სარფ აქაია: "არაფრით ველოდი, რომ ათმაჯას როლზე დამამტკიცებდნენ"

"დიდებული საუკუნე" ის თურქულენოვანი სერიალია, რომელმაც ბოლო დროს მსოფლიო მასშტაბით ყველა თაობის მაყურებელი აალაპარაკა, მათ შორის, საქართველოშიც. სერიალების მოყვარულებში ამ სურათის ნებისმიერი მსახიობი დიდ ინტერესს იწვევს და სურთ, მათ შესახებ რაც შეიძლება მეტი იცოდნენ. გამონაკლისს არც მუსტაფას საიდუმლო მცველის, ათმაჯას როლის შემსრულებელი სარფ აქაია წარმოადგენს, რომელიც, შევეცდებით, ამ სტატიით გაგაცნოთ.
სარფ აქაია 1980 წლის 13 მაისს თურქეთის ქალაქ სტამბულში დაიბადა. იგი თურქეთში თეატრისა და კინოს ცნობილი მსახიობია. ამ პროფესიაზე ბავშვობიდანვე ოცნებობდა. მისი სამსახიობო დებიუტი 11 წლის ასაკში შედგა – პატარა როლი მიიღო ფილმში "ნახევრად ხუმარა, ნახევრად სერიოზული". სკოლის დამთავრების შემდეგ კი სახელმწიფო კონსერვატორიაში სამსახიობო ფაკულტეტზე ჩააბარა.
დამწყები მსახიობი თავიდან თეატრის სცენაზე თამაშობდა საკმაოდ პოპულარულ დადგმებში, 2000 წლიდან კი სატელევიზიო ინდუსტრიაში ჩაერთო – აქტიურად მონაწილეობს სატელევიზიო შოუებსა და გასართობ გადაცემებში, ასევე სერიალებში. აქვე უნდა აღვნიშნოთ, რომ 2010 წელს ტყუპისცალ ძმასთან ერთად თეატრი ჩამოაყალიბა, რომელსაც დღესაც ხელმძღვანელობს.
2009 წლიდან სარფი ტელესერიალების გმირად მოევლინა მაყურებელს. 2011 წელს ის სერიალ "დიდებულ საუკუნეში" მიიწვიეს ათმაჯას როლზე. 2012 წელს კი საკუთარი შესაძლებლობების ბოლომდე წარმოჩენის საშუალება სერიალში "მდუმარენი" მიეცა, რომელშიც ბილალის როლს ასრულებს. ამ სერიალმა სარფ აქაია დიდების მწვერვალზე აიყვანა.
ერთი–ორი სიტყვა "ეზელზეც" უნდა ითქვას (ქართველი მაყურებელიც ადევნებდა თვალს ამ სერიალს), რომელშიც აქაიამ ტეფოს როლი განასახიერა და, როგორც თავად ამბობს, ამ სახემ და სერიალმა ცხოვრებაში ბევრი რამ მისცა.
პირად ცხოვრებას სარფი ყოველთვის ასაიდუმლოებს და, სხვა მსახიობებისაგან განსხვავებით, მშვენიერ სქესთან ერთად საზოგადოებაში გამოჩენას ერიდება. ბოლო დროს პაპარაცებმა ჯანსუ დერესთან ერთად კაფეში დააფიქსირეს. წყვილმა იქ ერთად 3 საათი გაატარა. ამ ფაქტის გახმაურების შემდეგ ჟურნალისტები აქაიას მოსვენებას არ აძლევდნენ. თავიდან მსახიობი მათ იგნორირებას უკეთებდა, ბოლოს კი ისე დაიღალა, ეჭვებისა და ჭორების გასაფანტად ჟურნალ "ნიუ პოსტს" დათანხმდა ინტერვიუზე, რომელსაც ქვემოთ გთავაზობთ.
– თქვენი ცხოვრება არსებითად სერიალ "ეზელის" შემდეგ შეიცვალა. რითი იყავით დაკავებული მანამ, სანამ ამ სერიალში მიგიწვევდნენ?
– ყოველთვის ძალიან მინდოდა მსახიობობა. ბავშვობა ჩემს ტყუპისცალ ძმასთან და უფროს დასთან ერთად გავატარე, რომელიც მიმარ სინანის სახვითი ხელოვნების უმაღლეს სკოლაში სწავლობდა. მე და ჩემს ძმას მისი გვშურდა, რადგან ხშირად იღებდა მონაწილებას სპექტაკლებში. ჩვენც გამოვდიოდით სკოლის თეატრში. ჩემდა გასაკვირად, 11 წლისამ პატარა როლი მივიღე ფილმში "ნახევრად ხუმარა, ნახევრად სერიოზული". ამას მოჰყვა სერიალი "ჩვენი ოჯახი". აი, ასე დაიწყო ყველაფერი.
– ოჯახი არ შეწინააღმდეგებია თქვენს გადაწყვეტილებას, მსახიობი გამხდარიყავით?
– მშობლები ყოველთვის მეუბნებოდნენ: "გააკეთე ის, რაც გულით გინდა გააკეთო". ასე, რომ...
– რა მოხდა უნივერსიტეტის დამთავრების შემდეგ?
– სანამ უნივერსიტეტს დავამთავრებდი, ძმასთან და რამდენიმე მეგობართან ერთად დავაარსე თეატრი, რომელიც დღემდე ფუნქციონირებს. მინდოდა, ფული ჩემს თეატრში მეშოვა, მაგრამ არ გამოვიდა, ამიტომ მეგობრის ბარში ბარმენად მოვეწყვე.
– "ეზელში" თქვენი გმირი ერთ–ერთ ეპიზოდში ტირის. მაყურებლის აზრით, ეს სცენა მეტად დამაჯერებლად ითამაშეთ, როგორ მოახერხეთ?
– სხვანაირად არ შეიძლება. იმ სცენაში ნამდვილად ვტიროდი. მსახიობმა თავიდან ბოლომდე უნდა გაითავისოს როლი, რომელსაც ასრულებს.
– რა მოგიტანათ "ეზელმა"?
– დიდი გამოცდილება, შემძინა მეგობრები. ეს როლი ყველაზე ძვირფასია ჩემთვის, რაც კი ოდესმე მითამაშია. ტეფო არის პიროვნება, რომელიც დამოკიდებულია სხვაზე, ის მხოლოდ ბრძანებებს ასრულებს. სწორედ ამ მოვალეობის შესრულებისას გაიცნობს ალის და მიხვდება, რომ ისიც მისნაირია. ალის სახით იპოვის მეგობარს, რომლის გულისთვისაც თავს გაწირავს.
– თქვენი ცხოვრება შეიძლება ორ ეტაპად დაყოთ "ეზელამდე" და "ეზელის" შემდეგ...
– დიახ, ჩემი ცხოვრება ნამდვილად ორ ეტაპად იყოფა. "ეზელის" შემდეგ ჩემი ცხოვრება ძირფესვიანად შეიცვალა, ცნობილი და პოპულარული გავხდი.
– ცნობილია, რომ სტამბულის ევროპულ ნაწილში ძალიან ძნელია თქვენი ნახვა. რატომ?
– დიახ, ეს სიმართლეა. ამ ნაწილის ძალიან მეშინია, რადგან აზიურ ნაწილში გავიზარდე. ევროპული მხარე ხალხმრავალია, იქ სურსათიც კი სხვანაირია.
– როგორ დაახასიათებთ საკუთარ თავს?
– მკაცრი და თავდაჭერილი. რა თქმა უნდა, მეგობრებთან მკაცრი არ ვარ. ხშირად მინდა მარტო ყოფნა, მაგრამ იმ ადამიანს, რომელიც იმ მომენტში ჩემთან არის, ამას ვერ ვეუბნები. მეშინია, არ ვაწყენინო.
– როცა ათმაჯას როლზე დაგამტკიცეს ისტორიულ სერიალში "დიდებული საუკუნე", ამას ელოდით?
– სიმართლე გითხრათ, არაფრით ველოდი, რომ ათმაჯას როლზე დამამტკიცებდნენ. ეს ჩემთვის უდიდესი წარმატების ტოლფასია.

– გავრცელდა ჭორები თქვენსა და ჯანსუ დერეს შორის შესაძლო რომანზე...
– ჩვენ მხოლოდ მეგობრები ვართ და ამის გამეორებით არ დავიღლები. მოდით, ამაზე დავასრულოთ ინტერვიუ. პირად ცხოვრებაზე ლაპარაკს არ ვაპირებ.
მოამზადა თათია ბოჭორიძემ, ჟურნალი სარკე