• ბახვა ბრეგვაძე: "ჩემი ცოლის დაქალებმა" გოგონებში პოპულარული გამხადა"

    ბახვა ბრეგვაძე არც მსახიობია და არც შოუბიზნესის წარმომადგენელი, მაგრამ ის ყოველთვის მათ წრეში ტრიალებს. ბომონდურ წვეულებებსა და შეკრებებს არასოდეს აკლდება, ცნობილ ადამიანებთან მეგობრობს და მშვენიერ სქესშიც დიდი პოპულარობით სარგებლობს. მას შემდეგ, რაც გამოჩნდა სერიალში "ჩემი ცოლის დაქალები", ქალების მხრიდან მის მიმართ ინტერესი გაორმაგდა. სოციალური ქსელით დამეგობრებას სთხოვენ, წერილებს უგზავნიან და სიყვარულში უტყდებიან.
    ბახვა 28 წლის არის. ერთ–ერთ კომპანიაში პიარის და მარკეტინგის სამსახურს ხელმძღვანელობს. მის ცხოვრებაში ყოფილა ხანმოკლე გატაცებები, მაგრამ სიყვარული ჯერ არ სწვევია. მშვენიერ სქესში ყველაზე მეტად ბუნებრიობას და ინტელექტს აფასებს. მეგობრობს ისეთ ქალებთან, რომლებსაც რჩევების მიცემაც შეუძლიათ და ისიც, რომ მეგობარ ბიჭს მოუსმინონ და მისი აზრი გაითვალისწინონ.
    – ბახვა, პირველ რიგში, გკითხავთ, პიარის სპეციალისტი როგორ აღმოჩნდით სერიალში "ჩემი ცოლის დაქალები"?
    – ხშირად მთავაზობდნენ კინოსა და სერიალებში როლებს, მაგრამ გამუდმებით იმაზე ვფიქრობდი, შევძლებდი თუ არა ამა თუ იმ როლის შესრულებას და ამიტომაც არ ვთანხმდებოდი. სერიალ "ჩემი ცოლის დაქალების" მთვარი გმირის, ცოტნე ცოტაშვილის მოადგილის, გურამის როლი რომ შემომთავაზეს, მითხრეს, ორ სიტყვას იტყვი და კადრიდან გახვალო. გადავწყვიტე, საკუთარი თავი გამომეცადა. მერე ისე მოხდა, რომ ჩემი გმირის ცხოვრება გაგრძელდა.

    – აქტიური ცხოვრების მოყვარული ხართ, არასოდეს აკლდებით წვეულებებს, თქვენზე ხშირად ხუმრობენ, "ტუსოვკების მამააო"...
    – "ტუსოვკების მამას" რომ მეძახიან, ვაპროტესტებ, რადგან მცდარი აზრია. წვეულებების ორგანიზატორები ხშირ შემთხვევაში ჩემი მეგობრები არიან და ისინი მეპატიჟებიან. ღონისძიებებიდან ყოველთვის ადრე ვბრუნდები სახლში, რადგან ხმამაღალი მუსიკა მღლის.
    – "ფეისბუქზე" ატვირთული ფოტოებით თუ ვიმსჯელებთ, თქვენ ირგვლივ ბევრი ლამაზი ქალი ტრიალებს, მათ შორის არიან მომღერლები ნინი ბადურაშვილი, ქრისტინე იმედაძე...
    – ქრისტინე იმედაძე და ნინი ბადურაშვილი ჩემი ბავშვობის მეგობრები არიან, ისინი შოუბიზნესიდან არ გამიცნია. კლუბებში ხშირად გვიწევს ერთად სიარული.

    – ფოტოები გაქვთ გადაღებული წარსულში საქართველოში ყველაზე პოპულარულ დიზაინერ მაკა ასათიანთანაც. რა გაკავშირებთ მასთან?
    – ის ახლობელი ადამიანია ჩემთვის. გარდა იმისა, რომ მაკა სუნთქვის შეკვრამდე ლამაზია, არაჩვეულებრივი პიროვნებაა და ძალიან მიყვარს.

    – როგორ ერთობით, როცა ბავშვობის მეგობრები, თქვენ, ნინი ბადურაშვილი და ქრისტინე იმედაძე ერთად იკრიბებით?
    – უამრავი გასართობი გვაქვს, თუმცა არ იფიქროთ, რომ კლუბებში ხალხზე "ვღადაობთ". არ მიყვარს ასეთი რაღაცეები და არც ის მომწონს, ვინც სხვაზე ცუდად ხუმრობს. კლუბებში ისეთებიც დადიან, ვინც ძალით "სვეცკები" არიან. ისე, საერთოდ ვერ ვხვდები, "სვეცკობა" რა ფენომენია და ვერც იმას გეტყვით, გოიმი გოგო როგორია. ჩემს სამეგობროში სიტყვებს "სვეცკი" და "გოიმი" არც არავინ ამბობს. თუ ვინმე მოგვეწონა, უბრალოდ ვიტყვით, რა მაგარი გოგოაო.

    – მშვენიერი სქესის მიმართ ზედმეტად კრიტიკული, მომთხოვნი ხართ?
    – კრიტიკული არ ვარ, მაგრამ დაკვირვებული კი ნამდვილად გახლავართ. არ მომწონს, როცა გოგო ფრჩხილებს იჭამს. შეიძლება უცნაურად მოგეჩვენოთ, მაგრამ არც ის მომწონს, როცა "ბასანოჟკი" ან ისეთი ფეხსაცმელი აცვია, საიდანაც ფეხის თითები უჩანს. საშინლად მაღიზიანებს მოუვლელი ქალი. არც ზედმეტად გადაპრანჭული გოგო მომწონს, პლაჟზეც დავარცხნილი თმით რომ დადის.
    – ასეთ გოგოსთან გქონიათ ურთიერთობა?
    – კი, როგორ არა! პლაჟზე ქუსლიანი ფეხსაცმლითა და ყელსაბამითაც მინახავს გოგო. ყელზე კოლიე ეკეთა და როცა ვკითხე, ზღვაზე ეს რად გინდა–მეთქი, მიპასუხა, ეს ქვები წყალში ცოცხლდებაო, მაგრამ ეჭვი შემეპარა, რადგან ის კოლიე საცურაო კოსტიუმთან ჰქონდა შეხამებული. უბრალოდ პლაჟის აქსესუარი იყო.
    – რას აკვირდებით ქალში ყველაზე მეტად?
    – პირველ რიგში, წვივებს, შემდეგ მთლიანად მის გარეგნობას ვაფასებ, მერე კი უკვე იმას ვაქცევ ყურადღებას, რამდენად კარგად გადმოსცემს საკუთარ აზრს. მომწონს საყვარელი, მხიარული, არადეპრესიული და ცოტა ინტელექტის მქონე გოგონები.
    – ცოტა ინტელექტი რატომ, ზედმეტი აწყენს ქალს?
    – გადამეტებული ინტელექტი საერთოდ გადასარევია! ჭკვიანი ქალისთვის რჩევა ბევრჯერ მიკითხავს და გოგონებიც მეკითხებიან რჩევებს.
    – ეს რჩევები მათ ჩაცმულობასაც ეხება?
    – ნაკლებად, მაგრამ თუ საჭიროა, ყოველთვის ვეუბნები. მაგალითად, ნინის და ქრისტინეს ჩაცმის სტილი ძალიან მომწონს. ხშირ შემთხვევაში სადად აცვიათ, არ არიან გამომწვევები და ყოველთვის ლამაზად გამოიყურებიან.
    – მანდილოსნებს კომპლიმენტებს ხშირად ეუბნებით?
    – კი და თან ეს ისე მიყვარს, მგონია, რომ ვერავინ მასწრებს, ოღონდ ტყუილად არ ვარიგებ კომპლიმენტებს. ადამიანებთან ურთიერთობაში ყოველთვის გულწრფელი ვარ.
    – ალბათ ქალებისგანაც გულწრფელობას ითხოვთ.
    – რა თქმა უნდა. ჩემი აზრით, ქალი ჩარჩოებში ზედმეტად არ უნდა იყოს მოქცეული, რაც სურს, ის უნდა აკეთოს, მაგრამ ღალატი და ტყუილი არც ქალმა უნდა იკადროს და არც კაცმა.
    – თინა მახარაძის გმირს, ანკას სერიალიდან "ჩემი ცოლის დაქალები" ძალიან აკრიტიკებენ. საზოგადოებისთვის მისი საქციელი მიუღებელია. თქვენ რას ფიქრობთ ასეთ ქალებზე?
    – კი, ანკას ცოლიანი კაცი უყვარს, მაგრამ არ ვთვლი, რომ ის ცუდი ყოფაქცევის ქალია. კარგად არ იქცევა, მაგრამ რა ქნას, თუკი შეუყვარდა? შეიძლება პატიოსან გოგოსაც შეუყვარდეს ცოლიანი კაცი და ამის გამო ვირზე არავინ უნდა შევსვათ.
    – ინტერვიუს ბოლოსკენ თქვენს გმირზეც გკითხავთ. არაპროფესიონალს მისი თამაში იმიტომ ხომ არ გიადვილდებათ, რომ რაღაცით თქვენ გგავთ?
    – ჩემი როლი რთული არ არის და თამაში ამიტომაც არ მიძნელდება. რაც შეეხება საერთო თვისებებს, გურამი მხოლოდ ერთი რამით მგავს – ჭამა ორივეს გვიყვარს. ამ როლმა პოპულარობა მომიტანა, ვგრძნობ, რომ ხალხმა შემიყვარა. "ფეისბუქზე" ბევრი გოგო მწერს, გეხვეწები, დამიმატეო და ვერ გეტყვით, ეს როგორ მიხარია.
    – შეყვარებული არ გყავთ?
    – შეყვარებული არასოდეს ვყოფილვარ. სიყვარულს ველოდები, მაინტერესებს, როგორია.
    სოფიო ბოჭორიძე, ჟურნალი სარკე
    2 165 ნახვა
    GOGATV

    abezara