ცირა ბესელია საკუთარი დით ამაყობს - ''ძმა გვყავს დასაოჯახებელი, სასურველი სასიძოა...''

საპარლამენტო უმრავლესობის წევრ ეკა ბესელიას და ცირა ბესელია ოჯახში მესამე ბავშვი იყო. ორი დის დაბადების შემდეგ ბიჭზე ოცნებობდნენ, თუმცა კვლავ გოგონა გაჩნდა. თავის თავს ბიჭის ძიებაში დაბადებულს ეძახის. მეოთხე ბიჭი დაიბადა, თუმცა ყველაზე განებივრებული დედმამიშვილებში მაინც მესამე და, ცირა ბესელიაა. ჩვენი რესპონდენტისგან ცნობილი პარლამენტარის ბავშვობაზე ბევრი რამ შევიტყვეთ.

- ოთხი დედმამიშვილი ვართ. სამ დას ერთი ძმა გვყავს. დებს შორის ყველაზე პატარა მე ვარ. პირველი ხათუნა დაიბადა, მერე გაჩნდა ეკა. ჩემსა და ეკას შორის ასაკობრივი სხვაობა შვიდი წელია. ბოლოს გაჩნდა ბესო. მამაჩემს ძალიან უნდოდა ბიჭი, ვხუმრობ ხოლმე, ბესოს ძიებაში ვარ დაბადებული-მეთქი.
- როგორი იყო ეკა ბავშვობაში?
- ძალიან ცელქი. მახსოვს, რომ ბავშვობიდან ძალიან შრომისმოყვარე და მიზანდასახული იყო. თამაშსაც ასწრებდა და სწავლასაც. რაოდენ გასაკვირიც უნდა იყოს, ფეხბურთსაც თამაშობდა. სულ კითხულობდა. მე არ ვიყავი ასეთი ბეჯითი ბავშვი. დედა სულ მეუბნებოდა, იმეცადინეო. ეკას ამის თქმა არ სჭირდებოდა, სულ კითხულობდა და მეცადინეობდა.
- დედმამიშვილებში ყველაზე კარგად ეკა სწავლობდა?
- ვერ ვიტყვი, რომ რომელიმე ცუდად ვსწავლობდით. ეკა განსაკუთრებულად შრომისმოყვარე იყო. ყველა ვსწავლობდით, უბრალოდ, ეკას არ სჭირდებოდა იმის თქმა, აიღე წიგნი და იმეცადინეო. ასწრებდა გართობასაც, სწავლასაც და შემოქმედებითად დახარჯვასაც. მახსოვს, სკოლებში სპექტაკლებს დგამდა. ბავშვობიდან გამორჩეული იყო.
- დედმამიშვილებში რომელ თქვენგანს ეკუთვნოდა გადამწყვეტი სიტყვა?
- ტრადიციულ ოჯახში ვართ გაზრდილები, სადაც უფროსი ყოველთვის უფროსობდა. თუმცა მიუხედავად იმისა, რომ დედმამიშვილებში ნაბოლარა ძმა მყავს, მე ვარ განებივრებული. თუ ისე იკრიბებიან, რომ მე არ ვარ, ყველას საშინელი დისკომფორტი აქვს.
- მეტსახელი გაქვთ?
- ეკა ციკოს მეძახის.
- სახელი - ცირა მან დაგარქვათ?
- სახელი მამამ დამარქვა. მესამე გოგო რომ დავიბადე, მამას შეაპარეს, კარგი ცირა დაიბადაო, მეგრულიდან რომ ვთარგმნოთ, დაახლოებით ნიშნავს, კარგი გოგონა დაიბადაო. ასე დამერქვა ცირა. მე კი ვაპროტესტებ, მაგრამ რას გავაწყობ.
- ეკასთან მეგობრობთ?
- ეკა ჩემთვის იმაზე მეტია, ვიდრე დედმამიშვილი. დედობრივი განცდა უფრო მაქვს მის მიმართ, ვიდრე დის, იმიტომ, რომ ძალიან მზრუნველია. განსაკუთრებულად კარგი ურთიერთობა გვაქვს. წლების განმავლობაში ერთად ვცხოვრობდით. ახლაც ერთად ვცხო-ვრობთ. დედმამიშვილები სულ ერთად ვისვენებთ. ხომ შეიძლება, რომ მეგობრებთან ერთად დავისვენოთ, მაგრამ ერთმანეთთან ყველაზე კარგ დროს ვატარებთ. ჩვენ შორის ყველაზე მზრუნველი ეკაა. მას ბევრი ფუნქცია აქვს შეთავსებული. როგორც დედა ზრუნავს თავის შვილებზე, ისე ზრუნავს ეკა თავის დედმამიშვილებზე.
- ეკა ძალიან კარგი ადვოკატი იყო, მაგრამ პოლიტიკაში წავიდა. მისი ეს გადაწყვეტილება მოგწონთ?
- ეკას პოლიტიკაში წასვლის იდეფიქსი არ ჰქონია. რეჟიმმა, რომელშიც მოუწია ადვოკატობამ, სხვა გზა არ დაუტოვა. მიხვდა, რომ თავისი ფუნქციები დაეკარგა. პოლიტიკაში წასვლა ბავშვობიდან არ დაუგეგმავს. გარემოებებმა აიძულეს, თორემ თავისი პროფესია ძალიან უყვარს.
- მოგწონთ ეკა, როგორც პოლიტიკოსი?
- მე მომწონს და იმიტომ არა, რომ და ვარ. ამ შემთხვევაში შეიძლება იფიქროთ, რომ მიკერძოებული ვარ, მაგრამ მე იმაზე მეტს ვხედავ, რასაც სხვები ხედავენ. ეკას იმდენად კარგი თვისებები აქვს, რომ პოლიტიკისთვის მეცოდება. გინდა თუ არა, პოლიტიკაში რომ ხარ, რამე სიბინძურეში ''გაგსვრიან''. ეკა აბსოლუტურად სუფთა ადამიანია. მე რომ მის თუნდაც ერთ ჩვეულებრივ სამუშაო დღეს ვუყურებ, გაოცებული ვარ. რასაც ის აკეთებს, ჩვეულებრივი ადამიანის ძალებს აღემატება. მეც ვმუშაობ, მაგრამ იმის ნახევრის ნახევარს ვერ მოვასწრებ, რასაც ის. მგონია, რომ ადამიანურთან ერთად, ზებუნებრივი ძალაც აქვს.
- როგორ უყურებთ ''ქერის უბანს'', სადაც სხვა პოლიტიკოსებთან ერთად ეკა ბესელიას პერსონაჟიცაა?
- მომწონს. ეკაც ძალიან ხალისობს, კარგი, გასართობი მულტფილმია.
- მსგავსებას პოულობთ თქვენს დასა და ''ქერის უბნის'' პერსონაჟს შორის?
- არა, რასაკვირველია. ვინც ამ მულტფილმს აკეთებს, აშკარად არ იცნობს ჩემს დას. საყვარელი თოჯინაა, თუმცა ჩემს დას ოდნავადაც არ ჰგავს. პოპულარული ადამიანის ცხოვრებაში ეს ჩვეულებრივი ამბავია. ჩვენ ამ ყველაფერს სერიოზულად არ აღვიქვამთ.
- ისე ლაპარაკობთ ეკას საქმიანობაზე, რომ მგონია, პოლიტიკაში არასდროს ისურვებდით ყოფნას.
- აბსოლუტურად აპოლიტიკური ადამიანი ვარ. პოლიტიკაში წასვლაზე არასდროს ვიფიქრებ. ჯერ ერთი, ძალიან შრომატევადია და მეორეც, ერთი ოჯახიდან ორი პოლიტიკოსი ნამეტანი ბევრი იქნება.
- დანარჩენებს რა პროფესია გაქვთ?
- ყველა იურისტები ვართ.
- ყველამ ერთი პროფესია რატომ აირჩიეთ?
- არ ვიცი, ასე მოხდა. მეორადი პროფესიებიც გვაქვს, მაგრამ ძირითადად ყველანი იურისტები ვართ. მე, მაგალითად, ერთ-ერთ ავიაკომპანიაში მარკეტინგის სამსახურის უფროსი ვარ.
- პროფესიით არ გიმუშავიათ?
- არა.
- დანარჩენ დედმამიშვილებს?
- უფროსი და ადვოკატია. ჩემს ძმას კი, რაოდენ გასაკვირიც უნდა იყოს, არასდროს უმუშავია იურისტად.
- უფროსმა დამ რომ აირჩია ადვოკატობა, მერე ყველას ეს პროფესია მოგინდათ?
- ჯერ ეკა გახდა ადვოკატი და მერე ჩემი უფროსი და. ვერ ვიტყვი, რომ ასე ერთმანეთის მიბაძვით მოვიქეცით. როგორც ჩანს, სამართლიანობისთვის ბრძოლის სულისკვეთება ჩვენს ოჯახში დევს. თამამად შემიძლია ვთქვა, რომ ჩვენს ოჯახში უსამართლო არავინაა. თუმცა აქვე იმასაც აღვნიშნავ, რომ ჩვენ შორის ეკას მოჭარბებულად აქვს სამართლიანობის განცდა.
- გარეგნულად, მგონი, ცოტათი ჰგავხართ ერთმანეთს.
- მე უფრო მამას ვგავარ, ეკა - დედას ჰგავს. ჩემს ნახვაზე ყველას პირველი რეაქციაა: უი, მართლა დები ხართო? იერით თითქოს ვგავართ ერთმანეთს. მე ვიტყოდი, რომ დანარჩენი სამი უფრო ჰგავს ერთმანეთს. მე ცოტა განვსხვავდები მათგან, ალბათ, ჩემი თმის ფერის გამო.

- თქვენს პირად ცხოვრებაში რა ხდება?
- მყავს ერთი ვაჟი, ცამეტი წლის საბა მესტვირიშვილი.
- დედმამიშვილებს რამდენი შვილი გყავთ?
- უფროს დას ჰყავს გოგო და ბიჭი. ეკას - ორი და მე ერთი შვილი მყავს. ძმა გვყავს დასაოჯახებელი, სასურველი სასიძოა.


- რატომაა სასურველი?
- ჯერ ერთი იმიტომ, რომ სამი დის საყვარელი ძმაა.
- ზოგს შეიძლება, სამი მულის ყოლა არ უნდოდეს.
- (იცინის) კი, ასეც არის ხოლმე, მაგრამ ჩვენთვის საყვარელი და განებივრებული ძმაა. ცუდი ბიჭი ნამდვილად არაა. მიმაჩნია, რომ კარგი სასიძო ბიჭია.
- რამდენი წლისაა?
- ბესო 30 წლისაა. დედმამიშვილებს ჯერ შვილიშვილები არ გვყავს. არც ისეთი დიდი ასაკი გვაქვს. თუმცა ეკას ბიჭი, რატი მილორავა, უკვე 21 წლისაა.
- ეკა შვილის გამო რამდენჯერმე გაეხვა სკანდალში, როგორ ფიქრობთ, ასე რატომ მოხდა?
- ეკას ვერაფერი მოუნახეს გასაკრიტიკებელი, ცხოვრების რეჟიმიდან გამომდინარე, საქმეზეა თავგადაკლული, მისი მტრები ამ ბავშვით მანიპულირებენ. ვერც ვხვდები, საიდან მოიგონეს ბოლოდროინდელი სკანდალი. როცა დაჩი დარჩია მოკლეს, ოჯახის რამდენიმე წევრი აჭარაში ვისვენებდით. რატი ფიზიკურად არ იყო თბილისში. არც მკვლელს და არც მოკლულს არ იცნობდა.
- რატი რა აზრისაა იმ სკანდალებზე, რაც მის გარშემო ხდება ხოლმე?
- ძალიან შეწუხებულია. ბავშვს ფსიქიკა დაენგრა მოყოლებული იმ დროიდან, როცა თექვსმეტი წლის ასაკში ჩემს ძმასთან ერთად სკანდალში გაეხვა. ეკას გამო იყვნენ დევნილები. მთელი ოჯახი სტრესის ქვეშ ვიყავით. შეიძლება ითქვას, რომ დაღიც კი დაგვასვა იმ წლებმა. არასრულწლოვანი რატი უმიზეზოდ იძებნებოდა. ამ ყველაფრის გამო ძალიან დაითრგუნა... ცოტა ხნის წინ გვითხრა, რაღაც გააკეთეთ, ეს რა დღეში ვარო. თან ლაპარაკი ხომ არ იყო იმაზე, რომ კამათი მოხდა. მკვლელობაზე იყო ამ ბავშვის სახელი მიბმული. ამბობდა, ეკა ბესელიას შვილობა სასჯელი ხომ არ უნდა იყოსო.
ძალიან მეამაყება ეკა ბესელია. რანგის გამო არ ვამბობ ამას. მის შინაგან ბუნებაზე ვამბობ. ძალიან ბედნიერი და ამაყი ვარ, რომ ეკასნაირი და მყავს. მისთვის ხშირად მითქვამს, რა მეშველებოდა, შენ რომ არ მყოლოდი-მეთქი.
- არასდროს აკრიტიკებთ?
- ყოფილა შემთხვევა, რომ მის ინტერვიუში რაიმე არ მომწონებია და მითქვამს. ჩემი შესასწორებელი ეკას არაფერი აქვს, მაგრამ ისეც არაა, რომ რასაც ეკა აკეთებს, ყველაფერს ვუწონებ. ყოველთვის ვეუბნები ჩემს აზრს. ეკაც ყოველთვის იღებს და ითვალისწინებს რჩევებს. ჩვენს ოჯახში დემოკრატიაა. ზოგადად ოჯახებიდან უნდა დავიწყოთ დემოკრატია, რომ მერე ქვეყნის დემოკრატიამდე მივიდეთ.

მერი კობიაშვილი
ჟურნალი ''რეიტინგი''