ზურა გორგაძე: "ჩემი დიდი სიყვარული კრახით დასრულდა"

26 წლის მსახიობ ზურა გორგაძის ცხოვრებაში წლების წინ იყო დიდი სიყვარული, მაგრამ მას ბედნიერი ფინალი არ მოჰყოლია. მას შემდეგ თავდავიწყებით არავინ შეჰყვარებია, თუმცა გატაცებები ხშირია. გოგონების ინტერესის ცენტრშია და ეს ყურადღება სიამოვნებს, სტიმულს ჰმატებს. კონკრეტულად როგორი გარეგნობის ქალები მოსწონს, ამ კითხვაზე პასუხი არ აქვს, თუმცა როგორი ხასიათისა და თვისებების მქონე უნდა იყოს მისი მშვენიერი ლედი, ეს კი ზუსტად იცის და ამის შესახებ თავისი აზრი "სარკესაც" გაანდო.
– ზურა, მას შემდეგ, რაც პროექტში "ცეკვავენ ვარსკვლავები" გამოჩნდით, გოგონების მხრიდან ყურადღებამ იმატა?
– თაყვანისმცემელი გოგონების ნაკლებობას არც პროექტამდე ვუჩიოდი, ახლა კი მათმა რაოდენობამ საგრძნობლად იმატა. ეკრანზე გამოჩენა მაინც თავისას აკეთებს. საკუთარ თავზე ლაპარაკი არ მიყვარს, მაგრამ ალბათ არც მე ვარ უჟმური და წარბშეკრული ბიჭი. გოგონებთან განსაკუთრებით გახსნილი გახლავართ და მათდამი თბილი დამოკიდებულებით გამოვირჩევი. სოციალურ ქსელში უამრავი წერილი მომდის.
– რას გწერენ?
– "რა კარგად იცეკვე!" – ეს ფრაზა თუ წავიკითხე შეტყობინებებში, ყველაზე მეტად მიხარია. თუ მწერენ, რა კარგი ბიჭი ხარი, ან შენ და სალომე ჭაჭუა რა კარგი წყვილი ხართო, ვხვდები, რომ მაინცდამაინც კარგად არ მიცეკვია, თუმცა ნებისმიერი ადამიანის წერილი მიხარებს გულს. ნურავინ იტყვის, რომ მამაკაცებს კომპლიმენტები არ მოგვწონს. როცა მანდილოსანი საქებარ სიტყვებს მეუბნება, სტიმული მემატება. კაცმა როგორი ქალისგანაც უნდა მიიღოს კომპლიმენტი, მის მიმართ სხვანაირი განწყობა ეუფლება.

– ანუ კომპლიმენტით თქვენი გულის მოგება შეიძლება?
– ვამბობ, რომ ამ დროს შეიძლება მამაკაცი ქალის მიმართ სიმპათიით განეწყოს. მგონი, ქალებიც ასე ხართ. შეიძლება გოგოს ბიჭი სულაც არ მოსწონდეს, მაგრამ მისგან კომპლიმენტს მოისმენს თუ არა, განწყობაც ეცვლება – დაიმორცხვებს და შეიფერებს.
მგონია, რომ ბოლო დროს ადამიანებს შორის სითბოს კრიზისი გაჩნდა. არ ვიცი, ეს მხოლოდ ქართველებს გვჭირს თუ მსგავსი პრობლემა სხვა ქვეყნებშიც არის. აშკარაა, რომ სითბოს გამოხატვისგან ყველანი თავს ვიკავებთ. კომპლიმენტების თქმა და სითბოს გამოჩენა მეტ სტიმულს აძლევს ადამიანს და რატომ უნდა შევიკავოთ თავი?!
– თქვენი კომპლიმენტებით ადვილად იპყრობთ გოგონების გულს?
– გოგოს გულის გახარებას რა უნდა? მოიფიქრე რამე კომპლიმენტი, რაც მის გულს გაახარებს და უთხარი. თუ გოგოს კარგად ვიცნობ და მისი სუსტი წერტილები ვიცი, ვხვდები, ხასიათზე როგორ უნდა მოვიყვანო. შეიძლება თვითონაც მიხვდეს, ამას რატომ ვაკეთებ, მაგრამ ეს თამაში რეალობაში გადადის და ამასობაში ხასიათზეც მოდის.
– თქვენს ყურადღებას როგორი გოგონები იქცევენ?
– გარკვეული კრიტერიუმები არ მაქვს. ასეთი ბუნების ვარ – წინასწარ არ ვიცი, რა როგორ მომეწონება. მაგალითად, ტანსაცმლის საყიდლად რომ გავდივარ, არასდროს ვიცი, კონკრეტულად რა მინდა, გადაწყვეტილების მიღება ყოველთვის მიჭირს და არჩევანის გაკეთებაში ვერც ვერავინ მეხმარება. კონსულტანტმა რაც უნდა მითხრას, მე თუ მომხვდა რაღაც თვალში, მაინც იმას ავირჩევ. ასე ვარ ქალების მიმართაც. არ ვიცი, როგორი გოგონათი მოვიხიბლები. გამორჩეული მზერის და მანერების გამოც შეიძლება ისე მომეწონოს, ჭკუიდან გადავიდე.
– გყვარებიათ ისე, რომ ჭკუიდან გადასულიყავით?
– რა თქმა უნდა. ის გოგო ძალიან ლამაზი ნამდვილად იყო, მაგრამ ის შარმი, რომელიც ჰქონდა და მომხიბლა, დღემდე ვერ ამომიხსნია. ეს სიყვარული წლების წინ იყო. მას შემდეგ სხვა შემიყვარდა. მერე ფლირტები მქონდა, მაგრამ ნამდვილი სიყვარული დიდი ხანია არ მწვევია. ყველაზე ხანგრძლივი სიყვარული კი სკოლის პერიოდიდან სტუდენტობამდე გამომყვა.
– ეს რომანი რატომ დასრულდა?
– არ ვიცი. არადა ეს სიყვარული იმდენად სერიოზულ ეტაპამდე იყო მისული, რომ მისი დასრულება წარმოუდგენლადაც მიმაჩნდა. მეგონა, ოჯახს შევქმნიდით, მაგრამ კრახით დამთავრდა ყველაფერი.
არ მიყვარს, როცა სიყვარულის დასრულებას ასაკს ან გამოუცდელობას მიაწერენ. როცა გრძნობა ძალიან დიდია, იქ არც ასაკს აქვს მნიშვნელობა და არც სხვა მიზეზს. ალბათ ჩვენ შორის ისეთი სიყვარული არ იყო, რასაც ოჯახის შექმნა მოჰყვებოდა. ბოლო პერიოდში ჩემს პირად ცხოვრებაში ერთი ურთიერთობაც არ შედგა.
– ამის მიზეზად რა მიგაჩნიათ?
– ალბათ ოჯახის შესაქმნელად მზად არ ვარ. საქმეზე იმდენად ვარ გადართული, ხანდახან ვფიქრობ, ვინმე სიგიჟემდე რომ შემიყვარდეს, რა მეშველება–მეთქი. ამჟამად ექვსი სამსახური მაქვს. გამთენიისას გავდივარ სახლიდან და შუაღამისას ვბრუნდები. თუმცა შეიძლება გადატვირთული გრაფიკი მიზეზად მომაქვს, რადგან თუ ვინმე შემიყვარდება, საქმიდან საყვარელ ადამიანზე გადართვა რთული აღარ იქნება.
– რა ღირებულებების მატარებელი უნდა იყოს გოგო, რომელიც თქვენ გვერდით იქნება?
– ქალის მთავარი ღირებულება ის გახლავთ, რისი დეფიციტიც ბოლო დროს ძალიან იგრძნობა – თავშეკავება და ნებისმიერ საკითხში ზღვარის ცოდნა. არ ვამბობ, რომ კდემამოსილი უნდა იყოს და მანდილი ატაროს, მაგრამ არსებობს რაღაცეები, რისი უფლებაც საკუთარ თავს არ უნდა მისცეს. ბიჭებს არ მოგვწონს, როცა ქალი საკუთარ თავს მაქსიმალურ თავისუფლებას აძლევს.
– მაქსიმალურ თავისუფლებაში რას გულისხმობთ, სად გადის თქვენთვის ზღვარი?
– მაქსიმალური თავისუფლებაა თუნდაც უცენზურო სიტყვების ბრახაბრუხი.
– უცენზურო სიტყვებზე თქვენი კოლეგა თინა მახარაძე გამახსენდა. "ფეისბუქის" საკუთარ გვერდზე ხშირად აქვს უცენზურო გამოთქმები. ამაზე რა აზრის ხართ?
– თინა მახარაძე შეიძლება ჩემი მეგობარი არ არის, მაგრამ კარგი ახლობელი ნამდვილად გახლავთ. ნიჭიერი მსახიობია და მან ასეთი გზა აირჩია. შეიძლება თინას რაღაც საქციელი არ მომწონს, მაგრამ მისი გაკრიტიკების უფლება არ მაქვს. ის ასეთია და გაუმარჯოს! უბრალოდ ჩემი პოზიცია დავაფიქსირე, რომ არ მომწონს ქალი, რომელიც ბილწსიტყვაობს.
არც ის მხიბლავს, როცა ქუჩაში სიგარეტს ეწევიან ან საღეჭ რეზინას ისე აღლაჭუნებენ, რომ ყურადღებას იქცევენ. თავისუფლების შეზღუდვას კი არ ვემხრობი, უბრალოდ ქალმა უნდა იცოდეს, სად როგორ მოიქცეს.
მე უფრო სხვანაირი ქალები მხიბლავენ – კლასიკურები და დახვეწილები. მოძრაობასაც კი დიდ მნიშვნელობას ვანიჭებ და იმასაც, თუ როგორ უჭირავს თავი.
– ჩაცმულობაც კლასიკური მოგწონთ?
– გააჩნია, სად არის. ტყეში, პიკნიკზე, მაღალქუსლიან ფეხსაცმელსა და პიჯაკში გამოწყობილი გოგო რომ ვნახო, აუცილებლად დავცინებ. ძალიან მაღიზიანებს, როცა გოგონები თეატრში კედით, ბოტასით ან დახეული ჯინსებით დადიან. მსახიობებსა და თეატრალურ გარემოს ხომ უნდა პატივისცემა? მსახიობები სპექტაკლისთვის ემზადებიან, რომ მაყურებელს სიამოვნება მიანიჭონ და ხალხმა ეს ხომ უნდა დააფასოს, თუნდაც თავისი ჩაცმულობით? ქალი ჩაცმის სტილითაც ინდივიდი უნდა იყოს და ქცევითაც. გოგოს თუ თავისი შინაგანი სამყაროს შეუსაბამოდ აცვია, ეს მას აუცილებლად ეტყობა.
– ანუ გარეგნული იერით ქალის ბუნების ამოცნობა შეგიძლიათ?
– მე არ ვამბობ, რომ ნათელმხილველი ლელა კაკულია ვარ, მაგრამ ქალის გამოცნობა კარგად გამომდის. თეატრალურ უნივერსიტეტში 4 წლის განმავლობაში ადამიანის ქცევებს ვსწავლობდით. ხალხზე დაკვირვება სულ გვიწევს, რომ პატარ–პატარა თვისებებით პერსონაჟი შევქმნათ.
– ქალისგან მოტყუებული დარჩენილხართ?
– მაჩვენეთ ადამიანი, ვისაც ტყუილი არ უთქვამს. როგორც უცოდველი ადამიანი არ არსებობს, ისევე არ არსებობს ადამიანი, ვინც არ მოუტყუებიათ ან თვითონ არ უთქვამს ტყუილი. ჩემს ცხოვრებაში ისეთი ტყუილიც ყოფილა, რომელსაც ყველაფერი დაუნგრევია და ისეთი შემთხვევაც მქონია, როცა ტყუილის გამო ქალს რამდენიმე თვით დავშორებივარ.
– და მაინც, როგორი ბუნების ქალი წარმოგიდგენიათ ცხოვრების თანამგზავრად?
– თავდაჭერილი. იუმორის გრძნობა აუცილებლად უნდა გააჩნდეს. პირადად მე სულ გართობის რეჟიმში ვარ, თუნდაც მარტო ვიყო. ადამიანი, რომელსაც იუმორის გრძნობა არ აქვს, ჩემ გვერდით არ გაიჭაჭანებს. ბორტგამცილებელთან ცხოვრებაც ვერ წარმომიდგენია, რადგან, ვინც მიყვარს, მასთან დიდი ხნით განშორება არ შემიძლია.

– არც თქვენ გაქვთ ისეთი პროფესია, რომ სულ საყვარელი ადამიანის გვერდით იყოთ.
– გეთანხმებით. ვაღიარებ, რომ ძალიან ეგოისტი ვარ, რაც ყველანაირ ურთიერთობაში ხელს მიშლის, ოღონდ ამის გამო შეყვარებულს არასდროს დავშორებივარ.
– დაბოლოს, ტრადიციულ შეკითხვას დაგისვამთ. ქართველ გოგონებს რას უსურვებთ?
– მინდა, ყველა ქალი წარმატებული იყოს როგორც პროფესიულ საქმიანობაში, ასევე პირად ცხოვრებაში. ბევრ ფულს ვუსურვებ ყველას, რომ სამკაულები, "ზმანები" და კოსმეტიკა არ მოაკლდეთ. ასე რომ იყოს, ხომ ძალიან ბედნიერები იქნებით? ჰოდა, მეც ეს მინდა!
სოფიო ბოჭორიძე, ჟურნალი სარკე