არას ბურუთ ინემლი: "ბაიაზიდის როლმა ჩემი ნერვები შეიწირა!"

თურქმა მსახიობმა არას ბურუთ ინემლიმ უამრავი ტელემანი ქალის გული დაიპყრო. მან "დიდებულ საუკუნეში" განსახიერებული უფლისწულ ბაიაზიდის როლით არც ქართველი ქალები დატოვა გულგრილი.
არას ბულუთ ინემლი 1990 წლის 25 აგვისტოს ქალაქ სტამბულში დაიბადა. პირველი მნიშვნელოვანი როლი არასმა 16 წლის ასაკში შეასრულა პოპულარულ თურქულ ტელესერიალში "დაბრუნების ხეივანი".
2013 წელს მსახიობი მთავარ როლზე დაამტკიცეს ფილმში "მაჰმუდი და მერიემი", სადაც კეთილშობილ პრინცს, მაჰმუდს თამაშობს. მერე კი, სხვა ცნობილი თურქი ვარსკვლავებივით, "დიდებულ საუკუნეში" გადაბარგდა და მე–4 სეზონიდან უფლისწულ ბაიაზიდის როლის შემსრულებლად მოგვევლინა.
ინემლი რეალურ ცხოვრებაშიც მშვენიერი სქესის ფავორიტია, თუმცა ჯერჯერობით უცოლოა. ამჟამად თურქ ლამაზმან ჯეილან ჩაპას ხვდება, რომელიც ცოტა ხნის წინ ბურაკ ოზჩივიტს დაშორდა.
გთავაზობთ ინტერვიუს მსახიობთან.
– არას, თქვენ ითამაშეთ მთავარი როლი რეჟისორ ჩაგან ირმაკის გახმაურებულ სერიალში "ჩვენ გვესმის ერთმანეთის", როგორი იყო მასთან მუშაობა?
– ჩაგანს საოცარი ენერგია აქვს, ის თავისი საქმის პროფესიონალია, ამავდროულად ძალიან ღია და გულწრფელია. ის არის რეჟისორი, რომელიც მსახიობებს ზუსტად და გასაგებად უხსნის, რა სურს მათგან.
– შემთხვევითობის გჯერათ?
– სანამ ამ ფილმში მივიღებდი მონაწილეობას, შემთხვევითობის არ მჯეროდა. ჩემი გმირის მაგალითზეც შეიძლება დავასკვნათ, რომ ყველაფერი კანონებს ემორჩილება და არაფერია შემთხვევითი.
– სერიალ "დიდებულ საუკუნეში" უფლისწულ ბაიაზიდის როლი მოირგეთ. როგორ ემზადებოდით ამ როლისათვის?
– "ჩვენ გვესმის ერთმანეთის" გადაღებების დასრულების შემდეგ ძალიან ცოტა დრო მქონდა ბაიაზიდის როლის მოსამზადებლად. პირველ რიგში, გარეგნულად უნდა შევცვლილიყავი. 13 კილოს მომატება დამჭირდა, ცხენზე ჯდომა და ფარიკაობაც ვისწავლე, რაზეც ადრე წარმოდგენა არ მქონდა. მოკლედ, ფიცხი ბაიაზიდის როლმა ჩემი ნერვები შეიწირა!
– ფიქრობთ, რომ ეს ისტორიული პერსონაჟი ხასიათით თქვენთან ახლოსაა?
– არა. მე არ მაქვს მისნაირი შესაძლებლობები, რადგან ჩვენ სხვადასხვა დროს სხვადასხვა სოციალური პირობებითა და ტრადიციებით ვცხოვრობთ. თუმცა ზოგ შემთხვევაში ვგრძნობ, რომ ყველაფერს ისე გავაკეთებდი, როგორც ამას ჩემი გმირი აკეთებდა.
– "დიდებული საუკუნის" გადაღებებმა დაგღალათ?
– არა, პირიქით. ბედნიერი ვარ და ვფიქრობ, გამიმართლა, რომ ასეთ მსახიობებთან, რეჟისორებთან და სცენარისტებთან ერთად მომიწია მუშაობა.
– თქვენ სტამბულის ტექნიკურ უნივერსიტეტში საავიაციო ფაკულტეტზე სწავლობდით. ეს ის პროფესიაა, რომელზეც ოცნებობდით?
– ბავშვობიდან ვოცნებობდი, ინჟინერი გავმხდარიყავი, თუმცა დრო გვიჩვენებს, ჯერ ყველაფერი მაინც წინაა.
– რამ გადაგაწყვეტინათ მსახიობობა?
– ჩემი უფროსი ძმა მსახიობია, და კი ტელეწამყვანი და ვოკალისტი. დედაჩემის თქმით, მსახიობობა გენში გვაქვს. მიუხედავად იმისა, რომ ინჟინრობაზე ყოველთვის ვოცნებობდი, მსახიობობა ვარჩიე. და მაინც, მე ყოველთვის მოყვარული მსახიობი ვიქნები.
– როგორ იქცევით, როდესაც ცუდ ხასიათზე ხართ?
– სასეირნოდ გავდივარ და ეს მშველის.
– რას აფასებთ ყველაზე მეტად ქალებში?
– პატიოსნებას!
– განგიცდიათ სიყვარულის ისეთი ძლიერი გრძნობა, როგორსაც თქვენი გმირები განიცდიან სერიალებში?
– არა და იმედი მაქვს, ოდესმე ასეთი ძლიერი, ნამდვილი სიყვარული მეც მეწვევა.
– ეჭვიანი ხართ?
– კი, ძალიან!
– რა გენატრებათ ყველაზე მეტად?
– სტუდენტობა.
– თქვენი აზრით, რა აკლია დღევანდელ ურთიერთობებს?
– ჩემი აზრით, ტექნოლოგიურმა მიღწევებმა ძალიან შეცვალა ურთიერთობა და საკომუნიკაციო გზები. ვირტუალურ ურთიერთობას ბევრი ხარვეზი აქვს. ვფიქრობ, უფრო ღირებული იყო, როდესაც შეყვარებულებს შეეძლოთ, ერთმანეთს სამი საათის განმავლობაში სიცივეში დალოდებოდნენ.

– არის ფილმი, რომლის ყურებაც არასოდეს მოგბეზრდებათ?
– კი, ეს "ბეტმენია".
მოამზადა თათია ბოჭორიძემ, ჟურნალი სარკე