სალომე ქათამაძე ქმარს გაშორდა და მამობილის გვარზე გადავიდა

მომღერალ სალომე ქათამაძის ცხოვრებაში ამ ზაფხულს მნიშვნელოვანი ცვლილებები მოხდა, ზოგი კარგი, ზოგიც... სალომე ქმარს, გიგი ზამთარაძეს გაშორდა. შემდეგ გვარიც გამოიცვალა, მამობილის გვარი აიღო – მდივანი. კიდევ ერთი სიახლე ის არის, რომ ბერკლის სამუსიკო კოლეჯში გამოცდები ჩააბარა. ოფიციალური პასუხი ჯერ არ მიუღია, მაგრამ იმედი აქვს, რომ სექტემბრიდან ამერიკაში გააგრძელებს სწავლას. როგორც ირკვევა, ერთ–ერთი მიზეზი, რის გამოც 23 წლის მომღერლის ოჯახური ცხოვრება დაინგრა, სწორედ ბერკლიზე მისი ოცნება იყო.
სალომე და გიგი 3 წლის წინ შეუღლდნენ. ერთი შეხედვით, შეხმატკბილებული წყვილი იყო, თუმცა სალომე "სარკეს" ახლა გამოუტყდა, რომ პრობლემები ქორწინებიდან მალევე დაიწყო.
თავის ცხოვრებაში მომხდარ ცვლილებებზე მომღერალი საჯაროდ პირველად "სარკესთან" ყვება.
– სალომე, თქვენს ოცნებას მიუახლოვდით და ბერკლის კოლეჯში გამოცდები ჩააბარეთ. საბოლოოდ როდის გაირკვევა შედეგი?
– გამოცდაზე ყველა ძალიან თბილად შემხვდა, ჩემი სიმღერა და იმპროვიზაცია დადებითად შეაფასეს. ნოტების კითხვის დროს ავნერვიულდი და ოდნავ შევფერხდი, მაგრამ ეს არაფერი. ოფიციალურ პასუხს 15 სექტემბრამდე გავიგებ.

– იქ სწავლა რა თანხებთან არის დაკავშირებული?
– ბერკლის კოლეჯში სწავლა წელიწადში 40 000 დოლარი ღირს. იმაზე არც ვფიქრობ, რომ დაფინანსებას ვერ მივიღებ. ასეც რომ მოხდეს, გამოსავალს მაინც ვიპოვი და არ დავიკარგები. გამოცდიდან ყველამ ისეთი ღიმილიანი სახით გამომიშვა, არ მგონია, საქმე ცუდად მქონდეს. ასე მითხრეს, ერთმანეთს მალე შევხვდებითო.
ამერიკაში ერთი კვირა გავატარე. ჩემმა მეგობარმა გიორგი ბუჩუკურმა მიმასპინძლა. მარიამ აბდუშელიშვილის დაც, სოფო, ჩემი მასპინძელი იყო. საკმაოდ კარგი დრო გავატარეთ.
– ბერკლიში სწავლა რა პერსპექტივებს გისახავთ, საკუთარ თავს სად ხედავთ?
– მიზანი მაქვს, ჩემი ხმა მსოფლიოს გავაგონო. ბერკლის კოლეჯში 2 წელი მომიწევს სწავლა. რაც უნდა მოხდეს, ამერიკაში გავაგრძელებ ცხოვრებას, რადგან ჩემი პროფესიისთვის იქ უფრო მეტი გასაქანია. ამის გარდა, ქველმოქმედებაზეც ბევრს ვფიქრობ, ესეც ჩემი დიდი ოცნებაა. თუ ოდესმე იმის საშუალება მექნება, რომ მსოფლიოს გარშემო ვიმოგზაურო და ყველა გაჭირვებულს დავეხმარო, ყველაზე დიდი მოგზაური მე ვიქნები.
– საქართველოში რატომ არ სცადეთ, ამ მიზნების მიღწევისთვის გებრძოლათ, თუნდაც ერთი სოლო კონცერტი ჩაგეტარებინათ?
– აქ სპონსორიც მყავს და კომპოზიტორიც, ვინც სიმღერებს დამიწერს, მაგრამ კონცერტის ჩატარების აზრს ვერ ვხედავ. შეიძლება ხალხი უამრავი მიზეზის გამო ვერ მოვიდეს, თუნდაც იმიტომ, რომ ბილეთის ფული არ აქვთ. სანამ მაყურებელს გააგებინებ, რომ კარგი მომღერალი ხარ, ამასობაში დრო გაფრინდება. კონკურსზე რომ გადიხარ იმისთვის, რათა პოპულარული გახდე და შენი ხმა ხალხს ასე მიაწვდინო, ეს უკვე იმის ნიშანია, რომ უფრო დიდ გეგმებზე ფიქრს საქართველოში აზრი არ აქვს.
– ბერკლის სამუსიკო კოლეჯში სწავლა ახლა გადაწყვიტეთ თუ მანამდეც გინდოდათ?
– ამ დრომდე პირობები არ მიწყობდა ხელს, სხვა რაღაცეებზე ვიყავი გადართული და სხვანაირადაც ვფიქრობდი.
– "პირობებში" ოჯახური მდგომარეობა იგულისხმეთ?
– ქმარზე ვიყავი გადართული და მის აზრებს ვითვალისწინებდი. გიგის არ უნდოდა, ამერიკაში წავსულიყავი და იქ მესწავლა. მისგან ასეთი დამოკიდებულება ძალიან მეწყინა, რადგან როცა ადამიანს უყვარხარ, ის შენს მომავალზეც უნდა ფიქრობდეს. ჩემი წარმატებისთვის კი ბერკლის კოლეჯი ძალიან მნიშვნელოვანია.
– ქმართან გაშორების მიზეზი ეს გახდა?
– არა, ბევრი პატარ–პატარა მიზეზი გროვდება დროთა განმავლობაში და მერე ხვდები, რომ ადამიანი ვერ გიგებს. როცა ათას საკითხზე ხშირია უთანხმოება და ეს ყველაფერი არა და არ სრულდება, ალბათ სამუდამოდაც გაგრძელდება. ამიტომ ადამიანმა თავი არ უნდა დაიტანჯოს და არც სხვა დატანჯოს. ჩვენ ერთად 3 წელი ვიყავით.
– ერთი შეხედვით, ძალიან ბედნიერი წყვილი ჩანდით.
– სატელევიზიო ინტერვიუებშიც და ჟურნალებშიც ვამბობდით, რომ იდეალური ურთიერთობა გვქონდა. ერთმანეთს კარგად ვუგებდით, ოღონდ ბავშვურ რაღაცეებში, ოჯახური სიტუაცია კი ვერ მოვირგეთ. მე და გიგი კარგად ვერთობოდით, ერთმანეთის იუმორიც გვესმოდა, ერთად ცანცარიც კარგად გამოგვდიოდა, მაგრამ ოჯახი უფრო სხვა თემაა.
ჩვენ გიგის დედასთან და ძმასთან ერთად ვცხოვრობდით, თუმცა ეს არაფერ შუაში ყოფილა. როცა ცხოვრებაში რთული პერიოდი გაქვს, გჭირდება ადამიანი, რომელიც შენზე იზრუნებს, ოღონდ ეს მხოლოდ გვერდში დგომით და შენი ყურებით კი არ უნდა გამოიხატოს, სულიერად უნდა იგრძნო მისი მხარდაჭერა და გვერდში დგომა. ჩვენ შორის კი ეს ყველაფერი ვერ მოხერხდა. რთულია, ასეთი ადამიანის გვერდში იცხოვრო და გამუდმებით გქონდეს კონფლიქტი.
– ბერკლის გამოც მოგივიდათ კონფლიქტი?
– ბერკლის კოლეჯზეც ვკამათობდით და თუნდაც იმაზე, რომ გიგი უნდა შეცვლილიყო, ნაკლებად უნდა ეფიქრა გართობაზე და ცოლთან ურთიერთობაში სერიოზული ყოფილიყო. ბოლო დროს ყურადღებისა და ურთიერთგაგების პრობლემები გაგვიჩნდა. ამ 3 წლის განმავლობაში ორჯერ ვცადე გიგისთან დაშორება, მისგან რამდენიმე კვირით წავედი, მაგრამ ორჯერვე ტყუილი დაპირებები მომცა და შევურიგდი. მითხრა, ყველაფერს შევცვლიო, მაგრამ ასე არ მოიქცა. გიგი ნაწილობრივ ჩემს კარიერაზეც ფიქრობდა, მაგრამ ხანდახან თავისი საქციელით საკუთარ სიტყვებს ეწინააღმდეგებოდა. არ მომწონს, როცა ადამიანი ერთს ამბობს და მეორეს აკეთებს, ეს არასერიოზული საქციელია.
– სანამ დაქორწინდებოდით, ამ ხასიათს ვერ ამჩნევდით?
– მე და გიგი თავიდან ძალიან კარგად ვეწყობოდით ერთმანეთს, ის სხვანაირად აზროვნებდა. მაშინ ვერ წარმომედგინა, ადამიანს ასე თუ შეეძლო შეცვლა.
– როდის შეამჩნიეთ ცვლილებები?
– ჩვენი ქორწინებიდან ერთი წლის შემდეგ გიგი ნელ–ნელა სხვანაირი გახდა. ამ 3 წლის განმავლობაში ერთი და იგივე ტიპი არასდროს ყოფილა, რაც ძალიან მაკვირვებდა. ხან თბილი იყო, ხან აგრესული, ხან დამთმობი და ხანაც პირიქით... ოჯახი ყველანაირად რთულია, უნდა იყო ცოლი და შემდეგ დედა, რაც ჩემთვის ჯერ ადრე იყო.
– გიგიც ფიქრობდა, რომ შვილისთვის ჯერ მზად არ იყავით?
– კი, ისიც ასე ფიქრობდა. კატეგორიულად არასდროს მოუთხოვია, ბავშვი მინდაო. ორივე ვფიქრობდით, რომ შვილის გაჩენა ჯერ ადრე იყო.
– პირადად თქვენი შეცდომა რა იყო?
– ძალიან დამთმობი ვარ და მიმაჩნია, რომ გიგისთან ურთიერთობაშიც ეს შეცდომა დავუშვი. ამ შემთხვევაში კი არც გიგის დავუთმე და არც საკუთარ თავს. არ მინდოდა, სულ დისკომფორტში მეცხოვრა და ამიტომაც დავასრულე ყველაფერი.
– თქვენს დაშორებამდე ვრცელდებოდა ჭორები, რომ გიგი კაზინოებს ხშირად სტუმრობდა...
– ჩვენი დაშორების ერთ–ერთი მიზეზი ესეც იყო. გიგი აზარტული თამაშების მოყვარულია. კაზინოში ერთადაც ვყოფილვართ, მეც ვარ აზარტული, მაგრამ ოჯახის ბიუჯეტის ბოლომდე განადგურება არ მიყვარს. მოთამაშე ადამიანს შეუძლია უკანასკნელი 20 თეთრიც კაზინოში დატოვოს. მე კი მხოლოდ გასართობად თუ შევალ. თუ 300 დოლარი მაქვს, 100 დოლარით გავერთობი, დანარჩენს დავიტოვებ, სხვა რამით ვისიამოვნებ და კაზინოს არ ვასიამოვნებ. ბევრჯერ მიცდია, გიგის გვერდით დავდგომოდი, სულ ვეუბნებოდი, თამაშისთვის თავი დაენებებინა, ამის გამო ხშირადაც გვიჩხუბია, მაგრამ... საკმაოდ დიდ თანხებს აგებდა, უმეტესად კი – ჩემს ფულს.
– მასთან დაშორება გამოუვალმა სიტუაციამ განაპირობა თუ გრძნობებიც გაქრა?
– როცა მისგან წამოვედი, ნელ–ნელა მივხვდი, რომ გრძნობებიც აღარ გამაჩნდა და ბოლოს უკვე მასთან შეჩვევის მომენტი მქონდა. როცა ადამიანისგან ბევრჯერ იგრძნობ ცუდ აურას და ცუდ ენერგიას მიიღებ, უკვე გრძნობებიც სადღაც მიდის. სიყვარულს გაფრთხილება, შენახვა და მოფერება უნდა და როცა პირიქით ექცევი, გაგიფრინდება, აბა, რას იზამს!
– გიგის თქვენთან შერიგების მცდელობა არ ჰქონია?
– როგორ არა, მაგრამ ჩვენი შერიგების შანსი ნულის ტოლია. ორ თვეზე მეტია, რაც ერთმანეთს დავშორდით და ამ ხნის განმავლობაში ყოველდღე მირეკავდა, მეუბნებოდა, დამნაშავე ვარო, მაგრამ როცა ამას მეათედ გეუბნება, აზრი აღარაფერს აქვს. "ფეისბუქზე" ჩვენი ფოტოებიც დადო, მაგრამ როცა დაშორების შემდეგ ერთმანეთს შევხვდით და საბოლოოდ ვილაპარაკეთ, მიხვდა, რომ ჩვენი შერიგების შანსი არ არსებობდა. როცა ადამიანს უყვარხარ, არც ხელს გაგიშვებს და არც იქამდე მიგიყვანს, რომ გაექცე.
– ახლა როგორი ურთიერთობა გაქვთ ყოფილ ქმართან?
– არანაირი. გიგის დედასთანაც ყოველთვის მეგობრული დამოკიდებულება მქონდა, მაგრამ აღარც მასთან მაქვს ურთიერთობა, არც კი მოვუკითხივარ. ცუდია, როცა ადამიანები ერთმანეთს ეფერებიან და შემდეგ ურთიერთობა გულისტკენის გამო აღარ გრძელდება. გიგის დედა შეეცადა, ოჯახი შეგვენარჩუნებინა. ისე მოიქცა, როგორც მშობელი მოიქცეოდა, მაგრამ... ყველაფრის მიუხედავად, გიგის, მის ოჯახს და ირგვლივ მყოფ ადამიანებს დიდ პატივს ვცემ. არავის შეძულება შემიძლია.
– დედათქვენი როგორ შეხვდა თქვენს ამ ნაბიჯს?
– რასაკვირველია, ძალიან განიცადა, მაგრამ ჩემს გადაწყვეტილებას ყოველთვის პატივს სცემს. ცდილობს, რომ გამამხნევოს, გართობაზე გადავერთო და ეს რთული პერიოდი მარტივად გადავიტანო.
– მამამ რა გითხრათ?
– ჩემი მამა კუკა (ალექსანდრე) მდივანია, თუ რატომ, ამაზე საუბარი არ მინდა. კუკას გული დასწყდა, ქმარს რომ გავშორდი. ოჯახის დანგრევის მომხრე არავინ არის და არც ის იყო. მე მისი შვილი ვარ და ჩემს გადაწყვეტილებას პატივს სცემს. "ფეისბუქის" გვერდზე უკვე ჩემი მამობილის გვარით ვარ და ვაპირებ, ოფიციალურად გავხდე მდივანი. ეს რატომ გავაკეთე, არ დავაკონკრეტებ. დიდი გოგო ვარ, არჩევანის საშუალება მაქვს და ვირჩევ კუკას! ის ჩემი მეგობარი და მამუცია – ასე ვეძახი. ეს კაცი ჩემთვის მამაკაცის იდეალია. გოგონებს ხომ უნდათ, რომ მათი ქმრები თავიანთ მამებს ჰგავდნენ, ჰოდა, მე ვოცნებობ, ასეთი ადამიანი შემხვდეს ცხოვრებაში. დედაჩემის და კუკას ურთიერთობას რომ ვუყურებ, ბედნიერი ვარ. სამწუხაროდ, გიგი კუკას არ ჰგავდა.
სოფიო ბოჭორიძე, ჟურნალი სარკე