• სალომე მდივანი ამერიკაში გიორგი ბუჩუკურთან ცხოვრობს

    მომღერალ სალომე მდივანის (ქათამაძის) ცხოვრებაში სრულიად ახალი ეტაპი დაიწყო. რამდენიმე თვის წინ ის ქმარს, გიგი ზამთარაძეს გაშორდა, შემდეგ ამერიკაში წავიდა, ბერკლის სამუსიკო კოლეჯის სტუდენტი გახდა და დაფინანსებაც მოიპოვა. უკვე ამერიკული მუსიკალური შოუ "ვოისისთვის" ემზადება და იმედი აქვს, რომ იქაც ისევე გაუმართლებს, როგორც თავის დროზე საქართველოში და ამჯერად ამერიკის ახალი ხმა გახდება.
    სალომეს პირად ცხოვრებაშიც სიახლეა. ამჟამად მის გვერდით არის ამერიკაში მცხოვრები ქართველი მუსიკოსი, გიორგი ბუჩუკური, ვისთანაც თავს ბედნიერად გრძნობს, მუსიკალურ კარიერაზეც ერთად მუშაობენ.
    – სალომე, პირველ რიგში, გვიამბეთ, როგორ მოერგეთ ამერიკულ ცხოვრებას.
    – ჯერჯერობით ყველაფერი კარგად არის. მეგობრის ოჯახში დავბინავდი. ნიუ იორკთან ახლოს, კონექტიკუტის შტატში, ქალაქ სტენფორდში ვცხოვრობ. ბერკლის მუსიკალურ კოლეჯში დაფინანსებაც მივიღე. სწავლა მაისში დამეწყება, მანამდე კი ამერიკული "ახალი ხმის" კასტინგისთვის ვემზადები, რომელიც დაახლოებით მაისიდან დაიწყება. შევეცდები, ამერიკაშიც გავხდე ახალი ხმა. ამ სეზონის მონაწილეებით დიდად მოხიბლული არ ვარ, ასე რომ, წარმატების იმედი მაქვს. მოკლედ რომ გითხრათ, კარიერისთვის ბევრს ვშრომობ.
    – ალბათ სიძნელეებიც გექნებათ გადასალახი უცხო ქვეყანაში.
    – არ მომწონს ის, რომ ამერიკაში არავინ მიცნობს და პოპულარული არ ვარ. ინგლისურად კარგად ვსაუბრობ, მაგრამ არის შემთხვევები, როდესაც ვიჭედები და კარგად ვერ გადმოვცემ იმას, რისი თქმაც მინდა. ეს ძალიან მაბრაზებს, მაგრამ ნელ–ნელა ეს პრობლემაც მომეხსნება. მომწონს ის, რომ სადაც უნდა ვიმღერო, ყველას გაოცებული სახით ვტოვებ. ეს დიდ სიამოვნებას მანიჭებს.
    ჩემი ქვეყანა ძალიან მიყვარს და ვატყობ, რომ უკვე ნოსტალგიაც დამეწყო. ოჯახი და მეგობრები მენატრებიან, მაგრამ ვიცი, რომ ეს არ არის ხანგრძლივი განშორება და თავს ამით ვიმშვიდებ.
    – როდის აპირებთ საქართველოში ჩამოსვლას?
    – საახალწლოდ ჩამოვალ ცოტა ხნით. ხინკალი, წალამზე შემწვარი მწვადი და დედაჩემის გაკეთებული საცივი საშინლად მენატრება. ჩემი მეგობრის, გიორგი ბუჩუკურის ოჯახს, სადაც ვცხოვრობ, შესანიშნავი დიასახლისი ჰყავს. დედის ხელი მომაკლდა, მაგრამ გიორგის დედა, ნაირა ხუციშვილი, მიწევს დედობას. საჭმელი, სასმელი, დედობრივი სითბო და მოფერება ნაირა დეიდასგან არ მაკლია.
    – თქვენი "ფეისბუქის" გვერდზე გიორგი ბუჩუკურთან გადაღებული არაერთი ფოტოა გამოქვეყნებული. ვინ არის ეს ადამიანი და სად შეხვდით ერთმანეთს?
    – გიორგი რამდენიმე წელია ამერიკაში ცხოვრობს. ამ ზაფხულს საქართველოში იყო ჩამოსული, ერთმანეთი საერთო მეგობრისგან გავიცანით და მაშინვე დავმეგობრდით. ახლა კი მოხდა ისე, რომ მის ოჯახში დავბინავდი. ჩემს ცხოვრებაში გამოჩნდა ადამიანი, რომელთანაც ჯერჯერობით კარგი მეგობრობა მაკავშირებს, მაგრამ ერთმანეთის მიმართ სიმპათიები უკვე გვაქვს. წინასწარ ვერაფერს გეტყვით. არ არის გამორიცხული, ჩვენი ურთიერთობა მალე სიყვარულშიც გადაიზარდოს. როცა ოჯახის შექმნისკენ მეორედ გადავდგამ ნაბიჯს, მხოლოდ და მხოლოდ ემოციებს აღარ ავყვები. ბევრ საკითხზე დავფიქრდები.
    გიორგიმ რითიც მომხიბლა, ეს მისი თვისებებია. ძალიან კეთილი, თბილი და გულახდილი ადამიანია. ყოველთვის იმას ამბობს, რასაც ფიქრობს. ქალბატონმა ნაირამ იცის ჩვენი ურთიერთობის შესახებ, მაგრამ ამ საკითხზე არ გვისაუბრია. თითქოს მე და გიო ჩვენთვის ვართ, მშვიდად და არავის ვაწუხებთ ჩვენი ურთიერთობით. ერთად დიდ დროს ვატარებთ და ეს ორივეს დიდ სიამოვნებას გვანიჭებს.
    – გიორგი რით არის დაკავებული ამერიკაში, რას საქმიანობს?
    – მუსიკასთან პირდაპირ კავშირშია. გიო სხვა ჟანრის მუსიკოსია, ტექნომინიმალის მიმდევარი. თავის მუსიკას ქმნის და სხვადასხვა ინსტრუმენტზე უკრავს. მე და გიომ ჯგუფის შექმნა გადავწყვიტეთ, რომელსაც "ფიქშენ ოფ რედ" დავარქვით. 14 ნოემბერს ჩვენს ჯგუფს პირველი ცოცხალი კონცერტი ექნება ნიუ იორკის ერთ–ერთ კლუბში. უკვე ალბომზეც ვმუშაობთ, თითქმის ვამთავრებთ. მასში 13 სიმღერა შევა.
    ჩვენი დღის განრიგი მუსიკით იწყება. გიოს სახლში პატარა სტუდია აქვს. ბევრს ვშრომობთ, მაგრამ გართობის გარეშეც ხომ არ შეიძლება ცხოვრება? კვირაში ერთხელ ბლუზ–ბარში დავდივართ და კარგ მუსიკას ვისმენთ.
    მე და გიო ხშირად გავმართავთ საღამოებს და ჩემი შემოსავლის წყაროც ჩემი პროფესია იქნება.
    – ამერიკაში ქართული შოუბიზნესიდან ბევრი წავიდა. მათ ხვდებით?
    – ნინი შერმადინთან ძალიან კარგი ურთიერთობა მაქვს. მოგეხსენებათ, მარიამ აბდუშელიშვილიც ამერიკაშია და უკვე ორივეს შევხვდი. კოტიკო თოლორაიაც აქ არის. ასე რომ, ბევრი მეგობარი შევიკრიბეთ. ერთმანეთთან მხოლოდ მოსაფერებელი თუ გვაქვს. საქართველოში ერთმანეთს რომ ექიშპებიან სხვადასხვა სფეროში და არამხოლოდ შოუბიზნესში, ეს იმით მგონია გამოწვეული, რომ თბილისი პატარაა, სივიწროვეა, ნიჭიერი კი ბევრნი ვართ. ამერიკაში დიდი თავისუფლებაა და წარმატების გამო არავინ არავის კლავს.
    – ადრე "სარკესთან" ინტერვიუში აღნიშნეთ, რომ გიგი ზამთარაძეთან უკვე დაშორებული იყავით, როდესაც მან თქვენს ერთ–ერთ მეგობარზე იეჭვიანა და ამის გამო კონფლიქტიც მოგივიდათ. ის მეგობარი გიორგი ბუჩუკური ხომ არ იყო?
    – გიგიმ ჩემს მეგობარზე რომ იეჭვიანა, ეს ჩემი მოსაზრება იყო. მაშინ ჩემსა და გიორგი ბუჩუკურს შორის არანაირი სიმპათიები არ ყოფილა, უბრალოდ მეგობრები ვიყავით.
    – თქვენი და გიორგი ბუჩუკურის ერთად გადაღებულ ფოტოებზე ყოფილი ქმრის რეაქცია როგორია?
    – მისგან აგრესია არ მიგრძვნია. როცა ახალი დაშორებულები ვიყავით, მაშინ შეიძლებოდა რაღაც–რაღაცეების მიმართ ჰქონოდა აგრესია. მეც ძალიან გამიჭირდა გიგისთან დაშორება, მაგრამ ცხოვრებაში ყოველთვის გვხვდება ისეთი რთული ეტაპები, როდესაც იმედები გვიცრუვდება. ყველას აქვს მეორე შანსი და არჩევანის გაკეთების უფლება. გიგი ვისთან ერთადაც უნდა იყოს, მისი ბედნიერება ყოველთვის გამიხარდება. მასთან ურთიერთობა აღარ მაქვს, მაგრამ დღემდე დიდ პატივს ვცემ.
    – გიგის არცთუ ისე დიდი ხანია დაშორდით და უკვე საუბრობთ ადამიანზე, ვის მიმართაც სიმპათიები გაქვთ. ამის გამო შეიძლება კრიტიკის ქარცეცხლი დაგატყდეთ თავს. ამისთვის თუ ხართ მზად?
    – ყოველთვის ყველაფრისთვის მზად ვარ! სამწუხაროდ, სხვისი ცხოვრების ქექვა უყვართ ჩემს ქვეყანაში. მარტოობა ვის უყვარს? რომელი არ ეძებს მეორე ნახევარს? არა მგონია, ხალხისგან ჩემ მიმართ აგრესია წამოვიდეს, რადგან გასაკრიტიკებელი არაფერი გამიკეთებია. ცხოვრების ერთი ეტაპი დავასრულე, რაც მე და გიგიმ რთულად გადავიტანეთ და იწყება ახალი. ალბათ გიგიც იპოვის საყვარელ და თბილ ადამიანს.
    – როცა მამის გვარიდან მამობილის გვარზე გადახვედით, ამ ფაქტს მამათქვენი როგორ შეხვდა?
    – მამასთან არ მისაუბრია.
    სოფიო ბოჭორიძე, ჟურნალი სარკე
    1 863 ნახვა
    24-11-2014, 15:50
    GOGATV

    abezara