როგორ უნდა გამოთვალოთ ჩასახვისთვის ხელსაყრელი ან უსაფრთხო დღეები

თურმე არასასურველი ორსულობისგან თავის დაცვა სპეციალური კონტრაცეპტივების გარეშეც შესაძლებელია. ამაში ე.წ. უსაფრთხო დღეების კალენდარი დაგეხმარებათ. ეს მეთოდი იმ ქალებისთვისაა, ვისაც ციკლი დარღვევების გარეშე, რეგულარული აქვს. თუ ამ მხრივ გარკვეულ "გადაცდომებს" ამჩნევთ, კალანდრის მეთოდი თქვენს შემთხვევაში არ "იმუშავებს".
როგორ გამოვთვალოთ დაფეხმძიმებისთვის ნაყოფიერი და უნაყოფო დღეები?
გააანალიზეთ ბოლო რამდენიმე მენსტრუაციული ციკლის ხანგრძლივობა (ანუ პერიოდი ციკლიდან ციკლამდე). შემდეგ ყველაზე მოკლე ციკლს 18 გამოაკელით. მაგალითად, თუ ციკლი 26-დღიანია, სხვაობას 8-ს მიიღებთ. ამის შემდეგ ციკლის დაწყების დღიდან 8 დღე გადათვალეთ და კალენდარზე მონიშნეთ. სწორედ ამ დღიდან იწყება თქვენი ნაყოფიერი პერიოდი. მის დასასრულს კი ამგვარად გამოითვლით: ყველაზე ხანგრძლივი მენსტრუაციული ციკლის დღეებს გამოაკელით 11. თუ ციკლი 30-დღიანია, სხვაობა 19 იქნება. ესე იგი მენსტრუაციის დაწყებიდან ზუსტად მე-19 დღეს დასრულდება განაყოფიერებისთვის ხელსაყრელი პერიოდი და უსაფრთხო დღეები დაიწყება.

საერთოდ, რეგულარული ციკლის შემთხვევებში კალენდარული მეთოდის ეფექტურობა 87%-ს აღწევს.

შეიძლება თუ დაფეხმძიმდეთ მენსტრუაციის წინა დღეებში
ფიზილოგიურად ამ პერიოდში განაყოფიერებისთვის ხელსაყრელი პირობები არ არსებობს, თუმცა თუ ქალი არარეგულარულ სქესობრივ ცხოვრებას ეწევა, დაორსულების შანსი ყოველი სქესობრივი აქტისას მაღალია, რადგან ორგანიზმი იშვიათ კავშირებზე ზოგჯერ არაგეგმიური ოვულაციით პასუხობს.
ასეთ პერიოდში ხდება დაორსულება, როცა წყვილი თავდაცვის მიზნით ხშირად მიმართავს ე.წ. შეწყვეტილ კავშირს. თუ სრულფასოვანი კონტაქტი თუნდაც მენსტრუაციის წინა დღეს მოხდა, სპერმაში შემავალი ნივთიერებები ოვულაციის პროვოცირებას ახდენენ.

ბუნების კანონი
როცა არახელსაყრელ დღეებზე ვსაუბრობთ, აუცილებლად უნდა გაითვალისწინოთ, რომ არ არსებობს დღე, როცა ქალის დაორსულება გამორიცხულია. უსაფრთხო დღეები მხოლოდ იმას გულისხმობს, რომ განაყოფიერების შანსი ძალიან დაბალია. თუმცა "ძალიან დაბალი" არ გულისხმობს "გამორიცხულს". თუ ბუნებამ ინება, ახალი სიცოცხლის მოვლინებას ვერანაირი კალენდარი ვერ შეაჩერებს.