• სალომე ტეტიაშვილი: "გამოჩნდა მამაკაცი, ვისთანაც თავს კარგად ვგრძნობ"

    ახალგაზრდა მომღერალ, სალომე ტეტიაშვილს, რომელიც ჯერ ინტერნეტსივრცის ფავორიტი გახდა თავისი სიმღერით, შემდეგ კი გრანდიოზული პროექტის, "იქს ფაქტორის" რჩეულთა ხუთეულში მოხვდა, სულ ცოტა ხანია, რაც საშუალება მიეცა, საკუთარ ჭერქვეშ იცხოვროს. მან და დედამისმა ნაქირავები ბინიდან, უფრო სწორად, ძალიან ღარიბული ოთახიდან, უკვე გადაიტანეს ნივთები ახალ სახლში, რომელიც დედა–შვილს "ნანუკას შოუმ" აჩუქა.
    სალომეს ცხოვრებაში კიდევ ერთი სასიხარულო სიახლეა – შეხვდა ადამიანს, რომელიც მისთვის ძალიან ბევრს ნიშნავს. ამ ურთიერთობას სიყვარულს ჯერ არ არქმევს, თუმცა თავს ძალიან ბედნიერად გრძნობს. ასე რომ, კონკიას ისტორია გრძელდება და წინ დიდი გეგმები აქვს. ამ ეტაპზე მთელი ყურადღება პროექტ "ბრავოზე" აქვს გადატანილი, სადაც ლევან მასპინძელაშვილს უნდა გაუწიოს მეტოქეობა.
    – სალომე, პირველ რიგში, გილოცავთ საკუთარ ბინას! გულახდილად რომ გვითხრათ, მოულოდნელი იყო ეს საჩუქარი თქვენითვის თუ წინასწარ ინფორმირებული იყავით?
    – ნამდვილად მოულოდნელი იყო. ბინის ჩუქებამდე ერთი კვირით ადრე დედაჩემმა მითხრა, რომ ნანუკა ჟორჟოლიანი რეალითი შოუს იწყებდა, სადაც დედა დიასახლისი იქნებოდა და ცნობილ სახეებთან ერთად იცხოვრებდა. მე ვიცოდი, რომ სახლში, სადაც შოუ უნდა დაწყებულიყო, გადაღებაზე მივდიოდი და უნდა მემღერა. საჩუქრის შესახებ მხოლოდ ნანუკამ და "საქართველოს ბანკის" წარმომადგენელმა ნინი ბუკიამ იცოდნენ.
    როცა ნანუკამ თქვა, სახლი სალომეს და თამარს დავულაგეთო, თავიდან რეაქცია არ გვქონდა, რადგან ვერავინ მიხვდა, რა ხდებოდა. ბოლოს კი ნანუკამ გვითხრა, დიახ, ეს თქვენი სახლიაო. სტეფანემ, ვანო ჯავახიშვილმა და ირინა ონაშვილმაც დიდი შოკი მიიღეს. ამ სიხარულს სიტყვებით ვერ გადმოვცემ! იმ წუთში გავიფიქრე, რომ ცხოვრებაში ყველაზე დიდი პრობლემა დამთავრდა.
    მე და დედას მთელი ცხოვრება რომ გვემუშავა, ბინის შეძენა მაინც ძალიან გაგვიჭირდებოდა. დღემდე ვერ მივეჩვიეთ, რომ ეს სახლი ჩვენია. დიდი ბედნიერებაა, ზამთარში სარეცხისა და ჭურჭლის გარეცხვა გარეთ რომ აღარ მოგვიწევს, ყველაფერი ერთ ოთახში რომ აღარ გვექნება და თავზე რომ აღარ დაგვათოვს.
    – როგორ მოაწყვეთ თქვენი სახლი?
    – ნაქირავები ბინიდან თითქმის ყველა ნივთი გადმოვიტანეთ. მთელი ცხოვრება ნაქირავებ ბინაში გავატარეთ, ამიტომ ბევრი ავეჯი არ გვქონია. ჯერ ყველაზე საჭირო ნივთები შემოვიტანეთ – გარდერობი და საწოლი. მაცივარი, გაზქურა და ტელევიზორი ნანუკა ჟორჟოლიანმა ტექნიკის ერთ–ერთის სახლის დახმარებით გვაჩუქა. ჩემს ოთახში მხოლოდ საწოლი და ტანსაცმლის კარადა დავდგი.
    საკმაოდ დიდი აივანი გვაქვს. დედას უნდა, რომ ბინას შევუერთოთ, მაგრამ არ გამოუვა! გაზაფხულიდან სახლში არ შემოვალ, აივანზე პუფებს დავყრი და მეგობრებს თავშეყრის ადგილი გვექნება.
    ახლა მჭირდება კუთხე, სადაც გაპრანჭვას შევძლებ – სარკე თავისი სათავსოებით. გადაღებები ხშირად მაქვს და სულ ფორმაში უნდა ვიყო.
    – თქვენი ამბავი კონკიას ისტორიასავით დაიწყო. არიან ადამიანები, ვისაც სწორედ ეს აღიზიანებს. მათი აზრით, თქვენი მატერიალური მდგომარეობით ერთგვარი სპეკულირება ხდებოდა.
    – ხალხსაც აღიზიანებს ჩემს სოციალურ მდგომარეობაზე ბევრი საუბარი და მეც. ძალიან ცოტა ფიქრობს, რომ პოპულარული ჩემი სოციალური პირობების გამო გავხდი. არ უარვყოფ, რომ შეიძლება ჩემმა ცხოვრებამაც გარკვეული როლი ითამაშა ჩემს წინსვლაში, მაგრამ სანამ "ნანუკას შოუში" ჩემს ისტორიას მოვყვებოდი, მანამდე უკვე ბევრი გულშემატკივარი მყავდა. იცით, რატომ აღარ განვიცდი ასეთ საუბრებს? ჩემზე ვერავინ იტყვის, რომ უნიჭო ვარ და სმენა არ მაქვს.
    ყველაზე მეტად რაც მეწყინა, ის იყო, რომ თურმე ჩემი ადგილი პროფესიონალების გვერდით არ ყოფილა. ეს ხალხისგანაც მსმენია და პროფესიონალი მუსიკოსებისგანაც. სწორედ იმით ვამაყობ, რომ ვინც მთელი ცხოვრება პედაგოგებთან მეცადინეობდნენ, იმ ადამიანების გვერდით ჩემი შრომით დავდექი. წლების განმავლობაში კომპიუტერთან ვიჯექი და უცხოელი და ქართველი მომღერლებისგან ვცდილობდი მესწავლა. "ჯეოსტარისა" და "საქართველოს ვარსკვლავის" ყველა კონცერტს ვესწრებოდი და კრიტიკოსების აზრებს ვისმენდი. ამის მიუხედავად, არასოდეს მიფიქრია, რომ დიდ სცენაზე დავმდგარიყავი. ეს ყოველთვის დედაჩემის სურვილი იყო. "საქართველოს ვარსკვლავის", "ჯეოსტარის" და "ახალი ხმის" შესარჩევ ტურებშიც მივიღე მონაწილეობა, მაგრამ არ გამიმართლა.
    – საბოლოოდ მაინც გაგიმართლათ "იქს ფაქტორში".
    – "იქს ფაქტორი" ჩემი პირველი და წარმატებული კონკურსი იყო. ჩემ გვერდით პროფესიონალი მონაწილე იდგა. ამიტომ ვფიქრობ, რომ ხუთეულში გასვლა ჩემთვის დიდი წარმატება იყო.
    – ბევრი ფიქრობდა, რომ "იქს ფაქტორი" თქვენ გახდებოდით. ალბათ თქვენც გქონდათ ამის მოლოდინი, რადგან მონაწილეობდით.
    – კონკურსზე თუ თავი დახარე და თქვი, სხვა კონკურსანტები ჩემზე ძლიერები არიან და მე ვერ გავიმარჯვებ–თქო, არაფერი გამოგივა. რა თქმა უნდა, გამარჯვება მინდოდა, თუმცა, როცა ხედავ, რომ კონკურსში შენზე ბევრად ძლიერები მონაწილეობენ, ეს ამბიციას ფარავს. პროექტი რომ დავტოვე, დედა და ჩემი მეგობრები ტიროდნენ, მე კი – არა, რადგან მივხვდი, რომ დიდი ნაბიჯი გადავდგი წინ. ხალხმა შემიყვარა და გულშემატკივრები შევიძინე, რაც საქართველოში ცოტა რთულია, რადგან ყოველთვის ცდილობენ, რაღაც ნაკლი გიპოვონ.
    – პროექტ "ბრავოში" როგორ აფასებთ საკუთარ შანსებს?
    – ძალიან დიდი კონკურენციაა. 16 მონაწილე ვართ. ჩემი მოწინააღმდეგე ლევან მასპინძელაშვილია. მისი ლობისტები ლუკა ზაქარიაძე, ნინა სუბლატი და თორნიკე ყიფიანი არიან. ლევანმა კარგად იცის, რა უნდა იმღეროს, რადგან დიდი გამოცდილება აქვს. უნდა ვიბრძოლო იმისთვის, რომ მას დავეჯახო.
    ჩემი ლობისტები პატარა მსახიობები გიორგი ბარბაქაძე და ქეთა ორბელაძე არიან. ძალიან გამიხარდა ეს ამბავი, რადგან ისინი მთელ საქართველოს უყვარს. ვფიქრობ, რომ ჩემ დასახმარებლად ძალიან სასაცილო და ორიგინალური ნომრების გაკეთებას შეძლებენ.
    ამჟამინდელი ინფორმაციით, გამარჯვებულს ბინა და მანქანა ერგება საჩუქრად, თუმცა ზუსტად არ ვიცი. სიმართლე გითხრათ, ამ პროექტში გამარჯვების იმედი არ მაქვს. "ბრავო" რომ მოვიგო, არც იქნება სამართლიანი. ისეთი ძლიერი მომღერლები მონაწილეობენ, რომ მე არ უნდა გავიმარჯვო და ამას გულწრფელად გეუბნებით.
    – ოცნებაში, როცა მომავალზე ფიქრობდით, წარმოგედგინათ, რომ თქვენი ცხოვრება ასე შეიცვლებოდა?
    – არა. დედა ყოველთვის მეუბნებოდა, შენ გაქვს იმის ნიჭი, რომ წარმატებული ქალი იყოო, მაგრამ მისი ნათქვამი მხოლოდ ცოტა ხნის წინ გავაცნობიერე. ინტერნეტში ჩემი ვიდეოების ატვირთვაც გართობისთვის იყო გამიზნული და არა – პოპულარობისთვის. სწორედ ამ ვიდეოებს მოჰყვა ყველაფერი. დღეს უკვე სხვა გრძნობებით ვიღვიძებ, არ მინდა, ჩემს მსმენელს დავავიწყდე.
    – შინაგანადაც შეიცვალეთ?
    – ბავშვობიდან ძალიან გულჩათხრობილი და სევდიანი ვიყავი, ახლა კი სულ ვიღიმი და ვცდილობ, ბევრი სითბო და სიყვარული გავცე. არ არის ლამაზი, როცა ადამიანი გეუბნება, რომ უყვარხარ და ამ დროს შენ სევდიანი თვალებით უხდი მადლობას. შეიძლება კარგად არ ვიყო, მაგრამ როცა სცენაზე ვდგავარ, არ უნდა შევიმჩნიო. თამამად შემიძლია ვთქვა, რომ დღეს ბედნიერი ვარ.
    – თაყვანისმცემელი ბიჭების მიმართ თუ შეიცვალა თქვენი დამოკიდებულება?
    – რამდენიმე თაყვანისმცემელს პასუხი რომ არ გავეცი, მათ ცუდი რეაქცია ჰქონდათ, მითხრეს, თავში აგივარდა პოპულარობაო. ასეთი ტექსტების კითხვას, მირჩევნია, ყველას ნორმის ფარგლებში გავესაუბრო.
    ჩემს ცხოვრებაში ძალიან კარგი ადამიანი გამოჩნდა, რომლის მიმართაც სიმპათიები მაქვს, თუმცა ჩვენ შორის ჯერჯერობით სერიოზული არაფერი ხდება. ვერც მე გეტყვით, რომ შეყვარებული ვარ და ვერც ის იტყვის ამას. უბრალოდ, თავს კარგად ვგრძნობთ, ახლო და მეგობრული დამოკიდებულება გვაქვს. ერთმანეთს დაახლოებით 7 თვეა ვიცნობთ, "იქს ფაქტორამდე" გავიცანით. პროფესიით ეკონომისტია.
    – დედათქვენი იცნობს მას?
    – კი, რა თქმა უნდა, მაგრამ ჩემს პირად ცხოვრებაში არასდროს ერევა. როცა ოჯახის შექმნაზე ვიფიქრებ, არ მინდა, ის მოხდეს, რაც წლების წინ დედაჩემის ცხოვრებაში მოხდა. ჩემს ბედს არასოდეს დავუკავშირებ ისეთ ადამიანს, ვისაც უკვე ჰყავდა ოჯახი. შეიძლება მეორე ოჯახის შექმნისას ბევრად უფრო ბედნიერი აღმოჩნდეს ადამიანი, მაგრამ საკუთარი ბედნიერების სხვის უბედურებაზე აგების მეშინია.
    – მამათქვენი არც ახლა გამოჩენილა?
    – არა. ვთქვი, რომ, თუ გამოჩნდება, მივიღებ. ალბათ ასეც მოხდება, თუმცა ჩემთვის მამა იმდენად დიდი ტკივილი და განცდაა, დრო დამჭირდება ამისთვის. 5 წლის ვიყავი, როცა წავიდა და ბოლოს 7 წლის ასაკში მომაკითხა, მაგრამ ქუჩაში რომ შემხვდეს, ზუსტად ვიცი, ვიცნობ. მიუხედავად იმისა, რომ მაშინ ძალიან პატარა ვიყავი, ყველაფერი კარგად მახსოვს. როცა დაგვტოვა, ორ კვირაში ერთხელ მოდიოდა და ყველაზე მეტად ის განცდა მახსოვს, როცა მამა მენატრებოდა და ველოდებოდი. საჩუქრებით, სათამაშოებით და ტკბილეულით რომ მაკითხავდა, ბედნიერი ვიყავი. ახლაც რომ ასე მოხდეს, იგივე განცდა მექნება.
    – მამა რომ დაბრუნდეს, მის გვარზე გადახვალთ?
    – არა, ალბათ იმიტომ, რომ თავის დროზე გვარი არ მომცა.
    – ძმასთან გაქვთ ურთიერთობა?
    – ჩემმა ძმამ დამირეკა, ბინა მომილოცა და მითხრა, ის დღეც დადგება, როცა პირადად გაგიცნობო. მინდა, მასთან კარგი ურთიერთობა მქონდეს, რადგან მშობლების გამო დედმამიშვილებმა ერთმანეთი არ უნდა დაკარგონ.

    – გარეგნობაში, იმიჯში ცვლილებების შეტანას ხომ არ აპირებთ?
    – პლასტიკური ქირურგიის მომხრე არც ვარ და არც ვფიქრობ, რომ რაიმე ცვლილების შეტანა მჭირდებოდეს საკუთარ გარეგნობაში. ცხვირზე პატარა კეხი მაქვს, ბავშვობაში გავიტეხე, რადგან ქალაბიჭა ვიყავი. ერთადერთი, რაზეც ვზრუნავ, წონაში დაკლებაა და დიეტაზე ვარ. ყველაზე მეტად კარაქიანი პური მენატრება. "იქს ფაქტორის" დროს წონაში მოვიმატე და ვცდილობ, ფორმაში ჩავდგე.
    სოფიო ბოჭორიძე, ჟურნალი სარკე
    1 575 ნახვა
    22-10-2014, 20:57
    GOGATV

    abezara