სალომე გოგიაშვილი: "ქმარი მეუბნება, როგორც კი პლასტიკურ ოპერაციას გაიკეთებ, ერთმანეთს დავემშვიდობებითო"

ტელესახე სალომე გოგიაშვილი 5 თვის წინ მესამე შვილის დედა გახდა. ჩვილის ნათლობა კი სალომეს და მისი ქმრის, ბიზნესმენ ვახო ნიკოლაიშვილის ქორწილად იქცა. ახალნამშობიარევი პატარძალი შესანიშნავ ფორმაში იყო, ამაზე კი სალომემ ადრევე იზრუნა – ბავშვის გაჩენიდან მალე უმკაცრეს დიეტაზე დაჯდა და ძველი წონა დიდი ტანჯვით დაიბრუნა. ახლა კიდევ 5 კილოგრამის დაკლება უნდა, მაგრამ ამას უკვე ტრენაჟორებზე ვარჯიშით შეეცდება და არა – დიეტით.
– სალომე, პირველ რიგში, ქორწილზე გკითხავთ. თქვენი საოცნებო დღესასწაული გამოვიდა?
– კი, ისეთი ქორწილი გამოვიდა, როგორზეც ვოცნებობდი. ყველაფერი სპონტანურად მოხდა, ჩვენი შვილის ნათლობა ქორწილში გადაიზარდა. წინასწარ რომ მცოდნოდა, ქორწილს ვიხდიდით, ალბათ გავგიჟდებოდი, რადგან ასეთ დროს თუნდაც საქორწილო კაბის შერჩევა რთულია. მე კი საპატარძლო კაბა ძალიან მარტივად ავარჩიე. ერთ–ერთ დიზაინერს მივენდე, ვუთხარი, როგორი კაბა მინდოდა და სამ დღეში ზუსტად ისეთი შემიკერა. მინდოდა, კაბა ცოტა სექსუალური ყოფილიყო და მისი პირველი ვარიანტი მართლაც ასეთი გამოვიდა, მაგრამ ბოლოს გადავწყვიტე, დეკოლტე ცოტა დამეხურა, რომ ქმარს არ ენერვიულა. როცა ვახომ კაბა ნახა, აღფრთოვანდა. ქორწილის დღესაც რომ ეთქვა, კაბა არ მომწონსო, აუცილებლად შევცვლიდი. მის ნერვიულობას მირჩევნია, ისე გავაკეთო, როგორც მას უნდა.
– ქმარს სამოსთან დაკავშირებით აკრძალვები აქვს?
– ვიცი, ძალიან მოკლე კაბა არ მოეწონება, ამიტომ არ ვიცვამ. ძალიან გამომწვევ კაბებზე არც ვკითხავ, ჩავიცვა თუ არა. კაცი რომ ვიყო, გამომწვევად ჩაცმული ცოლი არც მე მომეწონებოდა.
– საქორწილო მაკიაჟი და ვარცხნილობა ვინ გაგიკეთათ?
– მაკიაჟს და ვარცხნილობას დიდი ხანია მე თვითონ ვიკეთებ და ქორწილის დღესაც არავინ დამხმარებია.

– აქსესუარები როგორ შეუხამეთ კაბას?
– ვახომ ქორწილის წინა დღეს წამიყვანა მაღაზიაში და სადა ყელსაბამი მიყიდა, რომელიც კაბას ძალიან მოუხდა.
– კაბის მორგებაში ალბათ სხეულის ფორმამაც შეგიწყოთ ხელი. მშობიარობის შემდეგ ადვილად დაიბრუნეთ სასურველი წონა?
– არა, ეს დიდი ტანჯვით მოვახერხე. ორსულობის ბოლო თვეებში საგრძნობლად მოვიმატე. ერთი სული მქონდა, ბავშვი გამეჩინა და აღარასდროს არაფერი მეჭამა. მშობიარობის შემდეგ მთელი დღის განმავლობაში სალათის ორ ფოთოლს, ხორცის მცირე ნაჭერს და კიტრს ვჭამდი. და ეს ერთი თვის განმავლობაში გრძელდებოდა. ჩემი ეს დიეტა სადღაც გამოქვეყნდა და სოციალურ ქსელში კომენტარებს წერდნენ, იგივე არავინ გაიმეოროს, ეს ნორმალური არ არისო. მართლა არავის ვურჩევ ასეთი დიეტის დაცვას. 3 თვე დამჭირდა ფორმაში ჩასადგომად. ახლა ზუსტად იმ წონაზე ვარ, რაც ორსულობამდე მქონდა, მაგრამ გადაწყვეტილი მაქვს, კიდევ 5 კილო დავიკლო.
– ისევ ისეთ მკაცრ დიეტას დაიცავთ?
– არა, სახლში ტრენაჟორები მაქვს და ვცდილობ, რეგულარულად თუ არა, ხანდახან მაინც ვივარჯიშო. თანაც დღის განმავლობაში ფიზიკურად დატვირთული ვარ, სამივე შვილს სხვადასხვა რეჟიმი აქვს და თითოეულს ხელშეწყობა სჭირდება. ჩემი დილა 8–ის ნახევარზე იწყება.
– როგორ ახერხებთ, ქმარ–შვილსაც სათანადო დრო დაუთმოთ და თავის მოვლასაც?
– თავის მოვლის სიყვარული ჩემში ზის. ქმარი ჩემზე ხუმრობს, პურის საყიდლადაც არ გადის, თვალებზე ლაინერი თუ არ წაისვაო. დილით ბავშვები სკოლაში რომ მიმყავს, მაშინაც მაკიაჟს ვიკეთებ. სერიალებში რომ არიან ქალები, სახლში ფლოსტებით და თან "ჩახატულები", მეც ისე ვარ. ორსულობის ბოლო თვეში სახლიდან გასვლა არ მინდოდა, ამიტომ ლამაზი ფლოსტები ვიყიდე და ტელევიზორთან ვატარებდი დროს. ერთ დღეს ჩემი ქმარი სამსახურიდან რომ დაბრუნდა, სრულყოფილი მაკიაჟით დავხვდი. მითხრა, ჩემ გარდა აქ არავინ არის და რატომ იკეთებ მაკიაჟსო. ეს კი მითხრა, მაგრამ ვიცი, ძალიან მოსწონს, ყოველთვის მოწესრიგებული რომ ვარ.
– თმა რომ მოკლედ შეიჭერით, ამაზე ქმარს რა რეაქცია ჰქონდა?
– გადავწყვიტე, ვიქტორია ბექჰემის ვარცხნილობა გამეკეთებინა. სახლში რომ დავბრუნდი, ჩემს ქმარს ძალიან მოეწონა, მეხუმრებოდა, ჩემი ვიკი მოვიდაო. მერე თმა კიდევ უფრო დავიმოკლე. საერთოდ, გარეგნობაში პერიოდულად რამეს თუ არ ვცვლი, ნევროზი მეწყება. ამიტომ ხან თმის ფერს ვიცვლი, ხან – ვარცხნილობას, მაგრამ ასე მოკლედ თმა ბავშვობის მერე არ შემიჭრია. ორსულობის პერიოდში უცებ ჩემმა თმამ მომწვანო ფერი მიიღო და ამის გამო ერთ დღეში სხვადასხვა ფერი მოვისინჯე, საღებავებმა კი თმა ძალიან დამიწვა. ბავშვის გაჩენის შემდეგ მივხვდი, ჩემს თმას აღარაფერი ეშველებოდა და შევიჭერი.
– მაკიაჟის ხელოვნებას ადვილად დაეუფლეთ?
– კი, იმდენად მიყვარს მაკიაჟის გაკეთება, რომ თავისუფალ დროს ხშირად ვჯდები სარკესთან და თვალებს სხვადასხვანაირად ვიხატავ. მერე ვარჩევ, რა უფრო მიხდება და ხელიც გამეწაფა. მაკიაჟის გაკეთებისას მთავარია, ტონალური კრემი და რუჟი კანის ფერის მიხედვით შევარჩიოთ, რომ ყელი უფრო თეთრი არ გამოჩნდეს, ვიდრე სახე და ნიღბის ეფექტი არ მივიღოთ.

– თუმცა მუდმივი მაკიაჟი, რაც უნდა კარგი ხარისხის კოსმეტიკა იხმარო, კანს საკმაოდ აზიანებს. თქვენ როგორ უვლით სახის კანს?
– ვერ ვიტყვი, რომ კანის მოვლაზე განსაკუთრებულად ვზრუნავ. რეგულარულად კანის საცხსაც არ ვიყენებ, წასმა მავიწყდება. ისეთ ტონალურს ვარჩევ, რომელშიც მკვებავი კრემიც შედის, შუბლის არეში კი ბოტოქსს ვიკეთებ. კანისთვის და ზოგადად ჯანმრთელობისთვის წყალი აუცილებელია, მე კი საერთოდ არ ვსვამ. წამალსაც წვენით ვსვამ. ექიმები დღეში ორ ლიტრა წყალს ისე მინიშნავენ, როგორც წამალს. მე კი თვეში ერთ ჭიქას არ ვსვამ. ამას ემატება ის, რომ თავს ვიკლავ სოლარიუმში სიარულით. ასე რომ, ეტყობა, კარგი გენეტიკის წყალობით მაქვს კანი ამ მდგომარეობაში.
– პლასტიკურ ქირურგთან მისვლის სურვილი არასოდეს გაგჩენიათ?
– გარეგნობაში ბევრ კორექტივს შევიტანდი, მაგრამ ქმარი ამის ნებას არ მაძლევს. მეუბნება, როგორც კი რამე პლასტიკურ ოპერაციას გაიკეთებ, ერთმანეთს დავემშვიდობებითო. "გაკეთებულ" ქალებს ვერ იტანს. მხოლოდ შუბლის არეში ვიკეთებ ბოტოქსს და სულ ეს არის.
მანანა ნოდია, ჟურნალი სარკე