• კრისტი ყიფშიძე: "მამაკაცებს ლამაზი, პოპულარული ქალები აშინებთ"

    მოდელ კრისტი ყიფშიძეს ქაოსი და შინაგანი ფორიაქი მაშინ ეწყება, როცა მის პირად ცხოვრებაში რაღაც ხდება. ახლა კი მშვიდი ეტაპი დაუდგა, მთელი ყურადღება საქმესა და შვილზე აქვს გადატანილი. მისი და მსახიობ გიორგი ყიფშიძის ქალიშვილი, ნატალია, უკვე 13 წლისაა და დედას დამოუკიდებლობით აოცებს. კრისტიმ ზაფხულის ცხელი დღეები საქმეებს დაუთმო, დასვენებას კი სექტემბრიდან გეგმავს.
    – კრისტი, პოდიუმზე ისევ აქტიურად გამოდიხართ, საკმაოდ თამამ ფოტოსესიებში მონაწილეობთ. კარგ ფორმაში რომ ხართ, თქვენი ცხოვრების წესის დამსახურებაა?
    – სხვათა შორის, გარეგნობისთვის განსაკუთრებულს არაფერს ვაკეთებ. არც დიეტებით ვიკლავ თავს. უბრალოდ, უკვე დიდი ხანია გარკვეული პროდუქტები ამოვიღე რაციონიდან – პური, შაქარი, მარილი, ხორცი... სწორი კვება არამარტო სხეულზე, კანზე, ფრჩხილსა თუ თმაზეც აისახება. ძალიან მიყვარს ფეხით სიარული. ჩემი ქალაქი ამისთვის მოსახერხებელია. ვაკიდან ავლაბრამდეც მივლია ფეხით. ოქტომბრიდან კი სავარჯიშო დარბაზს ვუბრუნდები ხოლმე. არ მიყვარს სილამაზის სალონები და ვცდილობ, ხშირად არ მივიდე.
    – ოჯახის საქმეები გეხერხებათ?
    – კერძებს არ ვამზადებ, რადგან სახლში დედაჩემია შეფმზარეული. როლები გვაქვს განაწილებული: მე ჭურჭლის თუ სარეცხის რეცხვა მიყვარს.
    – თქვენი ქალიშვილი, ნატალია 13 წლისაა. ეს ისეთი ასაკია, როცა ორ თაობას შორის გარკვეული ბარიერები იქმნება. თქვენ მეგობრობთ შვილთან?
    – კი, მე და ნატალია ვმეგობრობთ. ერთი პერიოდი ხასიათი გაუფუჭდა და ჯიუტი გახდა, მაგრამ ახლა კარგი ბავშვია. რაც მთავარია, კარგად სწავლობს. მკაცრი დედა არ ვარ, მაგრამ, ბუნებრივია, რჩევებს იღებს ჩემგან. არ არსებობს, რამე არ შევუსრულო. ეს იმას არ ნიშნავს, რომ ვათამამებ, უბრალოდ, მას აქვს დიდი თავისუფლება.
    ჩემსა და ნატალიას შორის დიდი განსხვავებაა: ის მიზანდასახულია, რაც უნდა, იმას აკეთებს. მე კი მის ასაკში ასეთი არ ვიყავი. დღემდე სხვებზე უფრო ვარ დამოკიდებული. მაგალითად, შარშან სკოლა ბევრჯერ გააცდინა და მათემატიკაში ცოტა ჩამორჩა კლასელებს. მერე თავად მოძებნა მათემატიკის მასწავლებელი, გაარკვია ნომერი და მომიტანა მხოლოდ იმისთვის, რომ შესათანხმებლად დამერეკა. მას მსახიობობა უნდა და ეს არჩევანი მეც მომწონს.
    – ნატალიას მამას, თქვენს ყოფილ ქმარს, გიორგი ყიფშიძესაც მეგობრული ურთიერთობა აქვს შვილთან თუ შედარებით მკაცრია?
    – გიორგიც მეგობრობს, მის მიმართ მკაცრი ნამდვილად არ არის. თვითონ ნატალიაა ისეთი, რომ სიმკაცრე არ სჭირდება.
    – თქვენ როგორი ურთიერთობა გაქვთ გიორგისთან?
    – ნორმალური, ჯანსაღი ურთიერთობა გვაქვს. არც ვმეგობრობთ, მაგრამ არც ცუდი დამოკიდებულება გვაქვს ერთმანეთთან. არიან წყვილები, რომლებიც დაშორების მერე მტრები ხდებიან. ეს ცოტა გაუგებარია ჩემთვის.
    – ლამაზი, წარმატებული ქალი ხართ, მაგრამ ამ ეტაპზე თქვენ გვერდით მამაკაცი არ დგას. როგორ ფიქრობთ, საპირისპირო სქესს ასეთი ქალები აშინებთ?
    – კი, ასეა, ლამაზი და პოპულარული ქალები აშინებთ. მე თაყვანისმცემლები არ მყავს. ეს იმას ნიშნავს, რომ მე არ მყავს ისეთი თაყვანისმცემლები, რომლებიც მე მომეწონებოდა. ყურადღებას, რა თქმა უნდა, ვგრძნობ და არა მარტო მამაკაცებისგან. რეკლამა, სადაც საცურაო კოსტიუმში ვარ, ბევრმა ქალმა მოიწონა. როცა ქალი დადებითად გაფასებს, ეს ნიშნავს, რომ მართლა კარგია.
    – ამ რეკლამაზე მუშაობისას ფიქრობდით, საზოგადოება როგორ მიიღებდა?
    – კი და ცოტა მეშინოდა კიდეც, მაგრამ ჯანსაღი შეფასებები გაკეთდა, ზოგს მოეწონა, ზოგს – არა. ზოგადად ე.წ. თამამი ნაბიჯები არ მაშინებს.
    – როგორი მამაკაცი წარმოგიდგენიათ თქვენ გვერდით?
    – უნდა მავსებდეს და მასთან ურთიერთობა მსიამოვნებდეს. გამორიცხულია, ქართული ხასიათი ჰქონდეს, აზიატი იყოს. არ არის აუცილებელი ფიზიკურად უნაკლო, მაგრამ არც ცუდი გარეგნობის უნდა იყოს, რადგან საყვარელ მამაკაცთან შვილის გაჩენაზე ფიქრობ და შესაბამისად, გენეტიკას მნიშვნელობა აქვს. გარკვეული შარმი უნდა გააჩნდეს, უყვარდეს ჩემი მეგობრები, ოჯახის წევრები და, პირველ რიგში, ჩემი შვილი. ჩვენ შორის ყველაფერი ერთად უნდა იყოს – მეგობრობაც, სიყვარულიც და პატივისცემაც.
    – განვლილ წლებს რომ გადახედოთ, რაღაცეებს შეცვლიდით, სხვანაირად გააკეთებდით?
    – არა. არასდროს მივტირი წარ–სულს, არც ვფიქრობ მასზე და უფრო მეტიც, არაფერი მახსოვს. შეიძლება ვიღაცამ მაწყენინოს და ამის გამო იმ წუთში ბევრიც ვიტირო, მაგრამ მეორე დღეს აღარ მახსოვს.
    – გიგრძვნიათ შური და უარყოფითი დამოკიდებულება?
    – როგორ არა, მაგრამ ყურადღებას არასოდეს ვაქცევ.
    – ცხოვრების ამ ეტაპს როგორ შეაფასებთ?
    – უფრო სამსახურსა და შვილზე ვარ გადართული. პირადი ცხოვრება არ არის... ასეთი ეტაპი მაქვს, აფორიაქებული აღარ ვარ, დაწყნარებულ–დამშვიდებული გახლავართ. შინაგანი ფორიაქი მაშინ მეწყება, როცა ჩემს პირად ცხოვრებაში რაღაც ხდება.
    მანანა ნოდია, ჟურნალი სარკე
    1 694 ნახვა
    14-09-2014, 11:53
    GOGATV

    abezara