ნინა წკრიალაშვილი: ლანძღვის და ტალახის არ მეშინია!

მომღერალმა ნინა წკრიალაშვილმა ახალი კლიპი გადაიღო. თუკი თავის ერთ-ერთ ბოლო კლიპში ნინა მონაზვნის როლში მოევლინა მაყურებელს, ამჯერად ის შორენა ბეგაშვილთან ერთად ჯერ აბაზანაში ჩაწვა, შემდეგ კი ლოგინში იკოტრიალა. როგორც მოსალოდნელი იყო, ორი ლამაზმანი ქართული საზოგადოების კრიტკის ქარცეცხლში მოექცა, თუმცა როგორც თავად ამბობენ, ეს ფაქტი მათ საერთოდ არ აღელვებთ.

კლიპის რეჟისორი გიორგი კიკალიშვილია, სიმღერა სახელწოდებით ”რა გიპასუხო” ზაზა ხუბუკელაშვილმა დაწერა, ტექსტზე კი ნინამ და რეპერმა ძვალმა ერთად იმუშავეს.

ნინა წკრიალაშვილი, მომღერალი, ტელეწამყვანი: _ ნამდვილად არ ეჩვენება მაყურებელს, ზედმეტად თამამი კლიპი გადავიღეთ. გადავწყვიტეთ ექსპერიმენტი გაგავეკეთებინა და ეს მოვიფიქრეთ. დიდი ხანია კლიპი აღარ გადამიღია, ბოლო კლიპში ვიყავი მონაზვნის ფორმაში. მერე რადიკალურად შევიცვალე გეგმები, გავიხადე, შორენას დავუძახე, ჩავწექით ერთად აბაზანაში და არა მხოლოდ აბაზანაში. მართლა არაფერი არ არის ისეთი ამ კლიპში, მაგრამ რატომაც არ უნდა იყოს ასეთი სითამამე? როცა ეს სიმღერა დაიწერა ჩემთვის, ოთხი-ხუთი თვე მედო და ვცდილობდი დამეწერა ტექსტი, მაგრამ არ მოვიდა არაფერი თავში. მერე ვიყავი ცოტა მძიმედ და მომდიოდა თავში ეიფორია, მელანქოლია, ფობია. ტექსტი წავიდა იქეთ, რომ არ გამოვიდოდა მარტივი და კეთილი, მხიარული სიუჟეტი არ მოუხდებოდა ამ ყველაფერს. ბოლოს აღმოჩნდა, რომ ტექსტში არის იმხელა დოზით თავისუფლება, რომ შეიძლებოდა ნებისმიერი მიმართულებით გადაღებულიყო კლიპი.
ნინა წკრიალაშვილი: ლანძღვის და ტალახის არ მეშინია!

_ რატომ შეარჩიეთ კლიპისთვის შორენა?

_ აბა სხვა ვინ, თუ არა შორენა? როდესაც ვსაუბრობდით მე და რეჟისორი გიორგი კიკალიშვილი, ასე გადავწყვიტეთ. რეჟისორმა მითხრა, მოდი ხომ არ ვცადოთო და არც მიფიქრია, ეგრევე ვცადეთ. კარგად ვიხალისეთ გადასაღებ მოენადზე, ეს კიდევ ცალკე თემაა. მიმაჩნია, რომ თუ შოუბიზენსში კომპრომისზე არ წახვედი, თამამი ნაბიჯი თუ არ გადადგი, ხმაური თუ არ გამოიწვიე, არ არის საინტერესო. არც ლანძღვის გვეშინია და არც ტალახის სროლის. მერვე-მეცხრე წლისთავია პლეიბოის და სულ ხმაურია ჩვენს გარშემო. რადგან გადაწყდა, რომ კლიპში უნდა ყოფილიყო გოგო, იმიტომ რომ ბიჭი არ იქნებოდა ისეთი საინტერესო, ამიტომაც ბევრი აღარ მიფიქრია, ჩემი და კიკალას აზრი დაემთხვა ერთმანეთს, ორივემ ერთად ვთქვით, რომ შორენა ყოფილიყო, მაგრამ არ ვიცოდით შორენა დათანხმდებოდა თუ არა, საბედნიეროდ, დათანხმდა. არასოდეს არ მითქვამს ჩემს ნამუშევარზე კარგია-მეთქი, მაგრამ ეს კლიპი მართლა ლამაზი გამოვიდა. სიმღერაც ძალიან მომწონს, ტექსტიც ძალიან მომწონს, კლიპიც ძალიან მომწონს, ძალიან ლამაზი და ესთეტურად გაკეთებულია. თუმცა ძალიან გაგვიჭირდა გადაღებაზე, იცით რამდენს ვიცინოდით? ხელი მოკიდეო, რომ გვეტყოდნენ, დაჯღანული სახეებით ვკიდებდით ერთმანეთს ხელს. მაყურებელმა რაც უნდა, ის იფიქროს ამ კლიპზე. პირადად, ყოველთვის შინაგანად დიდი სურვილი მაქვს, რომ მხარი დავუჭირო ყველანაირ უმცირესობას, იქნება ეს ეროვნული უმცირესობა, ეთნიკური უმცირესობა, რელიგიური უმცირესობა, ლგბტ საზოგადოება თუ სხვა. თუნდაც დაჩაგრული ქალები. ტექსტში არის ასეთი ფრაზა, ”თუ არ მოგწონს ის, რაც შემოგთავაზა დრომ, შეცვალე, გამოიგონე შენი სამყარო”. ყველას შეგვიძლია შევცვალოთ ჩვენი რეალობა. ვისაც როგორ უნდა ისე გაიგოს, ვისაც როგორ სურს, ისე შეცვალოს. ჩვენ ვართ ჰეტეროები და არ ვეწევით არაფრის პროპაგანდას, ღმერთმა დაგვიფაროს.

შორენა ბეგაშვილი, მსახიობი, ტელეწამყვანი: _ ბოლო პერიოდში არ მიყვარს თამამი ნაბიჯების გადადგმა. თავის ვიკავებ. ნინას იმიტომ დავთანხმდი, რომ არ ვიქნებოდი ბიჭთან ერთად. რაც უფრო დრო გადის, ვხვდები, რომ ასეა საჭირო. თან როცა სხვა ქვეყნის შოუბიზნესს ვუყურებ, ვხვდები, რომ არ ამართლებს დახურული თანსაცმელი. თუ შოუბიზნესში ხარ, თუ საჭიროა გამომწვევადაც უნდა ჩაიცვა, ასეთი კლიპებიც უნდა გადაიღო. ეს ჩვეულებრივი როლია, ამით ვშოულობ ფულს, ეს არის ჩვენი საქმე. როცა იწყება განხილვა, ეს კაბა რატომ ეცვა, ეს კლიპი რატომ გადაიღო და მიდის მერე ორიენტაციაზე საუბარი, ეს ლამაზია, კარგი საყურებელია. ვისაც მოეწონება, მოეწონება, ვისაც არადა, ისიც კარგად იყოს. ჩვენ ვართ ორი არანორმალური გოგო, რომლებმაც კლიპი გადავიღეთ.

ეკა ირემაშვილი, გაზეთი ”ახალი თაობა”