• ცხოვრების 9 წესი – აღმოსავლელი ბრძენის შრი ნილაკატა დაივაგნიას ნაშრომის მიხედვით

    საერთოდ ყველაფერი გენიალური მარტივია (თუმცა ყველაფერი მარტივი გენიალური არ არის). როდესაც მოცარტს ეკითხებოდნენ, როგორ წერდა ასეთ შედევრებს, ის ამბობდა: „არაფერი განსაკუთრებული, უბრალოდ ყველა ნოტი თავის ადგილზე უნდა ჩასვა“. აღმოსავლელ მოაზროვნეთა მეტაფიზიკური ტრაქტატებიც უბრალოებით გამოირჩევა, თუმცა მასში ნამდვილად დიდი სიღრმეებია. ლაო-ძი, კონფუცი, ბო-ძიუი, კრიშნამურტი, თაგორი - ეს მცირე ნაწილია იმ აღმოსავლელი მოაზროვნეებისა, რომლებმაც საკუთარი შემოქმედებით მთელი მსოფლიოს აზროვნება და მსოფლმხედველობა შეცვალეს (რაღა თქმა უნდა, უკეთესობისაკენ). დიდი გოეთე წერდა: „უნდა გამოვტყდე, პოეზიაში აღმოსავლეთის ფასი უფრო დიდია, ვიდრე დასავლეთის“.

    „ცხოვრების ცხრა წესიც“ ერთ-ერთი აღმოსავლელი ბრძენის (შრი ნილაკატა დაივაგნიას) მეტაფიზიკური ნაშრომია. გთავაზობთ ამ ტრაქტატის მცირე ნაწილის თანამედროვე ინტერპრეტაციას.

    1. ნუ აანალიზებ
    2. ნუ წუწუნებ
    3. ნუ ადარებ საკუთარ თავს სხვებს
    4. ნუ ელოდები, რომ შენ ნაცვლად სხვა გააკეთებს
    5. ყოველდღიურად ეძებე ცოდნა
    6. მოძრაობა ეკუთვნის მას, ვინც მოძრაობაშია
    7. ყველა პრობლემა შენს თავშია
    8. ნუ ეძებ სრულყოფას შედარებითში
    9. შეინარჩუნე ერთიანობა საკუთარ თავში

    ნუ აანალიზებ

    ეს წესი პირდაპირ არ უნდა გავიგოთ. ის მხოლოდ გვახსენებს, რომ არ „დავტკბეთ“ საკუთარი ინტელექტუალური მონაცემებით, იმიტომ, რომ ჩვენი ცნობიერების ცვლილებასთან ერთად იცვლება ჩვენი წარმოდგენები და აზროვნების სტილიც, ამან კი შესაძლოა, შეცდომები დაგვაშვებინოს. თუ აზროვნებაში შევინარჩუნებთ სიმშვიდეს, მხოლოდ მაშინ მივაღწევთ ჭეშმარიტ ცოდნას, რომელსაც არ ჭირდება ინტელექტუალური ანალიზი.

    ნუ წუწუნებ

    ჩვენი ახლანდელი ადგილი და მდგომარეობა ცხოვრებაში - შედეგია ჩვენივე წარსულში ჩადენილი მოქმედებებისა. ცხოვრებაში ნეგატიური მოვლენები იმიტომ, ხდება რომ მივიღოთ გარკვეული გამოცდილება და ცოდნა (მიუხედავად იმისა, რომ ეს ნეგატიური ხანდახან ძალიან მწარეა). ამის გამო არ უნდა ვიწუწუნოთ და არ უნდა მივეცეთ სასოწარკვეთას. ნებისმიერი პრობლემა ჩვენ სულისა და სხეულისთვის არის საჭირო და სასარგებლო. საჭიროა ვიყოთ მადლიერები ღმერთის და საერთოდ ყველაფერის მიმართ.

    ნუ ადარებ საკუთარ თავს სხვებს

    ღვთის გამოვლენა სიცოცხლის ყველანაირ ფორმაში ინდივიდუალურია. არ არსებობს იდენტური წყლის წვეთიც კი, ამიტომაც არ შეიძლება ორი ადამიანის ცხოვრება ერთმანეთს აბსოლუტურად ჰგავდეს. ადამიანები ერთმანეთს მხოლოდ სულის რაობით (ტრანსცედენტული აზროვნებით) ჰგვანან, ეს კი ფიზიკურ სიხშირეს არ ემორჩილება. ნურასოდეს ინატრებთ სხვის ცხოვრებას, თქვენ ხომ არ იცით, ბედი მათ რას უმზადებს. იყავით კმაყოფილი საკუთარი ცხოვრებით (ბედით) და მიიღეთ ის პრობლემის გარეშე.

    ნუ ელოდები, რომ შენს ნაცვლად სხვა გააკეთებს

    ყოველი ადამიანი იმისთვის იბადება, რომ შეასრულოს საკუთარი დანიშნულება-მისია („დჰარმის“ კანონის თანახმად). თუ ადამიანი საკუთარი მისიას სხვას „გადააბარებს“, ის უბრალოდ უარს „იტყვის“ სიცოცხლეზე და დატოვებს ფიზიკურ სამყაროს. ჩვენი „ვალი“ ჩვენ თვითონ უნდა გადავიხადოთ და არა სხვა ვინმემ. არც ჩვენ უნდა შევასრულოთ სხვის მაგივრად რაიმე (აქ, რა თქმა უნდა, სულიერი მხარე იგულისხმება).

    ყოველდღიურად ეძებე ცოდნა

    ჯერ კიდევ კონფუცი ამბობდა: უმეცრება - ღამეა, ღამე მთვარისა და ვარსკვლავების გარეშე“. ამ წესის შინაარსიც ისაა, რომ ადამიანმა ყოველდღიურად უნდა ეძებოს ცოდნა (არა ინფორმაცია!). მითუმეტეს ოცდამეერთე საუკუნეში, როდესაც ძალიან ძნელია ნამდვილი და ყალბი ცოდნის გარჩევა (ქართველებს უნიკალური სიტყვა გვაქვს, „განათლებული“. ეს სიტყვა ცოდნის მიღებით ნათლისღებას ნიშნავს, ანუ ვინც მიიღო ცოდნა და განათლდა. ჩვენთან ზოგს განათლებული ინგლისურისა და კომპიუტერის მცოდნე ჰგონია).

    მოძრაობა ეკუთვნის მას, ვინც მოძრაობაშია

    აქ მოძრაობა სირბილს ან გადაადგილებას არ ნიშნავს. ეს არის ყოველმხრივი განვითარება, პროგრესი, პროგრესი უკეთესობისკენ. უძველესი სიბრძნეა: „მოძრავი ამარცხებს უძრავს“, ანუ ერთ ადგილზე გამუდმებული წყლის წვეთის დაცემა ქვას ხვრეტს (ამ ძველინდურ წესს ქართული ანდაზაც ეხმაურება: „მაწანწალა ტურამ აჯობა მწოლიარე მგელსაო“). ეს უფრო, რომ გავამარტივოთ, ასე ჟღერს - გაბედე და გაიმარჯვებ.

    ყველა პრობლემა შენს თავშია

    ყველა ადამიანი, მიუხედავად იმისა, რამდენად აქვს მას ცნობიერება განვითარებული, ირჩევს იმას, რასაც იმ წუთას ხედავს და ჰგონია მისთვის (მისი ახლობლებისთვის) საჭირო. გარკვეული დროის განმავლობაში ის ქმნის საკუთარ ინდივიდუალურ ცხოვრებას (ბედს) და რაღაც ხნის შემდეგ აღმოაჩენს, რომ წარსულში მას სწორი არჩევანი ვერ გაუკეთებია, სწორედ აქედან იწყება პრობლემები. თუმცა პრობლემა იმდენად არის პრობლემა, რამდენადაც ამას თვითონ ადამიანი აღიქვამს (თუ ამას ერთი ცნობილი ოკულტისტის სიტყვებით გამოვხატავთ: „ნამდვილი მამაკაცები პრობლემებზე არ ნერვიულობენ, ისინი პრობლემებს აგვარებენ“). ასე რომ, პრობლსემაზე ნუ ინერვიულებთ (ამით მაინც ვერ გადაწყვეტთ), უბრალოდ... მოაგვარეთ.

    ნუ ეძებ სრულყოფას შედარებითში

    სრულყოფილება ეს არის აბსოლუტური მოწესრიგებულობა და ჰარმონია. საერთოდ, ჭეშმარიტ შემოქმედთა უმეტესობა მიიჩნევდა (და მიიჩნევს), რომ სრულყოფილება არ არსებობს, თუმცა, ზოგიერთის აზრით, ის მიღწევადია. შრი ნილაკატა დაივაგნია კი გვასწავლის, რომ შედარებებით სრულყოფილება არ მიიღწევა. ცნობიერების განვითარება როგორც ეგზოთერული (გარეგანი), ისე ეზოთერული (შინაგანი) კუთხით იძლევა საკმაოდ ძლიერ იმპულსს სრულყოფილებისთვის.

    შეინარჩუნე ერთიანობა საკუთარ თავში

    სრულყოფილება ერთიანობის გარეშე უბრალოდ წარმოუდგენელია, ამიტომ, საჭიროა სრული კონცენტრაცია, უმაღლესი „მე“-ს გაცნობიერება და ამის ცხოვრების ყველა ასპექტში გამოყენება. სხვადასხვა ადამიანი სულიერი თუ ფიზიკური ერთიანობისთვის სხვადასხვა საშუალება მიმართავს - მედიტაციას, იოგას, გამუდმებულ ფიზიკურ ვარჯიშებს. (ქართველებს ამისთვის უნიკალური საშუალება გვაქვს - ლოცვა; როგორც წმინდა მამები ამბობენ, „გულიდან ამოსული ლოცვა“ და არა გონებრივი). ეს ერთიანობა შენარჩუნებული უნდა იქნას ყოველდღიურ, ყოფიერ ცხოვრებაშიც, სხვანაირად ის აზრს დაკარგავს.

    კესო ლაღიძე
    2 000 ნახვა
    GOGATV

    abezara