• ''ფსიქოპათთა თამაშებში'' შიშველი ეკა ნიჟარაძის კადრი ''გაიპარა''

    ''იმედის'' ეთერში გადის ახალი ქართული სერიალი ''ფსიქოპატთა თამაშები'', სადაც მსახიობი ეკა ნიჟარაძე ქმრის მოღალატე ქალს ასახიერებს, ჰყავს ასაკით უფროსი ქმარი და ახალგაზრდა, მასზე პატარა საყვარელი, რომელიც მისი ერთგული არაა, ეკას გმირი კი ფულით ცდილობს მასაჟისტი ანრის შენარჩუნებას. ანრის მსახიობი ერეკლე გეწაძე თამაშობს, ვის მშობლებთანაც ეკას დიდხნიანი მეგობრობა აკავშირებს. ეკას სერიალში ინტიმური და საკმაოდ თამამი სცენები ჰქონდა, ერთ მომენტში შიშველიც გამოჩნდა. გამოხმაურებაზე, ახლობლების რეაქციაზე და ზოგადად, საკუთარ გმირზე ეკა თავად ისაუბრებს.

    - სერიალის გადაღებები ზაფხულში მიმდინარეობდა, გიჟურ რეჟიმში ვიყავი, 57 გრადუს სიცხეში პარალელურად ორ სახლში ვაკეთებდი რემონტს. რომ დამირეკეს, ბევრი ვიცინე, სერიალის თავი ნამდვილად არ მქონდა, მაგრამ მსახიობი ვარ და უარი ვერ ვთქვი. სცენარი რომ გადმომიგზავნეს, ვიფიქრე, ჩემთვის ნამეტანი ხომ არ არის-მეთქი, მაგრამ რომ გავიგე, ვინ იქნებოდნენ ჩემი პარტნიორები, ვინ იყო რეჟისორი, დავთანხმდი. ძალიან მალე საფრანგეთში უნდა გავფრენილიყავი, კი ვუთხარი შემოქმედებით ჯგუფს, რომ ჩამოვალ, მერე გადავიღოთ-მეთქი, მაგრამ რაღაცები გადმოაადგილეს, გადაღებები ზედიზედ სამი დღე მქონდა და ყველაფერი მოვასწარით.
    - რეალობაში შენი გმირის მსგავსი ქალები თუ შეგხვედრია?
    - ალბათ, არსებობენ. რატომღაც, ძირითადად, ორმაგი ცხოვრებით მოთამაშე ქალებს ვასახიერებ. ჩემს გმირს ლანა ჰქვია. ''რუსთავი 2''-ზე რომ გადიოდა სერიალი - ''ჟამი ყვავილობისა'', იქაც დაახლოებით ამავე ტიპის ქალს ვთამაშობდი და იქაც ლანა მერქვა, სცენარი რომ წავიკითხე, ამაზე მაშინვე გავამახვილე ყურადღება, ეტყობა, ეს სახელი ჩვენთან ამ ტიპის ქალებთან ასოცირდება. რატომღაც სულ ასეთ უცნაურ პერსონაჟებს ვთამაშობ, მესმის, მსახიობი ვარ, მაგრამ ხომ შეიძლება შეარჩიო ისეთი მსახიობი, რომელიც შეესაბამება გმირს, მე სულ განსხვავებულ ტიპაჟებს ვასახიერებ. მაგალითად, ''ჩემი ცოლის დაქალებში'' კატოს ყოფილი ქმრის ცოლს ვთამაშობდი, მაგრამ ვფიქრობ, ეს ჩემი როლი არ იყო, იქ უნდა ყოფილიყო ყველანაირად სხვა ტიპის ქალი, ისეთი, ალფონსი ბიჭები რომ ეტანებიან და მოსწონთ. როგორც ჩანს, სწორედ მაგიტომ არ განვითარდა ჩემი გმირის ხაზი, რაზეც, სიმართლე გითხრა, გული მწყდება.
    - ეკა, ახალ სერიალში შენი მონაწილეობით ინტიმური სცენა თამამი და ესთეტიკური იყო. ახლდა დაძაბულობა გადაღებების პროცესს?
    - არა, გაღებები იყო სახალისო, სერიალში ჩემს მეუღლეს ბატონი ლევან ერისთავი თამაშობს, რომელთანაც მე ადრეც მიმუშავია სერიალზე, მეგობრები ვართ, არაჩვეულებრივი ადამიანია, კარ-გი იუმორი აქვს და ასე სიცილ-სიცილში გადავიღეთ ეს სცენებიც. თვითონ ძალიან ნერვიულობდა, მეც, მაგრამ გადაღების
    პროცესში დაძაბულობა არ ყოფილა. ვინც ბატონ ლევანს და ასევე რეჟისორ ოთარ შამათავას იცნობს, მიხვდებიან, რასაც ვგულისხმობ. რაც შეეხება ჯაკუზის სცენას, სადაც ერეკლე გეწაძესთან ერთად ვიწექი, ეს კიდევ უფრო სასაცილო იყო, თუნდაც იმიტომ, რომ ერეკლეს მშობლები ჩემი ბავშვობის მეგობრები არიან და რომ გაჩნდა, კარგად მახსოვს, ერთ-ერთი პირველი შვილი იყო ჩვენს სამეგობროში, მაგრამ სერიალში პარტნიორებს, საყვარლებს ვთამაშობთ, ნუ რა ვქნათ, ასეთი პროფესია ავირჩიეთ მეც და ერეკლემაც, ვინ რას წარმოიდგენდა.
    - უხერხულობის გრძნობა გქონდა?
    - თავიდან კი, სანამ უშუალოდ გადაღების მომენტამდე მივიდოდი, პროცესში კი ძალიან ვიხალისეთ. ჯაკუზის სცენის გადაღებისას ხან ქაფი იყო ზედმეტი, ხან გვციოდა, ხან გვცხელოდა, მაგრამ მსუბუქად გადავათამაშეთ, იმედია, ჩემი პარტნიორებიც ასე მსუბუქად გრძნობდნენ თავს.
    - გარდა იმ თამამის სცენისა, რომელზეც უკვე ვისაუბრეთ, იყო კადრი, სადაც წელზემოთ შიშველი ჩანდი.
    - ეგ შემთხვევით მოხვდა სერიალში, მე თვითონაც არ ვიცოდი, თუ გაუშვებდნენ, კადრი გაიპარა, არ უნდა ყოფილიყო, მაგრამ ეტყობა, მერე რეჟისორმა ჩათვალა საჭიროდ და ჩასვა, თუმცა ამის გამო არ დამირეკავს და საყვედურები არ გამომითქვამს. მე ვთამაშობდი სპექტაკლში ''ზაფხულის ღამის სიზმარი'', სადაც ნიჟარიდან შიშველი ამოვდიოდი. კარგად მახსოვს, ჭოლამ როგორ მითხრა ეს ამბავი, ჩემს საგრიმიოროში ვისხედით გოგონები, მათ შორის მანანა კაზაკოვა და უცებ ჭოლა მეუბნება, ''ზაფხულის ღამის სიზმარი'' უნდა დავდგა და შენ ითამაშებ, ოღონდ უნდა გაიხადოო. მე ძალიან დავიბენი, პაუზა მქონდა და ამ დროს დაამატა - ნიჭიერად უნდა გაიხადოო. წლები ვთამაშობდი ამ როლს, მაგრამ ამას არავინ გაუღიზიანებია.
    - და სერიალს როგორი გამოხმაურება მოჰყვა?
    - რა ვიცი, განსაკუთრებული არა. აი, დღეს ქუჩაში გამოვედი, მაგრამ ქვების სროლა არ დაუწყიათ, არც ჩავუქოლივარ ვინმეს (იღიმის). მგონია, რომ განსაკუთრებული არაფერი ყოფილა.
    - როგორია, უყურო საკუთარ თავს ინტიმური როლის შესრულების დროს?
    - მე ამას აღვიქვამ გადაღებებიდან გამომდინარე, ვიცი, იმ მომენტში ვინ რა თქვა, რა მოხდა, ჩაიწია ქაფი, იყო შიშინი და ა.შ. ანუ ტექნიკური მხრიდან ვუყურებ და სწორად ვერ შევაფასებ. ზოგადად, არასდროს ვარ კმაყოფილი. როცა თეატრში მუშაობ, იცი, დღეს თუ რაღაც კარგად ვერ ითამაშე, ხვალ გააუმჯობესებ, მაგრამ ამ შემთხვევაში ასე არ ხდება, ეს უკვე მზა პროდუქტია, ვერაფერს შეცვლი და ამიტომ ძნელია. თუმცა დამირეკეს და მითხრეს, რომ მოეწონათ, თან, ისეთმა ადამიანებმა გამოიჩინეს ყურადღება, საერთოდაც რომ არ დაერეკათ, არაფერი მოხდებოდა. ისედაც არ მჩვევია დავალდებულება, გინდა თუ არა დამირეკე და მომიკითხე, ასეთი რაღაცები არ მახასიათებს, მაგრამ რასაკვირველია, ზარები მესიამოვნა.
    - ოდესმე შენი როლის, გმირის გამო კრიტიკის ქარ-ცეცხლში მოხვედრილხარ?
    - არა, სხვათა შორის, მიუხედავად იმისა, რომ მქონია თამამი სცენები მაშინ, როცა უფრო ახალგაზრდა, გამხდარი, ლამაზი ვიყავი, დიდი ნეგატივი ჩემკენ არასდროს წამოსულა.
    - ოჯახის წევრები როგორ შეხვდნენ შენს როლს?
    - იცი, რომ არ უნახავთ? დამავიწყდა მეთქვა, რომ იმ დღეს იყო სერიალი, მე თვითონაც მოგვიანებით ვნახე, იმ დროს ბავშვთან ვიყავი, არ მეცალა. დამირეკეს, ''ფეისბუქზე'' დამიპოსტეს, მერე გადავახვიე და ვუყურე. მოკლედ, არ უნახავთ და მეც არ დამიძალებია, გინდა თუ არა შეხედეთ-მეთქი.
    - ზოგადად, შვილები როგორ რეაგირებენ შენ მიერ შესრულებულ თამამ სცენაზე?
    - სხვათა შორის, ერეკლემ მკითხა, ჯეჯიკომ იცის შენი გმირის შესახებო? კი-მეთქი, რასაკვირველია, ვუთხარი, რა იყო აქ დასამალი, მსახიობები ვართ. ერეკლეს დედა ნანუკა ლითანიშვილიც მსახიობია, ჯეჯიც თეატრალურში სწავლობს, შეიძლება, მათაც მოუწიოთ ერთად თამაში. ასე შეიძლება, ადამიანს ზღვაზეც შეხვდე საცურაო კოსტიუმში გამოწყობილი ან წყალში მყოფი. მე ჩემს შვილებთან ეს პრობლემა არ მაქვს.
    - ეკა, უამრავი სატელევიზიო პროექტია, რომელიმეში ხომ არ აპირებ მონაწილეობას?
    - ''ერთი ერთშის'' პირველი სეზონის შემდეგ შემხვდა ერთი ჩემი მეგობარი და მითხრა, მოემზადე შემდეგი სეზონისთვისო, მაგრამ ვერ ვიმღერებ, თავის დროზე მიმღერია რაღაც პროექტებში, მაგრამ ახლა ვეღარ, ხმა არ მაქვს და თავს ვერ მოვიჭრი, ეს ისაა, რასაც ვერ გავაკეთებ.
    - ჯანმრთელობის პრობლემა ბოლომდე მოგვარდა?
    - კი.
    - ზემოთ შვილიშვილი ახსენე, რა ხნისაა ახლა?
    - წლის და 9 თვისაა, ბაღში შევიყვანეთ. აღმოჩნდა, ძიძის ინსტიტუტი არაა საჩვენო, ვერ ვეგუებით რაღაცებს, რთულია მოძებნო ადამიანი, რომელსაც ეყვარება ბავშვი, ვისაც უვლის. მოკლედ, ზაფხული გადავაგორეთ და სექტემბერში წლისა და 7 თვის ასაკში ბაღში მივიყვანეთ. ჯერ არ ლაპარაკობს, სიტყვებს ამბობს ცალ-ცალკე, ოღონდ ძალიან მოძრავი, ცოცხალი და სასაცილოა, თან, გადასარევად გრძნობს თავს ბაღში, ხალისით მიდის და რომ მივაკითხავ წამოსაყვანად, მაინცდამაინც არ უხარია, შაბათ-კვირას სახლში ცოტა სწყინდება და გვჭამს (იღიმის).
    - უკვე დიდი, როგორც იტყვიან, გზაზე დამდგარი შვილები გყავს, საკუთარ პირად ცხოვრებაზე არ ფიქრობ?
    - როგორ უნდა ვიფიქრო, არ ვიცი. იმასაც რომ ამბობენ, მზად არ ვარო, ასეც არაა, შეიძლება, არაფრისთვის იყო მზად, უცებ გაგიჟდე, გადაირიო და შეგიყვარდეს.
    - ალბათ, შეხედულებები ამ საკითხში შეგეცვალა. აღარ ფიქრობ ისე, როგორც თუნდაც 5 წლის წინ?
    - კი, ასეა, ხუთის კი არა, ერთი წლის წინ რომ ვფიქრობდი, ისეც აღარ ვფიქრობ დღეს, ღირებულებები იცვლება, თუმცა ეს არ გამორიცხავს, რომ რადიკალურად სხვა ადამიანთან ააწყო ურთიერთობა, რომ ვერ წარმოიდგენდი, ისეთთან. რაც უფრო მეტად ფიქრობ, რომ ეს ის არაა, რაც შენ გჭირდება, მით უფრო გითრევს.
    - ურთიერთობა, რომელმაც შენში გარდატეხა მოახდინა.
    - კი იყო ერთი, ოღონდ ეს იყო გარდატეხა ცუდის მხრივ, ამის გახსენებაც კი არ მინდა... ის პერიოდი თავიდან იმდენად ამოვიგდე, რომ ჩემ გარშემო არც ახსენებენ. იმდენად მძიმე შემთხვევა იყო, დახურული თემაა.

    ციცი ომანიძე
    ჟურნალი ''რეიტინგი''
    1 639 ნახვა
    27-11-2014, 00:59
    GOGATV

    abezara