მაია ასათიანი: "ქმართან გაშორების დრო რომ მახსენდება, ჩემი თავი მებრალება"

პოპულარული ტოქ შოუ "პროფილის" წამყვანი, მაია ასათიანი, ტელეარხის ხელმძღვანელი გახდა და, როგორც ამბობს, ამით ისეთი ოცნება აუსრულდა, თავი სიზმარში ჰგონია.
ახალი არხი "მარაო" "რუსთავი 2"–ის ბაზაზე მუშაობს, ქალთა აუდიტორიისთვის არის განკუთვნილი და მისი ბოსის, ანუ მაია ასათიანის, ამბიციაა, რომ ყველა სხვა პატარა არხი გააჩეროს.
37 წლის ასაკისთვის, მაია ასათიანი თვლის, რომ ბევრი რამის გაკეთება მოასწრო. გათხოვდა, ქმარს გაშორდა, ჰყავს 16 წლის ქალიშვილი ნუცა. რაც შეეხება, პროფესიული წარმატებას – ფაქტი სახეზეა. ამ ყველაფერზე დაწვრილებით მაია ასათიანი "სარკეს" უამბობს, ანუ ჟურნალს, რომლითაც მისთვის "ყოველი ოთხშაბათის დილა იწყება".
– მაია, გილოცავთ ახალი არხის ხელმძღვანელის თანამდებობას. როგორ გრძნობთ თავს ამ ადგილზე, უფროსის, ხელმძღვანელისთვის აუცილებელ თვისებებს ფლობთ?
– ჩემს თავში ამ თვისებების ძიება მაშინ დავიწყე, როცა "პროფილის" იდეა გაჩნდა. ეს, რა თქმა უნდა, უფრო მცირე მასშტაბის პროექტი იყო, ვიდრე "მარაო" და ახლა უფრო რთული ამოცანის წინაშე ვდგავარ, მაგრამ, როცა შემოთავაზება მივიღე "რუსთავი 2"–ის ხელმძღვანელობისგან, იმხელა აზარტი შემოვიდა ჩემს ცხოვრებაში, რომ ასე მგონია, ახლა ვიწყებ სატელევიზიო კარიერას. ბედის მადლობელი ვარ, რომ არ მაძლევს მოსვენების და ერთ ადგილზე გაჩერების საშუალებას. ეს ისეთი დიდი გამოწვევაა, რომ შეიძლება არც გამომივიდეს. ის ფაქტი, რომ ახალ ბრძოლაში შევდივარ თუნდაც საკუთარ თავთან, ჩემთვის ძალიან საინტერესოა.
ეს არის ქალთა აუდიტორიაზე ორიენტირებული არხი. ჩვენი მიზნები ასეთია – უნდა ვაჯობოთ ყველა პატარა არხს, რომელიც მაუწყებლობს საქართველოში. მგონია, რომ ეს გამოგვივა, რადგან ამ აუდიტორიასთან მუშაობის დიდი გამოცდილება გვაქვს. ვფიქრობ, რომ ეს მხოლოდ ქალების არხი არ იქნება და მამაკაცებიც შემოგვიერთდებიან, რადგან, კვლევების მიხედვით, სერიალებს ბევრი მამაკაციც უყურებს. სერიალებიც გვექნება და კიდევ 12 გადაცემა.
ჩვენ არ გვინდა არსებობა მაყურებლის გარეშე – ეს თავის დროზე "პროფილის" მთავარი პრინციპი იყო. ჩვენი მთავარი ამოცანაა, ყველა სახლში, ყველა დაწესებულებასა თუ მაღაზიაში, სადაც ერთი ტელევიზორი მაინც იქნება, ტელევიზორი უჩვენებდეს "მარაოს".
ჩვენს ბადეში იქნება ყველაზე რეიტინგული საპნის ოპერები. ქალთა არხების დიდი პრაქტიკა არსებობს დასავლურ ტელეინდუსტრიაში. ჩვენ ველოსიპედს არ ვიგონებთ. "პროფილის" თემები, რომლებსაც უამრავი მაყურებელი ჰყავს, გადაცემებად იქცევა. მაგალითად, ამოუწურავია ღალატის, სხვა ქალის თემა ქართულ ოჯახში, ვის სახლში რა ხდება, ვის რა აცვია, ვის როგორი გარდერობი აქვს და ა.შ. გვექნება დოკუმენტური ფილმების ციკლიც, სადაც ის პიროვნებები მოგვითხრობენ, რომლებმაც მნიშვნელოვანი სიტყვა თქვეს საქართველოს ისტორიაში.
ჩვენი წარმატების საიდუმლო ისიც არის, რომ შეკრული გუნდი გვყავს. ბევრ სიმძიმეს, ტალახს, დაბრკოლებას იმიტომაც გავუძელით, რომ თავს ყველა ერთი პატარა გუნდის წევრად ვთვლით. "მარაო" არის არხი "პროფილის" შემქმნელებისგან. ეს ყველას გვეამაყება. ხანდახან მგონია, მძინავს და გამეღვიძება. ეს არის ის, რაზეც ბავშვობაშიც კი ვერ ვიოცნებებდი.
– რატომღაც იშვიათად, რომ ვინმე გამოტყდეს, "პროფილს" ვუყურებო, მაგრამ ისევე, როგორც სერიალებს, უმრავლესობა მაინც უყურებს. როგორ ფიქრობთ, რატომ?
– ცხოვრება თვითონ ამტკიცებს ყველაფერს. მე კი აღარ მინდა ამ თემაზე საუბარი. კარგისა და ცუდის მთქმელი ყოველთვის მოიძებნება. საზოგადოებაში ზოგადად დიდი აგრესიაა დაგროვილი. სამწუხაროდ, ამ აგრესიამ უკვე ქუჩაშიც გადაინაცვლა. ადამიანმა ამას რომ ყურადღება მიაქციოს, მაშინ არაფერი უნდა აკეთოს. როცა არაფერს აკეთებ, მაშინ უყვარხარ ყველას.
სიახლეები "პროფილშიც" გვექნება. მაყურებლის დაკვეთით გავაკეთეთ ამ სეზონის პირველი გადაცემა და ასევე გავაგრძელებთ. მთავარი ნიშა, რომ არასოდეს შევეხოთ პოლიტიკას, დაცული იქნება. მაყურებელი გვეუბნებოდა, რომ დაიღალა ზედმეტი ტაშ–ფანდურით და ეს გავითვალისწინეთ. თუმცა, რა თქმა უნდა, ტაშ–ფანდურიც იქნება, თორემ სულ რთულ და მძიმე თემებზე საუბარი არ არის სწორი.
– ერთი და იმავე სახეების ყურებითაც დავიღალეთო, წერენ სოციალურ ქსელებში თქვენს გადაცემაზე.
– სკრუპულოზურად ვსწავლობთ კვლევებს და რეიტინგებს და მაყურებლის დაკვეთა სწორედ იმ ადამიანებზეა, რომლებიც "პროფილში" ჩანან. ერთი და იგივე ადამიანი არასოდეს მოდის "პროფილში", თუ ეს არ არის მაყურებლის მოთხოვნა. ერთია, რას წერენ და მეორე – რას უყურებენ. რადგან მათ იციან, ვინ არიან "პროფილის" სტუმრები, ესე იგი, უყურებენ და დიდი მადლობა მათ ამისთვის. შორენა ბეგაშვილის გადაცემა "ჭირვეულის მორჯულება" ჯერ ეთერში არ გასულა და უკვე იმხელა მითქმამოთქმაა ატეხილი, წარმომიდგენია, მერე რა იქნება. როცა ადამიანი არ აინტერესებთ, მასზე აღარ საუბრობენ.
"პროფილის" ის ნიშაც მომწონს, როცა ჩვენ თვითონვე ვქმნით ახალ ვარსკვლავებს. ჩემი ოთხშაბათის დილა "სარკით" იწყება და არც თქვენი ჟურნალის ყდაზე მინახავს ყველასთვის უცნობი სახე.
– "ჭირვეულის მორჯულებაში" შორენა ბეგაშვილი სხვადასხვა მამაკაცის ცოლი იქნება თითო კვირით. სხვისი ქმრების ცოლი რომ იქნება, ეს იმ ოჯახებში ბზარს ხომ არ შეიტანს?
– ყოველთვის სხვისი ქმრების ცოლი არ იქნება, დასაქორწინებელი მამაკაცების ცოლიც იქნება. იმ კაცების ცოლებისგან მალულად არაფერი გაკეთდება. უბრალოდ, ვაჩვენებთ საზოგადოებას, ვინ როგორი ქმარია ან იქნება. ბევრი სასაცილო მომენტიც გავა ეთერში ყოველგვარი ეროტიკის გარეშე.
– გამორიცხავთ, რომ გადაცემაში მონაწილე ცოლიან მამაკაცს შეუყვარდეს შორენა?
– ამ კითხვაზე პასუხს ვერ გაგცემთ, თუმცა ზოგადად ტელეკამერების წინ დაწყებული სიყვარულის არ მჯერა.
– ცალ–ცალკე ოთახებში დაიძინებენ შორენა და მისი "ქმარი"?
– არ გიპასუხებთ, ეს კითხვები მე არ მეხება. ეს იქნება სახალისო გადაცემა.
– თქვენი მუდმივი თემებია ვის სახლში რა ხდება, ვის რა აცვია, ვის როგორი გარდერობი აქვს... თავად კი თქვენს პირადზე საუბარზე უარს აცხადებთ. რატომ?
– ძირითადად ყველა მეკითხება, რატომ არ ვთხოვდები და რატომ ვარ მარტო. ამ კითხვაზე პასუხი ნებაყოფლობითია. "პროფილში" არავინ მოგვყავს ძალით. ხანდახან მგონია, რომ თავისმართლება მიწევს იმის გამო, რომ ვარ ისეთი, როგორიც ვარ. ალბათ არც მე ვარ მომწიფებული იმისთვის, რომ ჩემს პირადზე ვისაუბრო. არ მიყვარს, როცა ჩემი პერსონა განსჯის და ბევრი მითქმამოთქმის საბაბი ხდება. უფრო კარჩაკეტილი ცხოვრება მიყვარს და ასეთ მდგომარეობაში ბევრად კომფორტულად ვგრძნობ თავს, მიუხედავად იმისა, რომ ძალიან საჯარო პროფესია მაქვს. იმდენად დიდი დოზით ვარ ტელესივრცეში, რომ ის, რაც ჩემია, მინდა, ჩემთვის დავიტოვო.
– თქვენი სიტყვებით, ღალატის თემა ამოუწურავია საქართველოში. ეს თქვენც შეგეხოთ?
– შეიძლება მიამიტურად ჟღერდეს, მაგრამ მჯერა, რომ ჩემთვის არ უღალატიათ. ვინც ამას წაიკითხავს, ალბათ გაიცინებს, რადგან ითვლება, რომ არ არსებობს ქალი, ვისთვისაც არ უღალატიათ, მაგრამ მე ასე მჯერა.
საქართველოში ამაზე ქალები უფრო იოლად ხუჭავენ თვალს, ვიდრე სხვა ქვეყნებში. არ მიმაჩნია სწორად, როცა ოჯახის შენარჩუნების მიზნით ადამიანები ყველაფერს ითმენენ და ბავშვები ისეთ გარემოში იზრდებიან, სადაც დედას და მამას ერთმანეთი არ უყვართ.
– სერიალებს უყურებთ?
– მე არ მივეკუთვნები იმ ადამიანთა რიცხვს, რომლებიც რაღაცას აკეთებენ და მერე ამას მალავენ. როცა ქართულ ბაზარზე გამოჩნდა თურქული სერიალები, დამაინტერესა, რატომ ჰყავდა მათ ამდენი მაყურებელი და ორ სერიალს თავიდან ბოლომდე ვუყურე იმისათვის, რომ, როგორც ტელეპროდიუსერს, ამ კითხვაზე პასუხი გამეცა. "ათას ერთი ღამე" და "დიდებული საუკუნე" ვნახე. ამერიკული სერიალების დიდი თაყვანისმცემელი ვარ. ახლაც სულმოუთქმელად ველოდები "სატახტოთა თამაშების" ახალ სეზონს, რომელიც იგვიანებს.
საპნის ოპერებს არ ვუყურებ იმ უბრალო მიზეზით, რომ ვერ ვასწრებ, თორემ ამაში არაფერია სათაკილო. ეს გასართობად მოგონილი ამბებია და ყველა ისე სწყდება რეალობას, როგორც უნდა. რადგან ქართულ ტელებაზარზე ეს ხილი არსებობს, ის მოთხოვნადია. ადრე ადამიანები იკრიბებოდნენ და ერთმანეთს უყვებოდნენ ზღაპრებს. ახლა კი თანამედროვე ზღაპრებს უყურებენ, რომლებსაც საპნის ოპერა ჰქვია. ყველა სერიალზე ვერ ვიტყვი, მაგრამ ეს სწორად მოფიქრებული და კარგად გათვლილი ტელეპროდუქტია.
– 16 წლის ქალიშვილი გყავთ. რამდენიმე წელიწადში ალბათ სიდედრობისთვისაც მოემზადებით.
– ეს ჯერ ძალიან ადრეა! მე 19 წლის ვიყავი, როცა გავთხოვდი და ვთვლი, რომ ადრეულ ასაკში ქორწინება ძალიან დიდი შეცდომაა. იმედია, ნუცა ასეთ სიურპრიზს არ მომიწყობს. სერიოზული ბავშვია და სწავლაზეა ორიენტირებული. დამოუკიდებელი ადამიანია. თავისი გზა და მიზნები აქვს. ჩვენ ამ თემაზე გვისაუბრია და მე, როგორც დედა, მაქსიმუმს გავაკეთებ, რომ ეს ხიფათი ავარიდო თავიდან. არ ვიცი, გამომივა თუ არა. ზოგადად, შვილები მშობლების მაგალითით არ ხელმძღვანელობენ.
ჩემი შვილი ამაყობს დედით, თუმცა არ სიამოვნებს, როცა, როგორც ჩემს შვილს, ისე გამოარჩევენ. ნუცა ჩემი უახლოესი მეგობარია და ვუყვები ყველა დეტალს – ჩემი პირადი ცხოვრებიდან დაწყებული, სამსახურში მომხდარი უმნიშვნელო ამბებით დამთავრებული. თვითონაც ასეა. დებივით ვართ. ერთადერთი პლუსი ნაადრევ ქორწინებას ის აქვს, რომ ამ ასაკში დიდი შვილი გყავს.
ქალისა და მამაკაცის ურთიერთობა რთულია და პირველი სიყვარულიც მალე გადის. ზრდასრულ ასაკში იცი, რაზე მიდიხარ, ბავშვობაში კი ეს ერთგვარი თამაშია და გგონია, რომ სულ ვარდისფერი სათვალით დაინახავ ყველაფერს. როცა ყოფიერებას ეჯახები, რაღაცეები რღვევას, ნგრევას იწყებს, რაც აღარ მოგწონს.
– ნაადრევმა ქორწინებამ თქვენი ცხოვრების შემდგომი გზაც განსაზღვრა?
– არა. მე ძალიან კარგი ურთიერთობა მაქვს ჩემი შვილის მამასთან, მაგრამ ეს იყო რთული წლები. მაშინ არსებობისთვის ვიბრძოდი. პატარა შვილი მყავდა, თან ვმუშაობდი. არ მინდა, ჩემი შვილი ასეთ სიძნელეებს შეეჯახოს მაშინ, როცა უნდა სწავლობდეს და პიროვნებად ყალიბდებოდეს.
ახლა, როცა მახსენდება ის დრო, ჩემი თავი მებრალება, რადგან იმ პრობლემებთან საბრძოლველად ძალიან პატარა ვიყავი. ცხოვრებას ვგულისხმობ და არა – ურთიერთობებს. მას მერე კი ალბათ არ გამოჩნდა ადამიანი, რომლის გვერდითაც ცხოვრებას გადავწყვეტდი. არ ვარ ზერელე რომანების ქალი. ალბათ ჯერ არ გამოჩენილა ადამიანი, ვინც ამ ავანტიურაზე დამითანხმებს. თუ გამოჩნდა, მოვიფიქრებ, ასჯერ გავზომავ და ერთხელ გავჭრი ან არ გავზომავ და არ გავჭრი.
– თქვენი შვილი ხომ არ აპირებს, დედის ჟურნალისტურ გზას გაჰყვეს?
– არა. ნუცა ტელესამყაროშია გაზრდილი. ტელეინდუსტრიის ყველა დეტალი იცის, მამაც ტელერეჟისორი ჰყავს. შესაბამისად, ეს სამყარო მისთვის იმდენად ჩვეულია, რომ აღარ აინტერესებს. მეც არ მინდა, რადგან ამ სფეროში მისთვის ადგილის დამკვიდრება რთული იქნება, მუდმივად ისაუბრებენ, რომ ის ჩემი შვილია. მისი აზრი ჩემთვის ძალიან მნიშვნელოვანია. ხანდახან შენიშვნებიც აქვს, მაგალითად, სტუმართან დაკავშირებით, ჩაცმულობაზე, ესა თუ ის თემა მოსწყინდება ან პირიქით, ამბობს, ჯობდა, უფრო გავრცობილი ყოფილიყოო.
– ძალიან მიამიტურად ჟღერს ხოლმე თქვენ მიერ ხშირად დასმული კითხვა: "მართლა?"
– ეს არ არის კითხვა. მთავარია, სტუმარი გაიხსნას და თქვას ის, რაც გულში აქვს. მე არასოდეს მივმართავ ხრიკებს, რომ რამე ძალით ვათქმევინო, მაგრამ ვაკეთებ ყველაფერს, რომ მას შევუქმნა კომფორტული გარემო, რათა გულიდან ამოიღოს სათქმელი. სტუმარი რომ მოდის, მას კარგად უნდა დახვდე. მეუბნებიან ხოლმე, ისეთი შეგრძნება მქონდა, თითქოს საკუთარ სახლში ვიყავიო. იქ მე მასპინძელი ვარ, ეს კი თბილი გადაცემაა.ამიტომ არის, რომ ადამიანები, რომლებიც ხშირად დადიან სხვადასხვა შოუებში, ყველაზე გულახდილები "პროფილში" არიან.
სატელევიზიო რეიტინგების ათეულში პირველ ადგილზე ვართ და წავიტრაბახებ კიდეც – "პროფილი" არის გადაცემა, რომელიც სხვა არხებზე ყველა გადაცემას აჩერებს.
– თქვენი მისამართით სხვა საყვედურიც ისმის – ქართული ტრადიციების ნგრევისთვის ხელის შეწყობა. თქვენი პოზიცია ჩანს ხოლმე ეთერში – ქორწინების გარეშე ურთიერთობას ეთანხმებით და ა.შ.
– დიახ, ვეთანხმები. ვთვლი, რომ ტრადიციების გაღმერთება და გაფეტიშება სწორი არ არის. 21–ე საუკუნეში ვცხოვრობთ და სიტყვები – "ქართველობას გვართმევენ" – საშინელებაა. ქართველობა არ არის ღვინით სავსე ყანწი, 300 კაციანი ქელეხი, სუფრაზე გამოთრობა, ღრეობა და ა.შ. დიახ, ვთვლი, რომ ქალიშვილობის ინსტიტუტი სასაცილოა! არ მომწონს, როდესაც ვიღაცის პირადი ცხოვრება ვიღაცის განხილვის საგანია.
ძალიან ცუდი თვისება აქვს ჩვენს საზოგადოებას – არ გვიყვარს ჩვენზე კარგად მყოფი ხალხი. ქართულ სოციალურ ქსელს რომ გადახედოთ, ერთმანეთის ლანძღვის მეტს არავინ არაფერს აკეთებს. სუფრასთან კი ყველა ერთმანეთს ეპირფერება. ეს ერთგვარი თამაშია. ზურგს უკან ყველა ერთმანეთს ვლანძღავთ და რაღას გვართმევენ?!
– სოციალურ ქსელში რატომ არ ხართ აქტიური?
– გარკვეული დოზით ვაქტიურობ, მაგრამ ამ ეტაპზე მინდა, საზოგადოება იმ საქმით მიცნობდეს, რასაც ტელეინდუსტრიაში ვაკეთებ. უახლოესმა წრემ ჩემი მოსაზრებები გარკვეულ თემებზე იცის, მაგრამ მე ვარ ჟურნალისტი და გარკვეულწილად ვზღუდავ ჩემს თავს, რომ სოციალურ ქსელში ვიაქტიურო. ვთვლი, რომ არ არის საჭირო, ჩემი შეხედულებები გამოვფინო და ამაზე ვიმსჯელოთ.
რუსუდან ადვაძე, ჟურნალი სარკე