ია ფარულავა: ''ვეღარ გავთხოვდები და ვერც ფულებს ჩავუკუჭავ ვინმეს ტრუსებში''

მალე ''რუსთავი 2'' ''ნიჭიერის'' მორიგ სეზონს გახსნის. 27 ოქტომბერს პროექტი განახლებული ჟიურით, განახლებული წამყვანებით და, რა თქმა უნდა, ახალი მონაწილეებით გავა ეთერში. ჟიურის წევრების საპატიო ადგილები წელს ნიკა გვარამიამ, ნანუკა ჟორჟოლიანმა, ია ფარულავამ და ლევან წულაძემ დაიკავეს. წამყვანებად კი ვანიკო თარხნიშვილი და გიორგი ყიფშიძე მოგვევლინებიან. თუ სიტყვაზე გვენდობით, გეტყვით, რომ ჩვენი შეფასებით, მათი ტანდემი ქართულ ტელესივრცეში საუკეთესოა.
ჩვენ საშუალება მოგვეცა, პროექტის ჩაწერებს დავსწრებოდით, რამდენიმე პაპარაცული ფოტო გადაგვეღო და ჟიურის წევრებს გავსაუბრებოდით. ყველაზე უცნაურ, ნიჭიერ, გამაღიზიანებელ მონაწილეებზე თავად ჟიურის წევრები მოგვიყვებიან.

ნანუკა ჟორჟოლიანი:
- ''ცეკვავენ ვარსკვლავებს'' თუ გავიხსენებთ, ეს ამპლუა ჩემთვის მთლად ახალი არ არის, თუმცა აქ მასშტაბები ძალიან დიდია. იქ უფრო სპეციფიკური შეფასება იყო საჭირო და ვფიქრობ, რთულიც იყო ამის გამო. არც მიფიქრია, როცა შემოთავაზება მივიღე. ეს საუკეთესო შანსია და ფიქრის დრო არ გაქვს. ჩვენ არ ვცხოვრობთ ქვეყანაში, სადაც ბევრი ასეთი კონკურსი ტარდება. ჩვენ ვცხოვრობთ ქვეყანაში, სადაც ერთი ''ნიჭიერია'', ერთი ''X ფაქტორია'', ერთი ''ცეკვავენ ვარსკვლავებია''.
- განსაკუთრებული ყურადღება, გაოცება რომელმა კონკურსანტმა გამოიწვია?
- დღეს განსაკუთრებით დამამახსოვრდა ქალბატონი ამალია. უკვე ძალიან დაღლილს რომ გშია, გწყურია, სახლში წასვლა გინდა, მოშვებული ხარ და მოწყენილიც, სწორედ მაშინ გამოვიდა და ისე იმღერა, სულ დამავიწყდა დაღლა... არ მომწონს ძალისმიერი ნომრები, ცხვირში რაღაცებს რომ იყრიან, ტკივილს რომ აყენებენ საკუთარ თავს. საერთოდ, ვერ ვხვდები, ლურსმნის ცხვირში შერჭობა, ერთ ადგილზე გირების დაკიდება, რანაირი ნიჭია.
- ტომასი რატომ არ გადაიყვანეთ, სასქესო ორგანოთი, ანუ როგორც თავად თქვა, ცოცრით რომ უკრავდა როიალზე?
- კარგით, რა (იღიმება)... ისე, კარგი ნომერი ჰქონდა, გაგვამხიარულა, ამასაც ნიჭი უნდა, რომ მაყურებელი შენს ტყუილში დააჯერო. სიტყვა ცოცარი ამ გადაცემაში პირველად გავიგე. ეს არ არის ცოცრების კონკურსი, ეს ''ნიჭიერია''.

ნიკა გვარამია:
- ჩემზე ზემოქმედების მოხდენა რთულია, მაყურებლის მხრიდანაც და ჟიურის მხრიდანაც. სწორედ ეს არის ჩემი ამპლუა ამ პროექტში, ზემოქმედებას არ ვექვემდებარები, ყოველთვის საკუთარ აზრზე ვრჩები, ვამბობ იმას, რასაც ვფიქრობ.
- მონაწილეებზე რას მეტყვით?
- დღეს ნამდვილი შოკი იყო ყრუ-მუნჯი გოგონები, რომლებსაც მუსიკა არ ესმოდათ და სირტაკს ცეკვავდნენ. მომეწონა მსტვენელი ბავშვი, ეს ნამდვილად ჩემი სისუსტეა.
- ია ფარულავამ თქვა, ნიკასაც აქვს მუსიკალურად სტვენის ნიჭიო.
- ასეა, შესაბამისად, მეტად ვაფასებ ამ ნიჭის პატრონებს, ძალიან მიყვარს მსტვენელები. უნდა აღვნიშნო ინდირა ჯგერნაია, რომელიც დიდი ხანია ჩემი ფავორიტია. მგონია, რომ ძალიან კარგი მომღერალია და სერიოზული ადგილი ეკუთვნის ქართულ ესტრადაზე.
- ვინ არის ჟიურის წევრებს შორის ყველაზე მკაცრი?
- ალბათ, მე. ყველაზე ხშირად ვამბობ ''არას'' და ყველაზე ხშირად ვაჭერ წითელ ღილაკს ხელს.

ლევან წულაძე (ჭოლა):
- ყველაზე ლოიალური ჟიურის წევრის იმიჯი გაქვთ, როგორ გგონიათ, რატომ?
- მკაცრი შეფასებებიც გამომერია ბოლო დროს. ასაკის ბრალი უნდა იყოს (იღიმება). შეიძლება გამოცდილებისაც. იმდენჯერ ვიყავი ჟიურის წევრი, ცოტა გავთამამდი.
- მონაწილეებზე რას მეტყვით, ვინ გაგაოცათ?
- მსტვენელმა, მოჭიკჭიკე გოგონამ და ყრუ-მუნჯების ცეკვამ, უფრო სწორად, მათმა არაჩვეულებრივმა მაჟორმა, სიცოცხლის სიხარულმა, რომელიც მათგან მოდიოდა.
- ვინმემ თუ გაგაღიზიანათ?
- კი, ბიჭმა, რომელიც თავისი სასქესო ინსტრუმენტით უკრავდა როიალზე. უფრო სწორად, გვაჯერებდა, რომ უკრავდა. არ გადავიყვანეთ ეს ახალგაზრდა, ვერ მივხვდით, რა გაგრძელება ექნებოდა შემდეგ ტურში ამ ნომერს ისეთი, რომ გემოვნების ფარგლებში დარჩენილიყო.

ია ფარულავა:
- ია, უკვე მეორე სეზონია ''ნიჭიერის'' ჟიურის წევრი ხარ. წინა სეზონზე უფრო აქტიური იყავი, სცენაზე ადიოდი კონკურსანტებთან, შოუს აკეთებდი...
- (მაწყვეტინებს - ავტ.) მაშინ გასათხოვარი ვიყავი. ახლა აღარ შეიძლება, აქეთ-იქით ხომ არ ვირბენ.
- წინა სეზონი შენთვის ბედნიერების მომტანი აღმოჩნდა, ტარიელმა სწორედ ''ნიჭიერის'' სცენაზე გთხოვა ხელი. შენი მეუღლე თუ ესწრება ხოლმე ამ პროექტის ჩაწერებს.
- არა, ჩაწერებს ვერ ესწრება, არ სცალია, მეცადინეობს, საღამოობით მოდის ჩემ წასაყვანად.
- ჟიურის ახალ წევრებს როგორ შეეწყვე?
- კარგები არიან, თითქმის ერთნაირად ვაზროვნებთ. ეს პრინციპში კარგი არც არის, განსხვავებული აზრები რომ გვქონდეს, მეტი პოლემიკა იქნებოდა. ისიც არ მინდა, ჟიურის წევრებმა ერთმანეთი დავხოცოთ, ''დღის შოუ'' ხომ არ არის.
- შოუს თვალსაზრისით გამოირჩევი ხოლმე, წელს რას გვიმზადებ?
- ვერაფერს, გენაცვალე, ვეღარ გავთხოვდები მეორედ და ფულებსაც აღარავის ჩავუკუჭავ ტრუსებში. სხვათა შორის, ძალიან ბევრს ითხოვთ ქართველი ჟიურის წევრებისგან. ამერიკულ ''ნიჭიერს'' რომ ვუყურებ, იქ ჟიური შოუსთვის არაფერს აკეთებს და მაინც მილიონებს უხდიან. ამბობენ მხოლოდ ფრაზებს, ''ძალიან მომეწონე'', ''ძალიან ნიჭიერი ხარ'', ''წარმატებებს გისურვებ''. ეტყობა, ჩვენ მიგაჩვიეთ შოუს ყურებას. ასე არაა, გენაცვალე. კონკურსანტზე ბევრია დამოკიდებული, უნდა აგაყენოს სკამიდან და უნდა აგიყვანოს სცენაზე.

გიორგი ყიფშიძე:
- ეს ამპლუა ჩემთვის მთლად ახალი არ არის, მაგრამ გვერდით მდგომი მყავს საოცარი. ხომ იცი, თუ გვერდით მდგომი არ გიყვარს, კარგად ვერ იმღერებ.
- არ ვიცი, როგორ მღერი.
- რაღა დაგიმალოთ და, მეც არ ვიცი.
- შეცვლილი იმიჯი გაქვს...
- ჰო, სხვანაირი ვარ. ოღონდ ვის ვგავარ, არ ვიცი.
- პუნქტუალური ხარ აქ მაინც?
- კი, აქ სხვანაირად არ გამოდის. აქ ჟურნალისტებსაც ვერ გადააგდებ. მოდიხარ და გახვედრებენ.

ვანიკო თარხნიშვილი:
- ვანიკო, აქამდე ამ პროექტში თიკა ფაცაცია გედგა გვერდით, მამაკაც თანაწამყვანთან როგორ გრძნობ თავს?
- მშვენივრად. ჯერჯერობით თავს ვართმევთ, როგორ გამოგვდის, ამას მაყურებელი შეაფასებს. ლაპარაკი და მაიმუნობა ორივეს გვიყვარს, მაგრამ ზრდილობიანები ვართ და ერთმანეთს ვაცდით.

ნინო მჭედლიშვილი
ჟურნალი ''რეიტინგი''