• ნინა წკრიალაშვილი: "ზედმეტი რუჯი აღარც მომწონს და აღარც მოდურია"

    მომღერალი ნინა წკრიალაშვილი ახალი სატელევიზიო სეზონიდან ერთ–ერთ ტელეარხზე გადაცემას წაიყვანს. დეტალებს, თუ რა ფორმატის და შინაარსის გადაცემა იქნება, საიდუმლოდ ტოვებს. ამ მნიშვნელოვანი ნაბიჯისთვის მზად არის, მანამდე კი კარგად ისვენებს. ივნისის დასაწყისიდან დიდ მოგზაურობაშია – ანაკლია, ბათუმი, კახეთი... საფრანგეთში ჩასეირნებაც მოასწრო. მშვიდ გარემოში ისვენებს, მაგრამ მის გარშემო დროდადრო მაინც არის ხმაური. სოციალურ ქსელში ჯერ მისმა ფოტოებმა მიიქცია ყურადღება, სადაც საცურაო კოსტიუმშია გამოწყობილი, შემდეგ პრეზიდენტ გიორგი მარგველაშვილზე გაკეთებულმა სტატუსმა. ამ ყველაფერზე ნინა "სარკესთან" საუბრობს.
    – ნინა, დიდი ხანია არსად გამოჩენილხართ, რა სიახლეები, ცვლილებები, გეგმები გაქვთ?
    – ბევრი რამის თქმის უფლება არ მაქვს, მაგრამ იმას კი გეტყვით, რომ სექტემბრიდან ერთ–ერთ ტელეარხზე გადაცემას წავიყვან. ამ ამპლუაში არასდროს ვყოფილვარ, ექსპერიმენტია და ვნახოთ, რა იქნება. ყოველ შემთხვევაში, საკუთარი თავის იმედი მაქვს და სიახლის არ მეშინია, რადგან თუ რამეს ვკიდებ ხელს, ყოველთვის ყველაფერი გამომდის.
    – სერიალ "ჩემი ცოლის დაქალების" ახალ სეზონშიც გიხილავთ?
    – როგორც ვიცი, ცოტნე ცოტაშვილი სერიალში რჩება და იმედი მაქვს, რომ მეც გავაგრძელებ თამაშს.
    – რამდენიმე დღის წინ "ფეისბუქზე" სტატუსი დაწერეთ, პრეზიდენტი გიორგი მარგველაშვილი მომწონსო. არასოდეს დაგიმალავთ, რომ ნაციონალებს უჭერდით მხარს. ახლა პოლიტიკური ორიენტაცია ხომ არ შეიცვალეთ?
    – ჩვენს პრეზიდენტზე კი არ ვგიჟდები, ღმერთმა დამიფაროს, პოლიტიკური ორიენტაცია შევიცვალო, იმ დღეს მოვიკლავ თავს ან თავისთავად მოვკვდები! რაც დრო გადის, საკუთარი თავის სიმართლეში მით უფრო მეტად ვრწმუნდები. უბრალოდ ბოლო პერიოდში ჩვენი პრეზიდენტი საკმაოდ სწორ განცხადებებს აკეთებს.
    – მგონი, პრეზიდენტის მეგობარ ქალს, მაკა ჩიჩუას იცნობთ. ასეა?
    – არა, პირადად არ ვიცნობ, მაგრამ მის მიმართ დიდი სიმპათიით ვარ განწყობილი. სანამ გიორგი მარგველაშვილი პრეზიდენტი გახდებოდა, მისი მეგობარი ქალი მანამდეც ძალიან მომწონდა. საკმაოდ კულტურული, განათლებული, ნიჭიერი და ამასთანავე ლამაზია, დახვეწილი გემოვნება აქვს. ჩემი აზრით, მაკა ჩიჩუა მშვენიერი პირველი ლედი იქნებოდა.
    – ამ ზაფხულის ერთ–ერთი ყველაზე ცხელი თემა კაზანტიპია. თქვენ რას ფიქრობთ ამ ფესტივალზე?
    – მეგობრებთან ერთად ორი დღით მაინც აუცილებლად წავალ კაზანტიპზე და ამით, მგონი, პასუხიც გავეცი თქვენს კითხვას. არ მესმის, რატომ არავინ უსვამს ხაზს იმას, რომ იქ სპორტული შეჯიბრებებიც გაიმართება. ტელევიზორს რომ ვუყურებ და ამ ფესტივალს შავი პიარი უკეთდება, ვიცინო თუ ვიტირო, აღარ ვიცი. ვისაც ცუდი რამის გაკეთება უნდა, კაზანტიპს არ დაელოდება, ისედაც გააკეთებს. კარგი ამინდი, მუსიკა, საუკეთესო განწყობა და ფესტივალი! რატომაც არა, ხალხნო?! რაც არ ვიცით, იმას რატომ ვლანძღავთ? მე კი მეშველება რამე, მაგრამ ამ ხალხს თუ ეშველება, არ ვიცი... დაისვენეთ, რა და სექტემბრიდან იმუშავეთ!
    – თქვენ როგორ ისვენებთ, ეს ზაფხული როგორ დაიწყო თქვენთვის?
    – უკვე რამდენჯერმე მოვასწარი ანაკლიაში წასვლა. სიწყნარეა და იქაურობა ძალიან მომწონს. ანაკლია ჩემ თვალწინ აშენდა, ფანტასტიკური ადგილია და ამინდიც შესაფერისია. ბათუმში რომ თავსხმა წვიმაა, იქ ერთი საათით იწვიმებს, აგრილდება და ისევ მზე გამოდის. კახეთშიც ვიყავი. იქ რამდენიმე ისეთი კარგი სასტუმროა, სადაც სიამოვნებით ვისვენებ. ივლისში დედასთან, ჩემს შვილთან და დისშვილთან ერთად ბათუმშიც ვიყავი ერთი კვირით.
    – ბათუმში კლუბების ხშირი სტუმარი ხართ?
    – უცნობებთან ერთად გართობა არ მომწონს, ამიტომ, როცა მეგობრებთან ერთად არ ვისვენებ, პლაჟის გარდა, არსად დავდივარ. კლუბებზე არასდროს ვგიჟდებოდი, არადა ყველას ჰგონია, რომ იქიდან არ გამოვდივარ. შეიძლება წელიწადში მხოლოდ ორჯერ წავიდე კლუბში ნახევარი საათით, მერე სახლში ვბრუნდები.
    – ეს ზაფხული საქართველოს ფარგლებში გაატარეთ?
    – ივლისში მეგობართან ერთად საფრანგეთში ვიყავი. იტალია და საფრანგეთი გამორჩეულად მიყვარს და, როცა ფული მაქვს, ყოველთვის ვცდილობ, ამ ორიდან რომელიმე ქვეყანას ვესტუმრო. იქ მიღებული ენერგია საქართველოში დიდხანს მყოფნის.
    – ზომიერად ხართ გარუჯული. როგორც ჩანს, მზეს ერიდებით.
    – გარუჯვასთან დაკავშირებით ბევრი ცუდი ინფორმაცია წავიკითხე, კიბოს და კანის ნაადრევ დაბერებას იწვევსო. მე კი ნაადრევად დაბერებას არ ვაპირებ, მით უმეტეს, მზეს რატომ უნდა დავაბერებინო თავი?! ჯანსაღი რუჯის მიღება ვისწავლე და ცოტა ნამზეური მაქვს. ვერ მოგატყუებთ, რომ დილით ადრე ვიღვიძებ და პლაჟზე მივდივარ, ამიტომ ზღვაზე მხოლოდ 5 საათის შემდეგ გავდივარ. არ არის აუცილებელი, ავადმყოფურად შავი ვიყო, ზედმეტი რუჯი აღარც მომწონს და აღარც მოდურია. ზაფხული და სიცხე ისე მძულს, მზისგულზე ვერც ვჩერდები. დამცავი კრემებითაც არ ვსარგებლობ დიდად, რადგან ეს ზაფხული ისეთი ცხელია, ვერაფერი დაგვიცავს. ბავშვობაში ჩემებს არ ვუჯერებდი, მზეს მივასკდებოდი და ბევრჯერ დავმწვარვარ კიდეც. ახლა არაფერი და არავინ მინდა, რაც დისკომფორტს შემიქმნის.
    – რამდენიმე ხნის წინ "ფეისბუქზე" ფოტო გამოაქვეყნეთ, სადაც დახურული საცურაო კოსტიუმი გაცვიათ...
    – დახურული არ არის, შუაში რაღაც აქვს ჩადგმული. ეს საცურაო კოსტიუმი ყველაზე მეტად მიყვარს, რობერტო კავალის არის და ლელა წურწუმიამ მაჩუქა. იმდენად მომწონს, რამდენჯერაც ჩავიცვამ, იმდენჯერ ლელას ვლოცავ. ახლა ალბათ ნანობს, რომ მაჩუქა, რადგან ის უკვე ჩემზე გამხდარია. ასეთ კარგ საცურაო კოსტიუმს იშვიათად შეხვდება ადამიანი. ქალს ლამაზი კაბა რომ აცვია და საკუთარი თავი მოსწონს, იგივე მჭირს ამ საცურაო კოსტიუმზეც.
    – აღნიშნულ ფოტოს უარყოფითი შინაარსის კომენტარებიც მოჰყვა. ამაზე არ გაბრაზდით?
    – გულწრფელად გეუბნებით, რომ სხვისი აზრი არ მაინტერესებს. ადრე ამაზე ვნერვიულობდი, ახლა კი, როცა მლანძღავენ, გულიანად მეცინება. როგორი უკულტურო უნდა იყო ადამიანი, რომ უცნობს ლანძღვა დაუწყო. ასეთები მართლა მეცოდებიან.
    – თქვენ შეიძლება მიეჩვიეთ კრიტიკას, მაგრამ ოჯახის წევრებისთვის იოლი მოსასმენი არ იქნება უარყოფითი შეფასებები.
    – როცა მლანძღავენ, დედაჩემი თავშეხვეული ზის და ამაზეც მაგრად მეცინება. მამა ალბათ მიეჩვია, თუმცა ჩემთან შეკითხვები სულ აქვს, მე კი ყოველთვის ორ სიტყვას ვეუბნები: "დაიკიდე, მამა!". მგონი, "დაიკიდა" კიდეც. ხალხს თუ ჰგონია, რომ ჩემზე ჭორაობით და ლანძღვით ზიანს მაყენებენ, ძალიან ცდებიან. ერთადერთი, რაც მაღელვებს, ის არის, რომ დედაჩემი განიცდის. ჩემს ინტერვიუებსაც არ ვკითხულობ. დედა დამირეკავს ხოლმე, ეს რა გითქვამსო.
    – თქვენი ბიჭი, სანდრო, 16 წლის არის. როცა უარყოფით კომენტარებს წერენ თქვენზე, მას რა რეაქცია აქვს?
    – საბედნიეროდ, ის ჯანსაღად აზროვნებს და ამ ყველაფერზე არანაირი რეაქცია აქვს. სანდროს დიდი ხანია გოგონებისკენ გაურბის თვალი, მაგრამ ერთმანეთის პირად ცხოვრებაში არ ვერევით. მან იცის, რომ ახალგაზრდა ვარ და მაქვს უფლება, მქონდეს ჩემი ცხოვრება. თუ რამე სერიოზული მოხდება ჩვენს პირადში, ერთმანეთს აუცილებლად ვეტყვით. ჩვენს პატარა ოჯახში ძალადობა და აკრძალვები არ არსებობს. ჩვენს ხმებს ერთნაირი ძალა აქვს, არასოდეს ვჩხუბობთ, პრობლემებსაც არ ვქმნით. საჭმელი თუ გვაქვს, ვჭამთ, მაგრამ სანდრო თუ ნახავს, არაფერი მაქვს მომზადებული, ხვდება, რომ დედას გაკეთება დაეზარა, წავა და ლობიანს შეიძენს ან სადმე ერთად გავალთ საჭმელად.
    – პირად ცხოვრებაში მომხდარ სიახლეებზე არაფერი გითქვამთ...
    – პირად ცხოვრებაზე საუბარს აღარასდროს ვაპირებ, რადგან რამდენჯერაც გულწრფელად ვილაპარაკე, ხალხმა არასწორად გაიგო. არ არის საჭირო ამ თემების გასაჯაროება, რადგან ამ დროს შენს ცხოვრებაში ბევრი ადამიანი ერევა. დავაკვირდი, რომ ჩემ შესახებ გარკვეული დეტალები სანამ ცოტა ადამიანმა იცის, ყველაფერი კარგად არის, მერე კი ფუჭდება.
    სოფიო ბოჭორიძე, ჟურნალი სარკე
    2 509 ნახვა
    15-09-2014, 11:13
    GOGATV

    abezara