• რის გამო ჩნდება მშობლებისა და შვილების ურთიერთობაში ბზარი

    უნდა ჩაერიონ თუ არა მშობლები შვილების ცხოვრებაში? აქვთ თუ არა უფლება, მათ რაღაც აუკრძალონ? - ეს ის კითხვებია, რომლებიც ყველა თაობის ადამიანს - მოზარდსაც და ზრდასრულსაც უჩნდება.
    ჩვენ ხან შვილები მოგვმართავენ თხოვნით, - ჩვენს მშობლებს ურჩიეთ, რომ შვილებთან მეგობრობა სცადონ, რათა მერე ჩვენი გაგება არ გაუჭირდეთო, ხანაც - ასაკოვანი ქალბატონები და ბატონები გვწერენ: შვილს ვერ ვუგებთ და იქნებ, ამაში თქვენი მკითხველები დამეხმარონო. ასე რომ, სულაც არ გამკვირვებია, როცა მობილურ ტელეფონზე 44 წლის ქალბატონის მესიჯი მომივიდა...

    "ჩემი შვილი 16 წლისაა. ცხადია, შვილია და ძალიან მიყვარს, მაგრამ ზოგჯერ მის საქციელს მდგომარეობიდან გამოვყავარ. მაცოფებს, მაგიჟებს და ამხელა ქალმა ლამის, კედლებზეც დავიწყო სირბილი. მწარე სიტყვებს (რომლითაც გულს ხშირად მიკოდავს) თავი რომ დავანებოთ, ვერ ვხვდები, რა საჭიროა რაიმეს ამოსვირინგება სხეულზე ან პირსინგის გაკეთება წარბზე, ჭიპზე და თქვენ წარმოიდგინეთ, ენაზეც. მისი აჩაჩულ-დაჩაჩული ჩაცმულობაც მაღიზიანებს. ძალიან მინდა, ჩემი ქალიშვილი ნამდვილ ქართველ გოგონას ჰგავდეს, ის კი ვიღაცების მიბაძვით თავს იმახინჯებს. მირჩიეთ, რა ვქნა? პატივისცემით, ელისაბედი", - ცხადია, ამ მესიჯის წაკითხვის შემდეგ ქალბატონთან დაკონტაქტების სურვილი გამიჩნდა. როცა დავურეკე, ინტერვიუზე უარი არ უთქვამს, მაგრამ შეხვედრა არ მოინდომა. მითხრა: არ მინდა, ჩემი ფოტო თქვენს ჟურნალში დაიბეჭდოსო. შევეცადე დამერწმუნებინა, რომ თუ შემხვდებოდა, ფოტოს ნამდვილად არ გადავუღებდი, მაგრამ როგორც ჟურნალისტს, არ მენდო. ასე რომ, ჩვენი საუბარი ტელეფონით შედგა.

    - რა არ გავაკეთე საიმისოდ, რომ ჩემს შვილს ჩაცმის სტილი შეეცვალა, მამამისიც როგორ არ დაემუქრა, მაგრამ არაფერი გამოგვივიდა. სხვათა შორის, ლიკას თავისნაირი მეგობრები ჰყავს. არ ვიცი, ეს გოგო-ბიჭები სად იპოვა, მაგრამ ფაქტია, თბილისში ბევრი უცნაურად გამოპრანჭული მოზარდი დადის. როცა ჩემი შვილის დაბადების დღეზე იკრიბებიან, მათი დანახვისას ლამის, ინფარქტი მივიღო. მირჩევნია, სადმე სხვაგან შეიკრიბონ, ვიდრე მათ ღრიანცელს ვუყურო.
    - მერე არ გეშინიათ, სადმე სხვაგან რაიმე ისეთი რომ გააკეთონ, რაც თქვენთვის მიუღებელია?
    - გულის სიღრმეში როგორ არ მეშინია, მაგრამ ზუსტად ვიცი, ლიკა ისეთს არაფერს ჩაიდენს, რაც მას ავნებს. ჩემთვის კი მთავარი შვილის კარგად ყოფნაა.
    - თქვენი შვილი და მისი მეგობრები როგორ ერთობიან?
    - ჩვეულებრივად. უსმენენ როკს და როგორც უნდა გაგიკვირდეთ, ზოგჯერ ჯაზითაც კი ტკბებიან. ცეკვავენ, ცოტა ალკოჰოლსაც ეპარებიან, მაგრამ ჩვენ თვალწინ ისეთი არაფერი გაუკეთებიათ, რაც მათ სულს ზიანს მიაყენებს, რაც ჩემთვის მიუღებელი იქნებოდა. სხვათა შორის, ჩემს გოგონას ძალიან უყვარს წიგნების კითხვა და როგორც ვხვდები, მისი მეგობრებიც ნაკითხები არიან.
    - ღამით სახლში გვიან ბრუნდება თუ...
    - (მაწყვეტინებს) არ დავუშვებ, რომ შინ გვიან მოვიდეს. შვილს ყოველთვის ვაკონტროლებ და ვცდილობ, მისი ყოველი ნაბიჯი ვიცოდე. ალბათ ამას იმიტომ მეკითხებით, რომ ახლახან აგორდა სკანდალი უცნაურად ჩაცმულ და სადისტურად მოაზროვნე მოზარდებთან დაკავშირებით. გარწმუნებთ, მიუხედავად იმისა, რომ ჩემი გოგონა ერთი ნახვით შეიძლება თქვენც უცნაურ ადამიანად მოგეჩვენოთ, ის და მისი მეგობრები სასაფლაოზე ნამდვილად არ იკრიბებიან და არც ცხოველების ტანჯვა-წამებით ერთობიან.
    - როგორ ფიქრობთ, "გზის" მკითხველები რით უნდა დაგეხმარონ?
    - მირჩიონ, როგორ შევაგნებინო შვილს, რომ გოგოს ასეთი საქციელი, ენის გახვრეტა და რაღაც ამდაგვარები არ შეშვენის, რომ ქალს ქალური ჩაცმულობა უფრო უხდება?.. დავიჯერო, ბიჭებს ასეთი გოგონები მოსწონთ?
    - მაგრამ თავადაც ხომ ამბობთ, რომ ქალაქში თქვენი შვილის მსგავსად ჩაცმული ბიჭიც უხვადაა?..
    - ღმერთმა დამიფაროს, ოჯახში სიძეც ისეთი შემომივიდეს, როგორიც ლიკას მეგობრები არიან.

    მამუკა, 48 წლის:
    - ჩემი შვილი ძალიან კარგად სწავლობს, საოცრად ნიჭიერია, მუსიკალურია, მაგრამ რად გინდა, მხოლოდ როკს უსმენს და მღერის. უკვე აღარ შემიძლია როკის მოსმენა. დღის ბოლოს თავი ახდაზე მაქვს ხოლმე.
    - არა მგონია, როკის მოსმენა რაიმე ცუდს ნიშნავდეს...
    - არც მე ვეთანხმები მათ, ვინც ამბობს, რომ როკის მსმენელები უფალს უარყოფენ, მაგრამ თავად არ მსიამოვნებს, როცა ჩემს სახლში ვიღაც პოპულარული როკერი ბოლო ხმაზე ყვირის... ჩემი შვილის მეგობრებიც როკერები არიან და ცხადია, ქუჩაშიც შესაბამისად ჩაცმულ-დახურულები დადიან. ამას წინათ ერთ-ერთ მათგანს პრობლემა შეექმნა. თურმე, მას შემდეგ, რაც ერთ-ერთ გადაცემაში უჩვენეს მოზარდები, რომლებიც სასაფლაოზე, ცხოველებზე და ა.შ. ლაპარაკობდნენ, რომლებსაც უცნაური იმიჯი ჰქონდათ, ქუჩაში როკერებსაც ცუდი თვალით უყურებენ. ჰოდა, ვიღაც მთვრალი ტიპები ჩემი შვილის მეგობარს სწორედაც რომ როკერული გარეგნობის გამო აუხირდნენ და ლამის სასიკვდილოდაც გაიმეტეს. მადლობა ღმერთს, ყველაფერი არც ისე ცუდად დასრულდა, როგორც მოსალოდნელი იყო. ახლა, როცა ჩემი ვაჟი სახლიდან გადის, ლამის უკან გავყვე; ვიდრე შინ არ დაბრუნდება, ვერ ვისვენებ. მეშინია, როკის სიყვარულის გამო შვილი არ მომიკლან...

    მარიამი, 52 წლის:
    - ჩემი გოგონა არა, მაგრამ მისი შეყვარებული მაკვირვებს - მთელი ტანი სვირინგებით აქვს აჭრელებული. ჰალსტუხი კი უკეთია და თავზე ცილინდრიც ახურავს, მაგრამ დახეული ჯინსი და გაცვეთილძირიანი კედი აცვია ხოლმე. მოკლედ, მისი დანახვისას ვინმემ შეიძლება იფიქროს, რომ მის ოჯახს მატერიალურად ძალიან უჭირს, არადა, საკმაოდ შეძლებული ოჯახის შვილია.
    - ვინაიდან ქალიშვილის შეყვარებულს იცნობთ, ეს იმას ნიშნავს, რომ შვილთან გარკვეულწილად მეგობრობთ კიდეც. თქვენს გოგონას არ ჰკითხეთ, შეყვარებულმა რით მოხიბლა?
    - მეუბნება, რომ სწორედ მისი უცნაური იმიჯი მოსწონს. ამბობს, რომ ნიკა ყველასგან გამორჩეულია. ისე, ნიტას მეგობრებს რომ ვუყურებ, ვფიქრობ, კარგი არჩევანი გააკეთა. სხვა თუ არაფერი, ჩემი სასიძო ძალიან მამაკაცურია და იმის ნამდვილად არ მეშინია, - გადახრები არ ჰქონდეს-მეთქი. მოგეხსენებათ, დღეს სასიძო არც ისე ადვილი საპოვნელია. კაცები არა მარტო ჰოლანდიაში ან სადმე სხვაგან, არამედ საქართველოშიც გადაჯიშდნენ. ვიღაცას შეხედავ და რომ გგონია, ნაღდი ქართველი იქნება, აღმოჩნდება, რომ ქალებს ვერ იტანს. ჰოდა, ამ ყველაფრის შემხედვარეს როგორ შეიძლება არ გაგიხარდეს, შენმა ქალიშვილმა ნამდვილი მამაკაცი რომ იპოვა?
    - მოკლედ, მიუხედავად იმისა, რომ სასიძოს იმიჯი არ მოგწონთ, მისით მაინც კმაყოფილი ხართ, არა?
    - ასეა და ამას ჩემს გოგონასაც ვეუბნები. სხვათა შორის, ამას წინათ ნიტა სვირინგის გაკეთებას აპირებდა, მაგრამ შეყვარებულმა აუკრძალა; უთხრა: იმიტომ მომწონხარ, რომ ქალს ჰგავხარ, თორემ სვირინგიანი და ჩაჩიანი გოგო რომ მნდომოდა, სხვასაც მოვნახავდი; ისეთი მიყვარხარ, როგორიც ხარ და იცოდე, იმიჯის შეცვლაზე არც იფიქროო. ნიტამ ეს ყველაფერი რომ მითხრა, სასიძოს მას შემდეგ უფრო მეტად ვაფასებ. მოკლედ, უცნაური, მაგრამ ძალიან საყვარელი სასიძო მყავს და იმედია, ჩვენი ოჯახის ახლობლები მას ცუდად არ მიიღებენ.

    დავითი, 35 წლის:
    - ჩემი შვილი ჯერ თინეიჯერი არ არის - 11 წლისაა, მაგრამ მეშინია და ხშირად ვფიქრობ, - მომავალში თანატოლების მსგავსად, რაღაც უცნაურობები მასაც რომ დასჩემდეს, მერე რა ვქნა-მეთქი. მართალია, ისე ვზრდი, როგორც ნაღდ ქართველს, მაგრამ ხომ გსმენიათ: ხარი ხართან რომ დააბა ან ზნეს იცვლის, ან ფერსაო; ან კიდევ: მითხარი, ვინ არის შენი მეგობარი და გეტყვი, ვინ ხარ შენო!..
    - ანუ გეშინიათ, თქვენმა შვილმა ვიღაცებს არ მიჰბაძოს და უცნაური იმიჯი არ მოირგოს?
    - თუ მიმბაძველობაში იმას გულისხმობთ, რომ ქართველმა მოზარდებმა უცხოელების მსგავსად, კომპიუტერს აუღეს ალღო, რომ სვირინგს იკეთებენ და საყურეებით დადიან, ძალიანაც ცდებით. ეს მიმბაძველობის კი არა, მოდის ბრალია. მე იმის უფრო მეშინია, სასტიკ ადამიანად არ ჩამოყალიბდეს, არ იამაყოს იმით, რაც საამაყო არაა, თორემ გარდატეხის ასაკში იმ დროისთვის ცოტა უცნაური იმიჯი მეც მქონდა და სიმართლე გითხრათ - ყურების გახვრეტის სურვილიც. მერე ამ სიგიჟეებმა ასაკის მატებასთან ერთად გამიარა. მოკლედ, მთავარია, ზომიერება დაიცვა. ერთადერთი, რაც არ მომწონს და რისი მუღამიც ვერ გავიგე, ეს ენაზე გაკეთებული პირსინგია.
    - თქვენს შვილს გაუმართლა, ასეთი თანამედროვე მამა რომ ჰყავს...
    - ეგ კიდევ საკითხავია! მე არ დავუშვებ, რომ მან საკუთარ დედას შეაგინოს; არც იმას დავუშვებ, რომ ქალს ცუდად მოექცეს, შეურაცხყოფა მიაყენოს და კიდევ, ძალიან არ მომწონს, ახალგაზრდები მოხუცს ან ფეხმძიმეს ადგილს რომ არ უთმობენ. ამ დროს შეიძლება, საკუთარი საქციელი ვეღარ გავაკონტროლო და ვინმე შემომელახოს კიდეც. ჰოდა, რა გასაკვირია, რომ ამ ყველაფერს პირველ რიგში, საკუთარ შვილს ვერ ვაპატიებ?!

    ნოე, 17 წლის:
    - მშობლებს ვინ ეკითხება, მე სად წავალ?! მიუხედავად მათი პროტესტისა, ღამის კლუბშიც დავდივარ, მეგობრებთან ერთად ქალაქგარეთაც მივდივარ და ჩემს სხეულზე იმას ამოვისვირინგებ, რაც მომწონს და მინდა. ადრე ჩემი მშობლები კი ცდილობდნენ, სახლში გამოვეკეტე, მაგრამ მერე მიხვდნენ, რომ მათ ამ მცდელობას აზრი არ ჰქონდა.
    - მშობლებს ხშირად ატყუებ?
    - როცა რაღაცებს მიკრძალავდნენ, ვატყუებდი, მაგრამ ახლა ეს არ მჭირდება. უფრო მეტიც, მათ ჩემს პირად ამბებზე არასდროს ველაპარაკები. არ მესმის, რა საჭიროა, დედ-მამამ შვილის ყველა ნაბიჯი იცოდეს? პატარა ბიჭი აღარ ვარ და ეს უნდა შეიგნონ. ისინი სხვა დროში ცხოვრობდნენ და იმ რაღაცების შესახებ, რაც მე მომწონს, წარმოდგენაც არა აქვთ.
    - მაშინ, როცა პრობლემა შეგექმნება, მშობლებს დახმარებისთვის არ უნდა მიმართო. ჩემი აზრით, თუ დამოუკიდებლად ცხოვრება გსურს, თავის გატანა და პრობლემების მოგვარებაც დამოუკიდებლად უნდა შეძლო.
    - მაგრამ ყველა მშობელი ვალდებულია, შვილი არჩინოს. ყოველ შემთხვევაში იმ დრომდე მაინც, სანამ ის სამსახურს არ იშოვის.
    - შვილები მათ წინაშე ვალდებულები არ ხართ? ზოგიერთი შვილი 30 წლის ასაკშიც კი მიიჩნევს, რომ ის მშობლებმა უნდა არჩინონ...
    - თუ სამსახურს ვერ ვიშოვი, აბა, რა უნდა ქნან?!. ისე კი, მე ნამდვილად არ ვაპირებ, მთელი ცხოვრება მათი ხელების შემყურე ვიყო. ზუსტად ვიცი, როცა "დავღვინდები", მათზე თავად ვიზრუნებ, მაგრამ სანამ ჯერ კიდევ მოზარდი ვარ, მინდა ჩემებურად გავუბერო და ამაში ხელი არ უნდა შემიშალონ...

    ლიკა ქაჯაია
    1 702 ნახვა
    29-01-2015, 06:06
    GOGATV

    abezara