თათია სულუაშვილი ბიჭის დედა გახდა

23 ოქტომბერს "კომედი გრუპის" მსახიობი თათია სულუაშვილი და მისი ქმარი ვასო შაბურიშვილი მეორე შვილის, ბიჭის მშობლები გახდნენ. მათი 4 წლის გოგონა, ქეთევანი, ძამიკოს თავს დასტრიალებს, უნდა, რომ აჭამოს, დაბანოს, მაგრამ ცოტათი მაინც ეჭვიანობს და დედისგან მეტ ყურადღებას ითხოვს. თათია დეკემბრამდე მხოლოდ შვილების განკარგულებაში იქნება, თან ზედმეტ წონასაც დაიკლებს და საახალწლოდ "კომედი გრუპს" შეუერთდება.
– თათია, გილოცავთ ვაჟის შეძენას და თქვენს ოჯახს ბედნიერებას ვუსურვებთ. მშობიარობამ გართულებების გარეშე ჩაიარა?
– დიდი მადლობა მოლოცვისთვის! ყველაფერმა კარგად ჩაიარა. დავითი 23 ოქტომბერს, საღამოს 7 საათზე დაიბადა შარაშიძის სახელობის პირველ სამშობიაროში. ფიზიოლოგიურად, გაუტკივარების მეთოდით ვიმშობიარე. დავითი 55 წუთში მეყოლა. ორივე შვილზე პეტრე ლომაიამ მამშობიარა და მინდა, თქვენი ჟურნალის საშუალებით ჩემს ექიმს განსაკუთრებული მადლობა გადავუხადო.
დათა 3 კილო, 500 გრამი და 50 სანტიმეტრი დაიბადა. ქეთოც ამ წონის გაჩნდა. ასე რომ, ორივე ბავშვი ერთი წონის "გამოვიყვანე".
– მშობიარობას თქვენი ქმარი დაესწრო?
– არა და ამის არანაირი სურვილი არ მქონია. ეს ჩემთვის დიდი დისკომფორტი იქნებოდა და, სიმართლე გითხრათ, არც ვასოს გასჩენია ამის სურვილი. ორივე მშობიარობას ჩემი და დაესწრო. დათა გაჩნდა თუ არა, ვისაც სურვილი ჰქონდა, ყველამ ნახა. მამამისმა მაშინვე აიყვანა ხელში. თავის ბიჭს გაოცებული უყურებდა.

– ვინ შეურჩია სახელი პატარას?
– ოჯახის წევრებმა ერთად შევურჩიეთ. დავითი ჩემი მამამთილის პატივსაცემად დავარქვით. ამ ადამიანს არ ვიცნობდი. როცა ვასოს ცოლად გავყევი, უკვე გარდაცვლილი იყო.
– როგორი ბავშვია პატარა დათა, ხომ არ ჭირვეულობს?
– პურისმჭამელი და კარგი მოქეიფე ბიჭია, საქართველოს ჯანმრთელ ვაჟკაცს ვუზრდი! ქეთოსგან განსხვავებით, ძალიან მშვიდია. მხოლოდ კრუტუნი იცის. სამშობიაროში ყველას უკვირდა, მხოლოდ დათას ხმა არ გვესმის და ხომ კარგად არისო. ჯერჯერობით სახლშიც ისე იქცევა, როგორც სამშობიაროში და მერე თუ არ გადაირევა ქეთოსავით, კარგი იქნება.
ჩემი გოგო ღამით მტირალა იყო, დათა კი გვანებივრებს და ძილს არ გვიფრთხობს. ქეთო ღამით ვასოს ჰყავდა ჩაბარებული. სამსახურში გამოუძინებელი რომ არ წავსულიყავი, ქმარი ხელს მიწყობდა და "ღამის ცვლაში" მორიგეობდა. პირველი შვილისგან იმხელა გამოცდილება მიიღო, რომ ახლაც თავისუფლად შემიძლია დათა დავუტოვო. აჭმევს, დაბანს და კარგადაც მოუვლის. მოკლედ რომ გითხრათ, მეუღლე მეორე ბავშვის გაზრდაში ისე მეხმარება, საწუწუნო არაფერი მაქვს.
– ვაჟი რომ გაუჩინეთ, რითი დაგასაჩუქრათ?
– ვასოსგან საჩუქრად ჯერ არაფერი მიმიღია, შეიძლება გეგმავს კიდეც, არ ვიცი. ასე რომ, მოლოდინის რეჟიმში გახლავართ, ოღონდ არ ვიმჩნევ, ჩუმად ვარ.
– ქეთომ ხომ არ იეჭვიანა თავის ძამიკოზე?

– თავიდან ვფიქრობდი, რომ იეჭვიანებდა, მაგრამ ასე არ აღმოჩნდა. ერთადერთი შეკითხვა დამისვა: "დედა, მეც ხომ ბევრს მომეფერები, სულ დათას ხომ არ აკოცებ?". ქეთოს სხვანაირად მივუდექი. ვუთხარი, რომ ორივე შვილი ძალიან მიყვარს და დათას გაზრდაში თვითონაც უნდა დამეხმაროს. რაღაცეებს ვავალებ კიდეც, ხან პამპერსს მომაწვდის, ხან ბავშვის ტალკს. ამის გამო მადლობას რომ ვუხდი, სტიმული ეძლევა და აღარ ეჭვიანობს.
ერთი პრობლემა კი გვაქვს – დათას ხელში აყვანა მალ–მალე უნდა და, როცა ქეთოს არ ვაჭერინებ, სწყინს. არ ვიცი, ამ საკითხს როგორ მოვაგვარებ. ამას წინათ პური მოუტეხია და მივასწარი, ბავშვისთვის ნამცეცები უნდა ჩაეყარა პირში. მითხრა, დათას შიაო. თუ ერთ დღესაც ქეთომ დათას პურზე გადასმული არაჟანი არ აჭამა, მაშინ ყველაფერი კარგად იქნება.
– დათასთვის ახალი ტანსაცმლის და ნივთების ყიდვა დაგჭირდათ თუ უფროსი დაიკოს ნაქონი გამოადგა?
– თითქმის ყველაფერი ვუყიდეთ, რადგან ქეთოს ვარდისფერ სამოსს ვერ ჩავაცმევდი. ჩემი გოგოს გარდერობიდან დათა მხოლოდ მუქი ფერის ტანსაცმელს ჩაიცვამს. საწოლი ვუყიდეთ, მაგრამ, რად გვინდა? თავის საწოლში არ იძინებს. ალბათ დედაშვილური ინსტინქტი და ყნოსვა გამძაფრებული აქვს, სულ ჩემთან უნდა ძილი. ქეთოც ასე იყო, დიდი ძალისხმევა დამჭირდა, რომ თავის საწოლში დაეძინა.
ახლა ორივე ბავშვი ჩვენს ოთახში წევს, დიდ გაწამაწიაში ვარ, მაგრამ რა ვქნა, შვილები მსხვერპლს მოითხოვენ. ერთი მხრიდან ქეთო კრუსუნებს, მეც მიყვარხარ და ჩამეხუტეო, მეორე მხრიდან დათა ატეხს ხოლმე ტირილს და მთელი ღამე გადაწოლ–გადმოწოლაში ვარ. ამასობაში თავზე მათენდება. ჩემი შვილები დედას ვერ იყოფენ და ეს პერიოდი სულ გამოუძინებელი დავდივარ.
– ორი შვილის დედობამ შინაგანად რა შეცვალა თქვენში?
– ორი შვილი რომ გყავს, უფრო ძლიერ ქალად გრძნობ თავს. არც მანამდე ვიყავი სუსტი, მაგრამ ახლა მეტ ძალას ვგრძნობ. უკვე იმ კატეგორიის ქალებს მივეკუთვნები, რომლებიც შვილებს იფიცებენ. მოწოდებით ვარ დედა. ჩემი შვილები ყველაფერს მირჩევნია. შეიძლება ღამეები გავათენო, დავიღალო, მაგრამ ეს მიღირს იმად, რომ ორი შვილი მყავდეს.
– სამსახურს როდის დაუბრუნდებით?
– დეკემბრისთვის საახალწლო კონცერტები გვექნება და სამსახურშიც ამ პერიოდისთვის გავალ. მანამდე ვეცდები, ორსულობის პერიოდში მომატებული 13 კილოგრამი დავიკლო. დათა ხელოვნურ კვებასთან ერთად ბუნებრივზეც არის და ამიტომ ჯერ დიეტის დაცვა გამიჭირდება.
– როგორც ჩანს, კარგი ორსულობა გქონდათ, რადგან ამ მდგომარეობაშიც მუშაობდით, სკეტჩებში აქტიურად მონაწილეობდით.
– არაჩვეულებრივი ორსულობა მქონდა. ივენთებზეც დავდიოდი და სამსახურშიც. 8 თვემდე ჩვეულებრივად ვიმუშავე დიდი მუცლით. 9 თვის განმავლობაში არაფერს შევუწუხებივარ. არც ჭირვეული ორსული ვყოფილვარ. ერთადერთი, რაც ძალიან მინდოდა, ვაშლი იყო. სხვადასხვა ზომისა და ფერის მიხედვით სულ უნდა მქონოდა.
– თან სკეტჩებში ორსულ ქალებს თამაშობდით და ამ მხრივაც არ იგრძნობდით დისკომფორტს.
– ზოგიერთ გმირს, მაგალითად, ნოდარის დედას, ფეხმძიმობა არ მოუხდებოდა, ამიტომ ვმალავდი. ცისმარს კი მუცელი მოუხდა.
– "ფეისბუქზე" ორსულობის დროს გადაღებული ფოტოები არასოდეს აგიტვირთავთ. რატომ ერიდებოდით?
– შეურაცხყოფას არავის ვაყენებ, მაგრამ 3–4 თვის ორსულები სარკესთან რომ დადგებიან, მუცელზე ხელს დაიდებენ და ასეთ პოზებში ფოტოებს იღებენ, არ მომწონს. ორსულობის დროს გადაღებული ფოტოები ტელეფონშიც კი არ მაქვს.
– დათას ფოტოებიც არ გამოგიქვეყნებიათ. ალბათ 40 დღის გასვლას ელოდებით.
– ასეთ ცრურწმენებს არ მივყვები. არც იმის მჯერა, რომ ბავშვს 40 დღემდე ფრჩხილები არ უნდა დავაჭრა. მონათვლამდე დათას ფოტოების გამოქვეყნება არ მინდა. ნახვა კი ყველას შეუძლია, ვისაც ამის სურვილი აქვს, რა თქმა უნდა, ვირუსიანების გარდა.
– მონათვლას როდის გეგმავთ?
– ქეთო 42–ე დღეს მოვნათლე და ალბათ დათასაც ასე მოუწევს. ნათლიებიდან ერთ–ერთი "კომედი გრუპის" წევრი, ბექა ონიანი იქნება, რომელიც ამის შესახებ თქვენი ჟურნალის საშუალებით გაიგებს. გადაირევა ნამდვილად! ბექა ჩემი უახლოესი მეგობარია.
სოფიო ბოჭორიძე, ჟურნალი სარკე