რუსეთში პოპულარული ქართველი ლამაზმანი, რომელსაც საქართველოში არ იცნობენ

თამთა ლანო - ეს ქართველი ლამაზმანის, თამთა ჯამალაშვილის სასცენო სახელია, რომლითაც რუსეთში უკვე კარგად იცნობენ. გოგონამ რუსულ შოუბიზნესში ზედმეტი სკანდალების გარეშე, სოლო კარიერით დაიმკვიდრა თავი, ახლა კი კომპოზიტორ პიოტს მალანოვთან ერთად დუეტი ჩამოაყალიბა.

თამთა ჯამალაშვილი რუსეთში არა მხოლოდ სიმღერით, არამედ სამსახიობო ოსტატობითაც ცდილობს თავის დამკვიდრებას. მან რამდენიმე სერიალში ითამაშა, რომელთაგან ყველაზე დიდი პოპულარობა "დედინაცვალმა" მოუტანა.

"ჩვენი ოჯახის მეგობარმა მითხრა, რომ ახალგაზრდული სერიალისთვის მსახიობებს ეძებდნენ და კასტინგზე მისვლა მირჩია. ვიფიქრე, - ესეც ხომ შოუბიზნესია-მეთქი და ამ სფეროში საკუთარი ძალის მოსინჯვა გადავწყვიტე. მართალია, კასტინგმა კარგად ჩაიარა, მაგრამ როლზე არ დამამტკიცეს, რადგან იმ სერიალში 13-14 წლის ბავშვები სჭირდებოდათ. მითხრეს: ამ ასაკის ბავშვს არ გავხარო და მირჩიეს, უფრო სერიოზული სერიალის - "დედინაცვლის" კასტინგში მიმეღო მონაწილეობა. ასეც მოვიქეცი. კასტინგმა იქაც წარმატებით ჩაიარა და როლზეც დამამტკიცეს. "დედინაცვალში" ახალგაზრდებისთვის საკმაოდ აქტუალური, საინტერესო პრობლემებია წამოჭრილი. სიუჟეტიც ბანალური არ არის. ყველაზე საინტერესო ის იყო, რომ უარყოფით გმირს ვასახიერებდი. მას ბარბი ერქვა. შურიანი და ანგარებიანი გოგონა მიზნის მისაღწევად ყველაფერზე მიდის. სიმართლე გითხრათ, ამ როლის მორგება ძალიან გამიჭირდა. იმ პერიოდში ჯერ კიდევ მუსიკალურ კოლეჯში ვსწავლობდი, თან - გადაღებების დაწყება ჩემს გამოცდებს დაემთხვა, მაგრამ მაინც მოვახერხე და სამსახიობო ხელოვნებისა და მეტყველების კულტურის რამდენიმე გაკვეთილი გავიარე. ამ სერიალში ჩემ გარდა, ყველა პროფესიონალი მონაწილეობდა და თამაშში ისინიც დამეხმარნენ. სწორედ ეს იყო ის პირველი სერიალი, სადაც საუნდტრეკად ჩემივე სიმღერები "დაადეს". მოკლედ, ეს ჩემთვის საკმაოდ წარმატებული პროექტი აღმოჩნდა და მას შემდეგ არა ერთ სერიალში გადამიღეს", - ამბობს თამთა "გზისთვის" მიცემულ ინტერვიუში.

Adami.ge