• ელენე ფოჩხუა: "ჩემი 5 წლის შვილი მიხსნიდა, რას ნიშნავს საყვარელი..."

    დღეს, როცა ადამიანები ძალიან დაკავებულები არიან, შვილების კულტურულ-ინტელექტუალურ განვითარებაზე ზრუნვა დროის, ხანდახან კი ფინანსების გამოც პრობლემური გახდა. გასაგებია, რომ ბავშვები დადიან სკოლაში, ათასგვარ წრეზე, მაგრამ თეატრი, ბალეტი, ცირკი, კონცერტი - ეს ყველაფერი კულტურული დონის ამაღლებისთვის საუკეთესო გზაა. ცნობილ დედებს სწორედ ამ თემაზე ვესაუბრეთ და ისიც გავარკვიეთ, უზღუდავენ თუ არა შვილებს ტელევიზორთან ან კომპიუტერთან ყოფნის დროს, აკონტროლებენ თუ არა იმ ინფორმაციას, რომელსაც ბავშვები ამა თუ იმ საშუალებით იღებენ.

    ელენე ფოჩხუა: "ჩემი შვილი დაინტერესებულია რომელიღაც ინდური სერიალით"

    - ჩემი შვილი 5 წლისაა და შეძლებისდაგავრად დაგვყავს ყველგან: თეატრში, კონცერტზე და ა.შ.
    - რა ასაკიდან დაიწყეთ ზრუნვა იმაზე, რომ ბავშვს ჰქონოდა წარმოდგენა ხელოვნებაზე, კულტურაზე...
    - სადღაც ორი წლის იყო, პირველად თეატრში რომ წავიყვანეთ, უფრო ინტენსიურად სამი წლიდან დავიწყეთ სხვადასხვა ადგილას სიარული.
    - წიგნების სიყვარული და თუნდაც ზღაპრის მოსმენა უყვარს?
    - კი, პატარა იყო, როცა ბევრი ნახატით გაჯერებული წიგნები მოსწონდა, ათვალიერებდა, მრავალფეროვნება იზიდავდა. ბევრი ზღაპრის წიგნი გვაქვს და ყველა იცის უკვე. თან იმავე ზღაპრის ანიმაციურ მულტფილმებს უყურებს, მერე დაიჭერს წიგნს და ნახატების მიხედვით ყვება, რომელ გვერდზე რა შეიძლება, ეწეროს... ჯერ პატარაა და კითხვა არ იცის, თუმცა წიგნი უჭირავს და ვითომ კითხულობს.
    - კომპიუტერთან, ტელევიზორთან ჯდომის დროს უზღუდავთ?
    - რა თქმა უნდა. ეს ალბათ ბევრი დედის პრობლემაა. არანაირი სურვილი არ მაქვს, დიდი დრო გაატაროს კომპიუტერთან, ამ პრობლემას განსაკუთრებით შაბათ-კვირას ვაწყდებით, როცა ბაღი არაა და მთელი დღე სახლში უწევს ყოფნა.
    - როგორ აგვარებთ ამას უმტკივნეულოდ?
    - ალტერნატივის შეთავაზებით. თუ სახლში ვართ, ვრთავთ სიმღერებს, ვცეკვავთ, ვერთობით, ან ვთავაზობთ გასეირნებას. ალბათ ყველა დედამ იცის, როგორ შეიძლება შვილის ყურადღების გადატანა სხვა საკითხზე. XXI საუკუნეა და კომპიუტერით ბავშვების დაინტერესებას ვერ გავექცევით, თან ვფიქრობ, რომ ელემენტარულად მაინც უნდა იცოდეს ბავშვმა კომპიუტერი, რაღაც დოზებით უნდა იჯდეს, სულ აკრძალვაც არ შეიძლება. ბავშვისთვის განკუთვნილ საიტებზე უნდა შედიოდეს და საბავშვო საკითხებით ინტერესდებოდეს. რაც შეეხება ტელევიზორს, ბოლო პერიოდში აღმოვაჩინე, რომ ჩემი შვილი დაინტერესებულია რომელიღაც ინდური სერიალით. ოღონდ მე არ ვუყურებ, მეზობელთან იყო გასული და ეტყობა, იქ ნახა, დაიმახსოვრა დრო და თითქმის ყოველ საღამოს გამოთქვამს სურვილს, რომ უყუროს. მიუხედავად იმისა, რომ ორი პატარა გმირი ბავშვია, არაა საბავშვო სერიალი და არ მინდა, ამას უყურებდეს ბავშვი. თან, ამას წინათ ჩემი შვილის და მისი თანატოლი ჩვენი მეზობელი ბავშვის დიალოგი გავიგე, ამ სერიალზე საუბრობდნენ, ვიღაცის საყვარელიაო... გავედი და ვკითხე, დედი, რას ნიშნავს საყვარელი, საიდან მოიტანეთ ეს-მეთქი... ინდურ სერიალშიაო - როცა ცოლიც ჰყავს და სხვა გოგოც უყვარს, ეგაა სყავრელიო, ამიხსნა. ბავშვებმა მგონი, ჩვენზე უკეთ იციან ყველაფერი და კარგად ერკვევიან ამა თუ იმ საკითხში, მაგრამ ამ ყველაფერს ბავშვმა მაინც არ უნდა უყუროს. ამას წინათ თურმე მთავარი გმირი მოკვდა, ამაზე ძალიან ინერვიულა, მეუბნებოდა, დედა, ის ხომ მსახიობია, ვითომ მოკვდა და არა სიანმდვილეში, ხომ ასეაო? ნამდვილად არ მინდა, იაფფასიანი სერიალი ბავშვისთვის სტრესი გახდეს.

    გვანცა დარასელია: "მაგალითი შვილებს ჩვენ უნდა მივცეთ"
    mshoblebi
    - მოგეხსენებათ, თანამედროვე ბავშვები მიდრეკილები არიან ტექნიკისკენ, კომპიუტერისკენ და მეც პირველ რიგში ვცდილობ, შევუზღუდო კომპიუტერთან ყოფნის დრო. ამასთანავე ვცდილობ, ვაკონტროლო, რას უყურებს ტელევიიზიით. ზუსტად გუშინ, ტელევიზორს ვრთავდით არხიდან არხზე, აჭარაზე შემთხვევით წავაწყდით დოკუმენტურ ფილმს, რომელშიც აჭარელი ოსტატი აკეთებდა ქართულ დოლს. ბავშვი დაინტერესდა, იმიტომ, რომ უყვარს ხალხური მოტივები და მინდა 20-წუთიან ფილმს გასუსულმა უყურა. საბდნიეროდ, ჩემი შვილი იმ ბავშვების კეტეგორიას მიეკუთვნება, ვისაც წიგნები ძალიან უყვარს. ამის მაგალითად ისიც კმარა, რომ თოვლის ბაბუს ბევრი წიგნის მოტანა სთხოვა და ძალიან გაუხარდა, როცა ეს საჩუქარი მიიღო.
    - თეატრში, ცირკში თუ დაგყავს ხოლმე?
    - ერთხელ მყავდა თეატრში, კინოში და ცირკში. შარშან დავესწარით საბავშვო სპექტაკლს. ვერ ვიტყვი, რომ ბოლომდე აღიქვა ნანახი, მაგრამ წყნარად უყურებდა. ცირკიც არაა ბოლომდე პატარა ბავშვებისთვის განკუთვნილი, იმიტომ, რომ ზოგი რაღაცის ეშინია, ზოგ რაღაცაზე იძაბება და მაინცდამაინც ვერ ისიამოვნა. უფრო დიდი არჩევანი რომ იყოს ამ ასაკის ბავშვის წასაყვანად, უკეთესი იქნებოდა.
    - მულტფილმები თუ უყვარს?
    - პირველი მულტფილმი, რომლითაც დაინტერესდა, იყო ინტერნეტში განთავსებული განმავითარებელი მულტფილმების სერია და ძალიან მოსწონდა. ახლა ამოჩემებული აქვს "ტომი და ჯერი", "მიკი მაიუსი", ზღაპრებიდან კი - "სამი გოჭი". ქართული მულტფილმების ყურება ჯერჯერობით უჭირს, მისი თვალი სხვანაირ ფერებს, სხვანაირ ხარისხსაა მიჩვეული და ჯერ ვერ აცნობიერებს, რატომ უნდა მოეწონოს.
    - რას ურჩევ მშობლებს, როგორ შეაყვარონ ბავშვებს კითხვა, წიგნი?
    - ამ საკითხში ძალიან მნიშვნელოვანია მშობლის მაგალითი. როცა ბავშვი ხედავს, რომ მშობელი კითხულობს, მასაც უჩნდება ამის გაკეთების სურვილი, მერე ჩვევაში გადასდის და უყალიბდება სიყვარული. როცა ბავშვს ვპირდებოდი, დღეს საჩუქარს მოგიტან-მეთქი, ხშირ შემთხვევაში ეს წიგნი იყო - მისთვის ის ძვირფას ნივთთან ასოცირდება, ალბათ ასეთი დეტალებითაც შეიძლება ბავშვის წახალისება და გარკვეული დამოკიდებულების ჩამოყალიბება. ბავშვის ცხოვრების წესი მშობლების ცხოვრების წესიდან გამომდინარეობს, ამიტომ მაგალითი შვილებს ჩვენ უნდა მივცეთ და ალბათ წიგნის სიყვარულის ჩანერგვა ასეცაა შესაძლებელი.

    ბაია დვალიშვილი: "დედაჩემი წყალზე ან კანფეტზე მაგზავნიდა, როცა ოდნავ ინტიმური სცენა იყო ეკრანზე"
    mshoblebi
    - ვერ ვიტყვი, რომ სხვა მშობლებისგან განსხვავებით რამე განსაკუთრებულს ვაკეთებ. ჩემი პროფესიიდან გამომდინარე, დამყავს თეატრში, ესაა და ეს. წიგნებს, ჩემდა საბედნიეროდ, ძალდატანების გარეშე კითხულობს. არ ვიცი, მე მივაჩვიე, თვითონ დაინტერესდა თუ რა, მაგრამ ასე მოხდა, დიდი ძალისხმევა არ დამჭირვებია. ძალიან მრცხვენია, მაგრამ ისე არ ვზრდი, დიდი ფიქრის შედეგად რომ მიჰყავთ სადმე, ასევე დიდი ფიქრის შედეგად რომ იღებენ გადაწყვეტილებას, რა განათლება მისცენ. სკოლაში სწავლობს, ცურვაზე დადის, გაძლიერებულ გერმანულს სწავლობს სკოლაში და ინგლისურზე დადის ცალკე, ესაა და ეს. ჯერ პატარაა, ისედაც ცოტა დრო აქვს. თეატრში კი მინდა-არ მინდა მიმყავს.
    - ტელევიზორის ყურების დროს თუ უზღუდავთ ან თუ აკონტროლებთ, რას უყურებს..
    - როგორ არ ვაკონტროლებ, მაგრამ არ ვზღუდავ, იმიტომ, რომ ისედაც ძალიან ცოტა ხანს ზის როგორც ტელევიზორთან, ასევე კომპიუტერთან. უნდა იცოდეს კომპიუტერი, უნდა გაერკვეს, ეს აუცილებელია. უკვე ჩემზე კარგად იცის და მე ეს მიხარია, როცა მჭირდება, ვეძახი და მეხმარება კიდეც.
    დიდი ხანია, როგორც უფროს ადამიანს, ისე ვექცევი, შეძლებისდაგვარად ყველა საკითხზე ველაპარაკები, იმიტომ, რომ მე მაინც არ ვარ დაცული, რომ არ გაიგებს. მირჩევნია, სწორად, ჩვეულებრივი ენით ავუხსნა, რომ მერე არასწორად არ მიიღოს ინფორმაცია. მე მახსოვს ჩემი განცდები, ფრჩხილების კვნეტა, როცა ვიღაც ეკრანზე კოცნაობდა. არ მინდა იგივე მდგომარეობაში იყოს ჩემი შვილი. დედაჩემი წყალზე ან კანფეტზე მაგზავნიდა, როცა ოდნავ ინტიმური სცენა იყო ეკრანზე, არ მინდა, მეც იგივე გავაკეთო. რასაკვირველია, რაღაცებს არ უნდა უყუროს, მაგრამ თუ ოდნავ ინტიმური ან სასიყვარულო სცენაა, უყუროს. ძეფირელის "რომეო და ჯულიეტა" დაიზეპირა და რა მოხდა?! უცქიროს. იცოდეს, ვუხსნი, რომ ესაა სიყვარული, აუცილებელია, ძალიან კარგია. არ უნდა კომპლექსდეს, იმიტომ, რომ მე მახსოვს ჩემი ტანჯვები, არასწორი მიდგომა, არასწორი ფანტაზიები, ინტერესის გაღვივება და ეს იმიტომ, რომ საშინლად მიკრძალავდნენ, გადართავდნენ, გადმორთავდნენ, როგორც კი ელემენტარული რაღაც გამოჩნდებოდა. მე მინდა სწორად მიიღოს ყველაფერი, სწორად გაიგოს და ჯანმრთელი დამოკიდებულება ჰქონდეს.
    ციცი ომანიძე


    წყარო: reitingi.ge
    1 706 ნახვა
    29-03-2015, 07:02
    GOGATV

    abezara