აუკრძალეთ ჭკვიანურად - გააკეთეთ მეტი და იყვირეთ ნაკლები

იმ მიზეზით, რომ შვილისთვის მხოლოდ კარგი გვინდა, ბავშვს ზედმეტად ბევრ რამეს ვუკრძალავთ. სამწუხაროდ, მათ არ ესმით ჩვენი საუკეთესო განზრახვა, ამიტომ ბრაზობენ, საკუთარ თავში იკეტებიან და ჰგონიათ, რომ დედ-მამას არ უყვართ. სპეციალისტები გვირჩევენ - აკრძალვა საჭიროა, ოღონდ ეს მეთოდი ძალიან საჭირო მომენტებში ძალიან ჭკვიანურად უნდა გამოიყენოთო. მაინც რომელია ჭკვიანური აკრძალვა?

აუკრძალეთ მხოლოდ ის, რაც მის სიცოცხლესა და ჯანმრთელობას ემუქრება
ნუ აშინებთ ბავშვს აკრძალვის დარღვევის მუქარით. ამით შეიძლება შიშები და ფობიები გამოიწვიოთ. ამ პათოლოგიების დაძლევა საკმაოდ რთულია.

აუკრძალეთ შეთანხმებით
ზოგჯერ ჩვენი საშინელი აკრძალვები არც ისე საშინელი და კატეგორიულია. ისინი მართებული აკრძალვებით უნდა შევცვალოთ. ქუჩაზე გადარბენა შეიძლება, ოღონდ დედას ან მამას ხელი უნდა ჩაკიდო. რატომ? მანქანებში უფროსები სხედან და ძალიან სწრაფად დადიან, საშიშია, შეიძლება დაგეჯახოს და გატკინოს.

ჩანგალს ან დანას ხელი მხოლოდ ტარზე უნდა მოკიდო (აჩვენე). თორემ შეიძლება ხელი გაიჭრა და ძალიან გეტკინოს. ჯობია უფროსს დაუძახო.

აკრძალვა ყვირილის გარეშე
ბავშვისთვის დაყვირებით სასურველ შედეგს ვერ მიაღწევთ. სამაგიეროდ, შეგიძლიათ მკაფიოდ და მკაცრად მოსთხოვოთ რაიმეს შესრულება. ეს ზოგჯერ საჭიროცაა და აუცილებელიც. ექსტრემალური სიტუაციებისთვის მოიფიქრეთ საგანგებო სიტყვა, მაგალითად: "სდექ" ან "სტოპ" და შეუდექით თამაშს - როცა ამ სიტყვას იტყვით, მაშინვე უნდა გაჩერდეს. თუ ამ თამაშს შეეჩვევა და თქვენს ხელს შეუწყობთ, ის შერჩეული სიტყვა რეფლექსური გახდება და როგორც კი წარმოთქვამთ, ბავშვის სხეულს მასზე ძალიან სწრაფი რეაქცია ექნება.