თეონა კონტრიძე: ”ნანუკა ჟორჟოლიანის გარდა არავის დაველაპარაკები”

რუსეთში მოღვაწე ქართველი მომღერალი თეონა კონტრიძე ჟურნალისტებს გაუნაწყენდა. ეს განაწყენება კი მხოლოდ ქართველ ჟურნალისტებს შეეხებათ. მომღერლის გაბრაზება იმდენად სერიოზულია, რომ მან საჯაროდ განაცხადა, ამიერიდან ქართულ ტელევიზიებსა და გამოცემებს ინტერვიუს აღარ მივცემო:

_ ძვირფასო ჟურნალისტებო! თქვენ მიაღწიეთ იმას, რაც ძალიან გულით გინდოდათ... ნახევარი საქართველო უბრალოდ არწყევს ჩემზე... უდიდესი მადლობა ამისთვის... ჩემი ქართული პოსტების წერა დამთავრდა... ტყუილად არ გაისარჯოთ და აღარ შემოხვიდეთ ჩემს გვერდზე, არანაირი კითხვა ჩემი მხრიდან დასმული აღარ იქნება. ინტერვიუ არ მიეცემა არავის არასოდეს. საქართველოს ტელესივრცე დახურულია ნანუკა ჟორჟოლიანის გარდა ყოველთვის. ჩემს ინტერესებში არც არასოდეს ყოფილა და არც იქნება საქართველოში პიარი, რამეთუ პიარს აქვს აზრი იმ დროს, როდესაც ლარი მაინც მოაქვს ამ ყველაფერს... კარგად მეყოლეთ ყველა... თქვენი უვიცი, უწიგნური, ეპატაჟისტკა, უნიჭო, უგემოვნო და ძროხა თეონა კონტრიძე!

მომღერლის გაღიზიანება ქართველი ჟურნალისტების აქტიურობამ გამოიწვია. როდესაც სვეტიცხოვლობა დღეს თეონამ სოციალურ ქსელში დასვა კითხვა ”სვეტიცხოვლობა ამიხსნას ვინმემ რა არის, თორემ ვიღებ მოლოცვებს და არ ვიცი, რას ვზეიმობთ!”. ამან ფეისბუქში აზრთა სხვადასხვაობა და კრიტიკული შეფასებები გამოიწვია. მომღერლის მიერ დასმული კითხვა ზოგიერთ ქართულ ვებ-გვერდზეც მოხვდა, სადაც მკითხველმა მომღერლის მისამართით უარყოფითი შეფასებები არ დაიშურა. ამის გამო თეონა კონტრიძემ ქართველ ჟურნალისტებთან ურთიერთობას ტაბუ დაადო და მის დარღვევას არ აპირებს.

ეკა ირემაშვილი, გაზეთი ”ახალი თაობა”