რა აკავშირებს დედა სულთან ნებეჰატ ჩეჰრეს საქართველოსთან

"ოქროს ფორთოხლის" მფლობელი თურქი მსახიობი, მოდელი და მომღერალი ნებეჰათ ჩეჰრე, ცნობილი გახდა სერიალებით "აკრძალული სიყვარული" და "დიდებული საუკუნე". ამ უკანასკნელში მან დედა (ვალიდე) სულთნის როლი მოირგო.
ნებაჰათ ჩეჰრე თურქ მსახიობთა უფროსი თაობის წარმომადგენელია. 1944 წლის 15 მარტს ქალაქ სამსუნში დაიბადა. ცნობილია, რომ იგი ქართული წარმომავლობისაა. მამამისი, იურისტი იზეთ ჩეჰრე, წარმოშობით აჭარელია, დედა კი – თურქი დიასახლისი. ნებეჰათი 5 წლის იყო, როცა მამა გულის შეტევით გარდაეცვალა. დედამისი, მუზეინ ჩეჰრე, შვილთან ერთად სამსუნიდან სტამბულში გადავიდა საცხოვრებლად. იქ მეორედ გათხოვდა, რაც ნებეჰათისათვის ძნელად შესაგუებელი ნაბიჯი აღმოჩნდა.
მისი პროფესიული კარიერა მოდელობით დაიწყო. 1960 წელს, 15 წლის ასაკში, "მის თურქეთის" ტიტული მოიპოვა და იმავე წელს თავისი ქვეყანა "მის მსოფლიოზე" წარადგინა, რომელიც ლონდონში ჩატარდა. როგორც მსახიობი თავად ამბობს, სილამაზის კონკურსის შესარჩევ კასტინგზე მეგობარს გაჰყვა, ჟიურიმ კი მასაც შესთავაზა მონაწილეობა. გამორჩეული გარეგნობის წყალობით, მას რეჟისორებმაც დაადგეს თვალი.
ნებეჰათის კინოდებიუტი 1962 წელს შედგა სერიალში "ველური ვარდი", რასაც მოჰყვა "მწარე ცხოვრება" და "მეფე ჩემი მეგობარია". პარალელურად აქტიურად აგრძელებდა სამოდელო საქმიანობას.
1964 წელს ჩეჰრეს მთავარი როლი მისცეს ფილმში "გუნიული", რომელშიც მისი მეწყვილე თურქი მსახიობი ილმიზ გიუნემი იყო. ეკრანულ წყვილს გაცნობისთანავე მოეწონა ერთმანეთი და შეხვედრები დაიწყეს. ჩეჰრე ბედნიერი იყო, მაგრამ მისმა ბედნიერებამ დიდხანს არ გასტანა. მალე შეიტყო, რომ მისი მომავალი ქმარი სხვა ქალისაგან შვილს ელოდებოდა. ამის შემდეგ ისინი დაშორდნენ.
1965 წელს ნებეჰათმა მონაწილეობა მიიღო ფილმში "მთის შვილი", რომლის სცენარის ავტორიც ილმიზ გიუნემი იყო. მათ კვლავ ხშირად უწევდათ შეხვედრა და... გიუნემი და ჩეჰრე 1967 წლის 30 იანვარს დაქორწინდნენ. მათი მეგობრის თქმით, ისინი უზომოდ შეყვარებული ცოლ–ქმარი იყვნენ, მაგრამ ხშირად ჩხუბობდნენ და ერთმანეთს ხელითაც კი ეხებოდნენ. ყველაფერი კი იმით დამთავრდა, რომ 1968 წლის აპრილში წყვილი გაიყარა.
ილზიმ გიუნემიმ მეორე ქორწინების შემდეგაც ვერ შეძლო ჩეჰრეს დავიწყება და ამის შესახებ მისმა ცოლმაც იცოდა. მოგვიანებით ილზიმი ციხეში მოხვდა, საიდანაც 1980 წელს გაიქცა, 4 წელიწადში კი კუჭის სიმსივნით გარდაიცვალა. ნებეჰათი მის დაკრძალვას არ დასწრებია, არც არასოდეს მისულა მის საფლავზე, რადგან სურს, პირველი სიყვარული ისეთივე დაამახსოვრდეს, როგორიც ბოლოს ნახა.
განქორწინების შემდეგ ნებეჰათ ჩეჰრე თაყვანისმცემლებს მომღერლის სტატუსით გამოეცხადა. მისი გასაოცარი ხმა პირველად თურქმა მომღერალმა და კომპოზიტორმა ზეკი მურემ შენიშნა.
1972 წელს ნებეჰათი კალათბურთელ იავუზ დემირს შეხვდა და 1976 წელს ცოლად გაჰყვა. დაფეხმძიმდა კიდეც, მაგრამ ხვდებოდა, რომ იავუზთან დიდხანს არ დარჩებოდა და აბორტი გაიკეთა. 1979 წელს წყვილი მართლაც განქორწინდა.
გთავაზობთ ინტერვიუს მსახიობთან.
– რა კრიტერიუმების მიხედვით ირჩევთ როლებს?
– იყო დრო, როდესაც პროექტებს მატერიალური თვალსაზრისით ვირჩევდი. ამჟამად ფინანსურად უზრუნველყოფილი ვარ და უკვე შემიძლია როლის თამამად არჩევა – ახლა იმ გმირებს ვთამაშობ, რომლებიც მომწონს. ვცდილობ, ყველა ჩემი პერსონაჟი განსაკუთრებული იყოს, თითოეულ სიუჟეტში, სადაც კი გამოვჩნდები, ჩემი ნიშანი დავტოვო.
– სცენარის მიხედვით, იძულებული იყავით, დაგეტოვებინათ "დიდებული საუკუნე", რადგან თქვენი პერსონაჟი კვდება. ამის შემდეგ თუ აგრძელებდით სერიალის ყურებას?
– მე მხოლოდ იმ სერიას ვუყურე, რომელშიც ჩემი სიკვდილის სცენაა ასახული. მინდა გითხრათ, რომ ჩემთვის საკმაოდ შთამბეჭდავი აღმოჩნდა.
– როგორ ფიქრობთ, დედა სულთანი რთული ხასიათის პერსონაჟი იყო?
– დასაწყისში ცოტა შემეშინდა, მაგრამ მერე მივხვდი, რომ ძალიან საინტერესო პერსონაჟი უნდა მეთამაშა.
– რას ნანობთ თქვენი განვლილი ცხოვრებიდან?
– იმას, რომ საკუთარი სიმღერების ალბომი არ ჩავწერე.
– ერთ–ერთ ინტერვიუში განაცხადეთ, რომ სამსახიობო კარიერას ასრულებთ. ეს მართალია?
– დიახ, ალბათ 2–3 წელიწადში ასეც იქნება. ბოლო 7 წელია, შეუსვენებლად ვმუშაობ. როცა დრო მოვა, მინდა, ჩემი პროფესია ლამაზად დავტოვო.
– ყოველთვის განსაკუთრებულად გამოიყურებით, როგორ ზრუნავთ გარეგნობაზე?
– 3 წლის წინ სიგარეტს თავი დავანებე, განსაკუთრებულ ყურადღებას ვუთმობ კვებას, უფრო მეტად ბოსტნეულს ვჭამ, მაგრამ ეს იმას არ ნიშნავს, რომ უარს ვამბობ ხორცსა და თევზზე. ამჟამად 57 კილოგრამს ვიწონი.
– ბოტოქსის ან პლასტიკური ქირურგიისათვის არასოდეს მიგიმართავთ?
– 10 წლის წინ გავიკეთე ლიფტინგი, 2 წლის შემდეგ კი ნაოჭები გამიჩნდა. საფრანგეთში ყოფნის დროს ექიმთან მივედი, რომელმაც მითხრა, რომ ეს იყო მარილები კანზე, ამიტომ ისევე დავტოვე, როგორც იყო. მე ასაკის გამო კომპლექსი არასოდეს მქონია, ეს ხომ ბუნების კანონია.
– გჯერათ, რომ ნამდვილ სიყვარულს კვლავ შეხვდებით?
– ამჟამად ჩემს ცხოვრებაში მამაკაცის საჭიროებას ვერ ვხედავ. შემიძლია კაცთან ვიმეგობრო, მაგრამ მასთან ერთად ვიცხოვრო ან სადმე წავიდე – არ შემიძლია, თუნდაც ის კოლეგა იყოს. მარტოხელა გავხდი, ბოლო 16 წელიწადია, მარტო ვარ, არავის ვხვდები. მე ცხოვრებაში ორჯერ მიყვარდა და ორივეჯერ ცოლად გავყევი.
– არაერთხელ გითქვამთ ინტერვიუში, რომ მამათქვენი ქართველი იყო. თავისი წარმომავლობის შესახებ თუ გიყვებოდათ?
– ძალიან პატარა ვიყავი, როდესაც მამა გარდაიცვალა. ვერ მოასწრო, ჩემთვის თავისი სამშობლოს, საქართველოს შესახებ მოეყოლა. დედაჩემი მალე გათხოვდა მეორედ და მამინაცვალთან ვიზრდებოდი. ის კარგი ადამიანი იყო, ყველანაირად ცდილობდა, ჩემთან ახლოს ყოფილიყო, მაგრამ მამას ვერავინ შემიცვლიდა.
მოამზადა თათია ბოჭორიძემ, ჟურნალი სარკე