როდის ხდება ქალი მოსაწყენი

"მანდილოსნებს სითბო სჭირდებათ..."
მოგეხსენებათ, სხვადასხვა გენდერული სტერეოტიპი არსებობს:
თითქოს ქალებისგან განსხვავებით, კაცებს ნამდვილი მეგობრობა შეუძლიათ, ქალები უფრო ემოციურები ან ჭკვიანები არიან, კაცები - აგრესიულები და ა.შ. ალბათ, დამეთანხმებით, რომ მამაკაცისა და ქალის უნარების, თვისებებისა თუ სოციალური ქცევების შესახებ საზოგადოებაში მცდარი შეხედულებებია დამკვიდრებული, რის გამო კამათი ხშირია... ამიტომ გადავწყვიტე, ახალი რუბრიკა - "სქესი და სტერეოტიპები" წარმოგიდგინოთ და რესპონდენტებს მათი ცხოვრებისეული გამოცდილების საფუძველზე, საპირისპირო სქესის წარმომადგენლებზე ვესაუბრო.

ქალებზე ლაპარაკი მსახიობ პაატა გულიაშვილისთვის უსიამოვნო ნამდვილად არ ყოფილა. თუმცა, აღიარა, რომ სუსტი სქესის წარმომადგენელთა მიმართ დიდი მოწიწების მიუხედავად, მისთვის არსებობს ქალთა ისეთი კატეგორიაც, რომლის მიმართ მსახიობი სიმპათიით განწყობილი არ გახლავთ.

- ქალი უფრო ძლიერია თუ მამაკაცი?
- საქართველოს ისტორიიდან თამარ მეფე გავიხსენოთ, ასევე - მსოფლიოს სხვადასხვა ცნობილი პოლიტიკოსი ქალები, რომლებიც ქვეყანას აძლიერებდნენ. ჰოდა, გამოდის, რომ ქალები ძლიერი ადამიანები არიან, მაგრამ უჩვენოდ გაუჭირდებოდათ, ისევე - როგორც ჩვენ გაგვიჭირდებოდა მათ გარეშე (იცინის).

- "შედი, ქალო, "კუხნაში", - ოდესმე, მსგავსი ფრაზა თუ გითქვამთ?
- თუ იმას არ გავითვალისწინებთ, რომ როგორი საკვირველიც უნდა იყოს, ამ დაძაბულ ცხოვრებაში ხუმრობის ხასიათზე ხშირად ვარ და ამაღლებული განწყობილების შენარჩუნებას ვცდილობ, ასეთი რამ არასდროს მითქვამს. "შედი, ქალო, "კუხნაში" ბევრჯერ მითქვამს ანეკდოტის მოყოლისას, სერიალებში თამაშისას...

- მეუღლეს საოჯახო საქმეებში ეხმარებით?
- ძალიან მინდა, მივეხმარო, მაგრამ იშვიათი გამონაკლისის გარდა, სამზარეულოს არ მაკარებს. მეუბნება, - ყველაფერს სვრიო. შეიძლება ითქვას, რომ "ვთხუპნაობ", მაგრამ მაინც ვცდილობ, განსაკუთრებული კერძები მოვამზადო. ჩემი კულინარიული გადაცემიდან ბევრი საინტერესო კერძის მომზადება ვისწავლე. შინაურების წრეში, მამაც და ბაბუაც გემრიელ, "კაცურ" კერძებს ამზადებდნენ და ეს საქმე მეც გამომდის. თუმცა, ვერ ვიტყვი, რომ მანუელივით პროფესიონალი მზარეული ვარ.

- დაგვისახელეთ თვისება, რომელიც მეტ-ნაკლებად ყველა ქალს ახასიათებს და უცნაურად გეჩვენებათ...
- ალბათ - ეჭვიანობა. ვიცი, ეს თვისება მამაკაცებსაც ახასიათებთ, მაგრამ როცა ქალი ზედმეტად ეჭვიანია, მის გვერდით ცხოვრება არ გამოდის. გარკვეული პერიოდის შემდეგ, ურთიერთობა აუცილებლად გართულდება. არსებობს საფუძვლიანი ეჭვიც და უსაფუძვლოც, მაგრამ ოჯახში ამ ყველაფრის დამარეგულირებელი ალბათ, ქალი უნდა იყოს... არც ქალების ბევრი ლაპარაკი მაღიზიანებს, არც მაღაზიებში ბევრი სიარულია მოსაწყენი... მაგრამ ქალი შეიძლება, მოსაწყენი გახდეს, როცა ნამეტნავად ეჭვიანია...

- "მეტი ქალი პარლამენტში" - ამ თემაზე რას ფიქრობთ?
- თამარ მეფის ხანა წეღანაც ვახსენე.... დღევანდელ თუ გუშინდელ პოლიტიკოსებზე კი თავს ვერ დავდებ. ჩვენმა ქვეყანამ ბევრი რამ გამოიარა და ვინმე გამორჩეულად კარგი პოლიტიკოსი რომ ყოფილიყო, აუცილებლად გამახსენდებოდა. მაინც მგონია, რომ მანდილოსანი პოლიტიკოსების შრომა უშედეგო ყოფილა, თუმცა, უიშვიათესი გამონაკლისების გარდა, ვერც მამაკაცი პოლიტიკოსების საქმიანობაზე დავდებ თავს. ასე რომ, ჯერჯერობით ამაზე - "მეტი ქალი პარლამენტში" - ლაპარაკი ზედმეტია, მაგრამ იმას არ ვამბობ, რომ პარლამენტში ქალები არ უნდა იყვნენ. მაგალითად თუნდაც, ქალის მიერ ავტომობილის მართვის თემა ავიღოთ: არ ვამბობ, რომ ქალი საჭესთან არ უნდა იჯდეს. დღესდღეობით, მანქანა ფუფუნების საგანი კი არა, აუცილებელი რამ არის, მაგრამ ეს იმ ფაქტს არ გამორიცხავს, რომ ქალების უმრავლესობა ავტომობილის მართვისას არაფრისმაქნისია. ჰოდა, ქალბატონ პოლიტიკოსებზეც, მათ მიმართ ჩემი დიდი პატივისცემის მიუხედავად, დაახლოებით იმავეს თქმა შეიძლება. აქვე აღვნიშნავ, რომ ზოგი კაცი პარლამენტში კი არ უნდა იჯდეს, იმ ქუჩას ახლოსაც არ უნდა გააკარო, სადაც პოლიტიკურ გადაწყვეტილებებს იღებენ...

- ჭკვიანი ქალები ხომ არ გაფრთხობთ?
- არა, პირიქით - ძალიან მხიბლავს. არაპოლიტიკოსი ჭკვიანი ქალი ნამდვილად კარგია (იცინის). შეიძლება, ერისთვის გადაწყვეტილება სასარგებლო ვერ მიიღოს, მაგრამ საქმიანობის რომელიმე სფეროში ძალზე ნაყოფიერად, წარმატებულად იმუშაოს. განათლებული ქალის მოსმენასა და მოფერებას არაფერი სჯობს...

- ლამაზ, ჭკვიან ქალს ხშირად შეხვედრიხართ?
- საბედნიეროდ, ამის დეფიციტი არ გვაქვს. ასეთს ბევრს არ შევხვედრივარ, მაგრამ არც - ცოტას. დიდი მოწიწებით ვეთანხმები იმ აზრს, რომ შეიძლება, ქალი ერთდროულად ლამაზიც იყოს და ჭკვიანიც. მათ ვუსურვებ, უფრო წარმატებულები, თამამები და ბედნიერები იყვნენ!

- ქალის სილამაზე, მუშაობისას, საქმეზე კონცენტრირებაში ხელს არ გიშლით?
- საქმეს გააჩნია. ჩემი პროფესიიდან გამომდინარე, პირიქით - სცენაზე თუ კადრში ლამაზი ქალი მნიშვნელოვანია, ტონუსს მმატებს: ასეთ დროს მინდა, როლი უკეთესად შევასრულო... თუკი ლამაზი ქალი კაცს ხელს უშლის, ე.ი. მამაკაცს რაღაც პრობლემა აქვს (იცინის).

- არსებული სტერეოტიპის გამო გეკითხებით: თქვენი აზრით, ქერა ქალები უფრო ჭკვიანები არიან თუ შავგვრემნები?
- ვერ გეტყვით, რთული შეკითხვაა... ჭკვიანი ან სულელი ქერაც შემხვედრია და შავგვრემანიც, ან კიდევ, წითური ჭკვიანი ან სულელი არ გინახავთ? ეგ კი არა, ბევრი გადარეული ჭაღარაც მინახავს (იცინის).

- დაოჯახებულ მამაკაცს ღალატი ეპატიება?
- რა თქმა უნდა, ღალატი არც მამაკაცს ეპატიება, არც - დედაკაცს. ეს რთული ამბავია. იმ აზრს ვემხრობი, რომ თუ გულში ღალატს ჩაიდებ, ჯობია, თუნდაც მეუღლესთან ურთიერთობა დაასრულო, წახვიდე და მერე რაც გინდა, ის გააკეთო. ღალატის ღირსი არავინ არ არის. ადამიანი თუ გიყვარს, არ უღალატებ. შეიძლება, რაღაც მოხდეს: ადამიანს ხან სად გიწევს წასვლა, ხან - სად, მაგრამ ის "რაღაც" იქვე მთავრდება... თუკი ჯერ მეუღლესთან ურთიერთობას დაასრულებ და მერე რასაც გინდა, იმას გააკეთებ, ოჯახთან, შვილებთანაც მართალი იქნები... არ გეგონოთ, უშეცდომო ადამიანი ვარ - ცხოვრებაში ყველაფერი ხდება, მაგრამ რა როგორ ხდება და სწორი საქციელი როგორია, სხვადასხვა საკითხია.

- ე.წ. "არასერიოზული" ღალატი ქალის შემთხვევაში უფრო მძაფრად რატომ აღიქმება?
- ვხვდები, საუბარი საითაც მიგყავთ. გინდათ, მკითხოთ: შეიძლება, "რაღაც სიტუაციაში" კაცი მოხვდეს და ქალი - არა? ქალი დედაა, კაცი - მამა. ამიტომ "რაღაც სიტუაცია" არც ქალის და არც - კაცის შემთხვევაში არ მომწონს. საერთოდ, მსგავსი რაღაცები "ტეხავს"... ამ თემაზე ლაპარაკი არ მიყვარს, რადგან ჩემთვის ღალატი ნებისმიერ შემთხვევაში მიუღებელია.

- ვულგარულად ჩაცმული ქალები მოგწონთ?
- გააჩნია - როგორ სიტუაციაში: სტრიპტიზ-კლუბში თუ ვარ, "როლინგიანი" ქალი არ მომეწონება (იცინის). ლაღი, "ნამდვილი" გოგონები მომწონს, რომლებიც არ თამაშობენ. მაგალითად, როცა თეატრიდან გასტროლი გვაქვს ხოლმე, იქ გოგონები უფრო იხსნებიან, უფრო მეგობრული სიტუაცია სუფევს, მათ "ნიღბის" გარეშე ვხედავ და უფრო კარგები არიან... ვერ მოგატყუებ, ქალები ძალიან მიყვარს, მაგრამ ნამეტნავად გადატყლარჭულები - არა. ისეთ ქალებს ვგულისხმობ, ნებისმიერი სიტუაციიდან ამოვარდნილებივით რომ არიან, მაღალფარდოვან სიტყვებს ამბობენ, სინამდვილეში კი "ტელეფონის წიგნიც" არ გადაუშლიათ. ვფიქრობ, ყველა ქალი მომხიბვლელია და მათ სულ სითბო სჭირდებათ - ამას "ქართულად", თამადის პოზიციიდან არ ვამბობ... წლების წინ, ია ფარულავას კარგი გადაცემა ჰქონდა: ქალბატონებს მაკიაჟს უკეთებდნენ და ხანდახან შედეგით ლამის გავგიჟებულვარ!.. რამდენჯერმე ვნახეთ, რომ ერთი შეხედვით არაფრისმთქმელი ქალბატონი "კრასავიცა" გამხდარა. ყველა ქალი განიცდის, თუ მას მოვლა აკლია. ამიტომ მაინცდამაინც თეთრ რაშზე ამხედრებული რაინდების ძებნასა და ლოდინს ჯობია, ქალმა თავისი მამაკაცი იპოვოს, რომელიც მას მოუვლის... ცხადია, მეორე ადამიანს შენი ბედი იმ შემთხვევაში უნდა დაუკავშირო, თუ გიყვარს. როცა შეყვარებული ხარ, საკუთარ თავსაც უფრო კარგად უვლი. სიყვარული მაგარი გრძნობაა...

- თქვენს ცხოვრებაში თუ ყოფილა შემთხვევა, როცა ქალმა წონასწორობა დაგაკარგვინათ და უნებურად, ხმას აუწიეთ?
- შეიძლება, ხმისთვის ამიწევია, მაგრამ უზრდელურად არასოდეს ვიქცევი. ვერ დაგიმალავ: ყოფილა შემთხვევა, როცა რაღაცის გამო მიყვირია, მაგრამ უზრდელობა, უხეშობა არ მჩვევია.

- პაატა, თქვენი აზრით, გოგონას აღზრდა უფრო იოლია თუ ბიჭის?
- 2 ბიჭის მამა ვარ და ვფიქრობ, ვაჟის აღზრდა რთულია... ალბათ, ქალიშვილის აღზრდაც არანაკლებ რთული იქნება, რადგან გოგოსაც დიდი ყურადღება სჭირდება. საერთოდ, დღევანდელ ცხოვრებაში ადვილი რა არის? ადამიანს სანერვიულო არ გელევა... მახსოვს, მამაჩემი ასეთ ფრაზას მეუბნებოდა: როცა შვილები გეყოლება, მაშინ გაიგებ, რასაც ახლა გეუბნებიო. ჩემიGგუგა 9 წლის არის, ნიკუშა - 6-ის. როცა მათ შენიშვნას ვაძლევ, სულ მამის სიტყვები მახსენდება... ისე, ორ შვილზე გაჩერებას არ ვაპირებთ და თუკი ღმერთმა გოგონაც გვაჩუქა, მერე ექსკლუზიურ ინტერვიუს მოგცემ და გეტყვი - გოგონას აღზრდა რთულია თუ იოლი (იცინის).

წყარო: gzapress.ge