინდა ასეთი ოჯახი?
– თქვენს უახლოეს გეგმებში რა შედის?
– მინდა, მომავალ წელს "ჯულიარდის" სტუდენტი გავხდე, მანამდე კი, ოქტომბერში, სოლო კონცერტი გავაკეთო. რაც შეეხება უახლოეს გეგმებს, აგვისტოს ბოლოს მე, დედა, მამიდა და მამიდაშვილი იტალიაში მივდივართ. ნანი არ მოდის, რადგან მისთვის მოგზაურობა დამღლელია და ცდილობს, ნაკლებად იფრინოს. იტალიაში ჩასვლას ვამთხვევთ სპექტაკლ "აიდას", რომელიც ვერონაში გაიმართება და მასში ანიტა რაჭველიშვილი მიიღებს მონაწილეობას. ანიტა უნიჭიერესი მომღერალია, მისი მოსმენა ბევრი რამის მომცემია ჩემთვის. გარდა ამისა, იქ ოპერის იტალიელი აგენტებიც მომისმენენ. ასეთი მოსმენებით კონკრეტულ წინადადებებს არ ველი, მაგრამ ეს მომღერლისთვის საჭიროა, რომ ბევრმა გაგიცნოს და კარიერული წინსვლა გაგიადვილდეს.
– წინსვლაში ალბათ ოჯახის სახელიც დაგეხმარებათ.
– ჩემი ოჯახის სახელი ბევრ რამეში მიწყობს ხელს და ამას მეტიჩრული ტონით არ ვამბობ. სხვასთან შედარებით შეიძლება უფრო გამიმარტივდეს გარკვეული კონტაქტების დამყარება საკმაოდ მნიშვნელოვან ფიგურებთან და, რასაკვირველია, ეს ნანის დამსახურება იქნება.
ლანა კიკნაძე, ჟურნალი სარკე