"მიყვარდა ბიჭი, რომელსაც თურმე მხოლოდ ჩემი ფული აინტერესებდა"

ამ წერილს 26 წლის ქალი გწერთ. ტელეფონით გავიცანი ბიჭი, რომელიც უზომოდ შემიყვარდა, არადა ერთხელაც კი არ მყავდა ნანახი. უცხოეთში ვცხოვრობ, იქიდან ვურეკავდი და ვლაპარაკობდით. მეუბნებოდა, მეც ძალიან შემიყვარდიო. სინამდვილეში კი თურმე სიყვარული კი არა, მხოლოდ ანგარება ამოძრავებდა.
2 წლის განმავლობაში ფულს ვუგზავნიდი. მერე მითხრა, რომ თვითონაც უნდოდა უცხოეთში წამოსვლა. გეგმებს ვაწყობდით, რომ ერთად ვიმუშავებდით და ერთობლივი ფულით საქართველოში ბინას ვიყიდდით. ყველანაირად დავეხმარე, რომ ჩამოსულიყო. მან კი საშინლად მომატყუა. თურმე სხვა გოგოსთან ჰქონდა კავშირი გაბმული. ჩამოვიდა და სხვაზე იქორწინა. ამ ტყუილით საშინელი შეურაცხყოფა მომაყენა. მარტო თვითონ კი არ მატყუებდა, ამ საშინელებაში მთელი მისი ოჯახი იყო ჩართული. ყველა ერთად ცდილობდა ჩემს გამოყენებას, მათ მხოლოდ ჩემი ფული აინტერესებდათ. სამწუხაროდ, მშვენივრად გამომიყენეს.
ერთადერთი, რაც მამშვიდებს, ის არის, რომ უფალი ყველას პასუხს მოსთხოვს. ღმერთმა ტანჯვისთვის არ გამწირა და გამომიგზავნა ადამიანი, რომელსაც უანგაროდ შევუყვარდი. მეც ძალიან მიყვარს და მასთან ბედნიერ ქალად ვგრძნობ თავს. ახლა მივხვდი, რას ნიშნავს ნამდვილი სიყვარული, როცა ადამიანს შენგან მხოლოდ სიყვარულის მიღება სურს და არა – ფულის. მალე ცოლადაც გავყვები და ვიცი, რომ ბედნიერი ოჯახი გვექნება.
გოგონებს მივმართავ – ბრმად ნურავის შეიყვარებთ! კარგად დააკვირდით იმ ადამიანს, ვის გვერდითაც ხართ, რომ მერე ტკივილისგან არ დაიტანჯოთ. ყველას დიდ ბედნიერებას გისურვებთ!
"სარკის" ერთგული მკითხველი