• ჰატიჯე სენდილი მალულად გათხოვდა

    ჰატიჯე სენდილი თურქეთში ერთ–ერთი ყველაზე წარმატებული და მაღალანაზღაურებადი მოდელი და მსახიობი გახლავთ. უამრავ სერიალში აქვს მიღებული მონაწილეობა, მათ შორის, საქართველოში უკვე პოპულარულ "ქალბატონ დილაში", სადაც მებრძოლი და მამაცი ქალის როლს ასრულებს.
    ახლახან ცნობილი გახდა, რომ "ქალბატონი დილა" ყველასგან მალულად ასევე მსახიობ ბურაკ საგიაშარზე გათხოვდა.
    ჰატიჯე სენდილი 1983 წლის 2 აგვისტოს სტამბულში დაიბადა. დედამისი წარმოშობით ალბანელია, მამა – თურქი, ანტალიიდან. ჰატიჯემაც ბავშვობა ანტალიაში გაატარა. უნივერსიტეტში ბიზნესისა და საქმიანი ადმინისტრირების ფაკულტეტზე სწავლობდა და პარალელურად, 2 წლის განმავლობაში, სამსახიობო ხელოვნებასაც ეუფლებოდა. მოდელობაზე არც უფიქრია, მაგრამ მშვენიერ სტუდენტს ჯერ კიდევ სწავლისას დაადგეს თვალი სამოდელო სააგენტოებმა.
    უკვე წარმატებულმა მოდელმა და მსახიობმა 2011 წელს "მის თურქეთის" კონკურსში გაიმარჯვა, ხოლო იმავე წელს "მის ევროპის" კონკურსზე მესამე ადგილს დასჯერდა.
    ჰატიჯეს სამსახიობო დებიუტი 2001 წელს შედგა სერიალში "ახალი ცხოვრება". შემდეგ იყო სერიალები: "სექტემბერი", "მგლების ხეობა" და "დიდი ოჯახი". 2011–2012 წლებში კი "ქალბატონ დილაში" ითამაშა. ეს მისთვის ვარსკვლავური როლი აღმოჩნდა და მსახიობი პოპულარობის ზენიტში აიყვანა – სურათმა ყველაზე რეიტინგული სერიალის ტიტული მოიპოვა, ჰატიჯე კი თურქეთში ყველაზე მაღალანაზღაურებადი მსახიობი გახდა.
    2010 წლიდან ჰატიჯე სენდილი ბურაკ საგიაშარს ხვდება. 2014 წელს კანის კინოფესტივალზე შეყვარებულები ერთად მივიდნენ. ბურაკმა შემთხვევით ისარგებლა და საყვარელ ქალს რომანტიკულ გარემოში სთხოვა ცოლობა, თან ძვირადღირებული, ბრილიანტის თვლებით დამშვენებული ბეჭედი აჩუქა. ჰატიჯე მაშინვე დათანხმდა, მაგრამ ჟურნალისტების წინ რატომღაც არ მოისურვა, საოცნებო ბეჭდით ეამაყა – როდესაც ფოტოაპარატით შეიარაღებული პაპარაცები შენიშნა, ხელი საქმროს ხელში დამალა.
    გთავაზობთ ინტერვიუს, რომელიც თურქმა ლამაზმანმა გათხოვებამდე ჟურნალ "გლორიას" მისცა.
    – უნივერსიტეტში ბიზნესისა და საქმიანი ადმინისტრირების ფაკულტეტი წარმატებით დაამთავრეთ, მაგრამ თქვენი სპეციალობით არასოდეს გიმუშავიათ. რა არის ამის მიზეზი?
    – დიახ, უნივერსიტეტში ვსწავლობდი, მაგრამ, სიმართლე გითხრათ, გამოცდილება სამსახიობო სფეროში მივიღე, ამიტომ მსახიობის კარიერა ავირჩიე. დარწმუნებული ვარ, უნივერსიტეტის დამთავრების შემდეგ ადამიანების 90%–ს ეცვლება შეხედულება. უნივერსიტეტში სწავლის პარალელურად სამსახიობო ხელოვნებასაც დავეუფლე, ასე რომ, სამსახიობო განათლება მაქვს.

    – თქვენი მონაწილეობით ფილმებს თუ უყურებთ და რამდენად თვითკრიტიკული ხართ?
    – ვუყურებ და უცნაური შეგრძნებები მეუფლება, თან ყოველთვის ვნერვიულობ. საკუთარი თავის მიმართ საკმაოდ კრიტიკული ვარ. ჩემი მონაწილეობით ფილმებს იმიტომ ვუყურებ, რომ, რაც არ მომეწონება, სხვა დროს გამოვასწორო.
    – "ქალბატონ დილაში" განსახიერებულ პერსონაჟს რამით ჰგავხართ?
    – დილა ძლიერი და გაბედული ქალია, ამით ჩვენ ერთმანეთს ნამდვილად ვგავართ. მის სიტუაციაში მეც იგივენაირად მოვიქცეოდი.
    – "ქალბატონი დილას" გადაღებები ქალაქ ადანაში საკმაოდ დიდხანს მიმდინარეობდა. არ გაგიჭირდათ სხვა ქალაქში ამდენი ხანი ყოფნა?
    – გადაღებები თითქმის წელიწადი გაგრძელდა, მაგრამ იქ ყოფნა არ გამჭირვებია, რადგან ამ ქალაქმა ძალიან შემაყვარა თავი. მართალია, ვიღლებოდით, მაგრამ მშვენივრადაც ვერთობოდით.
    – უარყოფითი პერსონაჟის როლი რომ შემოგთავაზონ, დათანხმდებით?
    – ეს ჩემი სამუშაოა და, რა თქმა უნდა, დავთანხმდები, მაგრამ იმ შემთხვევაში, თუ მეძავისა და 3 შვილის დედის როლებს შორის მომიწევს არჩევანის გაკეთება, რა თქმა უნდა, უპირატესობას უკანასკნელს მივანიჭებ.
    – ყველაზე მეტად რა მოგწონთ საკუთარ ხასიათში?
    – არ ვარ ნერვული, თუ იმას არ ჩავთვლით, რომ, როდესაც ვიღლები, ყოველთვის გაღიზიანებული ვარ.
    – მუდამ იმას აკეთებთ, რაც თქვენ გსურთ, თუ ახლობლების აზრსაც ითვალისწინებთ?
    – ყოველთვის იმას ვაკეთებ, რასაც ვფიქრობ და რაც სწორად მიმაჩნია.
    – თქვენი მომავალი ქმარი ბურაკ საგიაშარიც ძალიან დაკავებულია. როგორ ფიქრობთ, თქვენი ასეთი სამუშაო რეჟიმი პირად ცხოვრებაზე ცუდად ხომ არ იმოქმედებს?
    – ჩვენ მსახიობები ვართ და ერთმანეთის კარგად გვესმის. იმედია, მომავალშიც ასე იქნება. ვაპირებთ, დაქორწინების შემდეგ კვირაში ერთი დღე მაინც ქალაქგარეთ ერთად გავატაროთ.
    – საკმაოდ ლამაზი ქალი ხართ, ეს ცხოვრებას გიადვილებთ თუ გირთულებთ?
    – რთულია ის, რომ გამუდმებით პაპარაცების გარემოცვაში ვარ. ამავდროულად სილამაზე ყოველ გადადგმულ ნაბიჯს მიადვილებს.

    – როგორ ინარჩუნებთ ფიგურას?
    – ჯანსაღად ვიკვებები, არ ვეკარები გაზიან და ალკოჰოლურ სასმელს. როდესაც დრო მაქვს, აუცილებლად მივდივარ სპორტულ დარბაზში.
    – ამჟამად რა ხდება თქვენს პირად ცხოვრებაში?
    – როგორც იცით, მე და ბურაკ საგიაშარი დანიშნულები ვართ, უახლოეს მომავალში კი ოფიციალურად დავქორწინდებით. ვფიქრობ, ბურაკი ის ადამიანია, რომელთან ერთადაც ულამაზეს ოჯახს შევქმნი.
    მოამზადა თათია ბოჭორიძემ, ჟურნალი სარკე
    5 249 ნახვა
    18-09-2014, 11:05
    GOGATV

    abezara