3 ყველაზე პოპულარული დიეტა, რომლებსაც ქართველი ''სელებრითები'' იცავენ

''როგორ დაიკელი?'' ''რა გამხდარი ხარ?'' ''აუ, შენ კიდევ მოიმატე?'' - ამ ფრაზებს საქართველოში გამარჯობასავით ყოველდღიურად ეუბნებიან ერთმანეთს. არადა, დაუწერელი კანონია, ქალებს როგორც ასაკს, ასევე წონას არ ეკითხებიან, მაგრამ ქართველები ამაშიც გამონაკლისები ვართ. ალბათ, წონაზე ამდენი ლაპარაკით ქართველი ''სელებრითებიც'' დაიღალნენ და ახლა უკვე ღიად წერენ, ვინ რა დიეტას იცავს და კვირაში რამდენ კილოს იკლებენ, მაგრამ ტელევიზიის გადამკიდე, რომელიც საშუალოდ 5 კილოგრამს უმატებს ადამიანს, ხშირ შემთხვევაში მათ დაკლებულ კილოგრამებს ვერ ვამჩნევთ.

მეორე შვილის გაჩენის შემდეგ მომატებულ კილოგრამებს, უკვე წლებია, ჯიუტად ებრძვის ნანუკა ჟორჟოლიანი. წონასთან ბრძოლაში დამარცხდა ინგა გრიგოლია, მაგრამ ხანდახან დიეტის ხასიათზე ისევ დგება. სასწაულად გამოიყურება დიეტის შემდეგ მარიტა როხვაძე, ზედმეტ კილოგრამებს ებრძვის თიკა ჯამბურია. მარიამ როინიშვილმა კი ერთ-ერთი დიეტოლოგის რჩევით, 12 კილოგრამი დაიკლო.

მკითხველს შევახსენებთ ერთ დროს პოპულარულ ''უგულავას დიეტას'', რომელსაც მაშინდელი ქალაქის მერი – გიგი უგულავა იცავდა. დიეტას შედეგი ნამდვილად ჰქონდა, თუმცა ტანის დათხელებასთან ერთად, საფულესაც კარგად ათხელებდა, რადგან ყველი, რომელიც ამ დიეტის ერთ-ერთი ძირითადი ინგრედიენტია, საკმაოდ ძვირი ღირს.

შემდეგ იყო ნინო სურგულაძის ქატოს დიეტა, რომლის შესახებაც მომხიბვლელმა ოპერის მომღერალმა პირველად ნანუკა ჟორჟოლიანის შოუში მოყვა. მეორე დღეს მთელი თბილისი ქატოს საყიდლად გაეშურა. ქატოს ჭამა დაიწყო ყველამ, რის შემდეგაც ექიმები და სურგულაძე ერთდროულად შეშფოთდნენ. ჯერ მედიცინის მუშაკებმა გააკეთეს სპეციალური განცხადება, რომ მათთვის, ვისაც კუჭ-ნაწლავის პრობლემები აწუხებდა, დაუშვებელი იყო ქატოს მიღება. სურგულაძემ განმარტა, რომ ის სხვა სახის ქატოს მიირთმევდა, რომელიც საზღვარგარეთ იყიდებოდა.

ახალი დიეტის შესახებ, რომელიც ახლა გახდა ყველაზე მოდური, სოციალურ ქსელში პირველი სტატუსი ინგა გრიგოლიას ქალიშვილმა – მარი გრიგოლიამ გამოაქვეყნა. როგორც მარი წერდა, ამ დიეტის საშუალებით ადამიანს 10 დღეში 8 კილოგრამის დაკლება შეუძლია. ვერ ვიტყვით, რომ მარტივია ან ადამიანი მთელი დღე დანაყრებული დადის, მაგრამ უგულავას და ქატოს დიეტისგან განსხვავებით, თქვენს ჯიბეს ძალიან არ დააზარალებს და ჯერჯერობით არც შეშფოთებული ექიმებისგან გაგვიგია მისი განსაკუთრებული მავნებლობის შესახებ.

ამ დიეტით დაიკლო მარი გრიგოლიამ და ნანუკა ჟორჟოლიანმაც მიბაძა. მოგვიანებით ჟურნალისტმა მარის საჯაროდ გადაუხადა მადლობა, იმისათვის, რომ ბრინჯის დიეტით წონის მოკლება შეძლო.

ბრინჯის დიეტა

ათი დღის განმავლობაში ყოველდღე მიირთვით ერთ საშუალო ზომის ქვაბში მოხარშული ბრინჯი და 1 ქილა მაწონი. ასევე აუცილებლად ყოველდღე უნდა მიიღოთ 3 ლიტრამდე წყალი. გაითვალისწინეთ, რომ ერთი ქვაბი ბრინჯი და მაწონი მთელ დღეზე უნდა გადაანაწილოთ და ცოტ-ცოტა მიირთვათ.

ნინო გიგიშვილი