აკვანზე ერთი წლის განმავლობაში მიბმული ბავშვი პოლიციამ დაიხსნა

ყაზახეთის ქალაქ აქტაუში ბავშვთან სასტიკად მოპყრობის მორიგი შემთხვევა დაფიქსირდა. პატარა ბიჭუნა თითქმის დაბადებიდან აკვანზე ჰყავდათ მიბმული. ბავშვის გამოკვლევის შემდეგ ექიმებმა დაადგინეს, რომ მას კუნთების ძლიერი ჰიპოტროფია ჰქონდა, ჰემატომები თავზე და სახეზე. "როდესაც ჩვენთან მოიყვანეს, პატარა საშინლად ჭუჭყიანი იყო, ორჯერ ნაკლებს იწონიდა, ვიდრე მის ასაკში უნდა ყოფილიყო. ნევროლოგიური აშლილობაც ჰქონდა, ძალიან გაღიზიანებული იყო, არ ამბობდა არც ერთ სიტყვას და არ რეაგირებდა ხმებზე. წელზე მეტი ასაკის პატარა ვერ ჯდებოდა. დადგინდა, რომ ცხოვრების დიდი ნაწილი აკვანზე იკო მიკრული და უმოძრაოდ იმყოფებოდა", - აღნიშნა პედიატრმა, რომელმაც პატარა გასინჯა. ისიც დასძინა, რომ ამ ყველაფერთან ერთად ბავშვი ნაშიმშილარიც იყო.
აკვანში მწოლიარე ბავშვი სრულიად შემთხვევით აღმოაჩინა რაიონის მუნიციპალური სამსახურის წარმომადგენელმა. მას გაჰკვირვებია, როცა სიცხეში, მზის გულზე აკვანში მწოლიარე პატარა დაუნახავს. "თვალში მომხვდა მისი არაბუნებრივი სიგამხდრე და ძალიან ჭუჭყიანი სამოსი. ვერც ვიფიქრებდი, რომ ასაკით დიდი იყო. მაშინვე სასწრაფო გამოვიძახე", - უამბო მან ჟურნალისტებს.
სასწრაფოს პოლიციაც მიჰყვა. მათ ბავშვის ბებია დაკითხეს, რომელიც ამტკიცებს, რომ პატარს "ჩვეულებრივად" უვლიდნენ და არაფერს აკლებდნენ. ბავშვის დედა რა ხანია გადაკარგულია, მამა კი მეგობარ ქალთან ერთად ცხოვრობს, თუმცა საბუთებით ბავშვის მამაც არ არის. ამტკიცებს, რომ ბავშვის დედასთან ხელი არ ქჰონდა მოწერილი და ამიტომაც არსებობს ეს პრობლემა.
ამჟამად ერთი წლის პატარა საავადმყოფოშია. პოლიციელებმა უკვე აღძრეს საქმე ბავშვთან სასტიკი მოპყრობის ბრალდებით.