ლევან ჯიბღაშვილი: "მინდა, ისეთ ქალზე ვიქორწინო, რომელიც ოჯახს არ დამინგრევს"

მსახიობი ლევან ჯიბღაშვილი ძიებაშია. თეატრსა და კინოში კარგ როლებს ეძებს, ცხოვრებაში კი – ქალს, რომელიც კარგი დედა და ცოლი იქნება. ეიფორიული ეტაპები დაასრულა და 26 წლის ასაკში სერიოზული ნაბიჯის გადასადგმელად მზად არის. სანამ შემოქმედებითი პაუზა აქვს, მთელ ენერგიას თავის ბიზნესში ხარჯავს.
– ლევან, დიდი ხანია ეკრანზე არ გამოჩენილხართ. შემოქმედებითი პაუზა რითია გამოწვეული?
– რამდენიმე ტელეპროექტიდან მივიღე შემოთავაზება, მაგრამ უარი ვთქვი. იმ პროექტებში, რომლებიც ქართულ ტელეარხებზე გადის, ჩემი რესურსი ამოვწურე. მართალია, სერიალი "ჩემი ცოლის დაქალები" გრძელდება, მაგრამ იქ ჩემმა პერსონაჟმა თავისი სათქმელი თქვა და ჩვენი თანამშრომლობა დასრულდა. დღეს ახალი არაფერი ხდება, ტელეარხები ისევ ძველ რაღაცეებს აცოცხლებენ, სერიალ "დეტექტივებსაც" განმეორებით უშვებენ. მოკლედ, შემოქმედებითი ცხოვრებით დატვირთული არ ვარ და ახლა მთელ დროს ბიზნესს ვუთმობ.
– რა ჰქვია თქვენს ბიზნესს?
– ბავშვთა გასართობი ცენტრების ფილიალები მაქვს, პლუს სამშენებლო ბიზნესშიც ჩავერთვე. გარდა ამისა, წვრილ–წვრილი რაღაცეებიც მაქვს. ვთვლი, რომ ბიზნესში საკუთარი თავი ვიპოვე. შარშან 2013 წლის ყველაზე წარმატებულ ადამიანად დამასახელეს ბიზნესში.
– საბიზნესო გამოცდილება როდის მიიღეთ?
– სანამ თეატრალურ უნივერსიტეტში ჩავაბარებდი, პატარ–პატარა ბიზნესიდეებს ვახორციელებდი. დაახლოებით 10 წლის წინ მეგობრებთან ერთად ივენთსაღამოებს ვაკეთებდი. ძალიან რომ გვიჭირდა, პლაკატებს თვითონ ვაკრავდით, ფლაერებს ვარიგებდით. ამ საქმეს ოთხი მეგობარი ვაკეთებდით. ახლა თითოეულს თავისი ბიზნესი აქვს, ყველა წარმატებულია.
– ბიზნესი სამსახიობო საქმეს არ ჩამოგაშორებთ?
– არა, რადგან კიდევ ერთხელ ვამბობ, თეატრალურ და კინოცხოვრებაში ახალი არაფერი ხდება. ჩემი პროფესია ბიზნესის კეთებაში ხელს ძალიან მიწყობს. პოპულარობა მეხმარება, პარტნიორებს ჩემ მიმართ ნდობა ჰქონდეთ.
– შეიძლება ითქვას, ამ ეტაპზე როლებზე უარს ამბობთ თუ შემოთავაზებები არ არის?
– უარს იმ შემთხვევაში ვამბობ, როცა ვთვლი, რომ ის კონკრეტული პროექტი ჩემთვის მომგებიანი არ იქნება. ფინანსების გამო კი იშვიათად ვამბობ უარს. უხეშად რომ ვთქვა, ახლა გადაღებებისა და სიახლეების "ლომკა" მაქვს. რუსეთში სერიალ "სტალინში" სტალინის როლი რომ ვითამაშე, მას შემდეგ 2 წელი უსაქმოდ ვიჯექი, ერთი პროექტიც კი არ გამოჩნდა. მოძღვარს შევჩივლე, ჩემს სფეროში არაფერი ხდება–მეთქი. დამამშვიდა, მოთმინებით დაელოდე და შენს ცხოვრებაში ძალიან კარგი პროექტი გამოჩნდებაო. ამ საუბრიდან ცოტა ხანში გამოჩნდა სერიალი "დეტექტივები". ჩემი აზრით, მსგავსი მასშტაბის სერიალი არავის გადაუღია საქართველოში. ახლაც ველოდები სიახლეებს.
2 წელია ტელეშოუებში მონაწილეობით ვარ დაკავებული. საზოგადოებას ჩემი სახელი და გვარი არ დავიწყებია, რაც იმას ნიშნავს, რომ ხალხს ისევ ვუყვარვარ. ჩვენს ქვეყანაში მსახიობს არც სათანადო დაფასება აქვს პროექტების ხელმძღვანელებისგან და არც – ადეკვატური ანაზღაურება. ჩვენი პროფესიის ერთადერთი პლუსი ის არის, რომ ხალხის სითბო და სიყვარული გაქვს.

– მაგალითად, სად ვერ იგრძენით თავი დაფასებულად?
– ზოგადად სიტუაციაა ასეთი. რუსეთში გადაღებაზე რომ ვიყავი, თავზე მევლებოდნენ. ერთ დღეს, გადაღების პროცესში, რეჟისორმა შემამჩნია, რომ უხასიათოდ ვიყავი. რომ მკითხა, რატომ ვიყავი ასე, გადაღება გადადო და ჩხუბი დაიწყო, მსახიობებს ვინც ნერვებს მოუშლის, ყველას გავყრიო. მისმა ასეთმა მიდგომამ მაგრძნობინა, რომ პირველი ვიყავი. აქ მსგავსი არაფერი ხდება. საქართველოში, რეჟისორიდან დაწყებული გრიმიორით დამთავრებული, ვერავინ აცნობიერებს, რომ მსახიობისთვის უნდა მუშაობდეს.
– თეატრის სცენაზე ბევრი ახალი სპექტაკლი იდგმება. თეატრში მუშაობაზე არ გიფიქრიათ?
– როცა თეატრში ხარ, თავიდან ბოლომდე ჩართული უნდა იყო ამ საქმეში, რეპეტიციაზე არ უნდა დააგვიანო. მე დროის დეფიციტი მაქვს და არ მინდა, ჩემ გამო სხვა მსახიობს მუშაობის პროცესში ხელი შეეშალოს. საკუთარი თავის მიმართ კრიტიკული და მომთხოვნი ვარ, ჩემს პროფესიასაც დიდ პატივს ვცემ.
– რომელი როლი გიყვართ განსაკუთრებით?
– სტალინის. იმ პერიოდში სხვა სამყაროში ვცხოვრობდი. ამ როლმა დიდი გამოცდილება შემმატა. ეს იყო ჩემი კარიერის ტრამპლინი, რომლის შემდეგაც აღმასვლა დაიწყო.
– ახლა დაღმასვლის პერიოდი ხომ არ გაქვთ?
– არა. მსახიობი კი არ ჩერდება, უბრალოდ რესურსი არ არის, რომ უფრო წინ წავიდეს. ხარ პოპულარული, აქტუალური, მაგრამ არ არის სამუშაო. საქართველო პატარა ქვეყანაა და ალბათ ამის ბრალიც არის. ვფიქრობ, წინ ბევრი საინტერესო როლი მელის.

– პირად ცხოვრებაში თუ გაქვთ წინსვლა?
– პირად ცხოვრებაში ძალიან მიჭირს – ძიებაში ვარ. იყო პერიოდი, როცა მიყვარდა, მაგრამ ახლა – არა. დღეს ძალიან მონდომებული ვარ, მინდა, ცოლი მოვიყვანო, მაგრამ სასურველი ქალი ჯერ არ გამოჩნდა. ვთვლი, რომ მამაკაცი პატარა ასაკში არ უნდა დაქორწინდეს, გარკვეული ეტაპები უნდა გაიაროს. მე ეს ეტაპები მოვილიე და უკვე იმ ასაკში ვარ, როცა შეიძლება დავოჯახდე.
– როგორ ქალს ეძებთ თქვენი ოჯახის დიასახლისად?
– ჩემ გვერდით ლამაზი ქალი უნდა იდგეს. სულელ ქალს ვერ შევეგუები. ჩემთვის ოჯახი ძალიან მნიშვნელოვანია. ცოლს რომ მოვიყვან, მას არ გავშორდები. ამიტომ, მინდა, ისეთ ქალზე ვიქორწინო, რომელიც უმნიშვნელო კამათის გამო ოჯახს არ დამინგრევს. ყველანაირად მზად ვარ, საკუთარ თავზე ეს პასუხისმგებლობა ავიღო. ჩემმა სიძემ, რომელიც შვეიცარიაში ცხოვრობს, მკითხა, აბა, რომელია ყველაზე მაგარი კაციო. იქვე დაამატა, ყველაზე მაგარი კაცი ის არის, რომელიც იმდენ ფულს იშოვის, რომ ცოლი ვერ დაუხარჯავს, ყველაზე მაგარი ქალი კი ის არის, რომელიც ასეთ კაცს იშოვისო. მე კი ვთვლი, რომ, თუ ფინანსებს დაუწყე ყურება, შეიძლება ოჯახის გარეშე დარჩე.
ჩემს ცხოვრებაში დასრულდა მუდმივი გატაცებები, ჭორები... მექალთანის იარლიყიც მომაკრეს, არადა ძალიან ერთგული ვარ. მოკლედ, ეიფორიულმა პერიოდმა გაიარა.
– მსახიობ ქალს ცოლად მოიყვანთ?
– არა. მგონია, რომ რთულია მსახიობი ქალის ქმრობა.
ლანა კიკნაძე, ჟურნალი სარკე