დეტალები კაცზე, რომელმაც 10 წლის გოგონა გააუპატიურა

შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის სამხარეო მთავარი სამმართველოს და ზესტაფონის რაიონული სამმართველოს თანამშრომლებმა, ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, 1973 წელს დაბადებული, წარსულში სხვადასხვა მძიმე დანაშაულისთვის ნასამართლევი პეტრე ფ. 14 წელს მიუღწეველი პირის გაუპატიურების ბრალდებით დააკავეს.

შსს-ს ცნობით, გამოძიებამ დაადგინა, რომ ბრალდებულმა 31 მაისს ზესტაფონის რაიონის ერთ-ერთ სოფელში არასრულწლოვანი თანასოფლელი გოგონა გააუპატიურა და შემთხვევის ადგილიდან მიიმალა. სამართალდამცველებმა პეტრე ფ. თბილისში დააკავეს.

რაც შეეხება დეტალებს, როგორც სოფლის დეპუტატმა, ამირან ბახტიძემ განაცხადა, გაუპატიურების შესახებ ინფორმაცია 10 წლის ბავშვის ოჯახმა გაავრცელა. მისივე თქმით, მეზობლები საუბრობენ, რომ ბავშვს აღენიშნება სხულზე ნაკაწრები. თუმცა, დეპუტატის თქმით, სოფელში დაზუსტებით უჭირთ საუბარი მომხდარის შესახებ, ვიდრე არ იქნება ექსპერტიზის შედეგები.

"ეჭვმიტანილი ადგილობრივი მაცხოვრებელია. რამდენჯერმეა ნასამართლევი. მეზობლები როგორც ყვებიან, ბოლოს ნარკოტიკებზე იყო დაკავებული და 3 თვის წინ დატოვა სასჯელაღსრულების დაწესებულება. გუშინ ჩვენ უბანში შევიკრიბეთ და ამ მამაკაცს მომხდარზე ვკითხეთ, თუმცა ამტკიცებს, რომ მსგავსი რამ არ მომხდარა, თუმცა დღეს როდესაც მოვიკითხეთ ეს პიროვნება, სოფელში აღარ არის", - განაცხადა ამირან
ბახტიძემ, ვიდრე ეჭვმიტანილის დაკავებამდე.

10 წლის გოგონას გაუპატიურებაში ეჭვმიტანილის მეზობლების თქმით, მამაკაცი აღნიშნულ ფაქტამდე ნასვამ მდგომარეობაში იმყოფებოდა.
როგორც მეზობლები ჟურნალისტებთან საუბრისას აღნიშნავენ, ის ნასამართლევია და ციხიდან რამდენიმე ხნის წინ გამოვიდა.