ყველაზე სასურველი მეკვლეები - ვის ირჩევს ხალხი

მეკვლეობის ტრადიცია საქართველოში ოდითგანვე არსებობდა და მას საკრალურ მნიშვნელობასაც კი ანიჭებენ. ქართული ტრადიციის მიხედვით, მომავალი წლის ავკარგიანობა პირველ სტუმარზეა დამოკიდებული.

"მთელი კვირა" იმის დადგენას შეეცადა, თუ ვის მიიჩნევენ რიგითი მოქალაქეები დღეს მოქმედი პოლიტიკოსებიდან ყველაზე ფეხბედნიერად. ამისათვის დედაქალაქის მასშტაბით მცირე სატელეფონო გამოკითხვა ჩავატარეთ, რომელშიც შემთხვევითობის პრინციპით შერჩეულმა 200-მა რესპონდენტმა მიიღო მონაწილეობა.

პირველ რიგში უნდა აღინიშნოს, რომ გამოკითხულთა 40%-სათვის პოლიტიკოსის მეკვლეობა მიუღებელი აღმოჩნდა. მათმა უმრავლესობამ კი, ვინც სხვაგვარად ფიქრობს, ყველაზე სასურველ მეკვლედ პრეზიდენტი და ენერგეტიკის მინისტრი დაასახელა. მათ ხმების თანაბარი რაოდენობა - 10.5% (21 ხმა) მიიღეს.

მათ ოდნავ ჩამორჩა "თავისუფალი დემოკრატების" ლიდერი ირაკლი ალასანია 8%-ით (16 ხმა). "ლეიბორისტების" ლიდერმა შალვა ნათელაშვილმა ხმათა 7,5% მოაგროვა (15 ხმა). მეხუთე კი პრემიერ-მინისტრი იყო ხმათა 5,5%-ით (11 ხმა).

ჩვენი რესპონდენტები არჩევანს იმით ხსნიდნენ, რომ პრეზიდენტი მარგველაშვილი გაწონასწორებული ფიგურაა, ამასთანავე, განათლებული და სამართლიანიცაა. ერთ-ერთმა რესპონდენტმა ისიც თქვა, რომ პრეზიდენტი უუფლებო და ნიჭიერია და ამიტომ სურს მისი მეკვლეობა.

კალაძეზე არჩევანს იმიტომ აკეთებდნენ, რომ მთავრობაში ყველაზე წესიერ მინისტრად მიიჩნევენ. რამდენიმე მათგანს მინისტრთან რჩევაც აქვს - წავიდეს ქართული პოლიტიკიდან, სანამ დროა.

უნდა აღინიშნოს ისიც, რომ გამოკითხულთა უმეტესობას პოლიტიკოსი მეკვლე არ სურს, მიზეზად კი შეუსრულებელ დაპირებებსა და პოლიტიკოსებისადმი ნდობის დაკარგვას ასახელებენ. გამოკითხული 200 რესპონდენტიდან 141 ქალბატონი იყო, ხოლო 59 მამაკაცი. 80-მა მათგანმა არცერთი პოლიტიკოსი არ ისურვა მეკვლედ.

"მე ფეხბურთელი ვარ და კალაძის მეკვლეობა მინდა. მასთან ერთად სურათებს გადავიღებდი და ავტოგრაფსაც გამოვართმევდი. ვიმედოვნებ, მისი მეკვლეობა წარმატებულ საფეხბურთო კარიერაშიც დამეხმარება", - ამბობს 15 წლის ბიჭი.

კალაძის მეკვლეობა კიდევ ერთ ჩვენს რესპონდენტს სურს.

"მე კალაძის მეკვლეობას ვისურვები. ბედნიერი ვიქნებოდი, თუ შევჩენკოსაც მოიყვანდა", - გვითხრა 24 წლის გოგონამ.

37 წლის ქალბატონს კი დავით სერგეენკოს მეკვლეობა სურს.

"მე პროფესიით ექიმი ვარ და მინდა, რომ ჩემი მეკვლე სერგეენკო იყოს. მომწონს ამ ადამიანის მიერ გატარებული რეფორმა, განსაკუთრებულად კი ჯანდაცვის საყოველთაო დაზღვევა. მისი მეკვლეობით კმაყოფილი ვიქნებოდი", - დასძენს ის.

"მინდა, რომ ჩემი მეკვლე იყოს პრეზიდენტი. გიორგი მარგველაშვილი არის დინჯი, გაწონასწორებული, განათლებული, პროგრესულად მოაზროვნე და ადამიანი, რომელსაც ქვეყნის ბედი აღელვებს. მგონი, საკმარისი მიზეზებია იმისათვის, რომ მისი მეკვლეობა ვისურვო", - უთხრა "მთელ კვირას" 73 წლის ქალბატონმა.

70 წლის ქალბატონს სერგეენკოს მიეკვლეობა სურს.

"ჯანდაცვის მინისტრზე წესიერი კაცი მთავრობაში არ გვყავს, ამიტომ მის სტუმრობას ვისურვებდი", - გვითხრა მან.

"მე კახი კალაძის მეკვლეობა მსურს. მას ვთხოვ, რომ სანამ დროა, წავიდეს პოლიტიკიდან და მოშორდეს მაგ ხროვას, მთავრობაში რომ არიან თავმოყრილები. კახის აქვს ფული და მისი შოვნა არ სჭირდება, თან არც ფულზე გამოკიდებული არ არის. ეგ რომ ფულზე გამოკიდებული იყოს, როცა "მილანში" თამაშობდა, მაშინ გადავიდოდა "ჩელსიში", რომელიც უკეთეს საკონტრაქტო პირობებს სთავაზობდა. მაშინ კალაძემ გუნდს უერთგულა. ვთხოვ, რომ ქვეყანასაც უერთგულოს და დატოვოს პოლიტიკა", - გვითხრა 38 წლის მამაკაცმა.

ჩვენს კიდევ ერთ რესპონდენტს ირაკლი ალასანიას მეკვლეობა სურს.

"მინდა, რომ ჩემი მეკვლე ალასანია იყოს.

ვგიჟდები მაგ ბიჭზე, მაგისნაირი სიმპათიური ქართულ პოლიტიკაში არავინ არ არის", - აღნიშნა 40 წლის ქალბატონმა.

რამდენიმე რესპონდენტმა ხაზგასმით თქვა, რომ პოლიტიკოსების მეკვლეობას არავითარ შემთხვევაში არ ისურვებდნენ.

"მე არცერთ ქართველ პოლიტიკოსს აღარ ვენდობი, ამიტომ არცერთის მეკვლეობა არ მსურს", - ამბობს 68 წლის ქალბატონი.

"ნალებად ვარ ჩახედული პოლიტიკაში, ამიტომ არცერთი მათგანის მეკვლეობის სურვილი არ მაქვს", - დასძენს 19 წლის გოგონა.

"ქვეყანა ხომ ააყვავეს და კიდევ სახლში მინდა ეგენი?!" - გვითხრა 43 წლის მამაკაცმა.

"არცერთი პოლიტიკოსის სტუმრობა არ მინდა, შენი ჭირიმე. მაგ პოლიტიკამ დაღუპა ჩვენი ქვეყანა და სულაც არ მსურს მაგათი მეკვლეობა", - აღნიშნა 59 წლის მამაკაცმა.

"პოლიტიკოსის მეკვლეობა ძალიან სასაცილოა. მინდა, რომ თოვლის ბაბუა იყოს ჩემი მეკვლე", - გვითხრა 65 წლის ქალბატონმა.

"თქვენი სიიდან არავის მეკვლეობა არ მსურს. მოხარული ვიქნები, თუ ჩემი მეკვლე ალეკო ელისაშვილი იქნება," - აღნიშნა 52 წლის ქალბატონმა.

გამოკითხვის დროს იყო კიდევ რამდენიმე საინტერესო ფრაზაც:

45 წლის ქალბატონი: "მარგველაშვილი მინდა, იმიტომ, რომ უუფლებოა და ნიჭიერია".

43 წლის მამაკაცი: "არცერთი არ მინდა, მაგრამ რომ იცოდეთ, მაინც "ოცნებისა" ვარ"...

70 წლის მამაკაცი: "არცერთ მათგანს. კაცია რომელიმე?!"

60 წლის ქალბატონი: ჯერ თავიანთ ოჯახებსა და სახელმწიფოს მიხედონ და მერე ვისურვებდი".

25 წლის მამაკაცი: "სანტას ფორმა უნდა ეცვას, თუ ჩვეულებრივი?"

გაზეთი "რეზონანსი"