• "ბუტია მეგობარს სიმართლეს ვერ ვეუბნები"

    დაქალს სიმართლეს ვერ ვეუბნები, რადგან უბრალო რაღაცაც კი სწყინს. მაშინვე გამებუტება ხოლმე და მერე მის შერიგებას ზოგჯერ თვე სჭირდება. არადა პატარა გოგოები აღარ ვართ, რომ ასე ვებუტებოდეთ ერთმანეთს. მალე ორივე 14 წლის ვხდებით.
    ჩემს მეგობარს უცნაური ჩაცმა უყვარს. ჰგონია, რომ ლამაზად იცვამს, სინამდვილეში ფუფალასავით გამოიყურება. ძალიან ლამაზი, შლილი თმა აქვს, მაგრამ ისე დაიკულულებს ხოლმე, რომ ძველისძველი ფოტოებიდან გადმოსულ ქალებს ჰგავს. დედამისი იცვამს ასე, არც მას უხდება, მაგრამ ის ქალია და კიდევ არა უშავს, ბავშვებზე კი ასეთი სტილი უკვე საშინელებაა.
    ჩემი დაქალი ძალიან მიყვარს, კარგი გოგოა. ლექსებს ორივე ვწერთ და ერთმანეთთან ბევრი საერთო გვაქვს. მისი არასოდეს მშურს. ხშირად ვაღიარებ ხოლმე, რომ მისი ლექსები ჩემსას სჯობს და ჩემზე ბევრად ნიჭიერია. სხვათა შორის, დედაჩემსაც ძალიან უყვარს. ამბობს, მიხარია, რომ ასეთი კარგი მეგობარი გყავსო. დედამ მისი რამდენიმე ლექსი ზეპირადაც იცის. ამას იმიტომ ვწერ, რომ არავის ეგონოს, ის არ მიყვარს და მასზე გული არ შემტკივა, პირიქით, მინდა, რომ ყველაზე კარგი იყოს.
    მე უფროსი ბიძაშვილები მყავს, ბიჭები. ისინი ძალიან ხუმარა ბავშვები არიან და ვინმე საკბილო თუ გამოუჩნდათ, მასზე აგებენ ხუმრობებს. ახლა პროგრამაში სწორედ ჩემი დაქალი ჰყავთ. მის ჩაცმულობასა და ვარცხნილობაზე ძალიან ბევრს იცინიან. ამას წინათ სტუმრები გვყავდნენ და სუფრასთან დაიწყეს შაყირი, თანაც ისე ბაძავდნენ ჩემს დაქალს, რომ მაგიდასთან ვინც იჯდა, სიცილით ყველა თეფშებს ურტყამდა თავს. მარტო მე ვიჯექი მოწყენილი და ლამის მეტირა. მერე კი ჩემზე გადმოვიდნენ და დაცინვა დამიწყეს. ერთად რომ მიდიან, ეს ასე გამოიყურება, ის – ისეო და თან ორივეს გვბაძავდნენ. სხვებმა ძალიან იმხიარულეს, მაგრამ, აბა, ჩემთვის ეკითხათ!
    დაქალს ბევრჯერ ვუთხარი, რომ ჩვენი ასაკის შესაფერისად არ იცვამს, მაგრამ ვერაფერი შევაგნებინე. ახლაც მაღალქუსლიანი ფეხსაცმელი უყიდია. რომელი თინეიჯერი დადის მაღალქუსლიანი ფეხსაცმლით?! ვერ ხვდება, რომ ეს ჩვენი ასაკისთვისაც შეუფერებელია და მოდაშიც არაა. ასეთ რაღაცეებს რომ ვეუბნები, როგორც გითხარით, მებუტება. არადა უკვე აღარ ვიცი, როგორ შევაგნებინო, რომ დროა, ჩაცმის სტილი შეცვალოს. ბოლოს და ბოლოს, არ მინდა, მის გამო დამცინოდნენ და მის გვერდით გავლა მრცხვენოდეს.
    სარკის ერთგული მკითხველი
    1 898 ნახვა
    14-09-2014, 11:57
    GOGATV

    abezara