სად და როგორ აღნიშნავენ ახალ წელს "ჩემი ცოლის დაქალების" მამაკაცები

ახალი წლის დღესასწაულს ყველა სხვადასხვა ადგილას და სხვადასხვაგვარად აღნიშნავს: ვინ - სახლში, ოჯახის წევრების გარემოცვაში, ან მეგობრებთან ერთად, ვინ - ქუჩაში, ვინ - რესტორანში, ვინ - უცხო ქვეყანაში, ვინ ბოლოს და ბოლოს - სამსახურში, ასეთი სამსახურებიც ხომ არსებობს?
მკითხველს აინტერესებს, რა გეგმები აქვთ პოპულარული სერიალის - "ჩემი ცოლის დაქალების" მამაკაც პერსონაჟებს. ამიტომ მათ ნაწილს შევეხმიანეთ კიდეც კითხვებით, - სად და როგორ ხვდებიან ახალ, 2015 წელს, - რა გეგმები აქვთ? ახალი წლის აღნიშვნის რაიმე განსაკუთრებული ტრადიცია ხომ არ აქვთ?

გიორგი ბახუტაშვილი (ცოტნე ცოტაშვილი):
- 2014 წელს ოჯახი შევქმენი და ცხადია, მეუღლესთან ერთად შევხვდები ახალ წელს, თოვლში გვინდა წასვლა. თუ აქ მოვიდა, ხომ კარგი, თუ არადა, მთაში წავალთ. ასეთი ჩანაფიქრი გვაქვს...

- აქამდე როგორ ხვდებოდი ახალ წელს?
- მეგობრებთან ერთად, არაფხიზელ მდგომარეობაში, მაგრამ ეს იყო ადრე. ახლა სხვანაირად არის ყველაფერი... რაც შეეხება საახალწლო გადაღებებს, ახლა ვიღებთ, მაგრამ ყველაფერს ვერ გეტყვით. საინტერესო ამბები იქნება...

- რას უსურვებ მაყურებელს?
- დაისახონ და საერთოდ დავისახოთ ყველამ რეალური მიზნები და აუცილებლად აგვისრულდება!

ბახვა ბრეგვაძე, (ცოტნე ცოტაშვილის პარტიელი):
- ისეთი ტრადიცია მაქვს, რომ ყოველთვის სახლში ვხვდები ახალ წელს, ყველა ოჯახის წევრი მაგიდასთან ვსხედვართ და ერთად ვეგებებით ახალი წლის დადგომას. მერე, რა თქმა უნდა, ყველა ჩვენს გზაზე მივდივართ. მაგალითად, შარშან ჩემს მეგობართან ვიყავით სახლში და იქ გავერთე, - ასე უფრო მირჩევნია და სავარაუდოდ, ანალოგიურად მოვიქცევი წელსაც. მერე, 2-3 იანვარს, ყაზბეგში ვგეგმავ წასვლას, იქაც კარგი ამბები ხდება ხოლმე ახალ წელს (სიცილით ამბობს).

- სერიალის მსახიობებს რაიმე საერთო წვეულება ხომ არ გაქვთ დაგეგმილი?
- ჯერ არ დაგვიგეგმავს, სად და როგორ აღვნიშნავთ დღესასწაულს, მაგრამ აუცილებლად გავერთობით და ერთად ავღნიშნავთ 2015 წელს. ჯერ გადაღებები გვაქვს წინ, მათ შორის საახალწლოც.

სერიალშიც იქნება, რა თქმა უნდა, სადღესასწაულო დღეები, თან, ძალიან კარგი, ლამაზი და საინტერესო, ამიტომ დაელოდეთ...

- სულ ცნობილი მეგობრები გყავს. ვისთან ერთად აპირებ ახალი წლის ღამეს ყოფნას?
- კონკრეტულად სად და ვისთან წავალ, ჯერ საბოლოოდ დაგეგმილი არ მაქვს, თუმცა რომელიმე მეგობართან სახლში მოხდება ჩვენი შეკრება. ზოგს კონცერტი აქვს, ზოგს ღონისძიება მიჰყავს (მეც შემომთავაზეს წელს, საღამოს წაყვანა, თუმცა ახალ წელს მუშაობა ძალიან გამიჭირდებოდა, ამიტომ ყველაფრისგან გავითავისუფლე თავი). ალბათ ყველა 3 საათამდე მაინც ვერ შევიკრიბებით, - იმედი მაქვს, კარგ დროს გავატარებთ.
გილოცავთ დამდეგ ახალ წელს თქვენც და თქვენს მკითხველებს, 2015 წელი განსაკუთრებულად კარგი ყოფილიყოს თქვენთვის!

ბუბა მათნაძე (ბაქარი):
- ამ საახალწლოდ ძალიან გახარებული ვარ. მაქვს ახალი სახლი. ჩემმა მშობლებმა იყიდეს და ოჯახის წევრები, მეგობრები, ძმაკაცები, დაქალები ახალ წელს ერთად ვხვდებით, - ყველანი ჩემთან მოდიან და კიდევ, ვისაც უნდა და ამის სურვილი ექნება, ვეპატიჟები. სახლი დიდია და დავეტევით (სიცილით ამბობს).
ისე, დაბადების დღე მაქვს 1-ელ იანვარს, 17 წლის ვხდები...

- რა მაგარ დღეს ყოფილხარ დაბადებული.
- კი, მიყვარს ჩემი დაბადების დღე. თან, ახალი წელია, უამრავი სტუმარი მოდის, ახლა კიდევ სულ გახარებული ვარ, ამ ყველაფერს ახალ სახლში აღვნიშნავ. გილოცავთ ყველას დამდეგს...

ლალი ფაცია