რატი დურგლიშვილმა ''აეროსმიტის'' სოლისტს ავტოგრაფი არ ჩამოართვა

სახელი, გვარი: რატი დურგლიშვილი

ასაკი: 1982 წლის 5 აპრილი

პროფესია და საქმიანობა:

სამხატვრო აკადემია მაქვს დამთავრებული, ქანდაკების განხრით, საქმიანობა - სიმღერა, თუმცა ვერ ვიტყვი, რომ სიმღერა ჰობია, ორივე ჩემი პროფესიაა.

ფილმი, რომელსაც შეგიძლია, ნებისმიერ დროს უყურო:

''ქეთო და კოტე'', ''ტიტანიკი'', ''ავატარი''.

საყვარელი მსახიობი:

კიანუ რივზი და ჯულია რობერტსი.

წიგნი, რომელიც ბოლოს წაიკითხე:

დაახლოებით 4-5 წელია, არაფერი წამიკითხავს დროის დეფიციტის გამო, თან, გართობას რომ აჰყვება ადამიანი, ხომ იცი?! ბოლოს, თუ სწორად მახსოვს, რომელიღაც მხატვრის ბიოგრაფია წავიკითხე.

რაზე ოცნებობ?

ცოტა უხერხული ნათქვამია, მაგრამ ოცნება არ მიყვარს, იმაზე ვფიქრობ, რისი გაკეთებაც რეალურადაა შესაძლებელი. მიზანი მაქვს ის, რომ დროზე დავხურო ჩემი სიმღერების ალბომი და გამომივიდეს ის საქმე, რაც მიყვარს. ჩემს ოცნებად შეიძლება ის ჩაითვალოს, რომ მინდა, ჩვენს ქვეყანაში გაჭირვება არ იყოს და ადამიანები ბედნიერები ხვდებოდნენ ერთმანეთს.

რისი გეშინია?

მეშინია, საყვარელ ადამიანებს რამე არ მოუვიდეთ. გარდა ამისა, მეშინია სისწრაფის, არ მიყვარს ჩქარა სიარული და ღრმა წყალში ყოფნა.
ადგილი ან ქვეყანა, სადაც იმოგზაურებდი:
რაც მინდოდა ვნახე, მაგრამ მაინც ამერიკას დავასახელებ, ლოს-ანჯელესის, ნიუ-იორკის ნახვა მინდა.

რისი გრცხვენია?

ბევრი რაღაცის, რომ დავთვრები, მეორე დღეს ვრეკავ და ვკითხულობ, ვინმეს რამე ხომ არ ვაწყენინე. ასევე მრცხვენია ბევრ ხალხში დიდხანს ყოფნის, დიდხანს ვერ ველაპარაკები ადამიანებს, სულ მგონია, რომ ვაწუხებ. მორიდებული ვარ, ეს ბავშვობიდან მაქვს და ვერ მოვიშალე.

რას არ ჩაიცამ არასდროს?

კაბას (იცინის).

რას გამოჰყავხარ წყობიდან და როგორია გაბრაზებული რატი?

ტყუილს ვერ ვიტან და ვერც ვამბობ, როცა ტყუილის თქმა მიწევს, ვჩუმდები. თუ ახლობელ ადამიანს გამოვყავარ წყობიდან და მარტოები ვართ, შეიძლება, ხმასაც ავუწიო, თუ უცხოა და ჭკვიანი, შე-ნიშვნით შემოვიფარგლები, მაგრამ თუ ვერ იგებს ჩემსას, მაშინ ვდგები და მივდივარ, შურაცხყოფას არ მივაყენებ. აფექტური ვარ და ხშირ შემთხვევაში იმაზე ვბრაზდები, როცა ადამიანი საკუთარ თავს რაღაცას უშავებს და ამას ვერ ხვდება.

რამ შეიძლება გაგიფუჭოს ხასიათი?

უფულობამ, ადამიანმა, რომელიც შეიძლება არასწორად მოიქცეს, ამინდიც მოქმედებს.

ხასიათის თვისება, რომელიც გინდა, რომ შეცვალო?

ჩემი ხასიათის 70% მომწონს, სიმთვრალე იდეალური მაქვს, ადამიანებთან ურთიერთობისასაც კარგი ვარ, სიკეთის კეთება შემიძლია, მაგრამ ხასიათი მაქვს რთული. როცა პრობლემა მაქვს, ვიკეტები, მგონია, რომ ყველა დაბრკოლებას პასუხი ჩვენვე უნდა გავცეთ და სხვა ვერ დაგვეხმარება, ამ დროს კი, როცა ვინმე მირეკავს და რაღაცას მეკითხება, ცოტა არაადეკვატური ვხდები და მინდა, ეს გამოვასწორო...

სირთულე, რომელიც ბოლოს გადალახე:

სირთულე იყო იმ ოთხ სიმღერაზე მუშაობა, რომლებიც ჩავწერე. ძნელია, როცა ყველაფერს შენ აკეთებ, თავიდან ბოლომდე შენ ქმნი. მაგრამ სხვანაირად არ შემიძლია, ძნელად ვენდობი ადამიანებს და მინდა, რაც კეთდება, თითოეულ დეტალში მიმიძღვოდეს წვლილი. თუმცა ალბომის კიდევ 9 სიმღერა წინ მაქვს.

იდეალი თუ გყავს?
არა, არ ვბაძავ არავის და არ მყავს იდეალები, არ ვიციკლები ადამიანებზე, გაფანატება არ მახასია-თებს.

საოცნებო ვახშამი მსოფლიო ადამიანთან...
არ მყავს ასეთი, ბევრ ვარსკვლავს შევხვედრივარ ცხოვრებაში. მილანში სასტუმროდან რომ გავდიოდი, დავინახე, ფანები გროვდებოდნენ, მივხვდი, რომელიღაც ვარსკვლავს უნდა გამოევლო. დავე-ლოდე და სტივ ტაილერი გამოჩნდა. მიუხედავად ჩემი სიმპათიისა, არც სურათის გადასაღებად მივსულვარ, არც ავტოგრაფისთვის, ასეთი რაღაცები არც ბავშვობაში მხიბლავდა. გაფანატებული მქონდა ხელოვნებაზე, ხატვაზე, მუსიკაზე და არა კონკრეტულ ადამიანზე.

ერთი კითხვა რატისგან თეა წულუკიანს.
(ფიქრობს) განტვირთვისთვის რა ხერხს მიმართავს, რა არის მისთვის რელაქსი.

ციცი ომანიძე
ჟურნალი ''რეიტინგი''